L’atro diya feba una pregunta en petit comite a uns amigos. Seria posible trobar bells aragoneses que fesen a fondo perdiu una alportacion de 20 o 50 euros ta creyar un meyo de comunicacion dichital?

Fa tiempos que trobo a necesidat, y no soi l’unico, de creyar unatro meyo dichital, aragones, nuevo, esferent, politicament activo, que tienga rispeto por a diversidat lingüistica y cultural d’o pais, que faga un periodismo amanau a la carrera y luen d’as notas de prensa u as declaracions d’os politicos, que tienga present as luitas en esfensa d’os dreitos y a tierra. Tamien foi constar que ixos posts que meto en iste parrafo son de fa 3 anyos, y que dende ixos tiempos as cosas han cambeau a millor en os meyos aragoneses, a lo menos en a parti funcional, como he iu esplanicando en posts d’o viello purnas y en iste menos viello.

Fer-lo amenista ganas, tiempo y voluntat. Pero tamien, ye a pura verdat, diners ta prencipiar y dimpues posibilidatz de desembolicar un negocio ta subsistir, ta bosar os periodistas y proveedors, ta que siga economicament sostenible. Bi ha muitos modelos de produccion colectiva, as cooperativas como A Flama, as alportacions d’a chent que i partecipa y chent que quiere colaborar como La Pantera Rossa u os patrocinios privaus, mas que mas, y en menor mida publicos. Totz istos modelos tienen avantallas y tamien problemas, sobre tot o zaguer modelo. Remeraba en charrar d’isto, como estio a creyacion de l’Egin, con mas de 20.000 alportacions individuals amas d’as d’os fundadors d’a interpresa. O as peticions d’aduya d’un meyo espanyol de recient creyacion como Periodismo Humano. U ya en o fundo fracaso, as peticions de suscripcions que facio Factual.

Me feba la siguient pregunta, allora, y tos la foi tamien a vusatros. Creyez que bi abria una masa social prou gran en Aragon ta fer chicotas alportacions individuals que permitisen un anyo de creyacion en Internet mientres se desembolica o modelo de negocio d’un nuevo diario d’informacion con as caracteristicas que decimos?. Que en pensaz?