José Ángel Biel (PAR)

Pensar en politica y politicos en Aragon ye pensar en José Ángel Biel. Con una estendillada vida politica, a mayor parti, en os esferents gobiernos d’o pais, Biel ha contribuyiu, en istas zagueras decadas, que l’autonomia aragonesa siga como ye y no d’atra manera. José Ángel Biel, president d’o PAR s’autodefine como politico, porque li fa goyo fer politica, y porque encara veye en l’actividat politica una mica de sentiu de l’humor.

Dende chicorron tiengo vocacion politica y creigo que ye un noble arte, encara que agora quedan menos artistas d’a politica. Pero tamien bi ha una condicion que s’amenista, que ye lo sentiu de l’humor. O diya que yo tresbata o sentiu de l’humor dixare d’intresar-me por a politica.

Seguntes me dicio José Ángel Biel istas estaran as suyas zagueras eleccions, y no tornara a presentar-se. Pero as eleccions estaran complicadas, y o risultau puestar que siga prou achustau. Mientres ista pre-campanya lo PAR ha charrau tanto d’o suyo largo gobierno con o PSOE (12 anyos) como d’as politicas “de centro” que s’habrian d’aplicar agora, dixando os posibles pactos ta dimpues d’o diya 22.

Aragón se la chuga en istas eleccions, por o bipartidismo, por os vientos antiautonomistas, pero nusatros somos un partiu de centro aragonesista que prebara d’equilibrar as cosas. Os meyos de comunicacion imposan o bipartidismo, pero parixe mentira que una Comunidat historica con mil anyos d’historia no tienga mas conciencia. Si baxa lo voto aragonesista ye un defecto d’Aragon. Y ixo ye un handicap ta ista tierra, as comunidatz con mas conciencia rechional tienen mas favors. Os nuestros argumentos son a leyaltat historica y l’estatuto, que ye o resumen d’as enerchias d’Aragon. O problema que tenemos ye que bi’n ha asabelos aragoneses que no creyen en Aragon. Aragoneses que no esfienden ista tierra y ixo ye prou grau.

Precisament porque o PAR no dixa esclateras de manera publica as suyas intincions dimpues d’o 22 de mayo, li pregunto a Biel por as condicions que o PAR posaria a un pacto post-electoral.

Bi ha tres condicions, concarar a crisis economica potenciando os sectors interpresarials, o desenvolic de l’estatuto con a ley d’auguas u de capitalidat y aconseguir que Aragon tienga mayor peso en Espanya, y que Madrid reconoxca o caracter bilateral d’as rilacions dentre Aragon y Espanya.

O PAR ye un d’os unicos partius d’o mundo a lo que mos chitan en cara que sigamos muitos anyos en o gobierno, y no conoxco garra partiu politico que no quiera estar en o gobierno. Nusatros femos lo que femos de buena fe, de vegadas salen mal as cosas, pero si salen mal cosas ye porque femos cosas. Pero te digo una cosa, yo ye a zaguera vegada que me presento.

O venient president d’Aragon habra de fer cosas tan duras ta salir d’a crisis que ye cuasi seguro que no repetira. Pero tamien digo atra cosa, si yo estase o president cada lunes daria la cara en as Cortes. Yo no podria ser president d’as Cortes porque no me dixarian dicir a mia opinion.

A crisis, y l’ature marcan istas eleccions, ye esclatero. Totz os partius son ufrindo as suyas recetas, y mesmo lo president d’o PAR diz que o venient president no tornara a estar president por ixas mismas midas que habra de fer. ¿Pero cualas son as midas que proposa o PAR?

Cal agafar o presupuesto como si lo fese un pai de familia. Cal sacar dinero d’organizacions entremeyas y inversions que s’han feito en epoca de vacas gordas que agora no cal fer y adedicar-lo a creyar empleo, a l’instituto aragones de finanzas… A cucha quiere continar fendo politicas socials a cualsiquier pre, pero ta que l’estau d’o bienestar funcione s’ha de creyar empleo. Cada aturau menos ye un contribuyent mas. Cal sacar diners de muitos puestos, pero si lo digo agora… Agora ye l’inte de mantener lo feito, crexer o invertir estara mas deficil, pero no se pueden financiar cosas no productivas. Cal planteyar-se un presupuesto de base cero. Os partius de cuchas xublidan que repartir a riqueza si no se puede sostener no sirve, tampoco no a politica d’a dreita de redistribuyir con leis de mercau. O mundo va a politicas de centro con o millor d’as dos opcions.

