Una lei descafeinada d’una lei ya sin cafeina

Viernes, febrero 24, 2012 13:13
Publicau en a categoría de l'aragonés, purnas

Mos esplanica hue l’Heraldo d’Aragón en a suya versión paper (y en a dichital de pago) que o gubierno d’Aragón para una reforma d’a minilei de luengas (PDF) que deixara sin efecto o chicot efecto que la lei que apreboron PSOE y CHA heba teniu en as luengas minorizatas y propias d’Aragón. A lei aprebada, que tenió o firme refús de PP y PAR, y o refús contrario de IU que quereba ir una mica dillá, no s’heba desembolicau encara, fa no guaire que se creyó o Consello Superior d’as Luengas (organo consultivo y sin gasto t’o presupuesto), pero encara no s’han creyau de traza oficial as Academias previstas, ni s’ha feito garra cambeo en a estructura educativa, ni en os poders publicos, sisquiá s’ha visto reflexau en os meyos de comunicación publicos.

Yera una lei esbafada d’orichen si no se feban trangos ta cumplir-la, porque no teneba garra obligación y nomás que apuntaba a dreitos que s’heban de desembolicar, y nomás ta una parti d’Aragón, sisquiá ta totz os aragoneses. Y agora o gubierno la esbafará más si ye posible. De qué traza? Pues en dos importants camins. Por una parti, refusando de raso a denominación scientifica d’as luengas aragonesas y charrando de “modalidatz lingüisticas”. Ye un d’os caballos de batalla d’o sector más espanyolista, prencipalment, por o que fa a lo catalán. Por atra, refusando a creyación d’as Academias, que yeran la unica guarancia de que l’aragonés, sobre tot, fese un trango entabant como luenga y no entazaga como ye normal. Una academia que achunta-se totas as sensibilidatz, grafias y dialectos como atras luengas como o castellán en tienen. No tener ista Academia suposa un tiro en o tozuelo d’ista chicota luenga, como nos remera, terne que terne, a UNESCO, organismo internacional que lis bufa la pocha a os sinyors y sinyoras d’iste gubierno que tanto dicen veilar por o patrimonio cultural d’iste país.

Ya prencipió lo gubierno enrestindo contra os programas d’educación d’o catalán, y encara que iste anyo continan os de l’aragonés, con a retallada quasi definitiva contra la lei de luengas, ye probable que siga o zaguer anyo. Asinas esfienden o país y a suya cultura qui siempre ha quiesto acotolar o país y a cultura. Asinas creyen que mos ferán callar, pero, menos mal, a sociedat aragonesa, u bella parti d’ella, contina querendo fer pervivir a luenga y a cultura d’o país. A sociedat civil continará tenendo a parola, sin de lei, unatra vegada, pero con más ferramientas que no nunca ta fer pervivir ista parti d’o país nuestro, que ye casa nuestra, que ye ista luenga que si no femos servir nusatros se mos muere entre as mans porque la quieren asesinar. No mos ferán callar. Ni con lei, ni sin lei, ni con V ni sin V, totz os que charramos ista luenga hemos de deixar una mica as barallas nuestras internas y continar, como s’ha feito dende fa anyos, luitando porque no s’amorte a nuestra voz que replega a voz milenaria d’un pueblo que se diz aragonés y que continará vivo si nusatros queremos que asinas contine. No mos ferán callar, encara que mos digan klingons. No mos ferán callar, charramos aragonés y atros quantos parlen català y as suyas anglucias acotoladoras no podrán con nusatros. No mos ferán callar.