A web de La Pantera Rossa

Un camaton de chent abio ayer en l’enguero de La Pantera Rossa, o prochecto de libreria asociativa y centro social que ubrio ayer as suyas puertas en Zaragoza dimpues de muitos meses fendo vida nomada. Que i abese tanta de chent ya ye un buen sinyal de que bella cosa asinas amenistaba ista ciudat.

Dende os primers trangos d’o prochecto yo estie implicau, pero a la fin, abie de dixar-lo por manca de tiempo. En tot caso, lo que si tos recomiendo ye que faigaz una huellada por as  baldas plenas de libros y que vaigaz a os actos y charradas que i organicen que de seguras seran bien intresantz, prencipiando por a presentacion d’o libro en aragones O despertar de l’onso,

A imachen ye d’a pachina web d’a Pantera Rossa, que gracias a o puesto que me han dixau en A Flama y a base de crepes de chicolate he puesto creyar alacetada, profes, en WordPress. Dimpues d’unas cuantas horas de triballo o resultau ye ixe que podez veyer en La Pantera Rossa y que aspero que faiga buena onra a la ilusion y as ganas de creyar y compartir d’os colectivos que presentoron ayer o suyo nuevo espacio.

Bienplegaus y entabant!

Si ya fa uns meses metie o boton de Facebook ta espardir os contenius d’o blog, agora l’ha plegau o turno a Twitter. Bi eba maneras de meter un boton ta compartir conteniu enta twitter, dende wordpress, sobre tot con plugins, pero agora tenemos a version oficial ta fer-lo, implementada dende o propio twitter, como esplanican dende o suyo blog.

Veyerez que agora Purnas.com tien tanto en portalada como dentrando en cadagun d’os post, un boton mas. Ye o boton oficial de twitter, que premite espardir o conteniu, y amas amuestra as vegadas que bella presona ha publicau l’enrastre en twitter. Ta ficar-lo se puet fer de bellas formas esferentz, pero a mas facil ye a travies d’a pachina que twitter ha feito ta lo suyo boton oficial y que premite definir as variables d’o que claman tweetbutton.

Os trangos son facils de seguir, y a la fin tos quedara un codigo que ficar en a plantilla single.php (ta las dentradas individuals) y en index.php (ta la portalada, an cal fer una modificacion) en o puesto an quieras meterlo, por exemplo antis d’a etiqueta <div class=”content”> como yo l’he ficau.

Ta single.php o codigo podria estar:

<a href=”http://twitter.com/share” data-count=”horizontal”data-via=”otuyousuario” data-related=”usuariorecomanau1:usuariorecomanau2″>Tweet</a><script type=”text/javascript” src=”http://platform.twitter.com/widgets.js”>

Ta index.php ye important meter a variable data-url=”<?php the_permalink() ?>” ta que nomas ninvie o post y no a pachina prencipal. Por o demas, se puet meter igual antis de <div class=”content”>

<div style=”float:right;”><a href=”http://twitter.com/share” data-count=”horizontal” data-url=”<?php the_permalink() ?>” data-via=”Purnas” data-related=”aragoneame:troballa”>Tweet</a><script type=”text/javascript” src=”http://platform.twitter.com/widgets.js”>

Isto ye valido ta os blogs de wordpress en o vuestro propio servidor, ye esclatero, os de wordpress.com tamien premiten meter o boton pero se fa dende “Apariencia–Añadidos” an podrez marcar que tos amuestre o boton (nomas ta o conteniu d’os post y no pas en a pachina prencipal).

Agora o conteniu de Purnas.com puet ninviarse facilment a Meneame, Aragoneame, Twitter y Facebook.

Aprobeitando as funcionalidatz d’os retes socials he ficau en o blog o boton “Me gusta” de Facebook. Se diz “Me gusta” y no “me fa goyo” porque Facebook no ha autivau a posibilidat de traducir ta l’aragones o rete, atamas de que, como siempre, bi ha mesmo luengas ficticias que si que son autibadas. O caso ye que o boton se puet emplegar ta que en o tuyo muro pueda amanixer cualsiquier articlo d’iste blog que t’aiga feito goyo.

A potencia d’os retes socials ta espardir informacion ye unica y si foi iste blog ye ta que me leigaz, asinas que creigo que ye una prou buena ferramienta ta compartir os contenius de purnas.com. Si tenez un blog, de totas trazas, podez ficar tamien o boton, no ye guaire deficil y tos servira ta compartir o que deziz o pensaz. Yo he siguiu as instrucions de dos pachinas.

Por un costau a propia documentacion de Facebook sobre l’emplego d’istos plugins an puez configurar o boton como mas t’agane en midas y formas, por atro costau, o tutorial puestar menos tecnico, pero practico d’iste atro blog.

Agora nomas queda que Facebook decida, a la fin, dixar traducir a pachina enta l’aragones ta que o boton pueda estar tamien en ista chicota y polida luenga, como bien luego estaran Ubuntu (que ha estrenau a bersion 10.04), Firefox o Skype, gracias a lo triballo d’a chent de Softaragones, que agora tamien tienen pachina en Facebook, por cierto.