L’Apocalipsi ya ye aqui

Miércoles, noviembre 2, 2011 22:09
Publicau en a categoría purnas

Feba tiempos que no dondiaba por a ciudat sin cosa que fer. Feba diyas que no amanaba la orella ta sentir o que atros dicen. Feba diyas que, una vegada que he sentiu lo que dicen, he habiu de tragar-me as mias ganas de partecipar en a conversa. En o camín que va dende o Mercau Central enta casa mia m’ha pasau huei dos vegadas.

A primera en o centro ta lolos que La Caixa, creigo que ye, tien en o prencipie de Sant Blas. Fumarreando os suyos Ducados, que feba ixa ulor, tres yayos ascuitaban parando muita cuenta, a un quatreno. Sentindose bien ascuitau, iste zaguer lolo dentraba en modo “Arrabal” y sentenciaba “L’Apocalipsis ya está aquí! En las revelaciones hay una bestia con nosecuantas cabezas y ya ha llegado“.

Y lo deciba en serio. No se si se referiba a Papandreu y o suyo referendum, a la Merkel, u mesmo a ZP/Rubalcaba u Rajoy. Porque lo deciba tant serioso y se l’ascuitaban tant y tant seriosos que feba medrana y he eslampau ascape enfilando a carrera sant Blas entabant.

Encara no recuperau d’os susto, he habiu de fer un tallau (con leit d’o tiempo, por favor), y quan que m’he sentau en a silleta, leyendo l’Heraldo, he parau cuenta que a o mio costau bi’n heba dos mullers que por o que he sentiu yeran d’as “de hacer casas“. Una feba “la de la Inés, la de la Luisa, la de su hija, la de una amiga de la hija, y chica, no me puedo quejar“. L’atra, que amás feba, por o que he sentiu, “la empresa esa que te dije“, tamién en feba buena ripa, pero no ha concretau.

La que feba la casa “de la Inés” ha recentau a suya nueit d’ahiere. Con o suyo mariu heban de baixar bells zarrios a la basuera. “y oye, se me viste como para salir, claro, como lleva meses entre el ERE y el paro, ahí lo tengo en casa, y oye, le digo, pero chico, donde vas?“. Por o que pareixe, o buen hombre teneba intinción de cenar fuera, aproveitando la salida ta chitar la basuera. Pero rai, “dos cenas, 20 euros, y chica, con eso comemos cuatro o cinco días“. Os cenyos d’aprebación de l’atra muller y os mios propios, han refirmau a firme actitut d’a muller que fa “la casa la Inés“.

Ya no he sentiu cosa más, pero ye claro que l’apocalipsi ye plegando en forma de bella cosa porque como ha dito la muller “a ver si encuentra algo, porque entre que no podemos salir y eso, ahí lo tengo plantificau todo el día“. Y ixo sí que no…”hasta ahí podíamos llegar“.

Lo que me fa goi d’ista profesión

Viernes, octubre 21, 2011 10:29
Publicau en a categoría periodismo, purnas

Huei, encara carranyau como una mona, m’agana charrar d’as cosas que si me fan goi d’a mia profesión. Prou que ye ta pasar os efectos d’a bronca que levo dencima. Foi d’istos puntos a mia medecina contra o mal orache.

