Tal día farà un any

Domingo, septiembre 1, 2013 10:07
Publicau en a categoría prexinando, purnas

O reloch d'Ascaso (Sobrarbe)

O reloch d’Ascaso (Sobrarbe)

Iste ye o reloch de sol d’Ascaso. Pintau sobre a paret d’una casa d’un d’ixos lugarons d’Aragón an que nomás que i vive chent ta l’estiu. Ditz a canta d’a Ronda de Boltanya que iste reloch marca o tiempo en que a chent marchó. Como tantos atros aragoneses yo he habiu de marchar d’o país. Y bien marchau que soi. Agora chusto, hue, fa un anyo que dentraba en a que agora ye casa mía y asperaba o camión d’a mudanza que veniba dende Zaragoza.

Marchar-ne estió una decisión meditada dende feba tiempos, pero que no remataba de fer. Marchar-ne nunca no ye fácil, y de vegadas se fa quan sientes que t’empentan u mesmo que t’arrocegan. Muitas cosas que m’aimo m’asperaban en Barcelona, pero tamién en deixaba atras dezaga. Agora que fa un anyo puedo dicir que estió una buena decisión. No tot ha estau vins y rosas, ye platero, pero no puedo deixar de pensar que iste ha estau un buen anyo por muitas razons.

O mío corazón, a mía capeza, viven dislocaus dentre lo que soi, siento, pienso y m’aimo, y lo que soi, sentiré, pensaré y m’aimaré en o futuro. He aprendiu a redefinir una parti d’a mía traza de vivir. He aprendiu a fer servir trastes que antes me miraba con medrana. He aprendiu a confiar más en as mías capacidatz. He re-aprendiu que no tot ye como queremos que siga. He tornau a sentir a necesidat de luitar por o que pienso y creigo. He aprendiu a soniar sobre o futuro d’o país en que vivo, sin deixar de soniar d’o futuro d’o país que ye mío. Pero sobre tot, en iste anyo he aprendiu a reconoixer os que agora son os quatro pilars que alacetan a Jorge Romance.

O banco de Jesús en Abiego

O banco de Jesús en Abiego

Una parti d’ixos pilars, que no totz, os aprendié, os sentié y os adapté en muitas nueitz en iste banco d’o costau. Ye o banco que bi’n heba debant de Casa Jesús en Abiego. Agora nomás que quedan ixos repuis de metal. En ixe banco, en ixe bar, con a chent que me redolaba allora, con Jesús l’amo d’o bar, reaprendié cosas que pai y mai ya m’heban amostrau, y que agora han retornau ta quedar-se en forma de pilars d’a  vida. Pero o tiempo fa que tot cambee, tamién, y agora ni o banco ye, ni Pedro, o cartero amigo de Jesús ye, ni Jesús ye en o bar. Agora ya no se siente a “os de Sant Joaquín” por a carrera, ni Jesús mos asperará con as medianas a meyo ubrir, ni con o porrón plen.

No miento si digo que muitismas nueitz en ixos bancos, amás de charrar de tantismas cosas, soniabamos con un mundo de ak-47, y agora, mira-te-lo bien, en Casa Jesús d’Abiego, en tienen.

Ak-47 en Casa Jesús

Ak-47 en Casa Jesús

Asinas son de vegadas as cosas. Igual que yo me’n soi tornau ta Barcelona, agora os kalashnikovs con que arreguibamos y febamos mofla, son penchaus d’as paretz d’o bar que una vegada estió quasi casa nuestra. Dende o mio piso en l’Eixample de Barcelona me remero con un sonriso as conversas con Jesús, igual que me remero d’os sonrisos d’o mio pai, as gambadas con o mio yayo por as carreras de Zaragoza, me veigo os uellos d’a mai con glarimetas quan fa un anyo meteba a Sputnik en l’auto y veniba baixo a plevia enta aquí. Me veigo os uellos que he aimau y os uellos que encara m’aimo. Tot ixo ha feito de mi qui soi y qui quiero ser. Tot ixo y muitas atras cosas de buenas y de no guaire buenas que en o recorriu d’a vida han deixau una remeranza que fa que m’emocione. Tot ixo apuntala iste anyo en Barcelona. Tot ixo apuntala os quatro pilars d’a mía vida dende os quals, enreligando-se y puyando-se y cruzando-se uns con atros configuran o mapa d’os mios deseyos, trazas de ser, ideyas, seguridatz y medranas.

