Región, qué hermosa eres

Martes, enero 3, 2012 17:49
Publicau en a categoría purnas

Si bella cosa ye platera en os zaguers tiempos en Aragón ye a reversión d’un cierto sentimiento aragonesista, en electors, pero tamién en a carrera. As tres u quatre zagueras eleccions han contrimostrau que o voto “aragonesista” en o sentiu amplo d’o termino, ye de baixada. De traza mayoritaria, os aragoneses y aragonesas votan a partius d’obediencia espanyola. Por ixo no ye d’estraniar que a presidenta d’Aragón, Luisa Fernanda Rudi, que nunca no ha estau “aragonesista”, gose emplegar a ormino y sin garra prechudicio una terminolochia que ya pariexeba desterrada d’iste país nuestro.

Deciba huei Rudi:

Mi objetivo es convertir a Aragón en una región líder entre las comunidades españolas, y para conseguirlo es imprescindible que Aragón sea una comunidad creíble en los entornos económicos y financieros españoles y de fuera de nuestras fronteras. No podríamos haber trasmitido credibilidad si no hubiésemos sido capaces de ordenar la administración aragonesa. Ese ha sido nuestro esfuerzo y en él seguiremos trabajando.

Rudi define a Aragón como “región” y tamién con ixe “comunidad española” que remarca o caracter espanyol d’o suyo gubierno y d’os suyos votants. Ye grau que os aragoneses sigan tresbatindo bell tipo de conciencia “aragonesa” que se vaiga esleindo en ixe espanyolismo uniformizador. Ye grau, y ye historico, porque ye un proceso tan luengo como o tiempo que ha pasau dende que os reis d’a Corona espanyola en 1591, en 1707 y china chana, retalloron, han retallau y retallan no nomás que a legalidat, que tamién a identidat aragonesa con poca oposición d’os propios afectaus. Pero más grau ye que o cargo institucional más important d’o país, a presidencia, no nomás no tienga garra conciencia aragonesa, que tamién con as suyas parolas pase por dencima d’a legalidat vichent. Ye dicir, no ye un problema politico nomás, que tamién en ye de legal.

Cal remerar o que diz l’Estatuto d’Autonomía d’Aragón, refirmau por o PP en as Cortes d’Aragón y tamién en o Congreso espanyol.

1. Aragón, nacionalidad histórica, ejerce su autogobierno de acuerdo con el presente Estatuto, en el ejercicio del derecho a la autonomía que la Constitución reconoce y garantiza a toda nacionalidad.
2. Los poderes de la Comunidad Autónoma de Aragón emanan del pueblo aragonés y de la Constitución.
3. La Comunidad Autónoma de Aragón, dentro del sistema constitucional español, ostenta por su historia una identidad propia en virtud de sus instituciones tradicionales, el Derecho foral y su cultura.

Asinas que Aragón en l’ambito legal ye una nacionalidat historica que ha esdeveniu Comunidat Autonoma. En garra puesto mete “rechión” (y tampoco no país u nación). En l’ambito nomás que legal, Aragón ye, repito, una nacionalidat historica que s’ha feito d’ella mesma Comunidat Autonoma. Ixa ye a denominación que fueras d’atras custións politicas habria de rispetar a presidenta d’Aragón quan charra como presidenta d’Aragón.

Puestar que Rudi piense que Aragón nomás que ye una rechión espanyola, igual que yo pienso que ye una nación que habría d’esfer-se y marchar d’Espanya. Pero encara que Rudi piense ixo, como bells atros aragoneses, como que charra como presidenta d’a Comunidat Autonoma d’Aragón, que en ye, porque ye una nacionalidat historica que ha decidiu fer-se Comunidat Autonoma, habría de rispetar ixa, y nomás que ixa denominación. L’atra, la que li fa goyo, ta las tertulias de casa suya.

 

Suenios entre boiras

Lunes, enero 2, 2012 12:11
Publicau en a categoría purnas


O venient diya 6 de chinero se presenta en A Flama a exposición “Somnis entre boires” de Marc Martí, en colaboración con MagoFermin. En l’acto, a las 20.30, leyeré poesías de Marc en catalán y castellan, alcompanyau d’a suya guitarra.

“Somnis entre boires” ye una muestra de 21 fotografias de collas mosicals aragonesas en directo, que suposa una chicota anviesta d’a colección de l’autor. As imachens, feitas en conciertos de collas como Mallacán, Gen, Prau, Visión Túnel u Temps al Temps, quieren trasmitir a ideya de que bi’n ha un movimiento mosical dillá d’os espacios granizos y as grans ciudatz.