Un d’os aspectos mas controvertius d’o zaguer gobierno aragones ha estau a chestion d’as interpresas con capital publico, y no nomas a chestion, que tamien a manca de transparencia d’ixa chestion. De feito, muitas d’istas interpresas (Salvia, Pla-Za servicios aéreos u Pyrenair) ya no funcionan por os risultaus catastroficos.

Garra d’ixas interpresas son as que ha chestionau lo PAR. Lo digo en broma, pero ye verdat, funcionan totas as que ha feito lo PAR, funciona Dinopolis, funciona Walqa, Motorland…Bella cosa, de todas trazas, ha fallau. Cal reordenar as interpresas publicas y contar con mas participacion privada en a corporacion interpresarial publica. Aramon ye un buen exemplo. A participacion 50% con Ibercaja ha estau una magnifica ideya. Ha feito un gran triballo por o sector d’a nieu, encara que la crisis ha aturau bella cosa.

Pero Aramon no ye tien nomas una parti economica, a parti meyoambiental ye una d’as cosas que mas creticas ha debantau, por exemplo en Castanesa u Canal Roya.

A protesta ye menima. A chestion d’o territorio ye modelica y no tiene garra a veyer con o que se fa en o Levante, por exemplo. As posturas de vegadas son muit radicalizadas, y se mueven muito, y por ixo parixe que bi’n ha mas contestacion. A chent que i vive ye deseyando que se faigan cosas, y as cosas que se’n faigan s’han de fer contando con a chent que vive en as redoladas. En a natura s’ha d’actuar como en un chardin, amillorar o meyo ambient.

¿Y Sodemasa?

Ye un mito que siga un rete d’o PAR. Si ixo estase asinas totz estarian d’o PAR, pasa igual o mesmo con as redoladas. A mediocridat fa que no se profundice en as ideyas. Como deciba Proust, bi ha mas presonas que ideyas. O tema d’o Sodemasa ye un mito, de feito, bi ha chent que se mos quexa precisament por ixo, como con as redoladas. As redoladas resuelven os problemas d’os 522 monecipios de menos de 500 habitants. As redoladas son l’unico programa presupuestario que no ha aumentau. Cal reconvertir, ixo si, as diputacions provincias en corporacions provincials. No tien sentiu que a DPZ, a mayoria d’os diputaus sigan d’a ciudat de Zaragoza, an la provincia no tien garra competencia.

O PAR si que tien esclatero o que fera con a lei de luengas. Cal retirar-la u reformar-la, mas que mas por o tema d’o catalan, porque “a chent no entiende que o catalan siga una d’os cenyos d’identidat aragoneses“.

No refirmamos a lei de luengas y si sale un gobierno con o PAR a cambearemos u retiraremos. L’alcalde de Peñarroya de Tastavins, amigo mio, si que ye a favor d’o catalan, pero a masa social d’o partiu no veye esclatero que o catalan siga un cenyo d’identidat.

Atro tema que José Ángel Biel contesta cuasi sin dar tiempo a fer a pregunta ye o tema hidraulico

Isto ye esclatero. Chestion d’a reserva hidraulica de 6500 hm3, como diz l’estatuto y calendario d’execucion d’as obras d’o pacto de l’augua, que costaria fer a tercena parti d’o que costo a T-4. En ixas obras dentran as pactadas en a mesa de l’augua. Recreximient meyo de Yesa, Biscarrues, etcra. Cuan se’n faigan ixas obras ya no se charrara d’o trescole y se mos remataran os temas de discutir.

