Ahiere como que charramos sobre as leis antidescargas, o trancamient de Megaupload y custions rilacionadas con os dreitos (d’autor, de compartir, de propiedat), encara que estio un repaso muit por dencima, m’aimo de penchar-tos o programa, y asinas podemos debatir sobre tot isto. L’audio, como ye de dar, que ta ixo ye en Ràdio Matarranya, ye en catalán.

Ta descargar en MP3

Posts relacionados:

1. Ràdio Matarranya y Somonparty
2. Lo que me fa goi d’ista profesión
3. Nomás que cal saltar a cleta y prencipiar a caminar

O titular ye falso, claro, porque si que se’n charra. Prou que no se’n charra tanto como o castellan u lo catalán, pero “no se habla” quiere dicir zero, y ixo no ye verdat. Pero no quiero charrar d’ixe articlo, sino d’o que s’amaga dezaga ixe titular.

Quan bella cosa no existe no cal para cuenta en ella. Ixo ye asinas. Por ixo, un d’os argumentos emplegaus contra la lei de luengas, u contra cualsiquiera prebatina de fer bella cosa en aragonés, ye ixe tan zaragozano de “pues yo he estado mil veces en el Pirineo y jamás he escuchado a nadie hablar aragonés“. U catalán alli a la marguin dreita d’o país. Si una luenga no existe y si no bi ha fablants no cal lechislar, no cal protechir, no cal espardir, no cal refirmar.

Pero l’aragonés existe, y o catalán tamién. Atra cosa ye que os meyos que mos han tocau en suerte y a situgación de diglosia en totz os lugars, faigan que muitos aragoneses, y ye verdat, nunca no han sentiu charrar en aragonés u en catalán. Por eixemplo, en Aragón TV buena parti d’a programación ye adedicada t’amostrar lugars y dar presencia a la chent que i vive. O Sin ir más lejos d’o maitín, os reportaches d’Aragón en Abierto, o sobrebuen programa de Pequeños pero no invisibles… Tota ixa programación da presencia a l’Aragón que no ye Zaragoza, u que no ye urbano en cheneral. Pero mos amuestra tot? Prou que no. A gran mayoría d’os testimonios, la quasi entera totalidat d’as declaracions d’os habitants de lugars como Arens de Lledó, Echo, Beseit u Benás son en castellano. Una gran ocasión desaproveitada ta que os que “nunca no han sentiu que se charre aragonés u catalán” hesen puesto veyer a riqueza cultural que suposa tener un país con tres luengas.

Mos amagan ixa parti d’o país. O país amagau que pervive chunto y baixo lo castellano u la jota. As cosas que no esisten no cal controlar-las, lechislar-las, cusirar-las. Pero encara asinas, amagaus d’o mainstream aragonés, ixe atro país contina vivindo y creixendo. Gracias, como siempre, a la voluntat ciudadana. D’a chent como Juan Pablo Martínez u Santi Paricio que continan creyando ferramientas ta espardir l’aragonés en o rete, por eixemplo. D’a chent d’os lugars que contina charrando a os fillos suyos. D’a chent que s’aima una luenga chicota y no tien intincion de deixar que muera.

Ta ixo, encara que no solo, Internet ye un arma important. Tan important, que encara que en o mainstream aragonés muitas cosas pasen á amagatons, en atros puestos, en atras luengas, en atras realidatz, o triballo que fa muita chent por l’aragonés si que tien importancia. Y si no, leigan a entrevista que han feito a Juan Pablo Martínez y Santi Paricio Kevin Scannell d’Indigenous Tweets. Una chent que sape que, encara que l’Heraldo diga que no, en Internet, en Twitter, en Facebook y en os blogs, se’n charra aragonés.

With an estimated 10,000 native speakers, it is in a much more precarious position than its neighbors Catalan and Basque.  Nevertheless, there is a vibrant online Aragonese community that is working hard to develop free and open source resources to support and help revitalize the language.  One notable example is the tremendous volunteer effort that has gone into developing the Aragonese Wikipedia; weighing in at 25,000+ articles and 2.5 million words, it is believed to be the largest Wikipedia of any language, per number of native speakers.

Posts relacionados:

1. Diya entrenacional d’a luenga materna
2. A luenga que no esiste: o “romance”
3. Cilebrando o fin d’o pais

A ideya yera esplanicar por qué y cómo mos heba dau por creyar a chicota aventura (y una mica barrenada) que suposa Arredol. Asinas que prencipié por esplanicar o que mientres totz istos anyos hemos pensau d’iste nuevo periodismo, que, como digo, y pienso, no ye más que o viello periodismo pasau por un nuevo paradigma, nuevas ferramientas y nuevos modelos de negocio.

