A interpresa electrica Endesa ye fendo istas semanas una campanya de publicidat baxo lo lema “La actitud azul“. Mos bombardeyan por totz os medios posibles con a campanya, con presonaches conoxius, invadindo os espacios de television, d’internet, de radio… Yo no puedo dixar de pensar en o PP (tamien azul) quan veigo os anuncios, pero puestar que siga bella cosa presonal que en tiengo.

Lo que si que no trago ye que mos esplaniquen totas as cosas buenas que dicen fan ista chent d’Endesa, mas que mas con o meyo ambient. Me remero d’a reversion de Chanovas y totz os problemas que han metiu a las familias que habioron de marchar de casa suya por un entibo que nunca no se facio.

Me remero de como remataron dixando ixuto lo rio Eume en Galiza ta fer unas obras.

Me remero, sobre tot, d’a Patagonia chilena, an que Endesa Chile quiere fer una macropresa devant la oposicion de mas d’o 73% d’os chilens por as afeccions meyoambientals y mesmo culturals por o desplazamiento de comunidatz mapuches que creyara ista macropresa.

Ista ye l’actitut azul d’Endesa? De verdat? Por que sera que de istas cosas no charran en os suyos “evocadors” anuncios? L’actitut d’Endesa ye de color negro, y no pas azul.

No ye a primer vegada que charro d’o prexin que teneba o mio amigo Joaquin Macipe de dibuxar un Aragon d’auguas eternas crebau nomas por una tuberia por o meyo ta portar l’augua luen d’aqui. Tamien charra una canta d’o Comando Cucaracha d’ixe Aragon maritimo.

Os nuestros politicos tienen ista vision bien ficada en o tozuelo, baxo lo cachirulo, y por ixo empentan y empentan y empentan a construccion de Biscarrues u lo recreximient de Yesa u a construccion de Mularroya, Santaliestra, u mesmo de Lechago, ixe entibo que feito dengun no quiere emplegar. O fracaso de Lechago, dimpues de malmeter tierras y lugars, ye un exemplo de como se fan as cosas en iste pais. L’entibo de Lechago, a sinrazon d’os entibos feitos por fer, ye a mesma sinrazon que mos leva enta la siguient basemia d’os nuestros politicos.

Antimas d’a vision d’ixe Aragon maritimo, a os politicos nuestros lis fa goyo que ixe mar tienga islas. Islotes de tierra firme que s’empleguen por un costau ta casinos y por atro ta aeropuertos. Un mar Aragon comunicau por avions y que tienga tierra firme ta chugar-se’n os cuartos. Profes que ixa basemia politicoaragonesa leva o mesmo trango que l’entibo de Lechago. Mos lo recentan huei bien en l’Heraldo y o Periodico. Pyrenair dixara de volar, l’aeropuerto de Uesca tornara a estar una pista de cemento, l’aerodromo de Teruel, ya feito, no sirve ni ta aparcar as motos que van ta Motorland. D’ILD y Gran Scala casi que ya no cal charrar.

Pyrenair contina os trangos de l’atra companyia aerea encetada por o Gobierno d’Aragon, Pla-za Servicios Aereos. Y as mentiras de Pyrenair encara quedaban mas esclateras cuan o 31 de chinero mos deciban que a demanda de vuelos dende Lleida yera prou gran, y 10 diyas dimpues dixan de volar, por exemplo. Una politica de planificacion entivocada que leva a o fracaso economico, ixo si, con os diners de totz.

L’aspiracion de Joaquin Costa de “despensa y escuela” ha quedau ta istos politicastros nuestros en “entibos y aeropuertos (y casinos)”. Pero como diz Trasobares mos dicen de tot si dicimos isto antis de que se vaigan por o sumidero os millons publicos. Os agoreros que somos veyemos agora que os edificios d’a Expo 2008 continan sin poder-se fer servir, que os barcos de l’Ebro chitan millons d’euros ta la basuera cada anyo, que l’aeropuerto de Caude ye un disparate, que l’aeropuerto de Huesca no remata de despegar, que os diners publicos ta Ryanair en Zaragoza sirven ta que as demas companyias marchen en cuanto que no tienen aduyas, que Lechago yera un entibo que no teneba viabilidat economica, que ILD nunca no construyira Gran Scala…continamos?

Devant tota la presion que ye fendo o gobierno d’Aragon, seguiu por PP y IU, asinas como os regants, cal demanar a la ministra que faiga caso d’os informes tecnicos que no son favorables a la construccion de l’entibo de Biscarrues. Como parixe que ixos informes remaniran en un calaixo, puez ninviar una carta a la ministra dende l’aplicacion creyata en o portal Actuable.

El embalse de Biscarrués-Mallos de Riglos supondría la desaparición de un tramo del Río Gállego de gran belleza. Por sus valores ambientales y sus condiciones para el turismo náutico, este tramo de río está contribuyendo en estos momentos al desarrollo socioeconómico de la comarca de la Galliguera, que recibe cada año 80.000 turistas para disfrutar de actividades de rafting y kayak.

