No imos a descubrir agora a mena d’alcalde que tenemos en ista ciudat. Juan Alberto Belloch s’ha feito sinyalero siempre por o suyo disprecio por qui no piensa como ell y por querer, si puede, pasar por dencima de tot. No imos a descubrir agora ixo que dicie “L’Evanchelio de Belloch” repasando bellas d’as suyas actuacions mas destacadas.

Pero mientres a cosa quede dentre nusatros, pues rai. Pero huei, como ripresentant de tota la ciudat, y una vegada que Sant Sebastian ha estau nomenada como Capital Cultural d’Europa en 2016, ha dixau por o sulero a tota la ciudat con as suyas parolas de mal perdedor y, sobre tot, con o suyo quiste de tiempos de chuez.

Belloch ha charrau de politica (a que diz que ha menau a decision d’o churau) pero no pas de Cultura, ye esclatero. Ha dito que puestar impugnara a decision, y que no puede ripresentar a Espanya uns que no son espanyols. Fueras de que a historia ista va de ciudatz europeas y no espanyolas, Belloch no ha charrau de porque a vida cultural de Zaragoza queda luen de Sant Sebastian, o suyo festival de Jazz, u de cine, as suyas alportacions a la gastronomia europea, etc… Mientres que en Zaragoza a politica cultural ha estau dando bandazos, ha consistiu en trancar salas de conciertos, fer desfiladas militars, fer continament recreyacions de feitos militars, plantar banderas d’Espanya en plazas prencipals, sacar conciertos d’as carreras t’as fiestas, sacar ferias culturals como Amostranza, dixar amortar festivals de cine como Cinefrancia, retirar cartells en aragones en quanto cambeoron o socio de gobierno…

Ye verdat (y por suerte) que n’ha habiu atras actuacions mas encertadas, muitas d’ellas por iniciativa privada, social y ciudadana. Y bien se vale que si hesen trigau Zaragoza como Capital Cultural, suposo que habrian cambeau bellas cosas (encara que a desperencia d’a Expo contrimuestra que no siempre t’amillorar). Pero tot isto son elucubracions.

O que no ye una elucubracion ye que Belloch ripresenta malament a os ciudadans zaragozanos, que as suyas formas autoritarias, puestar que derivadas d’o suyo tiempo chudicial u d’os tiempos como ministro de quasi tot, dixan en mal puesto a os zaragozanos. Iste si que no me ripresenta pas.

A inmortal ciudat de Zaragoza quiere ser a capital europea d’a cultura en l’anyo 2016. Lo diz a pachina web d’o Conzello y tamien o sitio oficial d’a candidatura. Ye una mas d’os macroeventos que mos para la ciudat, o que mos quiere parar. Cuan facion a primer intincion se convoco a os ciudadans a dar a suya opinion. Bi’n abio collas de triballo que cordino o periodista Fernando Rivares y l’actuacion mas relevant estio penchar cartels en o Paseo Independencia de Zaragoza. Cartels, que como denuncio Marisancho Menjon teneban graus faltas d’ortotipografia.

Yo no soi en contra de que Zaragoza siga Capital Europea d’a Cultura. Tot lo contrario. Pero que siga una Capitalidat ubierta, que aiga espacios ta totas as culturas, a clasica y no tan clasica, o viello, l’antigo, o moderno y o posmoderno. Que l’aragones tienga presencia dilla d’a presencia testimonial en a web d’o Concello en forma de parola (unica). Que bi aiga espectaculos de carrera que no sigan siempre recreyacions melitars, agora tan de moda en ista nuestra ciudat. Que a ciudat s’impla d’actividatz pero d’aqui a 2016, no nomas ixe anyo.

Allora, charrando d’ixo con Xarxes, me deciba que a capitalidat cultural se fa tamien no trancando salas de conciertos. A zaguera ha estau a Sala DeVizio (podez refirmar contra o suyo trancamient en ista colla de Facebook), pero no ha estau a unica. Dimpues de refirmar o suyo cabo d’anyo o Conzello decidio trancar a Sala Arrebato, por exemplo. A cultura se fa dende totz os ambitos, se fa emplindo espacios, se fa dixando fer a la sociedat civil, se fa rispetando as culturas. Ye verdat tamien que istos zaguers cabos de semana o centro d’a ciudat ha estau a rebutir de chents y actividatz. Ixe puestar que siga o camin ta fer d’ista ciudat un exemplo. Pero ta ixo, abran tamien de rispetar atras luengas (y no retirar cartels que no sigan en castellan), abran de refirmar a qui preba de tener una achenda de conciertos dinna y esferent, abran d’entender que no tota la sociedat s’imple d’arguello en veyer desfilar a buena ripa de chent disfrazada de militar (siga la suya profesion o no) y que ta celebrar a cultura ye millor emplegar a cultura d’a paz y no pas a cultura d’a guerra.