Como Costa, diz Biel, a identidat se reparte a o 50%

Soi espanyol porque soi aragones y soi aragones y espanyol. Sin a Constitucion d’o 78 Aragon no tendria l’estatuto que tien, pero Aragon ha de tener mas peso en Espanya.

Dica aqui a intresant charrada con José Ángel Biel, que podez sentir en audio, una mas d’a serie d’entrevistas con os candidatos d’os partius mayoritarios ta la presidencia d’Aragon. A serie prencipio con Adolfo Barrena, contino con Nieves Ibeas y habria de continar con Luisa Fernanda Rudi y Eva Almunia.

Nieves Ibeas (CHA)

As Cortes d’Aragon son cuasi buedas. Ya han rematau os plenos y os partius s’adedican, de raso, a parar as eleccions. Dezaga d’as puertas d’as collas parlamentarias  s’esmolan os discursos y se descansa d’os kilometros feitos en a pre-campanya que bien luego sera campanya. En un d’istos descansos dentre viaches Nieves Ibeas me recibe en o suyo despacho y prencipia charrando en aragones, lo que no ye guaire cutiano en os politicos d’o pais, ta dimpues, y ya en castellan, chunir a figura de Nieves Ibeas con a d’o partiu que ripresenta.

Antis d’encetar quiero mandar esprisions a os que me leigan y ascuiten y quiero animar-te a seguir con a dinnificacion de l’aragones. Me ye dificil desligar a presona d’o compromiso por o pais, pero prebo de vivir a mia vida presonal con total normalidat, siempre contando con o deficil que ye fer-lo por tiempo que s’adedica a la vida politica. Soi una presona con muito animo, me ha tocau vivir situgacions dificils dende que plegue a presidir CHA, y la chent heba de recuperar-se d’o desanimo d’os zaguers risultatos.

As zagueras eleccions CHA baxo en votos, en responsabilidatz y ixo esdevenio en un recambeo en o partiu, en cargos y intincions. Ta istas eleccions que, seguntes as encuestas, decantaran as posibilidatz de fer gobiernos por poquetz votos, l’animo de CHA ye bueno, y a mesma Ibeas declara estar disposada a prener responsabilidatz ta influyir en ixos gobiernos.

Han estau anyos de muito triballo interno y en a oposicion, pero agora somos un partiu mas maduro. Queremos un Aragon mas chusto, mas solidario y mas arguelloso de si mesmo. Bi ha cosas que se pueden fer en a oposicion pero atras nomas se’n pueden fer dende o gobierno. Pero ixo no puede estar a cualsiquier pre, como decidimos no fer en a zaguera lechislatura en o Concello de Zaragoza.

Una d’as posibilidatz que planteyan as encuestas ye un gobierno tripartito con PSOE y IU. De feito, a luita electoral estara, y isto ye un chudicio presonal mio, en l’equilibrio dentre propuestas conservadoras u progresistas (por decir-lo d’una traza cheneral). CHA, IU y PAR son en a baralla por definir ixe equilibrio.

Somos triballando, en primeras, para ganar a confitanza d’os electors. A partir d’o 23 se veyera. O que diga Biel sobre o tripartito no tien garra importancia. Ha perturbau a politica aragonesa mientres asabelos anyos y ha enganyau sistematicament a os aragoneses y ha confundiu a dimension institucional con a partidista, premitiu por o suyo socio de Gobierno. Ye esclatero por atra parti que CHA no pactara con o PP ta o gobierno d’Aragon. Nusatros no renunciaremos ni a politicas de cuchas y socials ni a la esfensa d’os intreses chenerals d’Aragon. En ista lechislatura s’han debatiu temas alacetals t’o pais como a deuda u a la financiacion y o gobierno no ha esfendiu os intreses d’Aragon.

Con a situgacion actual de crisis y debant d’os alcuerdos de financiacion pactaus en a zaguera lechislatura Nieves Ibeas marca as linias basicas que han de marcar un gobierno an CHA i siga.