Marc Martí, naixiú de Massalió, ye licenciau en politicas y triballa en Ràdio Matarranya i Noticies del Matarranya. Como fotografo, ha publicau o suyo triballo en Heraldo d’Aragón, La Comarca, Diari de Tarragona u Temps de Franja y colabora con atros meyos dichitals. Amás, Marc Martí ye poeta y letrista de collas como Los Draps u Txirigol.

Resumen d’o 2011 en purnas.com

Jueves, diciembre 29, 2011 11:36
Publicau en a categoría purnas

Iste anyo 2011 que ya remata ha estau important por muitas cosas, a ran presonal y colectivo. Cambeos de gubiernos, d’interpresa, naiximiento de meyos nuevos como Arredol, muerte d’atros como Aragoneame, lecturas y sobre tot relecturas… Un anyo intresant, estresant de vegadas, y ilusionant a mayor parti d’as veces y no guaire en atras quantas. Como cada anyo dende fa tres, meto bells articlos que creigo que han marcau iste anyo en iste blog que cumple ya 8, y que por una u atra razón, cada vegada leye menos chent. A ideya de fer istos resumens ye de Torres Burriel, amigo y companyero d’aventuras y cada anyo en fa. Si queretz veyer os resumens d’atros anyos tenetz os d’o 2010, 2009 y 2008

chinero 2011

febrero 2011

marzo 2011

abril 2011

mayo 2011

chunio 2011

chulio 2011

agosto 2011

setiembre 2011

otubre 2011

noviembre 2011

aviento 2011

 

Cajal, l’autoodio y o desconoiximiento

Lunes, diciembre 26, 2011 11:29
Publicau en a categoría de l'aragonés, purnas

Un premio Nobel de medicina, naixiu de Petilla d’Aragón (Navarra), pero aragonés por vocación y familia, mos deciba como charraban en Ayerbe quan que estió vivindo astí. Y asinas encara continan pensando a-saber-los aragoneses. Y asinas ye a situgación en que l’autoodio y o desconoiximiento han deixau a ista antiga y chicota luenga.

Por entonces se hablaba en Ayerbe un dialecto extraño, desconcertante revoltijo de palabras y giros franceses, castellanos, catalanes y aragoneses antiguos. Allí se decía: forato por agujero, no pas por no, tiengo y en tiengo por tengo o tengo de eso, aivan por adelante, muller por mujer, fierro y ferrero por hierro y herrero, chiqué y mocét por chico y mocito, abríos por caballerías,dámene por dame de eso, en ta allá por hacia allá, m’en voy por me voy de aquí, y otras muchas voces y locuciones de este jaez, borradas de mi memoria.”En boca de los ayerbenses hasta los artículos habían sufrido inverosímiles elipsis, toda vez que el,la, lo se habían convertido en o, a y o, respectivamente. Diríase que estábamos en Portugal. A los rapaces de Ayerbe parecióles, en cambio, el castellano relativamente castizo que yo usaba, es decir, el hablado en Valpalmas y Cinco Villas , insufrible algarabía, y hacían burla de mí llamándome el forano (forastero).

Citado por Fernando González Ollé en “El habla de Ayerbe y otros aragonesismos en la autobiografía de Santiago Ramón y Cajal”, y ye de  l’autobiografía de Santiago Ramón y Cajal “Mi infancia y juventud”.

A replega de parolas no ye una replega antropolochica u filolochica, motivada por o saber scientifico, que ye una replega d’odio como amuestran os adchetivos que l’adedica: “desconcertante, revoltijo, inverosímiles” y que amás amuestra un fundo desconoiximiento que han heredau muitos aragoneses de huei, porque a luenga d’Ayerbe no yera una luenga sino “desconcertante revoltijo” que “diríase que estábamos en Portugal”.

País.

