Torna Rudi

Sábado, mayo 29, 2010 17:12
Publicau en a categoría purnas

Por “aclamacion popular”, sin garra votacion y contra a voluntat de os esferentz bandos d’o PP aragones ha tornau Luisa Fernanda Rudi. Agora totz diran que la refirman, pero no yera guaire esclatero antis de que dende Madrid, dende Espanya, como han d’estar as cosas en istos partius como o PP u o PSOE, Luisa Fernanda Rudi s’aiga trigau a candidata a presidir o pais.

 

Rajoy fa un pochon a Rudi

Rajoy fa un pochon a Rudi (Foto: Heraldo de Aragón)

As imachens de huet no dixaban garra duda. Garra bandera d’Aragon en l’auto zilebrau en o que estio a Expo, agora bueda. Mas de 50 autobuses ha bosau (ye de suposar que han bosau) o PP ta portar enta Zaragoza a chent d’os lugars. Han repartiu gorros de palla, porque a imachen que tienen d’os aragoneses ye ixa, gorros de palla y campo, campo, que, profes, dixaran ixugar cuan tornen a planteyar o trescole de l’Ebro.

Rudi ha tornau porque quiere ser a sucesora d’Iglesias en o gobierno d’Aragon que ta ellos no ye mas que a rechion espanyola d’Aragon. “Jose Mari, utilizanos”, chilo Lanzuela fa diez anyos, agora Rudi emplega un tono una mica mas moderau pero fendo referencias a o pasau imperial: “Hoy comienza la reconquista popular, el cambio del cambio en Aragón y en España”. Apelando a Don Pelayo, puestar. Con decenas de banderas d’Espanya y garra, insisto, garra bandera d’Aragon. No ye a suya bandera. Rudi ya ye a nueva candidata. O consuelo que mos queda ye pensar que si gana tornara a fer lo que facio, ye dicir, dixar o puesto ta marchar a o suyo pais o mesmo a lo Parlamento Europeo. Ya lo facio cuan yera alcaldesa de Zaragoza y cuan yera diputada en as Cortes. Cosa indica que agora no pueda fer o mesmo, y encara asinas, bi abra muitos aragoneses y espanyols que la votaran. A la Luisa.