Han habiu oportunidatz d’oro que s’han tresbatiu, como o pago d’a deuda tributaria, y no i habra unatra ocasion. O gobierno PSOE-PAR ha regalau diners a o gobierno central. Somos un pais dificil de chestionar, pero cal guaranciar servicios publicos de qualidat ta totz. Pero encara se pude intervenir dende os presupuesto chenerals de l’estau, pero en l’inte que dixas d’estar se xublidan d’as carreteras, d’o Canfranc, d’os pasos a livels, etc. Por atra parti bi ha un porcentache d’o presupuesto d’a Comunidat Autonoma que no tien control parlamentario y que premite construyir interpresas ad-hoc. Por exemplo, Sodemasa, que tien mas presupuesto pero tien menos recursos porque bi’n ha mas presonas en areas directivas que en o triballo de campo por os retes clientelars. Bi’n ha proyectos que nunca no s’habrian d’haber feito, Pla-Za servicios Aereos, Savia…en garra d’ellos s’ha puesto fer una comision de investigacion.

Ha dentrau con fuerza en a campanya tamien o tema d’Aramon, en que a participacion ye 50-50 dentre Ibercaja y o Gobierno d’Aragon. O sector d’a nieve “un sector estratechico ta o pais“, seguntes Ibeas, no puede estar hipotecau por intreses particulars y prebendas, como “a sinya d’alcuerdos en Sallen, an se comprometio a fer una serie d’alportacions a o concello por o sulero pero que a la fin no ha bosau garra d’ells“.

Ha d’haber colaboracion con as caxas, y somos en contra con o proceso de bancarizacion, pero no a cualsiquier pre, porque o control sobre as caxas premite adedicar parti d’os beneficios a obra social, y si no bi ha ixe control s’achiquira ixe alporte. Amas, si CHA plega t’o gobierno en un anyo habra una lei d’a montanya, con partecipacion ta alzar o patrimonio natural, premitindo o suyo desenvolic.

A definicion de sectors estratechicos ye clau ta salir d’a crisis, seguntes Ibeas.

No se puede salir d’a crisis sin parar cuenta en as chicotas interpresas. Antimas d’o sector lochistico, que cal empentar, porque por agora iste sector no mos salvaria si OPEL caye, por exemplo. Habria de desenvolicar o sector agroalimentario que ha crexiu un 4% pero encara sin tener un impulso firme ni una marca.  Tampoco no bi ha una politica industrial esclatera. En Uesca a cayita ha estau tremenda. No puede ser que a segunda ciudat d’Aragon tienga tan poco teixiu industrial. Cal apostar por l’alta tecnolochia que cheneren valor adibiu. Diversificacion y internacionalizacion. A inversion publica ha d’apostar por istas opcions, ta ixo cal estalviar y controlar bells gastos y o sobrecoste d’as obras publicas, pero tamien aumentar os ingresos. Impuestos progresivos, recuperacion de l’impuesto d’o patrimonio y ixo si, aduyas fiscals ta la empresarizacion chovenil u rural.

CHA ha esfendiu siempre una politica hidraulica esferent a la planteyada por a mayoria social. S’oposan a o recreximient de Yesa “que ye prevista ta un futuro trescole” u a la construccion de Biscarrues.

Construyir istos entibos suposa anegar espacios historicos, de valor patrimonial y sobre tot, a propia vida d’a chent que i vive. En Yesa no se puede ir ta zaga por que l’entibo ya ye construyiu, pero no se puede continar ta debant. Si en Biscarrues se pueden fer balsas laterals ¿ta que s’amenista construyir l’entibo?¿Cualas son as necesidatz reyals d’as redoladas de secano?

¿Y Mularroya?

Mesmo Perico Arrojo yera a favor en un prencipio, pero dimpues cambearon as cosas y plego lo debate. En o partiu se debate y se decide en ixe inte por exemplo Gran Scala, no y Mularroya si, pero con o mayor cudiau. I abra chent en o partiu que hese quiesto oposar-se a Mularroya y continar con Gran Scala.

CHA refirmo a lei de luengas, con un pacto con o PSOE dica que a la fin estio aprebada, pero o proceso d’o desenvolic d’a lei ye estando tan amonico que parixe que no ha estau aprebada.