Sin perder lo que era me hizo barcelonés

15-D Inundemos a CHE

Miércoles, diciembre 12, 2012 9:44
Publicau en a categoría purnas

Con iste video con as parolas de muita bienquiesta chent d’Artieda y solidarios con o lugar mos claman a manifestar-nos o venient sabado 15 devant d’a CHE, principal culpable de l’expolio que ye sufrindo Artieda y d’as agresions policials d’o zaguer octubre. Artieda ye un lugar vivo que continará vivindo. Yesa no pas! Artieda no rebla!

 

Casamuda y paismuda

Domingo, noviembre 18, 2012 11:53
Publicau en a categoría prexinando, purnas

O balcón de casa mía

O balcón de casa mía

A primer vegada que venié ta Barcelona sabendo qué feba estió en 1996 u 1997, no lo remero guaire. Venibamos os pais y yo en o 127 familiar que adugaba la mai. L’auto se quedó aturau en plegando a lo peache que i heba en El Vendrell. L’auto se quedó en un taller d’allá y nusatros veniemos enta Barcelona en un taxi Mercedes que mos deixó en l’Eixample, en a carrera Calabria con Gran Vía an que i heba l’hotel, muit amán d’o puesto an que agora vivimos Sputnik y yo. D’ixos diyas remero que a ciudat m’enlucernió. Coincidiba que yera La Mercé, y que indo solenco a bell concierto una colla de chent m’acullió ta salir de borina con ells. Tamién conoxié un bar que se deciba “Los de Aragón” y que risultó ser un bar gay.

Continé tornando-ie dende ixe primer viache, porque ya Barcelona m’heba empliu una parti d’a mia vida. Con o pasar d’o tiempo torné ya ta quedar-me, con totz os mios libros en a pocha, y a vida me levó unatra vegada ta Zaragoza en 2006. En os seis anyos que he pasau en Zaragoza, y por muitas razons, siempre he teniu una parti d’a mia cabeza a l’atra banda d’o disierto. 6 anyos vivindo en Zaragoza con parti de l’esmo en Barcelona. Y a la fin, fa tres meses, se dio la oportunidat de tornar-ie. Y aquí soi. Con ixe balcón de dos banderas que son a mesma bandera con as estrelas en puestos diferents.

Aquí vivimos agora Sputnik y yo. En un piso en que ya heba estau y an cal puyar 7 pisos d’escalas. Amán d’o puesto an que estié dormindo a primer vegada que estié en Barcelona. Un piso en que tres meses dimpués ya conoixco an son os interruptors d’a luz quan i soi a escuras. En un vico una mica especial pero an que en o bar de baixo casa ya saben qué café quiero fer de maitins y que biera de nueitz. Amán d’una estación de metro que ya conoixeba y que marca o prencipie d’a chornada laboral. Amán, tamién d’a parada d’un bus que tamién teneba amán en Zaragoza, a d’o 20, que en Zaragoza no agafé nunca y que en Barcelona he agafau menos d’o que habría d’haber feito y que m’aganaría d’agafar muito más.

Prou que no ye a mesma Barcelona que deixé quan marché en 2006, igual que yo no soi o mesmo de fa 6 anyos. Prou que encara soi fendo os trangos que amenisto ta tornar a sentir-me parti d’ista ciudat que me agafó por l’esmo ya fa tantos anyos. Prou que agora, con mas desperiencia, pero tamién con mas inseguridatz laborals, o ritmo d’a mia vida barcelonesa ha cambeau. Prou que, agora que vivo en Barcelona, tamién trobo a faltar muitas cosas de Zaragoza. Pero a vida ye un camin que no s’atura y que tien fitos que mos marcan ta cutio. Imos cambeando con o tiempo, pero i ha cosas que siempre remanen, siempre mos quedan, siempre mos remeran y remeramos. Puestar que o mio destín siga ser barcelonés en Zaragoza y zaragozano en Barcelona.

