Tenemos perfil en Facebook, en twitter, mos rilacionamos a travies d’o gTalk, de Tuenti. Femos trobadas de blogs en aragones, de blogs en cheneral, de twitteros, de periodistas que levan balons jeans y nos deseyamos buen cabo d’anyo con chent que no conoxemos en presona porque bell rete social mos remera a calendata.

Cal tener esclatero, sin dembargo, que totas istas rilacions plegan do plegan y no dillá. Totz buscamos cosas con istas rilacions. Estendillar o negocio, creyar retes d’aduya u mesmo tener vida social, que de vegadas no ye tan facil como parixe. Pero s’ha de saber que por ser contacto en Facebook, en Twitter u fer uns risos por gTalk, ixa rilacion no ye a mas important que tiens. As rilacions s’alacetan tamien en atras cosas y, de feito, os amigos que tiens mas aman en os retes socials son, asoben, os que conoxes, tamien, en presona. Ixo, si, antis u dimpues de tener contacto en os retes socials, porque, ye normal, as rilacions, como tot, evolucionan.

Ninos en o PIR'2010 en Echo

Y por qué tot iste embolique? Pues porque iste cabo semana he conoxiu a una nina de tres anyos. Somos estaus una colla d’a universidat en un lugaron de Cuenca, cilebrando que mos retrobabamos dimpues de 4 u 5 anyadas. Una d’as amigas que i venio lo facio alcompanyada d’a suya filla. Dentre totz emos prebau tamien que a nina pasase buens diyas y a mi me toco o sabado de maitins estar con ella veyendo Peter Pan, charrando d’o pincho que ye volar y o dolentz que son os piratas con mans de metal. Mos esmeliquemos asabelo y decidiemos que Campanilla ye o millor presonache. Cuan a mai d’a cria venio a recullir-la ta ir ta la piscina li pregunto: “T’has feito muit amiga de Chorche, eh?”. Ella, con a sinceridat que tienen os ninos dicio: “Si, bueno, un poco”. A la fin,no ebamos que pasau una oreta chuntos.

Cal medir a verdadera dimension d’as rilacions presonals, tiengas 3 anyos o 60.