Manhattan Transfer y o periodismo

Viernes, diciembre 23, 2011 10:59
Publicau en a categoría periodismo, purnas

-Voi a desfer-me de tot isto – dició Jimmy con aire obscuro – marchando-me’n ta Mexico a fer fortuna. Soi perdiendo o millor d’a mia vida podrindome en Nueva York.
- Como vas a fer fortuna?
- Petrolio, oro, asaltos a dilichencias, cualsiquier atra cosa fueras d’o periodismo…
- Bee, bee, uella tresbatita, bee, bee
- Deixa de belar, en quiers?
- Emigremos. Imos a apanyar o silenciador a Dingo

Dos Passos, John. “Manhattan Transfer

Ta os companyers d’ADN y totz os periodistas a qui forachitan en istos tiempos d’o triballo

Con a suya capeza as nuestras libertatz

Martes, diciembre 20, 2011 10:00
Publicau en a categoría purnas

En 1591 un exercito castellan plegaba en Aragon, se enfrontinaba en Epila a una banda achuntata por bells nobles aragoneses y dentraba en Zaragoza sin garra oposición. Asinas remataba un d’os episodios mas tristes d’a nuestra historia. Por esfender a un convicto, Antonio Perez, Aragon facio una crida a os suyos dreitos y institucions. Pero no tenio a fuerza ta esfender-los.

Con a capeza de Juan de Lanuza, “O mozo”, cayeban a tierra buena parti d’os fueros d’o pais, retallaus en Tarazona a l’anyo siguient por Felipe I d’Aragon, II de Castiella. Con a suya capeza rodaban tamien os tiempos en os que Aragon sabeba esfender os suyos fueros y o suyo pasau y present. Con as capezas talladas y amostradas mientres meses d’os nobles rebeldes s’amostraba tamién una parti d’a fin d’o país.

Un historiador frances esplanicaba en o sieglo XIX: “Os aragoneses, yeran y son, un pueblo que guarda o suyo pasau y a suya historia, y curoso con as suyas libertatz y chusticias, pero en ixe tiempo, encara que argüellosos d’a suya libertat ganada, no sabioron esfender-la

En Zaragoza, mientres os soldaus castellans feban guardia en o cadalso, os ciudadans s’amagaban en as suyas casas. Nomás que a boira estió testimonio de l’astral que li tallo a capeza a o Chusticia. Huei, 420 anyos dimpues, se remera a figura d’o Chusticia. A suya estatua preside una centrica plaza de Zaragoza, huei se levaran flors y banderas y os aragoneses han tornau a fer d’o Chusticia un simbolo y una institucion publica…o simbolismo de l’acto queda en ixo, y os huellos parixen querer veyer, encara, os cuerpos podrius d’os muertos que penchoron d’as murallas ta remerar a os aragoneses que no heba de debantar-se contra os forans y o rei.

Nos que somos tanto como vos, pero juntos más que vos, os hacemos principal entre los iguales, con tal que guardéis nuestros Fueros y libertades, y si no, no

Entalto Aragón Libre! Aragón, Kilometro Zero!

Leyer más, saber más

Domingo, diciembre 18, 2011 10:56
Publicau en a categoría prexinando, purnas

Iste anyo o premio d’as letras aragonesas ha siu ta Ignacio Martínez de Pisón. Nunca no heba leyiu cosa d’ell. No por manca d’intrés, pero si porque siempre que prebaba de leyer bella cosa d’ell, a la fin trobaba atro libro que me trucaba más o ficacio.Leyendo istos diyas datos biograficos d’ell he parau cuenta que bi’n ha cosas que compartimos, como a rilacion con Logronyo, estudiar en os chesuitas, a vida en Barcelona, como tantos atros aragoneses…

Aproveitando o premio, y un d’ixos sabados que pasan de corriu entre resaca, conversas y café, a la fin m’amané ta “Enterrar a los muertos”, que no ye una novela, sino lo que definen como “a suya obra más ensayistica”, y an que traza o recorriu de l’asesinato de José Robles por os comunistas mientres a guerra espanyola y o siguimiento d’o caso que fació John Dos Passos en calidat d’amigo presonal de Robles, traductor, escritor, hombre de letras.

Cal dicir que ye una obra bien documentada, bien narrada, y que, de feito, ha aconseguiu que leyese sin aturar dica o cabo. Pero lo más important que m’ha feito lo libro ye tornar a ubrir finestretas trancadas. Por “Enterrar a los muertos” amaneixen una serie de presonaches apegaus a o mundo d’as letras, que estudean luengas por vicio, que leyen, releyen y s’estudean uns a atros, que esnavesan por o mundo entre libros y escritos, que escriben y que s’escriben.

