Huei mesmo charraba d’as conexions, d’internet, d’o mundo virtual ta Ràdio Matarranya, como fere cada miercols a meyodias. A entreconexion dentre chents ye o nuevo mantra d’a nuestra sociedat. Antis se feba china chana, nomas con a chent de mas aman, y agora as nuevas tecnolochias fan posible que a entreconexion no tienga ni tiempos ni distancias.

Pero estar esclavos d’istas tecnolochias de vegadas causa problemas. Plegas enta Girona con o GPS enchegau, enta la carrera que has d’estar. No paras cuenta en l’adreza porque vas con chent que la conoix. Vas de borina y plega un inte que por circunstancias yes solenco. Prebas de gritar a os tuyos amigos con o “suelto”, que no tien bateria. Os tuyos amigos preban de gritar-te pero lis sale apagau y no se puede dentrar ni salir y tornar a dentrar. No tiens as claus d’o coche, nian sapes en que carrera en ye. No sapes l’adreza de casa. Profes, no sapes garra lumero de telefono d’os tuyos amigos de memoria, asinas que no puetz demanar atro movil ta gritar.

Asinas que mientres demanas unatro gintonic, prebas d’aconseguir dentre rumberos y clowns un movil con internet ta rechirar en o rete bell telefono en os contactos de gmail ta gritar-ne. Pero, por fortuna, as entreconexions 1.0 tamien funcionan, asinas que os tuyos amigos, que tampoco no tienen manera de trobar-te, deciden tornar ta zaga, enta o zaguer puesto an que t’han visto. Asti, con o gintonic, y con un  sonriso amplo te piensas: “Si, internet ye guay, pero como no tiengas pilas ni amigos…”

Posts relacionados:

1. Una foto d’ahiere feita huei, una remeranza de huei feita ahiere

XI Borina por l'aragonés en Zaragoza

A onzena Borina por l’aragonés emplirá o miercols 22 a plaza Asso de Zaragoza. Dende as 20 oras mesas informatibas, gaiters y bullizio. A partir d’as 22 oras en o bar Meta (chunto a la plaza) con mosica en aragonés. Tamién i abrá una esposizión con os relatos d’a Trobada de Fabloggers.

Biene-te-ne y fabla n’aragonés (o informa-te sobre ista quiesta, polida y chiqueta luenga).

No related posts.