Tot ye dito en ista presentación que pasé ta ir charrando por dencima, y an que feba ficacio en temas como

• l’emplego d’o software libre
• a realidat d’una comunicación en dos endreceras
• l’emplego d’as ferramientas y sabers propios d’o periodista que no cal xublidar
• l’emplego de ferramientas libres (API’s, contenedors como Youtube, Google Maps, etc)
• presencia en retz más grans (Facebook, twitter, etc)
• ser conscients d’a realidat d’a gran quantidat d’información que se mueve en internet
• trobar o forau d’intrés que queremos cubrir, ta que mos leigan y ta poder financiar os nuestros prochectos.

En fin, un ratet bien agradable en a universidat que resume, pero no esplanica de raso, a siguient presentación, en que bi ha eixemplos de tot lo que deciba antis, como NewsCoop, Futbol Aragonés u Aragón Social, y, profés, Arredol.

Posts relacionados:

1. Lo que me fa goi d’ista profesión
2. 5 convencions d’o videoperiodismo que puez albandonar

Pero como que as redoladas son vivas, dilla d’as institucions, pero contando con ellas y porque ripresentan realidatz que la chent conoxe, me fa goyo charrar de dos iniciativas que no parten de Zaragoza, Uesca u Teruel (como muitas atras), pero que son tamien muestra de que o futuro ye present y que dende as redoladas “no capitalinas” se pueden fer cosas sobreintresants.

Por un costau, Ràdio Matarranya, que con dos horetas de programacion diaria fa un poder por vertebrar ixe territorio dende a suya luenga propia. Informacion local y d’a redolada en a luenga d’a redolada y con qui colaboro una vegada a la semana, os miercols enta la una, charrando d’internet y tecnolochia en l’espacio Buscant Conexió.

Por l’atro, Somonparty, una iniciativa d’a Feria de Balbastro, que ya va por a tercena edicion, y que se fera en as zaguerias d’o mes d’agosto. Somonparty preba d’amanar as tecnolochias y as suyas posibilidatz en a capital d’o Vero y presenta buena ripa d’actividatz sobre TIC’s en tres diyas intensos.

Amas fan un concurso de blogs an que bella presona ha decidiu apuntar istas Purnas, y que, ya que i somos, podetz votar a veyer si plega ta la final. Tamien digo que si a la fin recibo bell premio, iste estara integrament adedicau t’Arredol, o prochecto de diario dichital en aragones que somos prebando de tirar entabant.

No related posts.

Huei mesmo charraba d’as conexions, d’internet, d’o mundo virtual ta Ràdio Matarranya, como fere cada miercols a meyodias. A entreconexion dentre chents ye o nuevo mantra d’a nuestra sociedat. Antis se feba china chana, nomas con a chent de mas aman, y agora as nuevas tecnolochias fan posible que a entreconexion no tienga ni tiempos ni distancias.

Pero estar esclavos d’istas tecnolochias de vegadas causa problemas. Plegas enta Girona con o GPS enchegau, enta la carrera que has d’estar. No paras cuenta en l’adreza porque vas con chent que la conoix. Vas de borina y plega un inte que por circunstancias yes solenco. Prebas de gritar a os tuyos amigos con o “suelto”, que no tien bateria. Os tuyos amigos preban de gritar-te pero lis sale apagau y no se puede dentrar ni salir y tornar a dentrar. No tiens as claus d’o coche, nian sapes en que carrera en ye. No sapes l’adreza de casa. Profes, no sapes garra lumero de telefono d’os tuyos amigos de memoria, asinas que no puetz demanar atro movil ta gritar.

Asinas que mientres demanas unatro gintonic, prebas d’aconseguir dentre rumberos y clowns un movil con internet ta rechirar en o rete bell telefono en os contactos de gmail ta gritar-ne. Pero, por fortuna, as entreconexions 1.0 tamien funcionan, asinas que os tuyos amigos, que tampoco no tienen manera de trobar-te, deciden tornar ta zaga, enta o zaguer puesto an que t’han visto. Asti, con o gintonic, y con un  sonriso amplo te piensas: “Si, internet ye guay, pero como no tiengas pilas ni amigos…”

Posts relacionados:

1. Una foto d’ahiere feita huei, una remeranza de huei feita ahiere

Portalada d'a hemeroteca de Diario del Altoaragón

Ye un trango sobreintresant que aspero que puedan siguir atros meyos que tamien vienen d’o sieglo XIX, como Heraldo de Aragon. As hemerotecas suposan una valura adibida ya que premiten rechirar en as linias storicas que os meyos han veniu esplanicando en intes y puestos concretos.

