O delegau d’o gobierno espanyol en Aragon, amas de tot o que ya dicie ayer, tamien aprobeito una entrevista en o Periodico ta dicir que, textual, “el recrecimiento de Yesa ha cogido velocidad de crucero“. Asabelas son as razons por as que o recreximient de Yesa ye una error. Son prou anyos ya que as chentz d’a val y a chent que los refirmamos, levamos luitando contra a sinrazon, una mas, que destroza una parti d’o pais, metendo, amas en periglo a las suyas chentz y a o suyo territorio. Garra d’as razons d’os pro-Yesa parixe prou funda. Zaragoza ya bebe augua de Yesa. As Bardenas, as no ocupadas melitarment, ya no son rendibles por muitas auguas que lis leven, que ya en son prou. O rio Aragon ya ye prou “controlau” por atras presas y por o mesmo entibo de Yesa. Tot ixo, sin recreximient, un recreximient que amas de no amenistar-se suposa un periglo reyal, como dicen os tecnicos y que afoga una mica mas os territorios y chentz d’o norte d’o pais.

Dezaga d’ixa continada intincion de recrexer si u si l’entibo mas gran d’Aragon bi ha atros intreses. Interpresas de chestion d’augua, interpresas constructoras, equilibrios de poder en os partius politicos y ves a saber que atras cosas. Contra tot ixo, contra a “velocidad de crucero” que diz Javier Fernandez, iste cabo semana mos manifestare-mos en Zaragoza. T’amostrar o refirme a la chent d’Artieda, de Ruesta y tamien a la d’atros puestos amenazatos por os que encara quieren fer politicas idraulicas d’o sieglo pasau. Con a chent de Santaliestra, de Biscarrues, de Mularroya, con mas de 70 organizacions d’o pais y de difuera d’o pais, iste cabo semana chilaremos unatra vegada: Yesa, no pas!

Yesa, no pas!

Iste ye o futuro

De conchunta con a chent d’Artieda tallemos a carretera no rematada dende Pamplona enta Lleida ta dicir bien altero que os lugars d’o costau de l’entibo quieren continar vivindo. A chent, mas chobena y mas viella tamien, baxo dende Artieda, Sigues, venio dende Uesca u Zaragoza, ta contrimostrar o refus social d’una obra que no s’amenista, que condena de muerte a la chent d’os lugars, que ye cara y que amas tien periglos prou importantz como ta dixar-los de banda.

Fendo mofla un d’os crios d’o lugar li deciba a atra nina: “Yesa, si! Yesa, si!”. A nina, tan seriosa como una nina de 8 anyos cuan se mete seriosa li dicio: “Yesa no, porque sino se te van a inundar todos tus juguetes“. Ixe ye o futuro que aspera a os ninos y viellos y chovens d’Artieda u Sigües si contina a sinrazon d’o recreximient de Yesa. S’inundaran totz os chuguetz, s’afogaran totz os suenios, se tresbatiran totas as remeranzas.

Ista chent que veyez en as fotos, istos ninos que encara chuegan y s’encorren por as carreras d’Artieda, istos viellos que filosofan en os bancos a la huembra d’o lugar, os chovens que treballan de sol a sol en os campos u que tornan t’o lugar dimpues de triballar en atros puestos…tota ista chent disparixera d’os suyos montz, d’as casas suyas, d’os bancals suyos. Por ixo chilan que no. Dicen que no. Suenian que no. Por ixo se comprometen con o patrimonio vital y cultural d’as suyas radices, d’o suyo pasau, d’o suyo mundo. Con ellos muitos atros continamos dicindo que si ellos quieren vivir asti, qui somos os demas ta fer-los marchar d’as suyas radices? Yesa no pas. Que no repitamos as errors de Chanobas u tiengamos que veyer atros lugars pantasmas baxo las auguas d’os entibos. O sieglo XXI planteya nuevas solucions.

Aqui tenetz, amas o manifiesto que se leyo en rematar a concentracion.

Yesa, no pas!

O domingo, 22 d’agosto, a las 12.30 os vecins d’Artieda feran una concentracion ta protestar contra o recreximient de l’entibo de Yesa. O puesto de trobada estara lo puent d’Artieda. Cal refirmar a os vecins d’o lugar, a la chent de l’asociacion Río Aragón, y a totz os que creyemos que atra politica idraulica ye posible. Una politica que no s’alacete en afogar lugars y chentz, que no pase por dencima d’os periglos, y que rispete os paisaches, a cultura y as radices.

Soz convidaus a venir-ie!

Si queretz saber mas sobre Artieda y o periglo que corre a suya forma de vivir con o recreximient, tos dixo l’enrastre a un triballo d’un d’os suyos chobens, Adrián Solana.

Yesa, no pas!

A traicion, como siempre, huei sabemos que o Ministerio espanyol de Meyo ambient (sic) ha dau luz verda a lo recreximient de l’entibo de Yesa. Asinas mos lo recentan (y digo bien) l’Heraldo y o Periodico.