Bi’n habio una traicion en l’estatuto, quan PSOE, PP, PAR y IU pactoron que no se charrase d’as luengas en o nuevo texto. Totz istos anyos s’han tresbatiu. A lei no ye la nuestra. A lei ye d’o PSOE pero s’apreboron muitas d’as nuestras enmiendas. Somos arguellosos d’a dinnificacion que suposa, a constitucion d’as d’os luengas, pero encara queda camin por fer. Agora o gobierno continara xublidando a lei u l’habra de desenvolicar.

¿Y sobre identidat propia?

Mas aragonesa que espanyola. Si CHA gobernase o identidat aragonesa estaria prou mas desenvolicada.

Unatra charrada de muito mas d’os 15 menutos que yo planteyaba, que podez sentir entera en audio. A serie, como ya sabez, prencipio con Adolfo Barrena y continara con os candidatos a o gobierno d’Aragon d’os partius que agora tienen ripresentacion parlamentaria, ye dicir Eva Almunia, Luisa Fernanda Rudi y José Ángel Biel.

Adolfo Barrena (IU)

Ya han rematau as sesions de Cortes d’Aragon quan Adolfo Barrena me recibe en o suyo despacho. No bi ha guaire actividat por os pasiellos, pero en a colla parlamentaria d’IU preban de fer bella cosa ta protestar por a descatalogacion de Canal Roya como espacio protechiu. Mesmo antis de prencipiar a entrevista, Adolfo Barrena prencipia a charrar d’ixe tema.

Si tenesenos capacidat nusatros rematariamos con o chiringuito que ye Aramon. En Bruselas s’eslucernian con iste holding. No podemos fer de l’esqui un monocultivo. Son dos socios, uno Aramon y atro Ibercaja que no son interpresa publica porque son 50%. A interpresa decide fer una ampliacion. Uno d’os socios ye o que mete diners y l’atro ye o que decide sobre desenvolic urbanistico, declaracions ambientals, etcra. Ixe socio ye juez y parte. Si bi ha deficit, se fa ampliacion de capital, y un d’ixos socios mete a suya parti d’a bolsa comun. U siga que lo bosamos dentre totz.

Adolfo Barrena se define como “politico no profesional“. O suyo tiempo como diputau ya va ta 8 anyos, y aspera repetir en istas prosimas eleccions ta esfender a politica d’IU.

IU alporta una anviesta de cuchas en o contexto de l’estau federal, de traza internacionalista. A solucion d’os problemas supera o territorio propio, en iste caso, Aragon. Tenemos tamien un component verde. IU no ye un partiu ecolochista, somos verdes, blanco d’a paz, royo reivindicatiu y internacionalista, l’arco Sant Chuan d’a libertat sexual y profes, o tricolor republicano. A nuestra intincion ye trencar o bipartidismo, dende o nuestro movimiento politico social.

Os risultaus dictaran sentencia sobre os alacetz d’o nuevo gobierno. En a intincion de Barrena se ve esclatera a no voluntat de pacto con o PAR u lo PP, ta no refirmar un gobierno de dreitas. Tampoco no ye o PSOE un partiu de cuchas, seguntes Barrena, que apuesta por una mayoria d’IU, que veye, profes, una basemia.

O nuestro obchetivo, que tenemos os pies en o sulero, ye ser prou decisius ta chirar a fer politicas de cuchas. Si o nuestro voto ye decisiu no i abra garra president u alcalde d’o PP u d’o PAR. Con o nuestro voto no i abra garra coalicion an que aparixca o PAR. Os nuestros votos nomas refirmaran alcaldesas d’IU, CHA u mesmo d’o PSOE, siempre que a negociacion se faga sobre programas socials de cuchas, y no nomas a negociacion con a suma de votos. A Lei de muerte dinna, u lo programa “estonoesunsolar” d’o Concello de Zaragoza u la progresividat fiscal, son exemplos d’ixa traza de fer as cosas.

