Me nimbian iste mail an esplanican que iste año no s’ha conbocau un d’os premios en aragonés más importants. Fa bels años que se declara disierto atamás que bi ha obras presentadas, pero iste año sisquiá ha estau conbocau. L’articlo ye d’a chen de Fendo Orella, un sobrebuen programa de Radio Topo, de raso en aragonés.

“O conzello de Balbastro deixa de combocar o premio de nobela curta en aragonés “Ziudá de Balbastro” qu´iste año abría de zelebrar a suya seisena edizión.

¿A razón? dengún no la sabe, talmén siga la crisis, talmén l´aragonés no siga rentable, lo zierto ye que ya en feba d´años qu´encara que se i presentaban obras o premio se declaraba desierto, pero ista edizión ya no ye que se declare desierto, ye que ni sisquiera se comboca.

Una pena que se cazegue un premio d´ista mena, considerau un d´os millors d´a literatura en aragonés y d´an que i salion nobelas como “Aguardando lo zierzo” d´Anchel Conte, una d´as obras maestras d´a literatura aragonesa y que ye considerada por muitos una d´as millors nobelas escritas en o sieglo XXI.

Por ixo, dende Fendo Orella queremos instar-tos a busatros que mos sentiz semana zaga semana a nimbiar un e-mail a o Conzello de Balbastro ta que contine combocando iste premio, porque, o millor de tot, ye que o anunzian en a web como un d´os suyos concursos anuals, manimenos, no apareixen por garra puesto as bases d´iste concurso, qu´abria de finalizar o suyo plazo de presentazion a prenzipios d´o 2010, pero sí d´a resta. Talmén siga muit poliu de fer creyer a la chen que o Conzello de Balbastro fa cosa por l´aragonés cuan en reyalidat, no se fa ni zarrapita ni pon.

Fendo Orella

Ya se saben os candidatos a os X Premios Aragón Musical, tamién en a categoría que dizen “Mejor Canción en Lengua Minoritaria de Aragón. Tema musical cuya letra esté escrita en alguna de las distintas hablas minoritarias autóctonas aragonesas”. Iste año repiten bels d’os candidatos, entre atras cosas porque no bi ha guaires bandas que s’adediquen a fer cantas en aragonés o catalán en Aragón, pero tamién porque bi ha muitas que no se conoxen. Iste año son totas en aragonés, atamás que uno d’as collas candidatas son “Los Draps”, pero que han estau nominaus por a suya canta en aragonés “Isto ye”.

Ista ye a rilazión de nominaus, con os enrastres t’as suyas pachinas. Rechirando por Internet nomás he trobau penchadas tres cantas. Ya se pueden sentir totas as cantas en internet.

• Inestables por a canta “Goyoso y capín”
• Los Draps por a canta “Isto ye” que podez sentir en lastfm.com dende aquí o en youtube, aquí.
• Lurte por a canta “Anarkum” (Podez sentir-la aquí pasando dica la canta 3)
• Prau por a canta “O Chilo” (Podez sentir-la en o Myspace aquí)