Chera

Ya son a saber los anyos que chito en a chera un paper con os mesmos deseyos. De tantas vegadas que he deseyau lo mesmo ya he rematau estando conscient que nunca no se cumplira. Pero por ixo huei tornare a chitar t’as flamas un paper con as mesmas seis parolas d’istos zaguers anyos.

En a chera cremaran as parolas y os suenios y os esmos y o cierzo las portara luen, tan luen rio t’a baxo que trigaran bellas semanas en tornar-ne. Cal aproveitar istos intes que a maxia invade o nuestro mundo racional, cal recuperar o poder d’a nueit, d’o fuego y de l’augua ta dixar-se levar luen como as parolas. Ta tornar a sentir-nos ninos que se piensan que tot o que suenian esdevenira reyalidat. Y ye por ixo que l’anyo venient, quan comprebe que as mias seis parolas no s’han tornau de verdat, tornare a escribir-las en un paper y las cremare en a chera d’o solsticio d’estiu.

Cal cremar as parolas que soniamos ta dixar que encara que nomas siga por unas horas, faigamos reyalidat os suenios.

Ya plega unatra nueit de machia. Ya plega l’inte de deseyar unatra vegada. Ya plega l’inte de cremar os esmos viellos y replenar a falsa de suenios. Plega l’inte de creyer, de l’estiu, de vivir, de creyar, como tantas atras vegadas.

Preta fuego a la fusta! Crema vidas viellas! Creya vidas nuevas! Fuego, fuego, fuego! Ye Sanchuanada!

Ya plega la Sanchuanada. Plena de ritos. Os que se fican en l’augua chelada encara d’os ibons, os que pasan dentre o tronco d’una carrasca ta sanar, os que salta por denzima d’as fogueras, os que se dixan cremar por as purnetas libres que chilan en l’aire.

Crema, crema y crema

Ya plega unatra nueit de machia. Ya plega l’inte de deseyar unatra vegada. Ya plega l’inte de cremar os esmos viellos y replenar a falsa de suenios. Plega l’inte de creyer, de l’estiu, de vivir, de creyar, como tantas atras vegadas.

Preta fuego a la fusta! Crema vidas viellas! Creya vidas nuevas! Fuego, fuego, fuego! Ye Sanchuanada!