O candidato d’IU quiere dixar tamien un mensache a os electors. Barrena remera a os votants que remeren qui ha estau con ells en as manifestacions, en a vada, qui ye contra la guerra de Libia. Seguntes Barrena os candidatos d’IU fan un contrato, sinyau con a ciudadania, ta cumplir o programa, que incluye tamien, midas contra la crisis “a meyo o luengo plazo, no nomas t’Aragon”.

O capitalismo ha fracasau y cal reformar o capitalismo, pero as midas que se son prenendo nomas refirman o modelo. Cal sentar os alacetz ta un cambeo de modelo, cambeando estructuras interpresarials u financieras. Cal recuperar ta o sector publico campos basicos como as comunicacions, a electricidat, a banda ampla, o ferrocarril. Encara que no se puet fer d’a nueit t’o maitin, cal racionalizar os consumos, repensar a productividat, fer programas de formacion profesional u d’investigacion que encara no se son fendo. Faciemos 100 proposas que conforman un programa coyuntural por a situgacion. Creyar empleo puya as cotizacions, incrementa o consumo, y creya nuevas posibilidatz. Ta ixo s’amenistan tamien inversions publicas que creyen triballos coyunturals t’aduyar a os mas de 100.000 aturaus, pero tamien a tota la resta d’a ciudadania. A crisis no l’han de bosar qui no tien culpa d’ella, sino ingresar mas, mesmo puyando impuestos a la chent que mas ingresa, de traza solidaria.

A revision d’os gastos publicos, y as infraestructuras mal pensadas (charra Barrena de l’aeropuerto de Uesca, u de Motorland) ye un d’os puntos claus d’o modelo que proposa IU. Ixas infraestructuras ya son feitas y cal repensar-las.

Antimas mos metemos cacherulo, y decimos pues chestionamos nusatros Uesca, que si yo estase o gobierno espanyol diciria “ta vusatros”. Y mesmo agora tenemos o problema de Caudé, an s’han gastau 50 millons y encara no se sape ta que se emplegara. Gran Scala, pasara a la historia, os Chuegos Olimpicos 2022 no s’amenistan, Motorland, Walqa… Creyemos que s’amenista en primeras trasparencia, gastos, amortizacion, y no queremos que en haigan diners publicos ta bosar isto. O Gran Premio de motos han chenerau 342 triballos, o maximo de  5 diyas y mesmo de 6 horas. Dicen que ha chenerau 32 millons d’euros, pero que mos den o numero d’entradas que s’han bosau u as declaracions de l’IVA d’os establimentz ta veyer quants diners n’ha chenerau.

Sobre a politica hidraulica IU refirma a cota meya d’o recreximient de Yesa y a construccion d’o clamau “chicot” Biscarrues. Son alcuerdos d’o Pacto de l’augua que IU refirmo y que encara refirma, encara que no refirmaran a manifestacion d’os regants ni l’entibo gran de Biscarrues.

En Biscarrues siempre hemos apostau por as balsas laterals, que aturen l’augua en caso d’avenida d’o rio. A nuestra politica d’augua ha d’estar alcompanyada d’una politica de precio de l’augua, social y progresiva. Ha de solucionar problemas economicos y medioambientals, contaminacion, caudals ecolochicos, etcra, y tamien una chestion alacetada en a unidat de cuenca.

Adolfo Barrena voto en contra d’a lei de luengas d’Aragon por considerar que no guaranciaba a coficialidat y a obligatoriedat d’a inclusion en o curriculum d’os centros.

En especial mos preocupa o tema de l’aragones en todas as suyas variedatz, porque o catalan no mos alticama tanto, porque tiene a suya fuerza. As luengas, fueras que no somos nacionalistas, amenistan proteccion, y tamien os suyos fablants. Triballaremos ta promover a oficialidat, y a obligatoriedat de que siga luenga vehicular en o curriculo escolar. Ta ixo no amenistariamos reformar l’estatuto, que ya no vieda ista coficialidat, y que estio un tema delicau en a reforma de l’Estatuto, que a la fin acepto una formula proposada por nusatros.

