Imachen d’o que ye pasando en iste país nuestro ye a presencia ayere d’o Consellero d’Obras Publicas, Alfonso Vicente, en as Cortes d’Aragón. O buen siñor, ombre de mundo, por o que a se i beye, y dimpués de charrar con uns y atros ha plegau a la conclusión de que en tot o mundo femos envidia por o nuestro rete de trens. Asinas como lo leyez. Os trens más caros, a retallada d’orarios y trens en localidaz chicotas, os trens más biellos en conecsions enta Navarra o Valencia, a bergüenya d’o Canfranero, uns trens de “Cercanías” que fan risos porque no leban de garra parte a garra parte, tot ixo, fa que sigamos a chen con más fortuna d’o mundo y que toz quieran estar como nusatros.

No ye cosa de monologo d’umor. Alfonso Vicente no yera prauticando ta salir en o “Club de la Comedia”, yera serioso dizindo ixo devant de toz os atros parlamentarios, que, ye de dar, lo se güellaban de fito en fito, y no ye ta menos. Ixa ye a clase de Gobierno que tenemos. Son capables de mirar-se os datos y beyer que se mos pixan denzima y dizir que ye plebendo, y nomás ixo, sino amás, dizir convencius que ixo ye o millor que mos puede pasar.

Iste ye o mesmo Gobierno que diz que Castanesa ye sostenible, que Motorland fa muitos diners, que bendrá l’equipe USF1 y cuan no biene dizen que no ye malo, os que dizen que Gran Scala se ferá, os que s’inventoron una linia aerea qu no bendiba ni mesmo por Internet y que abió de trancar, y unatra que portaria chen t’o Pirineo aragonés dende Uesca y agora mos dizen que operará dende Lleida.

Iste ye o Gobierno, que cuan s’amana o suyo fin (allá por l’anyo benient) contrimuestra, diya a diya, que ha perdiu lo norte, si ye que bella begada ha sabiu an yera. A lo menos, mos queda o consuelo que a bels de nusatros no mos enganyan con a suya ambiesta d’a reyalidat. Chicot consuelo.