  • Me fa goi que encara que des a noticia de l’anyo, a o diya siguient cal continar triballando ta trobar atra noticia.
  • Me fa goi haber de pensar diya par d’atro que ye lo important y que no.
  • Me fa goi haber puesto fer a portalada d’arredol.com en un diya como lo d’ahiere.
  • Me fa goi dar voz a os que no tienen voz.
  • Me fa goi poder contraposar as mias opinions con a realidat, cada diya, y con as opinions d’os demás.
  • Me fa goi pensar que bi’n ha qui se fia d’o que recento y qui aspera que lo recente.
  • Me fa goi a solidaridat d’as companyeras y os companyers porque tienen os mesmos problemas y dandalos.
  • Me fa goi haber de rechirar y rechirar ta trobar cosas intresants que esplanicar diya ta par d’atro
  • Me fa goi veyer cosas que atras presonas no habrán de veyer y haber de filtrar contenius ta esplanicar as cosas como cal.
  • Me fa goi haber cumpliu o suenio que teneba de nino quan grababa os mios programas de radio en un walkman dorau.
  • Me fa goi tot lo que he aprendiu en totz os puestos de triballo que he teniu.
  • Me fa goi tot lo que m’han amostrau os que saben más que no yo.
  • Me fa goi quan o tiempo me da la razón.
  • Me fa goi quan o tiempo me quita razóns y aproveito t’aprender más.
  • Me fa goi adaptar-me a os luengaches propios de cada meyo.
  • Me fa goi poder charrar de tú a tú con os protagonistas d’a historia. Y quan que digo historia digo tota la historia, no nomás os grans feitos. A historia presonal de cadagún ye parti tamién d’a historia.
  • Me fa goi poder interpretar a realidat dende os conoiximients d’a historia.
  • Me fa goi relativizar o diya de huei en virtud d’o diya de maitin u d’o diya d’ahiere.
  • Me fa goi leyer, veyer, pensar y vivir a realidat dende una anviesta analitica amás de l’atra realidat cutiana que vives como protagonista.
  • Me fa goi sentir o carinyo de muita chent por o que foi y tamién por o que soi.
  • Me fa goi sentir o rispeto d’atra muita chent por o que foi y tamién por o que soi.
  • Me fa goi pensar que o mundo cambea y que yo soi testigo d’o cambeo.
  • Me fa goi pensar que yo tamién cambeo.

Víctor Morlán. Aragonés, malfurriador, repetidor

Lunes, octubre 17, 2011 19:45
Publicau en a categoría purnas

Iste zaguer cabo semana o candidato socialista numero 1 por Uesca a o Congreso espanyol, Victor Morlán, actuaba en dos ocasions. La primera, con no guaire repercusión en os meyos aragoneses, estió dende Barcelona. En a ciudat catalana reconoixió que igual l’aeropuerto de Uesca no heba d’haber-se feito. Y más encara, deciba en una entrevista que s’heban feito cosas de nuevos ricos y que como bi’n heba diners y totz quereban obras en casa suya se’n facioron.

O más curioso d’a charrada de Morlán ye que encara que parixe que ye una disculpa por haber dixau deudas arrienda y haber feito infraestructuras ruinosas, risulta que no. Que diz Morlán que no puede tornar a pasar o que ha pasau, pero, tachán, que lo que fación estió bien. Ye una disculpa una mica tramposa. U siga, faciemos cosas que no hebamos d’haber feito, pero como pensamos que faciemos bien, me pienso que no ye dolent o que faciemos. No se si m’esplanico, pero me parixe que Morlán tampoco no.

Y diz o uescano Morlán amás que si viene o PP s’acotolará l’estau d’o bienestar. Ixo lo dició dimpués d’haber dito l’anterior, y ya como  candidato a continar malfurriando os diners. Que no digo yo que o PP no siga una menaza ta l’estau d’o bienestar, pero dito por un sinyor que reconoix que han gastau “porque n’habeba” como que suena una mica a burla. Que no?

Tags: , ,

Tot lo que prencipia, remata: aragoneame.com

Viernes, octubre 7, 2011 17:25
Publicau en a categoría periodismo, purnas

Con ixe titol no ye dificil pensar-se de que va o que viene agora. Dimpués de 4 anyos experimentando con a información, o social, o local y a desperiencia d’usuario, o puesto que ubrimos o consultor d’usabilidat y amigo Daniel Torres Burriel y yo mesmo, aragoneame.com tranca definitivament.

As razons son muitas, pero tampoco ye custión de meter-se a plorar. Ahiere moriba Steve Jobs y huei Félix Romeo. Bi’n ha cosas inevitables y tristas. O trancamient d’aragoneame.com no ye que una desperiencia más, d’ixas que toca vivir en a vida. Manca de tiempo, cero recursos y prochectos ilusionants que prencipian pueden estar un buen resumen d’o final d’ixo que en o suyo diya dicimos que yera “un sistema de chestión de contenius de codigo ubierto que te premite creyar o tuyo propio rete social y compartir enrastres y noticias d’intrés”.