Puestar porque, como una vegada me esplanicó a mia mai, fa muitos anyos ufrioron un triballo a o pai en Barcelona, antis de que yo naixese. Ells no se decidioron a fer casamuda. Yo hese naixiu barcelonés, y puestar, por ixo, qui ha tornau a fer casamuda enta aquí he estau yo, ya naixiu, creixiu, y feito un hombre adulto. Y puestar por ixo que d’un tiempo dica agora suenio asobén con o pai. No con a suya muerte, ni con o feito que ya no i siga, sino con esplanicar-li as cosas que me pasan, fer gambadas con ell y con atros suenios, alufrar o mar pensando a vida y sentindo que cumplo o prochecto de vida que ell no fació.

L’Apocalipsi ya ye aqui

Miércoles, noviembre 2, 2011 22:09
Publicau en a categoría purnas

Feba tiempos que no dondiaba por a ciudat sin cosa que fer. Feba diyas que no amanaba la orella ta sentir o que atros dicen. Feba diyas que, una vegada que he sentiu lo que dicen, he habiu de tragar-me as mias ganas de partecipar en a conversa. En o camín que va dende o Mercau Central enta casa mia m’ha pasau huei dos vegadas.

A primera en o centro ta lolos que La Caixa, creigo que ye, tien en o prencipie de Sant Blas. Fumarreando os suyos Ducados, que feba ixa ulor, tres yayos ascuitaban parando muita cuenta, a un quatreno. Sentindose bien ascuitau, iste zaguer lolo dentraba en modo “Arrabal” y sentenciaba “L’Apocalipsis ya está aquí! En las revelaciones hay una bestia con nosecuantas cabezas y ya ha llegado“.

Y lo deciba en serio. No se si se referiba a Papandreu y o suyo referendum, a la Merkel, u mesmo a ZP/Rubalcaba u Rajoy. Porque lo deciba tant serioso y se l’ascuitaban tant y tant seriosos que feba medrana y he eslampau ascape enfilando a carrera sant Blas entabant.

Encara no recuperau d’os susto, he habiu de fer un tallau (con leit d’o tiempo, por favor), y quan que m’he sentau en a silleta, leyendo l’Heraldo, he parau cuenta que a o mio costau bi’n heba dos mullers que por o que he sentiu yeran d’as “de hacer casas“. Una feba “la de la Inés, la de la Luisa, la de su hija, la de una amiga de la hija, y chica, no me puedo quejar“. L’atra, que amás feba, por o que he sentiu, “la empresa esa que te dije“, tamién en feba buena ripa, pero no ha concretau.

La que feba la casa “de la Inés” ha recentau a suya nueit d’ahiere. Con o suyo mariu heban de baixar bells zarrios a la basuera. “y oye, se me viste como para salir, claro, como lleva meses entre el ERE y el paro, ahí lo tengo en casa, y oye, le digo, pero chico, donde vas?“. Por o que pareixe, o buen hombre teneba intinción de cenar fuera, aproveitando la salida ta chitar la basuera. Pero rai, “dos cenas, 20 euros, y chica, con eso comemos cuatro o cinco días“. Os cenyos d’aprebación de l’atra muller y os mios propios, han refirmau a firme actitut d’a muller que fa “la casa la Inés“.

Ya no he sentiu cosa más, pero ye claro que l’apocalipsi ye plegando en forma de bella cosa porque como ha dito la muller “a ver si encuentra algo, porque entre que no podemos salir y eso, ahí lo tengo plantificau todo el día“. Y ixo sí que no…”hasta ahí podíamos llegar“.

Contraposicions: Mularroya y o tranvia de Zaragoza

Domingo, agosto 14, 2011 12:47
Publicau en a categoría purnas

O nuevo Gobierno d’Aragon ha feito ascape totz os posibles contra a destruccion d’o patrimonio derivau d’as obras d’o tranvia de Zaragoza. Fueras de consideracions esteticas d’a comision de Patrimonio sobre plazas en cerclo o quadradas, ye de dar que cualsiquier obra que s’encete ha de cumplir totas as normativas legals y protechir o patrimonio que afecten. Asinas, que parixe lochico que o Gobierno d’Aragon truque o ficacio sobre as normativas que no s’han rispetau en iste caso y veile por os posibles biens culturals d’o recorriu d’o tranvia. Curiosament, pero iste ye atro tema, istos “desvelos” por o patrimonio lis bufon a pocha quan facion a remodelacion d’Independencia os mesmos que agora sufren por os restos islamicos extramuros.