Y ye tota ixa ripa de presonaches a que ha feito que quan he zarrau o libro iste maitín, en que he maitinau sin obligación, ta rematar de leyer-lo, a que ha feito un clamamiento en o mio esprito. M’han veniu as ganas de leyer más, de saber más, d’escribir más, d’estudear más. Leyendo sobre as trayectorias vitals d’ixa chent he parau cuenta de totas as cosas que encara no se, as que encara no he leyiu, os clasicos que no he ubierto, o conoiximiento que s’eslampa de yo por manca de tiempo. Remero qui una vegada fació una lista con totz os libros que s’heban de leyer sí o sí, y que teneba intinción de fer-lo en o esnavesar d’a vida. Puestar yo no faiga ixa lista, pero si que he d’emplir foraus en as mias letras. Puestar no tienga tiempo agora ta estudear atra luenga, pero me’n tornan as ganas. Puestar tampoco no tienga tiempo ta tornar ta la Universidat, porque as amostranzas que más m’intresan no pueden fer-se a distancia, pero quedan apuntadas en o “debe” y de feito ya m’he mirau o que quiero fer, estudear y leyer…y saber.

Porque como deciba Don Quijote “el que lee mucho y anda mucho vee mucho y sabe mucho”.

Blecua y l’aragonés

Miércoles, diciembre 14, 2011 10:00
Publicau en a categoría de l'aragonés, purnas

image

El aragonés José Manuel Blecua ye un más d’os directors d’a RAE aragoneses que han habiu. Teneba ista entrevista guardada de fa bells meses con ell en l’Heraldo, y no heba puesto encara fer un pensamient sobre ella. Aproveito que istos diyas Blecua recibe premios en Catalunya ta recuperar-la.

No sere yo qui meta en dubda a categoria como filologo de Blecua, pero sosprende en ixa zaguera pregunta de l’Heraldo que faiga un mezclallo entre o que se charra en a Cinca (catalán) con l’aragonés, que amás, diz que “no ye una luenga, sino atra cosa”. Puestar que bi’n haiga una categoria filolochica que siga “atra cosa”, que yo desconoixco. Mesmo puestar que o director d’una Academia que ha de dar como valida una frase como “a ver qué remera cojo del placard para ir al laburo” piense que as esferencias nomás que son importants en bellas luengas.

Pero me quedo más en o sendito d’o que diz, que me pareixe que no ye o que escribe a periodista de l’Heraldo. Porque o que diz Blecua ye que en no haber-ie normalización ye normal que bi’n haiga esferencias. “L’aragonés ye una multiplicidat de variedatz”. Verdat. “Como totas as luengas que no son unificadas”. Verdat a meyas, pero verdat. As luengas como l’espanyol, que si tienen una Academia que “fija y da esplendor” tienen variedatz, muitas y ricas. Y o catalán, luenga a la que Blecua tien carinyo y que ha refirmau dende a suya catedra en Barcelona, tamién.

Me pienso, quiero pensar, que Blecua no quereba dicir que as variedatz de l’aragonés fan que l’aragonés no siga una luenga, mientres que en o resto d’a entrevista as variedatz de l’espanyol que esfiende si que fan de l’espanyol una luenga. No seré yo qui diga o que Blecua ha quiesto dicir sin haber-lo escuitau, pero ixe parrafo ye tant rarizo y con mezclallos tan rarizos de luengas y conceptos, que me cuesta a-saber-lo pensar que ta Blecua bi ha variedatz que fan luenga y atras que fan “atra cosa”. Puestar a unica esferencia entre l’aragonés y as suyas variedatz, o catalan y as suyas variedatz y o castellan y as suyas variedatz siga, precisament, que encara no tenemos una Academia que “fije y de esplendor”, dillá d’as variedatz, pero veilando por ellas.

Ixo sí, l’Heraldo teneba o titular claro. A tamás que ixa estió a zaguera pregunta d’a entrevista, y que yera una pachina entera de preguntas sobre o castellán y as suyas variedatz, y que o propio Blecua, encara que ye filologo diz que no tiene guaire opinión sobre o tema porque en sabe poco, tituló l’articlo por “El aragonés no es una lengua, es otra cosa”.

As 4 y 20 d’un cabo semana

Martes, diciembre 13, 2011 11:36
Publicau en a categoría prexinando, purnas

image

image

De vegadas sientes que t’encorren. A yo m’encorre de fa anyos o 420. Suposo que dende que prencipie a dispertar-me a ixa hora, en un inte concreto, paro más cuenta d’ixa zifra en tot o que me redola. Tamién bi ha condicions especials que fan que o 420 tienga más presencia. Por eixemplo, quan que plega aviento y se me fa o tiempo de parar o reparto d’a loteria que con ixe numero fa anyos que chugamos con os cada vegada menos lectors de Purnas.