Lo que más mal mos fa ye que con o fin d’aragoneame.com queda sin d’espacio, sin puesto, o triballo que a nuestra quiesta y plorada Marina fació en Pirena en 2009.

Sin puesto, sin amarre, y tresbatius por a pena mos dixó a suya marcha. Desorientaus. Una desorientación vital que cualsiquiera que haiga perdiu a un ser quiesto puede comprender, encara que no siempre asimilar. Por ixo, y porque ye a millor alcordanza que mos dixa ista desperiencia, hemos decidiu continar mantenendo o dominio, dixando disposable o triballo que Marina fació en Pirena.

Una alcordanza que se suma a la retransmisión que faciemos d’o derby aragonés en Segunda División dentre o Reyal Zaragoza y a S.D. Huesca, la devantadera d’a Expo, las milentas fotos publicadas dentre chunio y setiembre de 2008, l’homenache especial a Labordeta o diya que tamién ell mos dixó, u la ceremonia de clausura que tamién transmitiemos… alcordanzas que alzamos como bella cosa unica.

Cuatro anyos d’una desperiencia estupenda, complicada de vegadas, y divertida siempre.

Muitas gracias, y dica siempre

Buen viache, Félix

Viernes, octubre 7, 2011 13:55
Publicau en a categoría purnas

Félix Romeo (Foto: Gran Enciclopedia Aragonesa)

Félix Romeo (Foto: Gran Enciclopedia Aragonesa)

Iste viernes de pre-pilars mos dixa a noticia trista d’a muerte de Félix Romeo. Escritor, insemiso, activista cultural, traductor, culto. Romeo de 43 anyos dixa tres novelas, una d’as quals, “Dibujos animados” ha estau un d’os mios libros de cabecera mientres muitos anyos.

Nomás coincidié con ell una vegada, en o funeral de Jesús Moncada en Barcelona, y estiemos charrando un ratet sobre o desagradexiu que ye iste país con os suyos escritors. A Moncada l’heban dau o premio d’as letras aragonesas, pero que escribise en catalán estió masiau ta que tenese o reconoximient que merexeba. Agora, en a muerte de Romeo, me pienso si con ell no hemos feito lo mesmo. Presonas como ell quedan pocas. Cultos, comprometius, libres, intelectuals…Os suyos libros remanen, as suyas traduccions y a suya difusion d’a cultura. Que tiengas buen viache, Félix, y que pases buens ratos con os que han marchau antis que no tú. Moncada, Algora, Labordeta…ya tenetz unatro paisano ta compartir lifaras culturals.

El día de la mudanza, mi hermana se metió en una caja de cartón. Mi padre buscaba a mi hermana y mi madre buscaba a mi hermana. Y también mi hermano. A mí me dejaron con la gata. Mi hermana llegó a la nueva casa dentro de una caja de Vanguard blanco y negro. En una mano llevaba una batidora y en la otra un enorme pepón.

“Dibujos animados”, Félix Romeo

Belloch, a estucia suya y as eleccions

Lunes, octubre 3, 2011 17:10
Publicau en a categoría purnas

En istos diyas se son fendo os movimientos propios d’antis d’unas eleccions. Pero iste anyo parixe que estarán una mica más especials en Aragón. O PAR y o PP sinyan huei l’alcuerdo ta concurrir chuntos. IU y CHA tamién son fendo trangos ta fer lo mesmo. Si no cambea guaire cosa d’aqui entabant, os aragoneses podran votar a tres grans bloques y a poquetz partius mas chicorrons por os cambeos en a lei electoral.

Pero os partius aragoneses son en campanya dende mayo. Una vegada rematón as eleccions d’aqui os movimientos de pactos y contrapactos yeran feitos con os uellos fixos en as eleccions espanyolas. No estió casual o cambeo d’aliau d’o PAR, ni que CHA y IU no queresen sinyar un pacto de gubierno con o PSOE, sino nomás un alcuerdo d’investidura en o concello de Zaragoza. Un concello an que, amás, encara yera a figura de Belloch que agora parixe que se aluenya.

