Naxita de pai mosico militar ista muller ha viviu dentre Zaragoza, Vitoria y Logronyo. Atamas d’a poca aduya ta que as mullers estudiasen mientres o franquismo se facio una carrera de Graduato Social, y a la vegada triballaba d’aduyant en una farmacia. Se caso con un hombre a qui li daban 3 meses de vida, pero con ell vivio 30 anyos de felicidat y triballo, y con ell tenio a o suyo unico fillo.

Mientres o mariu se ganaba la vida pintando monas, ye dicir, debuxando ta publicitar negocios en vallas, periodicos y revistas, ella antimas de fer casa, prencipiaba un negocio de libreria en o suyo bico.  A la fin habioron de trancar o negocio, pero contino triballando en casa, y mas tardi refirmando a o suyo mariu quan lo forachiton d’a suya interpresa. Dimpues, y mientres o fillo crexeba, habio de cuidar a os suyos pais y veilar por o mariu, ya malaudo y sin triballo, y mesmo habio de logar habitacions de casa suya ta chent de fuera ta poder tirar entabant.

A malotia d’o suyo mariu a la fin remato con a suya vida, y poco tiempo dimpues, moriban tamien os pais suyos. Allora, y mientres o fillo marchaba a ganar-se o pan fuera d’o pais, ella habia d’achustar-se ta triballar en una botiga de medicina natural, an que o suyo jefe, un fillo d’a gran puta, la timo, sin bosar-li a Seguridat Social, dica que ella paro cuenta y lo denuncio.

En ista epoca, antimas, habio d’aduyar o fillo, que a la fin heba marchau ta Barcelona ta completar os suyos estudeos, ninviando-li, quan caleba, diners ta bosar o loguer d’o piso. Ta ello, y una mica por no estar solenca, heba de tener chent en casa y a la fin, mesmo re-hipotecar casa suya, a casa que heba mercau con o suyo mariu.

Agora contina participando, como siempre, en a vida social d’a parroquia, contina fendo cafes con as amigas, fendo os viaches que a suya pension li’n dixa fer, refirmando a o suyo fillo, que ha tornau ta Zaragoza, charrando con a suya familia, prebando d’aprender cosas primero en a Universidat d’a desperiencia y agora en a Universidat Popular, vivindo, como siempre, prebando de ser y fer y alcompanyar en ser y fer a os otris.

Huei ye o diya d’a muller triballadora, y yo no conoxco atra muller mas triballadora que a mia mai. Gracias, mai.

T’atras anviestas d’o diya, a d’o mio sendicato, o SOA, y a d’una colla de mullers que luitan por a igualdat, A Clau Roya.

Muitas mullers en o mundo simbolizan o 8 de marzo. As mullers baxo d’un burka, as que concaran o machismo d’as suyas soziedaz, as que biben en o disierto d’Alcheria, as madres, as amigas, as companyeras, as que triballan de sol a sol ta fer florecer a primavera, as que se dixan as mans, a piel, l’esmo, en un mundo que muitas begadas no para cuenta en ellas. As mullers biolentadas, as mullers rebeldes, as mullers que s’han de bender por os camins, as que limpian, as que escriben, as que aduben, as que mandan, as que obedecen. Toz os diyas ye 8 de marzo ta muitas mullers d’o mundo. Güé, como cada diya, cal remerar-se d’ellas, de l’esprito femenino que ha feito, diya zaga diya, semana zaga semana, sieglo zaga sieglo, que podamos remerar-las, aimar-las y bibir con ellas, y sobre tot, caminar a ixena con ellas ta que no calga un diya ta remerar isto porque toz sigamos iguals, con os mismos dreitos, oportunidaz y posibilidaz. Como deziba Mario Benedetti.

Y si dios estase una muller?

Y si dios estase una muller?

pregunta Juan, sin fer garra zeño

si dios estase muller
ye posible que agnosticos y ateos
no diziesemos no, con a capeza
y diziesemos si con l’esmo

puestar que mos amanaramos a o suyo divino cuerpo despullau 
ta besar os suyos piez, no de bronce
o suyo pubis, no de piedra
os suyos peitos, no de marbre
os suyos labios, no de cheso

si dios estase muller l’acollariamos
ta rancar-la d’o suyo orizont
y no abríamos de churar
dica que a muerte mos separe
ya que estaría inmortal por definizión
y en cuenta de trasmitirmos sida o medrana
mos apegaría a suya inmortalidat

si dios estase muller no s’instalaria
lexana en o reino d’os ziels
sino que mos asperaria en o siestro de l’infierno
con os suyos brazos, no trancaus
a suya rosa, no de plastico
y o suyo amor, no d’anchelez

ai, dios mio, dios mio
si dica siempre y dende siempre
estases una muller
que poliu estrapaluzio estaría
que fortunata dadosa imposible
prodichioso churament

Y asinas, como qui no quiere a cosa, una canta que m’alcompanyó bels anyos d’a mia bida “Maybe God’s a woman too”

Atros años ta o 8 de marzo, emos sentiu cantas polidas en anglés y aragonés, emos remerau a Agnes Hodgson, a las mullers migrants, o la historia d’as mullers.