A hemeroteca d’o diario de Uesca premite escar contenius por dia, por rango de calendatas y presenta tamien contenius trigatos por o propio diario, como as portaladas de fa 25, 50 y 10 anyos d’a calendata d’o diya. Norabuena a o Diario del Altoaragon por a iniciativa, que suposara una avantalla ta storiadors y alparcers y a veyer si atros meyos continan por ixe camin.

No related posts.

Dende a pachina oficial feita por as Cortes sobre o debate de Politica Cheneral se pueden ver totas as intervencions feitas, en radio, video y audio. En texto, en PDF, son as de Marcelino Iglesias, José Ángel Biel, Jesús Miguel Franco, Eloy Suárez, Nieves Ibeas y Adolfo Barrena. Mientres o debate Aragon Radio ha feito una retransmision en twitter, dende o canal d’Aragon Radio 2, tamien Heraldo u o Periodico d’Aragon han feito bella alportacion, encara que o Periodico nomas meteba articlos publicaus en a web. Aragon Radio, por cierto, ha prebato de estendillar o hashtag #debatearagon, pero me parixe que no ha teniu guaire exito.

Dentre os politicos nomas o canal de José Ángel Biel y o d’o gobierno d’Aragon han twitteyau en o debate. Juan Martin, por exemplo, ha trigau Facebook ta fer alportacions, pero no twitter. He trobato a faltar ixo si, que mas politicos y mesmo os politicos con perfil, comentasen en directo as intervencions. Meter un twitt de cabo cuan dende as Cortes, mientres as intervencions, no saca muito tiempo y puede fer mas partecipatiu lo canal, sobre tot si se contesta a las presonas que interactuan, ya sigan atros politicos, periodistas u atros ciudadantz.

De feito, istos diyas estie fendo una lista de twitter con os politicos aragoneses (politicos, no pas partius ni institucions). A lista se diz Politicos d’Aragon y os politicos que i son no son guaires. Dica agora son José Ángel Biel (PAR), Juan Martín (CHA), Luisa Fernanda Rudi (PP), Sebastián Contín (PP), Fernando Beltrán (PSOE), Roberto Fernández (PSOE). Cadagun tien una participacion esferent, y, profes, si tenetz bell politico mas que manque, agradeceria que lo escribises en os comentarios.

Por cierto, que dende Aragoneame fa tiempos ubrimos un adibidor de blogs de politicos aragoneses que se diz Blogliticos y an se pueden veyer os posts d’os politicos d’Aragon y fer comentarios sobre as suyas dentradas. Por ir ubrindo canals, con a vista ficada en que l’anyo venient tenemos eleccions ta lo gobierno d’Aragon y os concellos aragoneses.

No related posts.

Aragón es vino

O proyeuto se diz Aragón es vino y ye un adibidor de noticias sobre as denominacions d’orichen de vin d’Aragon, asinas como atras noticias que sigan d’intres ta os vins aragoneses o sobre o vin en cheneral.

Ye, como tot o que foi dende fa un tiempo, alazetau en WordPress y como toz os mios proyeutos tien alox en 1and1.es, que tos recomiendo. Con una serie de plugins he estau capable de adibir fuents de noticias tanto de webs oficials como de meyos de comunicacion que charran d’o vin. Amonico se ye emplindo de contenius, pero tos demanaria que si sabez webs de vin que puedan estar intresantz me las pasez.

Por l’inte no tien mas publicidat que a de Google AdSense, pero al estar un disenyo modular, se puede adautar ta ficar publicidat mas direuta si bella empresa, denominacion d’orichen o bodega ye intresada.

A web de noticias de vins d’Aragon: www.aragonesvino.com

No related posts.

Antiparti son os que s’han dau en dizir dominios culturals. O .cat, por exemplo, esiste no pas por una dezisión politica, sino por que a dezisión se prenió en l’Icann tenindo en cuenta o dominio cultural y lingüitico catalán, por o que mesmo instituzions no catalanas stricto sensu, emplegan o .cat.

En Aragón, por l’inte, as instituzions aragonesas han feito serbir asobén os dominios más abituals d’internet, como o .com, pero fa un tiempo que dende o Gobierno d’Aragón se dezidió impulsar l’emplego d’o .es. Ye una dezisión que se puede interpretar de muitas maneras, pero que tamién tiene un sentiu politico.  Pero o que yo quiero (y no estaré o primer, porque ya en han abiu atras propuestas similars) ye apostar por un sentiu estratechico.