Y agora plega octobre y ya somos en o fregau de nuevas. En as zagueras semanas, mientres que alcordaban dentre bastidors o suyo pacto, IU y CHA s’han mirau de no parixer masiau achuntaus a o PSOE en o Concello. Han feito un valor de no haber sinyau por o gubierno y mesmo han habiu declaracions creticando leument a o gubierno municipal por una u unatra razón.

Pero Belloch ye muito Belloch. Y quan parixe que CHA-IU se presentaran chuntos y, por tanto, tienen bella intinción de sacar votos a o PSOE por a cucha, y que ta fer ixo, han de marcar distancias (como as declaracions sobre a marcha de Zapatero)…plega Belloch y asinas como sin querer, dixa cayer que mas luego que no tardi bi’n habra un tripartito de cuchas en o gubierno d’a bimilenaria ciudat de Zaragoza. Bravo por Belloch, desarmando a estratechia d’os suyos semialiaus y sin dembargo rivals. Y no estará la primera vegada, que Belloch ye un crack esferrando a os suyos socios de coalicion, en primeras CHA y dimpués PAR. Y si, as eleccions espanyolas no tienen cosa a veyer con o gubierno municipal, ya lo sabemos, pero dentre unas cosas y atras, mas d’un y de dos zaragozans votarán a Rajoy/Biel porque no pueden baxar con l’auto por Independencia.

Diez diyas d’Arredol (y vida estresant)

Jueves, septiembre 29, 2011 18:37
Publicau en a categoría periodismo, purnas

Foto publicada en Avui, feita por Laira Gonzalo

Foto publicada en Avui, feita por Laira Gonzalo

Fa diyas que no escribo en iste blog porque no adubo. As horas d’o diya son as que son, y nomás tiengo que dos mans y un celebro. L’amanixer (y nunca no millor dito) d’Arredol ocupa muitas horas d’o mio tiempo y bien emplegadas que son ixas horas. En istos diez diyas d’o diario dichital hemos aprendiu a-saber-las cosas y nomás ixo ya fa que valga la pena l’esfuerzo.

Creyar de cero un diario dichital, alacetau en o triballo voluntario, y prebando de plegar a la mayor parti d’as noticias, ye un esfuerzo titanico, más que más quan que o nuclio duro d’o prochecto somos 3 presonas que no tenemos tot o tiempo disposable ta fer-lo, porque tenemos atras fainas que fer.

Ha suposau, amás, un triballo important de categorización, de riflexión sobre lo que queremos y no queremos fer, de concertar voluntatz de chent ta que escriban de vegadas, de difusión… O perfil de twitter tien más de 500 siguidors, y son más de 200 presonas as que s’han apuntau a la pachina de Facebook. Ixo contrimuestra l’intrés de muita chent, y tamien leva dezaga firme triballo de difusión y contestar.

L’atro diya li diciba a Torresburriel que Arredol, amás d’a segunda prebatina de fer un diario dichital en aragonés (a primera estió A rebista, que feba Chusé Fernández, agora en TEA FM) ye un proceso presonal en que aplicar tot lo que he iu aprendiendo d’istos mundos dichitals en totz istos anyos. A redacción ta internet, o disenyo en wordpress, o periodismo dichital y ciudadano, a faina de community manager, ubrir espacios ta la comunicación horizontal… tot ixo ye present en Arredol, y as parolas que mos han plegau de chent como o profesor de periodismo de l’Autonoma de Barcelona, Gabriel Jaraba,  dicen que va por buen camín. Amás, d’a repercusión d’o feito en o mundo aragonesofablant, en Aragón en cheneral y difuera d’Aragón (En Món Divers, en Fablans, en Aruelu, en Goza Zaragoza, en Vilaweb, en Arainfo,  en El Punt-Avui, en Diario Liberdade, en PGLingua, tamién en Esta es la Nuestra, de Aragón Radio, en Aragón Tv, en GaraFendo Orella, de Radio Topo, en Radio Matarranya, en Diagonal)

O balance d’istos diyas, si ye que se puede fer balance en diez diyas, ye espectacular. Más de 1000 vesitas unicas diarias, muitos comentarios, continamos creixendo en numero de siguidors en twitter, recibimos notas de prensa de quasi totas as institucions d’o país, asociacions, sindicatos, partius u colectivos, hemos recibiu ya proposas ta fer publicidat, y mesmo curriculums, encara que Arredol no ye un meyo profesional (en o sentiu d’interpresarial).