En pleno sieglo XXI o PSOE contina fendo o mesmo que facio lo franquismo, afogar, inundar y amortar lugars d’Aragon con ochetivos mica claros. Se diz que s’amenista ta plantar en as vals, se diz que s’amenista ta que podamos beber augua d’o Pirineo en Zaragoza. De verdat no bi ha atra alternativa que no siga amortar a vida en os lugars ya menazatos dende fa anyos por Yesa? De verdat? De verdat no emos aprendiu cosa de Chanobas? De Santaliestra? De Biscarrues? De Valmont? De verdat?

De verdat ye posible fer una declaracion d’impacto ambiental positiva a una obra que os propios tecnicos d’o Ministerio espanyol no avalan? De verdat ye posible fer-lo en o puent d’agosto? De verdat ye posible que l’informe charre en condicional dicindo que “no debería afectar”? Tan poco claro tienen ixo? De verdat no han contau as grietas en as montanyas ya feitas? De verdat? De verdat piensan que ye “sostenible” y d’alcuerdo con a Nueva Politica de l’Augua o las directivas marco europeas recrexer un entibo ya chigant? De verdat? De verdat en pleno anyo Chacobeo fan lo posible por inundar a ruta tradicional? De verdat as chentz d’Artieda y la resta de lugars son  menos aragoneses que la resta? De verdat?

Soi “indignado”, carranyato, furo, triste. Soi farto d’ista colla de caciques que mos gobiernan. Soi farto de que un diya se implen as bocotas con “sotenibilidad” u “medio ambiente” y o diya dimpues tiengan os collons de fer tot lo contrario. Soi farto de que s’aigan malfurriato os mios diners ta creyar una “Expo de l’augua” ta dimpues, dos anyos dimpues, continar prebando d’afogar lo pais.

Ya ye prou, ya ye prou, y ya ye prou. No dicire cosa mas que o que dicen os que levan anyos y anyos luitando porque no torne a pasar o que paso ya en 1959 cuan forachiton a las chentz de Tiermas u Esco d’as casas suyas. L’Asociacion Rio Aragon leva anyos luitando contra lo recreximient de Yesa y continaran fendo-lo. Ye unatra oportunidat ta refirmar-los, ta estar con ells contra a barbaridat que caciques como Javier Lamban quieren fer con a complicidat d’o gobierno d’Aragon y agora tamien con ixo que dicen “Ministerio de Medio Ambiente”.

Fa cuatro diyas como qui dice, veyiba a os chobens d’Artieda leyer un manifiesto en esfensa d’o suyo lugar, d’as suyas chentz, d’as suyas familias. Que pensara huei ixa chobentut? Que pensaran cuan saban que as suyas tierras, o paisache suyo, a casa suya, contina menazata por un entibo que no s’amenista?

Artieda 2010. Esfendemos a tierra

www.artieda2010.com

16,17 y 18 de chulio

Biernes 16 de Chulio

Fiesta Presentazión
22.30 Enguero-Audizion con Groovy Grandpa, The Lliterans soundsistem, y “tal’infernoytorna”

Sabado 17 de Chulio

12.00 Esferras meyoambientals dende l’ambiesta feminista (con chen de AHT Gelditu, Bardenas YA, Artieda,Clau Roya, etc..)
15.00 Chenta Popular
17:00 Teyatro d’a colla “Os Algabenaires” y a suya obra “O Yayo Bolador”.
18.00 Gymkana Antipatriarcal (No xublidez trayer una falda)
19.30 Pasabillas con Profés Prou y Maskarrada
21.30 Conzierto con

Rebel Spell
Prau
China Chana
Gen
Banda Batxoki

04.30 Discomobil

Domingo 18 de Chulio

12:30 Gaiters de Chaca
15:00 Chenta Popular
Despedida

Durante tot lo festibal i abrá mosica, puesto d’acampada, radio, puestos de benda de materials, barras, y muitismas cosas mas!

Sin xublidar a exposizion d’os compañers de “Rio Aragón” an que podrez beyer fotos, pancartas, cartels u mesmo bideos d’as mas de 30 añadas de luita contra o recrecimiento de l’entibo de Yesa.

I abrá autobús dende Calatayut, Zaragoza, Uesca y Chaca

Pré d’o Conzierto: 10 euros

Bono Autobús (o diya 17 ta ir-ie y tornar o 18) + Dentrada de Concierto + Chentas Populars: 30 euros (ta reserbar bus, nimbiar un mail a “artieda2010@gmail.com“) u si yes de Zaragoza, puedes mercar-lo en a tabierna ” A Flama” ( C/mayor , 53)

Mas info en artieda2010@gmail.com y en www.artieda2010.com

Colaborador: Conzello d’Artieda
Organiza: Bloque Independentista de Cuchas
Co-organiza: O Salzar

ARTIEDA NO REBLA
YESA NO
ESFENDEMOS A TIERRA

Bloque Independentista de Cuchas