A zaguera semana torne a dispertar-me a las 4 y 20 d’o maitín. Y no ye un recurso literario. Estió literal. O miercols dimpués d’un suenio rarizo y a la fin, premonitorio, me disperté a las 4 y 20. Y dimpués o domingo y o lunes. As 4 y 20 como sintoma. As 4 y 20 como reyalidat horaria. As 4 y 20 como zifra d’un cabo semana en un ticket de bar agradable y hongaro. Un ratet de paz en a vida convulsa.

As 4 y 20 como nombre de botiga en a carrera. D’una gambadeta eslampando d’o futuro incierto y fredo de l’hibierno dimpués de l’estiu y l’agüerro calidos. Asinas ye l’orache. Asinas ye la hora. As 4 y 20 horas. As 4 y 20 vegadas que t’estampas contra una reyalidat ingrata, rariza y fiera y polida a partis iguals.

Tornar a uellada ta zaga no tien guaire sentiu. As cosas no son como las veyes en un inte concreto sino como pasan. Me quedo dentro muitos atros analisis, sensacions, asperanzas, medranas, suenios. Son as 4 y 20 en una parti d’a mia vida. Agora cal decidir si quiero continar soniando u dispertar d’o suenio. Agora cal pensar si programo o dispertador ta las 4 y 20 u a mesma hora decidira dispertar-me. Agora cal devantar d’o leito, o leito vuedo que no ye vuedo porque qui quiers que i siga ye luen, que ye vuedo porque no tornaras a emplir-lo.

Si tu yes luen (Mallacán)

As nueitz son tan luengas si tu yes luen
As nueitz son tan luengas si tu yes luen

Alufrando as fuellas baixo os arbols
I trobé as güembas de tu arredol
Camino solenco debant d’a luz
Os ricuerdos son vuedos tan luen de tu

Si tu yes luen, si tu yes luen, si tu yes luen

A vida en a pocha plena de sal
Os intes que mullan l’augua d’a mar

E dimpues d’os trangos que o cierzo borró
Amagato en o leito veigo a foscor

Si tu yes luen, si tu yes luen, si tu yes luen

Pero ixo rai que anque te mire sin cosa que dicir
Solenco continé cuan te i trobé amenisté fuyir
Y agora soi prebando de sentir a tuya piel
Anque sigas luen asti m’enradigué, astí m’enradigué

Si tu yes luen, si tu yes luen, si tu yes luen

Audaces fortuna iuvat

Lunes, diciembre 12, 2011 20:12
Publicau en a categoría prexinando

Audaces fortuna iuvat. Ye una d’ixas mazadas que se gosan sentir á ormino. Audaces fortuna iuvat. Audaces fortuna iuvat. La sentimos quan que charran d’as interpresas, d’as decisions importants. Bella vegada, mesmo la sentimos quan charran d’a Eneida de Virgilio, o suyo contexto orichinal. Audaces fortuna iuvat.

Debant d’ista mazada podemos trobar atras. Por eixemplo, una d’irlandesa que siempre m’ha feito goyo “Mas vale ser cobarde un segundo que muerto ta tota la eternidat”. Y d’atras parellanas, claro. Pero me quedo con a primera. Audaces fortuna iuvat. Ye un chilo de guerra. Ta tirar entabant. Ta fer decisions. Ta creyar y creyer. Ye o “Desperta ferro” d’os latinistas, y d’os que prefieren mazadas menos guerreras, quan no saben que o contexto ye, precisament, d’una guerra.

Audaces fortuna iuvat. Mos deixamos seducir por ixas parolas. Queremos fer dispertar o fierro. Queremos ser valients. Queremos creyer. Creyemos. Y tiramos ta debant. Pero, mira, de vegadas, a fortuna ye una mala puta. Y o fierro no dispierta ni pa dios. U s’aduerme, silencioso, a nonón, a nonón. Y alavez, y nomás que en ixe inte, mos femos os suecos. Ta qué ser valient? mira que podié no haber feito ixo…Por qué me decidíe?

Y ta que sirve dicir ixo? Ta cosa. A lo menos, deixar-se levar, creyer, enrestir, creyar, decidir, fer, achuntar, plegar levaus en as alas d’a fortuna u d’o fierro de l’esmo d’o corazon d’as mans d’a vida ye más important que o risultau. A vida ye ta vivir-la y ta entivocar-se y tornar-se a entivocar y no fer-lo. As decisions feitas son t’aprender d’ellas. Que a fortuna alcompanye u no pas ye custión menor. De vegadas caleba dicir sí. Porque sí, y porque, de vegadas, a fortuna tamién s’entivoca de camín.

Pachina 5 de 216« Primera...34567...101520...Zaguera »