Tamién hemos d’aplicar tot o que mientres istos anyos hemos charrau y sentiu charrar d’o periodismo dichital, a rapidez, pero tamien a profundidat. O dialogo con os lectors. As proposas ta fer a vesita a la pachina más agradable. Correchir as errors que se puedan comenter dixando constancia d’ixo (y mira, d’ixo ya hemos teniu).

Pero encara queda muito camín. Plegar a más cosas, fer más contenius propios, continar triballando a luenga, as opinions, creyar más intrés en os lectors…En quedan tantas! Tot camin tien un prencipie, y encara no s’alufra o final, y menos mal, que plegamos de naixer. Asinas que china chana, amonico, dondiando, y fendo camin, que ye bien poliu haber puesto creyar Arredol y fer tantas cosas que querebamos fer.

O 19 de setiembre, un diya sinyalero: Labordeta y Arredol

Lunes, septiembre 19, 2011 17:55
Publicau en a categoría purnas

Fa un anyo, y en buena companyia, plorabamos a muerte de José Antonio Labordeta. Estioron aquells uns diyas intensos, plens d’emocions, con a sensibilidat a flor de piel. Companyers de luitas retrobaus dimpues d’a-saber-los tiempos, compartibamos o dolor por a muerte d’un hombre digno. Con as suyas luces y huembras, con as suyas errors y enciertos, pero con a suya dignidat, voz y luita a cuestas. A suya voz mos tornó o significau d’estar aragoneses, mos emplió de l’argüello d’ista tierra dura, salvache, y toba por dentro. A suya gorra, a suya guitarra y as suyas gambadetas son parti ya de l’ADN d’iste país y d’istos paisans.

Son tiempos duros. Os aragoneses han quiesto que mos gobierne la chent contra la que luito tota la suya vida Labordeta. Ixos a los que ninvió “a la mierda” porque no li dixaban charrar. Ixos que, chunto a o PAR que antis demandaba que o Canto a la Libertad estase l’himno d’Aragón, no han quiesto nian charrar en as Cortes d’o tema.

Pero o ciclo d’a vida ye como ye. As simients han de morir ta fer l’arbol, l’ordio, o fruito. Qui deciba que nomás somos enans dencima d’os huembros de chigants teneba tota la razón. Por ixo, y con tot lo que hemos aprendiu, con tot o que atros han luitau, con os fruitos d’as suyas asperanzas, hemos de continar marchando entabant. Por a memoria d’os que s’han iu, por as suyas fuerzas gastadas contra mallacans y paretz, por o suyo esprito y esmo. Por tot ixo, iste mesmo diya 19 de setiembre naxe Arredol. Contra o silencio d’as leis y o chilo d’o ignorant. Por a información en aragonés y a normalización d’una luenga menazata de disparixer como diz la Unesco.

Somos. Hemos. Imos. Ista tierra ye Aragón y continamos esnavesando a historia, siempre entabant. Ta cutio entabant.

Ortega Cano, o suyo auto y yo

Viernes, septiembre 9, 2011 14:02
Publicau en a categoría purnas

De quan yo viviba en Cartagena me’n leve desperiencia profesional, vital, buena ripa d’amigos y tamien un camaton d’anecdotas d’a vida d’ixa ciudat que ye en una autonomia que quasi no reconoix. A curiosa vida cartagenera y o propio triballo que teneba me fa agora poder recentar anecdotas d’o rei d’Espanya, de Zaplana, de Juan Cotino y agora que ye de moda por haber matau en una carretera a una presona en un accident, de Jose Ortega Cano, torero.

Yera una nueit escura, como gosan prencipiar bells relatos, y yo adugaba o mio 127, alcompanyau con una amiga por o vico d’a Concepcion de Cartagena (Quitapellejos, que li’n dicen asti). En una tornada ta cuchas dentremos por un callizo estreito de sentiu unico y por sospresa, mos trobamos unatro auto, fosco, negro, con as luces enchegadas y que mos feba sinyals ta que retaculasemos.