Pero be-de haber tamien unatra motivacion politica quan a lo mesmo tiempo, ni o gobierno d’Aragon ni o d’Espanya, han paralizau as obras de l’entibo de Mularroya, que continan china chana, encara que l’Audiencia Nacional espanyola ha anulau as declaracions d’impacto ambiental u que o suyo coste ya ye sobredimensionau en mas d’un 20% sobre os primers presupuestos.

As obras de Mularroya continan entabant, pues, sin a preceptiva declaracion d’impacto ambiental, u siga, en fraude de lei, y sin que garra organismo haiga dito cosa sobre l’alegalidat de facto d’ixas obras. Ni o gobierno actual popular, ni, profes, l’anterior socialista (os dos refirmaus por o PAR) han puesto garra problema a unas obras que no cumplen a lei como dicto l’Audiencia Nacional espanyola.

Por que ta unas obras si, y t’atras no? mos podemos preguntar dende a inocencia orichinal…Be-de estar que a politica tien istas cosas y nusatros, simples ciudadans, no podemos que aplaudir a valentia d’os nuestros gobernants por aplicar una solucion y la contraria a lo mesmo tiempo.

Belloch y o mal perder

Martes, junio 28, 2011 21:18
Publicau en a categoría purnas

No imos a descubrir agora a mena d’alcalde que tenemos en ista ciudat. Juan Alberto Belloch s’ha feito sinyalero siempre por o suyo disprecio por qui no piensa como ell y por querer, si puede, pasar por dencima de tot. No imos a descubrir agora ixo que dicie “L’Evanchelio de Belloch” repasando bellas d’as suyas actuacions mas destacadas.

Pero mientres a cosa quede dentre nusatros, pues rai. Pero huei, como ripresentant de tota la ciudat, y una vegada que Sant Sebastian ha estau nomenada como Capital Cultural d’Europa en 2016, ha dixau por o sulero a tota la ciudat con as suyas parolas de mal perdedor y, sobre tot, con o suyo quiste de tiempos de chuez.

Belloch ha charrau de politica (a que diz que ha menau a decision d’o churau) pero no pas de Cultura, ye esclatero. Ha dito que puestar impugnara a decision, y que no puede ripresentar a Espanya uns que no son espanyols. Fueras de que a historia ista va de ciudatz europeas y no espanyolas, Belloch no ha charrau de porque a vida cultural de Zaragoza queda luen de Sant Sebastian, o suyo festival de Jazz, u de cine, as suyas alportacions a la gastronomia europea, etc… Mientres que en Zaragoza a politica cultural ha estau dando bandazos, ha consistiu en trancar salas de conciertos, fer desfiladas militars, fer continament recreyacions de feitos militars, plantar banderas d’Espanya en plazas prencipals, sacar conciertos d’as carreras t’as fiestas, sacar ferias culturals como Amostranza, dixar amortar festivals de cine como Cinefrancia, retirar cartells en aragones en quanto cambeoron o socio de gobierno…

Ye verdat (y por suerte) que n’ha habiu atras actuacions mas encertadas, muitas d’ellas por iniciativa privada, social y ciudadana. Y bien se vale que si hesen trigau Zaragoza como Capital Cultural, suposo que habrian cambeau bellas cosas (encara que a desperencia d’a Expo contrimuestra que no siempre t’amillorar). Pero tot isto son elucubracions.

O que no ye una elucubracion ye que Belloch ripresenta malament a os ciudadans zaragozanos, que as suyas formas autoritarias, puestar que derivadas d’o suyo tiempo chudicial u d’os tiempos como ministro de quasi tot, dixan en mal puesto a os zaragozanos. Iste si que no me ripresenta pas.

Troballa en Aragón en Abierto d’Aragón Tv

Jueves, mayo 19, 2011 16:58
Publicau en a categoría purnas

L’atro diya colabore dende Troballa con Aragon en Abierto ta charrar d’os zaguers (y bells de mas viellos) cambeos de nombre de carreras en Zaragoza.