El rechazo social de los habitantes de esta comarca y de multitud de colectivos ambientales, usuarios recreativos, y asociaciones empresariales, se ha visto de nuevo respaldado por un estudio técnico, en esta ocasión de un organismo oficial de prestigio como es el CEDEX, consultado en el marco de la inminente declaración de impacto ambiental sobre el proyecto de embalse.

Sin embargo, la inercia ideológica e intereses electorales de los partidos políticos del gobierno de Aragón (PSOE-PAR) han provocado que estén realizando presiones políticas sobre el ministerio de medio ambiente para desestimar ese estudio y las prescripciones técnicas que en él se contienen. La ministra de medio ambiente, Rosa Aguilar, ha cedido a esas presiones realizando declaraciones a favor de la continuidad del proyecto.

Demostremos a estos partidos políticos que no todos sus potenciales votantes están de acuerdo con la estéril y evitable destrucción de un río hermoso. Vota ya para paralizar la desaparición del Río Gállego en Biscarrués, preservándolo para el disfrute de las generaciones presentes y futuras.

Demana a la ministra que ature Biscarrues.

Yesa, no pas!

O domingo, 22 d’agosto, a las 12.30 os vecins d’Artieda feran una concentracion ta protestar contra o recreximient de l’entibo de Yesa. O puesto de trobada estara lo puent d’Artieda. Cal refirmar a os vecins d’o lugar, a la chent de l’asociacion Río Aragón, y a totz os que creyemos que atra politica idraulica ye posible. Una politica que no s’alacete en afogar lugars y chentz, que no pase por dencima d’os periglos, y que rispete os paisaches, a cultura y as radices.

Soz convidaus a venir-ie!

Si queretz saber mas sobre Artieda y o periglo que corre a suya forma de vivir con o recreximient, tos dixo l’enrastre a un triballo d’un d’os suyos chobens, Adrián Solana.

Yesa, no pas!

A traicion, como siempre, huei sabemos que o Ministerio espanyol de Meyo ambient (sic) ha dau luz verda a lo recreximient de l’entibo de Yesa. Asinas mos lo recentan (y digo bien) l’Heraldo y o Periodico.

En pleno sieglo XXI o PSOE contina fendo o mesmo que facio lo franquismo, afogar, inundar y amortar lugars d’Aragon con ochetivos mica claros. Se diz que s’amenista ta plantar en as vals, se diz que s’amenista ta que podamos beber augua d’o Pirineo en Zaragoza. De verdat no bi ha atra alternativa que no siga amortar a vida en os lugars ya menazatos dende fa anyos por Yesa? De verdat? De verdat no emos aprendiu cosa de Chanobas? De Santaliestra? De Biscarrues? De Valmont? De verdat?

De verdat ye posible fer una declaracion d’impacto ambiental positiva a una obra que os propios tecnicos d’o Ministerio espanyol no avalan? De verdat ye posible fer-lo en o puent d’agosto? De verdat ye posible que l’informe charre en condicional dicindo que “no debería afectar”? Tan poco claro tienen ixo? De verdat no han contau as grietas en as montanyas ya feitas? De verdat? De verdat piensan que ye “sostenible” y d’alcuerdo con a Nueva Politica de l’Augua o las directivas marco europeas recrexer un entibo ya chigant? De verdat? De verdat en pleno anyo Chacobeo fan lo posible por inundar a ruta tradicional? De verdat as chentz d’Artieda y la resta de lugars son  menos aragoneses que la resta? De verdat?

Soi “indignado”, carranyato, furo, triste. Soi farto d’ista colla de caciques que mos gobiernan. Soi farto de que un diya se implen as bocotas con “sotenibilidad” u “medio ambiente” y o diya dimpues tiengan os collons de fer tot lo contrario. Soi farto de que s’aigan malfurriato os mios diners ta creyar una “Expo de l’augua” ta dimpues, dos anyos dimpues, continar prebando d’afogar lo pais.

Ya ye prou, ya ye prou, y ya ye prou. No dicire cosa mas que o que dicen os que levan anyos y anyos luitando porque no torne a pasar o que paso ya en 1959 cuan forachiton a las chentz de Tiermas u Esco d’as casas suyas. L’Asociacion Rio Aragon leva anyos luitando contra lo recreximient de Yesa y continaran fendo-lo. Ye unatra oportunidat ta refirmar-los, ta estar con ells contra a barbaridat que caciques como Javier Lamban quieren fer con a complicidat d’o gobierno d’Aragon y agora tamien con ixo que dicen “Ministerio de Medio Ambiente”.

Fa cuatro diyas como qui dice, veyiba a os chobens d’Artieda leyer un manifiesto en esfensa d’o suyo lugar, d’as suyas chentz, d’as suyas familias. Que pensara huei ixa chobentut? Que pensaran cuan saban que as suyas tierras, o paisache suyo, a casa suya, contina menazata por un entibo que no s’amenista?