Pasa la vida

Cuan corremos masiau xublidamos que o verdadero sentiu d’a vida ye nomas ixe, vivir. As chentz que mos afogan no son as millors companyeras, y o verdadero secreto d’a vida ye, de vegadas, posar-se en a carrera, leyer letra zaga letra un diario u bell libro y dixar os nuestros huellos libres ta mirar a vida de cara.

Nomas pasa que, de vegadas, notamos mas o buedo dixau en a silla d’o costau.

Finestras buedas

Allora yo teneba ganas de chitar os uellos por as finestras. Yo yera chobenet y a mia curiosidat no conoxeba mugas. Agora, con o tiempo, esdebeniu biello choben u choben biello tiengo a mesma curiosidat. Miro por as finestras y beigo l’espazio buedo que una begada emplio a tuya presenzia. De begadas me digo que emplir ixe espazio ye una mision. Atras begadas, nomas me miro l’espazio y me digo que ya ye bien, asinas, buedo. Me fa bien pensar que os umans no somos como l’augua, que imple toz os foraus que se i troba. Me fa bien pensar que l’espazio buedo tamién ye un puesto, en iste mundo. Millor encara, que l’espazio buedo ye buedo porque nomas o que tresbatiemos puede tornar-lo a emplir.

A la fin, as finestras nomás son que foraus que adugan enta l’alma d’ixo que una begada estiemos. Uellar por ellas ye tornar ta zaga. Uellar dende ellas ye caminar entadeban. Os foraus son a mesma presenzia, pero bueda, y son  tan de nusatros como lo que no ye buedo. A luz ye luz porque podemos contimparar-la con a escuredat. U a lo reves.