Troballa en Aragon Tv

Martes, abril 19, 2011 11:18
Publicau en a categoría de l'aragonés, purnas

Gracias a l’Asociacion Nogara, que treballa de firme por a normalizacion y amostranza de l’aragones, dende Troballa podie menar una vesita por a viella Zaragoza d’o sieglo XV que teneba nombres en aragones. Estiemos por l’antiga carrera Archenteria, por Botigas Fondas, un d’os trenques d’a ciudat, a puyada os chigants u lo Burdel Viello. En o recorriu, esplanique sobre nombres de carreras u zonas que encara emplegamos y que son fruito d’a evolucion d’o latin u l’arabe enta l’aragones: Portillo, Valdefierro, Coso, Reboleria, Tenerias…

Ista vegada venio tamien un equipe d’Aragon Tv que facio con nusatros una parti d’o camin y que ha posibilitau que s’emitise en os informativos d’a television publica aragonesa. Aqui tos dixo a noticieta, gracias a Chuse que la grabo con o movil, mientres prebo de tener una copia millor.

Gaddafi bombardeya con armas zaragozanas (A historia d’Instalaza)

Sábado, abril 16, 2011 12:46
Publicau en a categoría purnas

Instalaza ye una fabrica d’armas en pleno centro d’a ciudat de Zaragoza, en o bico d’a Madalena. Human Right Watch ha confirmau que Gadaffi, o dictador libio de qui Aznar asegura que ye un amigo excentrico, ye chitando muerte Instalaza en forma de bombas de racimo contra Misrata.

Bombas de racimo (NY Times)

Bombas de racimo (NY Times)

Ye cierto que Instalaza, como asegura en a suya web, dixo de fer istas bombas en 2008, quan se sinyo a convencion contra las bombas de racimo, pero as bombas que son cayendo sobre Misrata son anteriors. O negocio d’a muerte parte d’a nuestra ciudat, como leva fendo dende 1942, quan Instalaza estio creyata por o rechimen franquista.

O curioso d’ista fabrica ye que muitos zaragozanos innoran a suya esistencia. No son guaires os zaragozanos que sapen que ye ixa paret en a carrera Monreal. Sin dembargo, ye una fabrica conoxita mundialment por os suyos productos. En tiene pachina de wikipedia en angles, y en bells paises mesmo se diz “Instalaza” a os morteros u cohetes, como diciriamos Kalashnikov.

As naus d'Instalaza

As naus d'Instalaza

Mas encara, mientres anyos, os poders publicos aragoneses han concediu aduyas a ista fabrica de muerte ta que contine producindo-ne. Y agora, quan queda malament tener muerte en a ciudat, en cuentas de forachitar a fabrica, s’han recalificau os suyos terrenos ta que puedan vender con sobre coste (mas de 150 viviendas) y metan a produccion en atro puesto.

Asinas que no nomas hemos de sufrir a sobreexplotacion melitar d’a ciudat en poligonos, vuelos y presencia, que tamien adedicamos parte d’a produccion industrial zaragozana a producir ferramientas de muerte que exportar a tiranos. Zaragoza, ciudad de paz…sí, de cojón.

A politica, Aragon, Zaragoza y Dios

Jueves, abril 7, 2011 17:36
Publicau en a categoría purnas

Parixe que a vida politica aragonesa estara marcada por dios (o dios cristiano ye esclatero) y os suyos siguidors. Si ahiere parabamos cuenta que una fiesta catolica feba que o gobierno d’Aragon fe-se de menos o diya nacional d’Aragon, huei ha estau l’alcalde de Zaragoza, Juan Alberto Belloch qui ha decidiu que, como en tiempos pasaus, siga dios qui decida qui y como ha de gobernar-nos.

En una trobada con chovens empresaires o divino Belloch ha dito que aspera que “dios viede un tripartito de cuchas”. (Tenez o testo en iste PDF penchau d’o blog de CHA en Zaragoza). Dentre atras cosas ya dixa esclatero Belloch que ell no ye de cuchas, y no ye a primer vegada, pero tamien, que confita prou mas en as secretas desinnacions d’o sinyor que no pas en os electores (aka ciudadans). Y tampoco no ye a primer vegada.

Por si no lo remeraz, podez veyer a Belloch aqui bien alcompanyau u remerar o Santo Evanchelio seguntes Belloch, que antimas veyio que yera bueno. Sicut erat in principio

Pachina 1 de 2012345...101520...Zaguera »