O mio nombre ye un fake ta Facebook

Lunes, febrero 13, 2012 17:54
Publicau en a categoría purnas

Dimpués de tres u quatre anyos en Facebook l’atro diya me trobé que no me deixaba dentrar en a mia cuenta. Me pensé que heba ficau malament a clau, pero no. Facebook ha decidiu agora que o mio nombre (suposo que o mio apelliu, Romance) ye un fake y no puede estar o nombre d’una presona de carne y ueso. Ye de dar que Facebook ye una interpresa privada, y, por tanto, puede fer como quiera con os suyos usuarios, asinas que una vegada que han decidiu ixo, m’han bloqueyau a cuenta. A verdat ye que no me carranyaría, ni mesmo feria cosa t’apanyar iste afer si no estase porque con a cuenta presonal, vinclada con o mio nombre real ye con a que almenistro atras cuentas d’os esferents prochectos que tiengo penchaus por astí, por eixemplo, a d’Arredol u la de Troballa.

O caso ye que me demandan de que meta o mio nombre real, que ye ixe que ye, Jorge Romance, y no pas atro, asinas que cualsiquier atro nombre que meta sera en verdat, falso. O sistema de comunicación de Facebook ye una mica complicadet, asinas que ye dificil trobar un mail (ya ni charramos d’un telefono) an que esplanicar o caso mío y ninviar-lis mesmo un duplicau d’o DNI ta que compreben a mia identidat. Facebook nomás se comunica a traviés de formularios automatizaus. He empliu o formulario correspondient y a rispuesta automatizada me diz que si, que muit bien, que ells no almiten pas nombres falsos y que meta o mio nombre de verdat. Asinas que somos en un cerclo. Lis ne digo que o mio nombre ye o que ye, y ells me dicen que si ye falso que meta o de verdat.

Entre as aduyas recibidas por Twitter y rechirando una mica por Google, trobé tamién una adreza de correo electronico (disabled@facebook.com). Torné a esplanicar o mesmo caso, y mesmo lis ninvié o DNI escaneyau. A rispuesta estió a mesma que en o formulario, que os nombres falsos y bla, bla, bla. O caso ye que encara que o mio perfil de FB encara se puede visitar, yo no puedo dentrar-ie. Asinas que no puedo esviellar cosa, ni almenistras as pachinas que tiengo vincladas con a mia cuenta, ni charrar con chent con a que nomás que charro por o chat d’o FB, por eixemplo.

Istos bloqueyos, por o que he leyiu, son temporals, asinas que puestar que en ratet no tienga más problemas, u mesmo que se decidan a contestar o mio mail d’una traza más presonals. Ganas fan, ixo sí, de no tornar ta Facebook, pero insisto, ta yo ye más que una aina d’entrenimiento, que tamién la emplego t’afers profesionals. Me viene a la memoria una cosa que diz siempre Torres Burriel, l’obchectivo no ye estar en Facebook sino plegar ta la chent. Si agora la chent ye en Facebook u Twitter, cal estar-ie, pero puestar que en bells diyas, meses u anyos marchen, asinas que s’han de tener as ganas y as posibilidatz de trasladar tot quan s’haiga de fer. En iste caso, yo aspero que Facebook, a la fin, si que me risponda y pueda fer servir o mio nombre real unatra vegada, porque lo que no quiero fer ye cambear-me o nombre, o mio nombre, l’apelliu d’a mia familia, ta complacer a Facebook. Si insisten que ye falso, diciré adiós a Facebook. Continaremos informando.

Esvielle

Facebook m’ha ninviau por fin, a un formulario an que si puedo contrimostrar (con o DNI) que o mio nombre ye o mio nombre. Dicen que no saben quan tardan en contestar, y se veye que no han visto o mio DNI encara, a tamás que lis n’he ninviau. Repleno o formulario y a veyer que pasa.

