Aprobeito o post que ha feito Lorién sobre as carreras adedicadas a Costa ta remerar una aneudota que leyié fa tiempos en as “Historias de la Historia” de Carlos Fisas. Costa yera un ombre especial, d’ixo no bi ha garra duda. Tan especial que se diz que mesmo presentó a suya tesis en aragonés baxoribagorzano en a Unibersidat de Zaragoza. Profés, no se l’almitioron. Pero ser especial, de begadas, y contando con o carauter aragonés, li suposaba bellas incomprensions fuera de Aragón. Isto rezentan en o libro d’aneudotas d’a historia de Fisas.

A prenzipios de sieglo besitó Joaquín Costa un lugar andaluz. As fuerzas bibas d’a localidat li conbidoron a besitar o casino. Costa dizió que si por cortesía. Fendo un café, s’animó y prenzipió a charrar d’os grans problemas que teneba España y Andaluzia, allora. Costa prenzipió a charrar más zereño y amonico, toz os que i yeran, prenzipioron a marchar, menos dos o tres, por educazión. L’alcalde beyendo o biolent conbidó a Costa a chugar a o “tresillo” y Costa prenzipió a dizir faltadas contra o chuego, que yera perder o tiempo y os diners que tanto s’amenistaban. O medico dictó sentenzia “iste ombre ye barrenau y dende allora toz os d’o lugar quedoron conbenzius de que Joaquín Costa yera un “orate”.