Purnas en o zierzo » refirme

Refirme a la bada cheneral

Chorche — Tue, 28 Sep 2010 15:45:13 +0000

En l’Estato espanyol y en tota Europa, o 29-S estara una chornada de luita. Luita d’os triballadors y triballadoras por os suyos dreitos, contra as rebaxadas y as retalladas que os mercaus continan obligando a os gobiernos a fer. En l’Estato Espanyol, amas, os triballadors y triballadoras, por cuenta d’otri y tamien autonomos, amas de casa, pensionistas… totz os miembros d’ista sociedat sufrimos as enrestidas d’o capital, bien refirmatas por os gobiernos que aceptan totas as condicions que lis dicen.

Por ixo, por o que dicen as mullers, os sindicatos de presonas y no os macrosindicatos, a chent que sufre la crisis, y que sufrira as retalladas, os triballadors y triballadoras que veyeran mas feble a suya situgacion devant de l’empresario que preba d’esprimir-los…por tot ixo, purnas.com refirma a bada cheneral d’o 29-S y fa una crida a totz os miembres d’ista sociedat a que maitin partecipen en a chornada de luita, que no consuman y salgan ta la carrera a dicir prau!.

Totz os actos de Zaragoza asti y en o siguimient especial que faran as radios libres como Radio La Granja, Radio Topo u l’achencia de informacion Arainfo con a que puez colaborar ninviando-lis fotos, sonius o cronicas d’a bada.

No related posts.

Refirme etico y economico a la Pantera Rossa

Chorche — Fri, 28 May 2010 11:51:47 +0000

As amigas d’a libreria asociativa La Pantera Rossa son demanando refirmes economicos ta enantar o suyo proyeuto y o local suyo que estara en a carrera San Vicent de Paul, cantonada carrera Mayor. Tos convido a aduyar a iste proyeuto que esdebendra un nuevo foco cultural y social d’a ciudat. Asinas mos dicen ellas:

En os meses venientz un nuevo espacio de ciudadania ubrira as suyas puertas en Zaragoza. Dimpues d’un vivo proceso de debate, un ligallo de desperencias comunitarias en esfensa d’o comun presentamos en Zaragoza un proyeuto endrezado enta l’aizion cultural y compromeso con a economia social y solidaria.

A empresarialidat politica ye feita en torno a la libreria y a la botiga de comercio chusto que feran de proa t’o proyeuto. A reforma y esvielle de l’espacio, asinas como a enantada d’a libraria, que tendra bells puestos de triballo asalariatos, demana un refirme economico, parti d’o cualo ye cubierto por as presonas que prencipiamos o viache. Pero amenistamos mas colaboracion ta aconseguir a resta que s’amenista y a estabilidat en o prencipie. Ta ixo hemos creyato un sistema de donacions y tamien de prestamos presonals a travies d’achuste privau ta quedar difuera d’os sistemas d’a banca y financieras tradicionals y aduyarnos, asinas, a guaranziar a viabilidat d’o proyeuto.

Si quiers partecipar economicament, de maniera etica y solidaria con o viache d’a Pantera Rossa contauta con nusatros a travies d’o telefono 652823651 u por correyo eleutronico ta info@lapanterarossa.net.

No related posts.

Prensa: Libertat d’esprisión y represión. O caso d’Egunkaria

Chorche — Tue, 12 Jan 2010 16:41:24 +0000

Iste biernes 15 de chinero en o Salón d’Autos d’a facultat d’Economicas l’antigo direutor de Egunkaria, Martxelo Otamendi, encausato en l’Audienzia Nazional, charrará sobre a libertat d’esprisión y a represión, exemplificada en o clamau caso Egunkaria.

Será a partir d’as 7 d’a tardi y contará tamién con a partezipazión de Carmen Lamarca y de Ricardo Vázquez Prada. Tenez más informazión en as dentradas d’a Plataforma aragonesa de refirme a Egunkaria y en a web de refirme a Egunkaria que reculle informazions y adhesions d’un caso que agora bibe os suyos trangos finals en l’Audienzia Nazional ya que o fiscal ha quitau os cargos y nomás persisten as acusazions particulars.

No related posts.