Espelunciecha, Castanesa, Yesa, Biscarrues, A Carrodilla, Mularroya, Gran Scala, dragau de l’Ebro, fundicion de plomo en Pina u Albalat de l’Arcebispe, nueva Aragon-Cazaril, Canal Roya, cementera d’Albentosa, y bellas atras que suposo que me dixo, y que podez adibir en os comentarios.

De verdat que no pueden pensar prochectos ta desembolicar o territorio que no sigan esferrando lo pais? De verdat se creyen ells mesmos cuan charran de desembolique sostenible? De verdat se piensan que imos a votar-los asinas?

Que Aramón ye una tapadera ta fer d’Aragon o “Levante” d’a nieu ya lo sabemos totz. Que os suyos proyeutos, como Castanesa, meten en periglo a pervivencia d’o meyo natural aragones, tamien. Con a puyada global de temperaturas as estacions d’esqui cada vegada son menos rendibles economicament por os gastos d’esplotacion e innivacion artifical. Tamien sabemos ixo. Por exemplo, en o Congreso Mundial de Turismo de Nieve d’Andorra, en 2008 se deciba que en 10 anyos sera complicada a prautica de l’esqui en altarias de menos de 1500 metros (PDF). De feito, a manca de nieu enchegara un proceso de trancamient de estacions. O propio Congreso Mundial de Turismo de Nieve, iste mesmo anyo, fa ni dos semanas, ha dito que s’amenistan estacions mas chicotas ta optimizar os recursos.

Pero en iste pais as cosas parixe que van por atro puesto. O direutor d’Aramon deciba ayer que cal “chunir as estacions de Astun, Formigal y Candanchu” ta estendillar o dominio esquiable y optar, allora, a ixos miticos Chuegos d’ibierno. Ista ye a solucion que planeya lo holding semipublico que chestiona as estacions aragonesas (fueras de, precisament, Astun y Candanchu). U siga, contra o propio sentimient d’o sector d’a nieu de tot lo mundo, reuniu en Andorra, Aramon apuesta por fer de lo Pirineo una macroestacion d’esqui, encara que siga sin de nieu.

O proceso ye esclatero. Si quieren enamplar l’oeste y tamien l’este por Castanesa lo siguient paso ye chunir as dos megaestacions y ya lo siguient, chunir istas, a trabiés de Gran Scala, con Javalambre. Feba tiempos o mio amigo Joaquin Macipe prexinaba un Aragon esdevenidero plen d’augua y con nomas una tuberia por o centro. Yera l’Aragon feito entibo ta amortar atras setz. L’esdevenidero que piensa Aramon ye encara piyor. Dentre nieu y nieu, nomas oficinas de Ibercaja ta recullir dinero (d’a construccion, que no pas de l’esqui, que rematara por dixar de fer beneficios).

Puestar por tot isto, huet la pregunta de l’Heraldo.es en a suya encuesta yera tan pertinent: ¿Ye Mourinho buen entrenador ta o Reyal Madrid?