Profés que no marchamos ta zaga, porque tenebamos prioridat y porque soi de Zaragoza, pero si que mos faciemos a un costau ta que l’auto negro (un Mercedes, creigo remerar) que iba en sentiu viedau, pasase a o costau nuestro. Quan pasó, me mire ta dentro de l’auto y veyie a qui adugaba, que no yera atro que José Ortega Cano, torero, naxiu de Cartagena y a mai d’o qual viviba en a Concepción.

Encara que li chile bella faltada, ell no baxo de l’auto en garra inte, nian se miro enta nusatros en pasar, pero asinas estio como conoxie a o torero Ortega, ell adugando en sentiu viedau, con un auto negro, mientres yo, con o mio 127 li dixaba pasar. Porque agora, a toro pasau, nunca no millor dito, puedo dicir que bi ha qui se piensa que os regles no van con ells, dica que lis pillan, claro.

Unatra osca en o revolver d’o gobierno PP-PAR. Huei, l’himno de Labordeta

Jueves, septiembre 8, 2011 10:34
Publicau en a categoría purnas

Prencipia l’actividat politica en iste chicot pais nuestro, y l’actividat d’o suyo gobierno. No sapemos encara que piensa o gobierno sobre a reforma d’a Constitucion espanyola, pero os suyos brazos d’aicion ya prencipian a atacar con as suyas garras os temas primordials que preocupan a os aragoneses, profés que si.

Por exemplo, o programa d’invitacion a la lectura, que como que puede meter ideyas estranias a os ninos s’ha suspendiu mientres que paran unatro, dicen. M’agana mas no pensar en nombres d’escritors que lis feria goyo portar-ne. O la lei de luengas, que ye un d’os temas en que o gobierno tien mas ganas de ficar a man. Pero puestos a continar minando a identidat aragonesa que millor que no dixar pasar a ocasion de fer mal con una canta y una presona a la que disprecian, atamás que quan moriba o zaguer anyo dicisen que si tal u qual.

O PP y o suyo socio de gobierno, o PAR, antis aragonesista, han decidiu que ye millor nian charrar d’a posibilidat de que o Canto a la libertat siga l ‘himno d’Aragon, cambeando l’actual himno que poca chent reconoxe y dengun se’n sape. Y como que queda mal votar contra Labordeta en o cabo d’anyo d’a suya muerte, han decidiu que votaran antis ta que ni dentre en o parlament a ILP que presentaba mas de 20.000 sinyaturas ta cambear l’himno d’Anton Garcia Abril por o de Labordeta.

Diz muito de l’intres d’os politicos profesionals sobre a opinion d’a carrera que siga a segunda ILP que no prospera en as Cortes Aragonesas, dimpues d’a proposada por a plataforma en esfensa d’as montanyas. En tot caso, encara que o que votaran estara a toma en consideracion y no a decision de cambear l’himno, ye sintomatico qui votara en contra y porque. O PP, que diz que ya tenemos un himno, y que no cal trencar os alcuerdos institucionals. En menos d’una semana han xublidau o que han feito con a reforma constitucional. Pero truca o ficacio, en especial, o socio d’o gobierno de Rudi, o Partido Aragonés, que diz que l’himno ye un sinyal d’identidat. Curioso, porque dengun no conoxe o testo y poquetz a mosica, y curioso, porque ye precisament ixa falta d’empata con os aragoneses a que facio que o PAR votase en contra de l’actual himno y fese a proposa de que, tachan, o Canto a la Libertat estase l’himno d’Aragon porque “ya existe, no es partidista, es popular y muy conocida“, y mesmo o sinyor Mur remataba dicindo “pero sin embargo, seguimos pensando, que aquí y ahora habrá un día en que todos al levantar la vista, veremos una tierra que ponga libertad“.

Claro que yeran atros tiempos y Mur no ye Biel ni Boné, ni o PAR d’allora, encara con o “regionalista” pegau, puestar que estase mas aragonesista que no agora. No ye dicir guaire, porque o PAR d’ixos tiempos mos levo por o camin lento d’as autonomias de segunda, pero si lo contimparamos con o PAR d’agora…

Pachina 8 de 217« Primera...678910...152025...Zaguera »