Sobre identidat, Barrena, naxito de Madrid, diz no tener apego por banderas ni identidatz

Me fa goi a bandera republicana, pero me siento ciudadan y sobre tot internacionalista. Ye lechitimo que totz queramos ta la nuestra tierra bella cosa millor, pero tiene o mesmo dreito un ciudadano de Soria u de Teruel. Y ya la transicion naxio con un vicio que son os rechimens fiscals navarros y vascos, que cal igualar por elevacion, pero ta totz igual. Ye mas de cuchas buscar l’equilibrio y a redistribucion. O nuevo rechimen economico d’as autonomias va bien ta las autonomias ricas, pero l’estau tresbate capacidat de redistribucion ta las comunidatz menos pobladas u mas pobres.

O 22 de mayo as proposas d’IU, con as d’a resta d’as formacions, s’examinan en as urnas. Barrena creye que caldra sinyar alcuerdos ta gobernar y la suya apuesta pasa por no refirmar a la dreita u centro dreita.

Cal plegar a alcuerdos y veigo mas capacitadas ta fer-lo, porque nusatros, estando reyalistas, ye mas complicau, a las companyeras Eva u Nieves.

Una ampla charrada con Adolfo Barrena que podetz sentir entera en audio (y en castellan) y que ye a primera d’as que he proposau de fer a totz os candidatos d’os partius con representacion en Cortes ta lo Gobierno d’Aragon, Nieves Ibeas, Luisa Fernanda Rudi, José Ángel Biel y Eva Almunia.

Podez trobar-la tamien en goear.com

L’atro diya estioron en casa Manu y Mari ta fer-me una chiqueta entrevista sobre o mio blog, que iste anyo fera seis anyos. O domingo l’emitioron en Clic! d’a television an triballo, Aragon Tv. Iste ye o risultau.

El otro día Olivier Vilain, periodista en Radio Ebro, el Periódico de Aragón o Intereconomía, me entrevistó para Radio Ebro, dentro de una sección sobre los blogs en Aragón. La conversación dura alrededor de 20 minutos, y dio tiempo para hablar de mis proyectos (solos o compartidos), de periodismo, del periodismo en Aragón, de los blogs, de los políticos, de las nuevas tendencias, de internet y de otras muchas cosas. Un rato agradable, desde luego, y en el que, a pesar de tantos minutos, se quedaron muchas cosas por hablar. Hablar es la clave o ¿no?.

Este es el resultado.

Grazias a jgregore ya ye disposable en youtube l’espazio que ayer o programa “La vida sigue igual” adedicó a l’aragonés. Tos pencho os tres bideos en que ha trestallau l’espazio. (Yo soi en o segundo trozet, por zierto)

Viaje relámpago a Barcelona. Cerveza en el Antiquari y ruta habitual. En el entreacto reencuentros con el pasado y caminos furtivos por la noche. Mientras yo iba por el desierto hacia allí, vía internet me llegaba una foto desde la plaça del rei. 

Dieguito el malo acababa de presentar su libro , La Fuga de los 45 en la librería donde yo trabajaba. Después, le entrevisté, junto con otro compañero para Radio Contrabanda. Más tarde, los editores le timarían, y acabaría fugándose una vez más, para después ser detenido de nuevo. En la foto se me descubre a mí, detrás, esperando a Dieguito. Un tipo peculiar. Producto de unos tiempos oscuros e hijo de su propio destino. Dieguito está en la cárcel, donde ha pasado la mayor parte de su vida, soñando con escapar, soñando con ser libre. Ahora cuenta los rastros del plomo en su cuerpo. Sus hazañas. La organización de la fuga más grande producida en España, cuando por las alcantarillas de la calle Rosselló salieron de la Modelo de Barcelona. Pronto lo volveremos a ver en televisión, según me cuentan. Historias que merecen ser contadas y que trascienden los límites del bien y el mal, seguro.

Pinchando en el reproductor se escuchará la entrevista que edité para la radio hace unos años. Era su primer día en tercer grado, y se acababa de reunir con parte de su familia.  En pleno Paseo de Gracia de Barcelona Dieguito nos contaba sus sueños, esperanzas y recuerdos.

Etiquetas: