Huei ha veniu ixe que dicen que ye aragones Victor Morlan ta dicir a os politicos aragoneses que no s’alticamen que en setiembre, sin saber encara guaire bien con que diners, continaran as obras d’as dos autovias d’o norte d’o pais. No totz os tramos, ye esclatero, nomas os que tiengan problemas de seguridat. En Binefar, dende Caldearenas enta Lanau u dende Monrepos enta Arguis. Cosa ha dito de la resta de retalladas en Aragon, muitas muit fundas, de anyos de retardos y aturadas, como a que decibamos l’atro diya d’a N-232.

Ye bien que no s’aturen totas as obras, u, dito de millor manera, que se re-enceten as obras ya aturadas, pero parixe que la estratechia d’o ministerio espanyol de Fomento ha quedau a la vista. Por trangos.

1. Decimos que no tenemos diners. Asinas femos eslampar a bellas concesionarias y prebamos a capacidat de leyaltat d’os aragoneses
2. Una vegada feita a comprebacion de que os aragoneses nomas chilan por as cantonadas (ye dicir, comarcas y concellos y no dende o gobierno) proposamos una reunion
3. Decimos que ya tenemos diners, que s’ha solucionau un problema en una semana
4. Proposamos continar bellas obras que no plegan ni a lo 40% d’o que ebamos aturau
5. Totz goyosos, sobre tot os aragoneses que son “de buen conformar”.

Asinas que agora as retalladas se localizan totas difuera Uesca. Amas, han feito un ERE encubierto en ixas obras de Uesca. Han feito marchar ta casa a os triballadors, porque as obras s’aturaban, y muitos d’ellos ya no en tornaran. As interpresas, amas, tampoco no saben cuan ni como cobraran en muitos d’os tramos y de feito, bellas d’ellas no saben ni si continaran con as concesions.

As retalladas agora parixen menos, sobre tot, tarcual han dau a noticia bells meyos de comunicacion aragoneses, dentre ellos Aragon Tv, pero as retalladas han suposau un grau problema ta interpresas, triballadors y sociedat civil, y de f eito, l’aturada d’obras continara en a mayor parti d’as zonas an que s’eba anunciato que s’aturaban.

No sere yo qui aplauda huei a Victor Morlan, aragones.

Istos diyas que charrabanos d’as retalladas de Fomento en Aragon uno nomas que leyiba que numeros. Fueras d’analisis identitarios o que amanixeba en os meyos cheneralistas d’o pais yeran numeros. Os numeros identificatius d’as carreteras que quedaban fuera d’o presupuesto y os millons d’euros que l’Estau espanyol ha decidiu dixar de emplegar en Aragon.

Obras en a N-232. Foto La Comarca

Por veyer a representacion d’a vesita d’os Calatravos que feban en Pena-Roja he estau iste cabo de semana en a redolada d’o Matarranya. Como ye natural en os lugars d’ixas redoladas no ye cosa nomas de numeros l’ature d’as obras d’a N-232. Fa 20 anyos que ya se aturoron as obras, y agora por tercena vegada, as maquinas, que encara remanen en as ribas d’a carretera, no se enchegan ni ta fer-las marchar d’aqui.

Ta la chent d’a redolada, que gosa tener rilacions en totz os lugars d’os arredols, tener una carretera segura por an circular y marchar de lugar en lugar. No ye custion de numeros cuan fa 20 anyos que asperas tener una millor carretera por an puyar y baxar lo puerto. Ye custion de seguridat, de vida u muerte, de no aber de chugar-se la piel cada vegada que vas a mercar a atro lugar, a chentar con a familia, a fer borina con os amigos.

Ixo son as retalladas de Fomento en o micro espacio an que se sufren, difuera d’os despachos d’os politicos. As declaracions institucionals no solucionan cosa cuan o que quiers ye que as maquinas que agora parixe que pastan dentre os pins faigan a la fin o suyo triballo y rematen una obra que prencipio fa mas de 20 anyos.