A Lei Sinde y a Lei de Partius

Martes, diciembre 21, 2010 16:49
Publicau en a categoría purnas

Se vota ista semana en o Congreso espanyol (y dimpues en o Senado espanyol) a clamada Lei Sinde. Ye un adibiu a ixo que o gobierno espanyol ha dito “Ley de Economia Sostenible” y ha prevocau un chicot tierratremo en a chent que gosa vivir en Internet. Tenez bellas claus d’a lei en iste blog y por exemplo, en o comunicau que ha feito Hispalinux.

Un d’os aspectos que mas ha trucau o ficacio d’a chent que ha feito debantar-se en armas a os internautas ye a posibilidat que una comision creyada “de expertos” pueda dicir que cal trancar una u atra web. Dimpues ixo si, estaria l’Audiencia Nacional espanyola la que decidiria, pero como esplanicaba Enrique Dans nomas ta dotar de bella legalidat a l’aicion d’ixa comision.

Feba yo un tuit decindo antis que a Lei Sinde ye a las webs como a Lei de Partius a os partius, porque se fa contra os presuposaus dolents pero puede afectar a totz. Pero ixa definicion no ye de raso correuta, me pensaba una mica dimpues. Encara que o risultato pueda estar o mesmo como se facion una y atra y como se pueden emplegar ye una mica esferent.

A Lei de partius se facio con a intincion de dixar difuera d’a legalidat a la cucha abertzale vasca. Ta ello se facio un redactau cheneral an l’emplego d’a violencia y a suya chustificacion yera o punto clau. Encara que bi ha mas partius que han emplegau a violencia (partius nazis y d’ultradreita, alacetalment) y que mesmo tienen chent con delitos de sangre dentre as suyas filas nunca no s’ha emplegau a Lei de partius contra garra d’ellos. Ixo fa que a Lei de partius tienga un handicap, que ye que se lechislo, de propio, contra un colectiu de chent y no ta l’orden cheneral. Pero o redactau dixa esclatero que se puede emplegar contra cualsiquier partiu que no cumpla os requisitos que diz.

A Lei Sinde, d’atra traza, va, de propio, contra un tipo de web. As webs que facilitan l’entrecambeo d’archivos y as descargas pero o redactau d’a lei (como diz o propio Enrique Dans) ye prou confuso como ta que en un inte concreto se pueda estendillar a decision d’ixe “comite d’expertos” ta trancar cualsiquier web que contenga o que dicen “contenius ilegals” que no s’especifican. Asinas que nomas cal enamplar os criterios d’ilegalidat ta que tranquen cualsiquier lei sin cuasi pasar por o chuzgau fueras de ta que sinyen l’acta.

Ye asinas de simple. Una lei amagada de cheneral que s’emplega de traza particular (a lei de partius) y unatra de traza particular que se puede emplegar de traza cheneral (a lei Sinde) tienen o periglo de cayer en malas mans, ye dicir, en cualsiquier gobierno que nomas estendillando una mica os nugos d’o rete d’ixas dos leis puede ilegalizar partius y trancar webs de traza cheneral. Son u no son pas de periglosas istas dos leis?

Tags: , , ,