28 de chunio 2010. Diya de l’arguello (y bellas cosas mas)

Lunes, junio 28, 2010 11:30
Publicau en a categoría purnas

Me ninvian iste comunicau sobre o diya l’Argüello en Zaragoza:

Güe fablamos dende o Bloque TransMariBollero Gañoso porque queremos remerar a gais e lesbianas “integraus”, e a eteros “guays”, que a ocupazión d’as carreras o 28 de chunio surtió en 1969 protagonizada por os seutors más gañosizaus d’istos coleutibos, os mesmos que güe soportamos más crudament a “crisis” capitalista e mos quedamos a o marguin n’as prioridatz d’as reibindicazions lgtb.

Si l’añada pasada dezibamos que “con güegas no bi ha argüello”, entimando a promulgazión de l’autual lai de estranchería, güe dende a mesma trinchera proclamamos: “con gaña no bi ha argüello”.

Con iste bloque transmaribollero e gañoso ubrimos un buedo dende do besibilizar una serie de coleutibos gañosizaus, e una nueba perspeutiba: lo femos no dende a bitimizazión (anque re-conoxendo a nuestra gaña), sino dende a nuestra potencialidat pulitica.

Ubrimos iste buedo ta fablar dende un puesto que mos resulta común a totz: a “crisis”, “crisis” que mos acompaña dende muito antis que a tele dixese que bi eba “crisis”. E dende iste puesto tos imbitamos a tintar de rosa las buestras neuronas con nusatras, pos ista “crisis” tiene muitas grandarias.

Antis que a finanziera, ya esistiban atras “crisis”. Beluns coleutibos -trans, sinpapers…- perent emos estau en “crisis”, anque cuasi naide quiera parar cuenta. Porque abonda con fer-se-ne unas simplas demandas ta parar cuenta d’ello: ¿cómo bibe una trans cuan o 90% d’ellas se’n troba en una situazión continada d’ature no bosau? ¿cómo pueden as personas sinpapers -transmaribollos u no- susistir? ¿cómo se las apaña una mai maziella, con fill@s, con un emplego gañoso, e con pais a os que cudiar? E podríamos continar con exemplos como istos dica incluyir a una inmensa “minoralla”.

A crisis no ye igual ta totz; a besibilidat e a posibilidat d’enunziazión ye mui desigual drento d’a propia comunidat transmaribollera, e mesmo mos i trobamos drento d’a mesma seriosos exemplos de endodescriminazión: transfobia, misoxinia, androfobia, plumofobia, clasismo, senofobia, eterosesismo, xerontofobia, ezt.

As salidas a la “crisis” deben emplantillar-se dillá d’a “crisis” finanziera, e dillá d’una reforma laboral. Porque con istas “salidas” muita chent -transmaribolleras u no- que protagonizamos as situazions que beisibilizamos aquí e agora, no podemos sentir-nos partezipes ni reflexadas en ellas; e por ixo emos de esmaxina-nos en imbentar mecanismos que mos incluyan a cuantas más millor: a las personas que no treballamos de traza bosada (cudiadoras, treballadoras n’o fogaril…), personas que no treballamos de traza regularizada (mandarras, chaperos, manteros…), treballadoras discontinas, pres@s, ezt.

No queremos esterzas ta una unica “crisis”, t’a suya “crisis”, que mos fan pagar a totz. No queremos integrar-nos-ie como “emparadas”, contamos con a nuestra propia perspeutiba e o nuestro propio contesto dende do dezidir sobre a nuestra bida, sobre os nuestros cuerpos, sobre os nuestros esdebeniders.

Semos trans, negros, mandarras, gañosas, mullers, sinpapers, mezclizas, bolleras, aturadas, moros, maricas, presos, sudacas, drags, biellas, discapazitaus, maziellas, intersecs, migrans, barrenadas, rurals, queers, depres, onsetz, sinteito, marimasclos, antipocadas, sidosos, chitanas, asesuals, chaperos… qué coño marguin! Si ye que semos mayoría, a beyer qui ye l’esbarrau!

Con güegas, con prechuizios, con inchustizias, con muros… con gaña no bi ha argüello, porque l’argüello d’as gañosas trans, maricas, bolleras e demás, no te lo puede ofrexer dengún partiu, dengún gubierno, denguna interpresa, sino que emos de conquistar-lo chunt@s cada diya.