Por a creyazión d’un dominio .ara

Impulsar un dominio propio “cultural” como .ara tiene abantallas (y bella desabantalla, pero ixas tos las dixo descubrir a busatros).

1. Por una banda premite a esferenziazión d’os dominios aragoneses de toz os atros dominios autonomicos españols (fueras d’os catalans que ya tienen o .cat)
2. Tamién suposaria un zereño inzentibo ta la creyazión de pachinas web, creyando más conzenzia dichital y mesmo identitaria
3. Premitiría integrar as muestras lingüisticas barias que bi ha en Aragón baxo un mesmo batiaguas cultural, fueras d’as esferenzias de luenga.
4. La imachen d’Aragón como puntera en o mercau teunolochico seria apuntalada con l’adopzión d’un dominio propio.

Garra d’istas razons ye una razón politica, sino estratechica. Puestar que bi aiga chen que beiga dillá d’a estratechia, no digo que no, pero dentre un dominio .es y un dominio .ara, ya que emos apostau por no emplegar os dominios chenericos como .net o .com siempre ye más esferenziador y por tanto, más imachen de marca apostar por ixo que ye propio y no por ixas atras cosas que podemos compartir y que, por ixo, mos fan uno más d’a ramada.

No related posts.

1.- Os dreitos d’autor no puede situgar-se en o cobalto d’os dreitos alazetals d’os ziutadans, como lo dreito a la pribazidat, a la seguredat, a la presunzión d’inozenzia, a l’amparo chudizial efeutiba y a la libertat d’esprisión.

2.- A suspensión de dreitos alazetals ye y ha de continar estando competenzia esclusiba d’o poder chudizial. Garra zierre sin sentenzia. Iste abanproyeuto, cuentra o estableziu en l’articlo 20.5 d’a Constituzión dixa en mans d’un organo no chudizial -un organismo pendient d’o Ministerio de Cultura español-, a potestat de biedar a os ziutadans españols l’azeso a cualsiquier pachina web.

3.- A nueba lechislazión creyará inseguridat churidica en o seutor teunolochico español, fendo mal a un d’os poquez campos de desembolique y esdebenidero d’a economía, aturando a creyazión d’empresas, metendo trabas a la libre competenzia y fendo que baiga más amonico a suya proyeuzión entrenazional.

4.- A nueba lechislazión proposada menaza a os nuebos creyadors y fa más defizil a creyazión cultural. Con Internet y os siguiens adebantos teunolochicos s’ha democratizau a creyazión y emisión de contenius de tota mena, que ya no bienen d’as industrias culturals tradizionals, sino de muitas fuens esferenziatas.

5.- Os autors, como toz os triballadors, tienen dreito a bibir d’o suyo triballo con nuebas ideyas creatibas, modelos de negozio y autibidaz asoziatas a las suyas creyazions. Prebar de refirmar con cambeos lechislatius a una industria biella que no ha sabiu adautar-se a iste nuebo entorno no ye chusto ni reyalista. Si o suyo modelo de negozio yera alazetau en o control d’as copias d’as obras y en Internet no ye posible sin faltar a os dreitos alazetals, abrian de buscar-se unatro modelo de negozio.

6.- Creyemos queas industrias culturals amenistan ta perbibir alternatibas modernas, eficazes, creyibles y adubibles que s’adauten a os nuebos emplegos sozials, en cuenta de limitazions desproporzionatas y ineficazes con o fin que dizen buscar.

7.- Internet ha funcionar de forma libre y sin d’interferenzias politicas reclamatas por seutors que preban de perpetuar biellos modelos de negozio y biedar que o saber umán contine estando libre.

8.- Desiximos que o Gobierno guaranzie por lei a neutralidat d’o Rete en España, debán cualsiquier presión que pueda fer-se, como marco ta o desembolique d’una economía sostenible y reyalista cara t’o futuro.

9.- Proposamos una berdadera reforma d’o dreito de propiedat intelectual endrezada ta su fin: tornar a la soziedat o conoximient, impulsar o dominio publico y meter mugas a os abusos d’as entidaz chestoras.

10.- En democracia as leis y as suyas modificazions han d’aprebar-se dimpués d’o debate publico y dimpués de consultar a toz os afeutaus. No ye de buen almitir que se faigan cambeos lechislatius que afeutan a dreitos alazetals en una lei no organica y que antimás ye feita t’atra materia.

Iste testo se ye publicando en milenta de puestos web. Si yes d’alcuerdo, fica-lo tamién en o tuyo blog.

No related posts.