Refirme etico y economico a la Pantera Rossa

viernes, mayo 28, 2010 12:51
Publicau en a categoría purnas

As amigas d’a libreria asociativa La Pantera Rossa son demanando refirmes economicos ta enantar o suyo proyeuto y o local suyo que estara en a carrera San Vicent de Paul, cantonada carrera Mayor. Tos convido a aduyar a iste proyeuto que esdebendra un nuevo foco cultural y social d’a ciudat. Asinas mos dicen ellas:

En os meses venientz un nuevo espacio de ciudadania ubrira as suyas puertas en Zaragoza. Dimpues d’un vivo proceso de debate, un ligallo de desperencias comunitarias en esfensa d’o comun presentamos en Zaragoza un proyeuto endrezado enta l’aizion cultural y compromeso con a economia social y solidaria.

A empresarialidat politica ye feita en torno a la libreria y a la botiga de comercio chusto que feran de proa t’o proyeuto. A reforma y esvielle de l’espacio, asinas como a enantada d’a libraria, que tendra bells puestos de triballo asalariatos, demana un refirme economico, parti d’o cualo ye cubierto por as presonas que prencipiamos o viache. Pero amenistamos mas colaboracion ta aconseguir a resta que s’amenista y a estabilidat en o prencipie. Ta ixo hemos creyato un sistema de donacions y tamien de prestamos presonals a travies d’achuste privau ta quedar difuera d’os sistemas d’a banca y financieras tradicionals y aduyarnos, asinas, a guaranziar a viabilidat d’o proyeuto.

Si quiers partecipar economicament, de maniera etica y solidaria con o viache d’a Pantera Rossa contauta con nusatros a travies d’o telefono 652823651 u por correyo eleutronico ta info@lapanterarossa.net.

Charraire Fest en Pandicosa (Alto Galligo) o 12 de chunio

miércoles, mayo 26, 2010 18:48
Publicau en a categoría de l'aragonés, purnas

I Charraire Fest en Pandicosa

I Charraire Fest en Pandicosa

O 12 de chunio se fera en Pandicosa (Alto Galligo) o I Charraire Fest, o festival d’as luengas d’Aragon. Lo para la chent de Ara Cultural que son fendo un sobrebueno triballo ta espardir a cultura aragonesa y sobre tot, a cultura en aragones. O programa ye bien plen de autibidatz ta ninos y grans tot lo diya. Amas han teniu o detall de convidar-me a una mesa redonda que fan sobre as luengas minorizatas y os meyos de comunicacion an compartire charrada con Eduardo Lolumo (un d’os ombres de l’orache en Aragon Tv), Mario Sasot (corresponsal de La Vanguardia en Aragon y autibista de lo catalan), Camino Ibarz (presidenta de l’Asociacion d’a Prensa d’Aragon) y Maite Cortina (delegata d’Aragon Tv en Uesca).

Iste ye o programa d’ista intresant chornada d’as luengas en l’Alto Galligo.

11.00 Gambadeta botanica en aragones dende Pandicosa dica O Pueyo

12.00 Socalze con os gaiters Profés Prou en O Pueyo

12.00 Feria d’as luengas

12.00 Tallers ninos

12.00 Tallers danzas aragonesas y paloteaus

13.00 Animacion ta ninos en aragones con Aibadai

14.30 Chenta con caldereta

16.00 Documental “L’aragones d’a Bal de Tena” Fernando Romanos y Fernando Blas. Parola

17.00 Presentacion d’o ret social por l’aragones “Aragoneses por l’aragones

17.30 Mesa redonda “Periodistas aragoneses y as luengas d’Aragon”

16.00 Tallers ninos y mosica con os Profes Prou

16.00 Dinamica Charrada “Argumentos por l’aragones”

17.00 Clase ubierta d’aragones. A.C. Nogara

19.00 Presentacion d’os cursos d’aragones 2010-2011. Pilar Benítez y Manuel Ramón Campo

19.30 Cantando y aprendiendo en aragones

20.00 Premios Esnabesar 2010

21.00 Zena

22.00 Teyatro en Aragones. Mullers. De qué coda.

23.00 Mosica y Karaoke en aragones

00.00 Dj Zafio $ Dj Chandrio. Femeral Brothers

 

Di-me que soi y que he de sentir

lunes, mayo 24, 2010 17:38
Publicau en a categoría purnas

L’atro diya @tarazonando me deciba en Twitter que El País escribiba sobre a lei de custodia compartida (PDF) aprebada por a nuestra “región”. Ixo a lo menos, deciban en a portalada d’o diario, encara que dimpues, y puestar porque yera escrito dende Barcelona, o testo charraba de Comunidad Autonoma. Dende Aragón Colonial he prebau mientres tres anyos de sinyalar o mal fer de os meyos aragoneses cuan charraban de “estadisticas regionales”, “región” u “economia regional”. Y digo de meyos aragoneses y no pas d’espanyols, como El Pais, que ni tien edicion aragonesa. Ye dificil demanar a atra chent que rispete a legalidat autual d’Aragon cuan os mesmos aragoneses no lo femos.

L’Estatuto d’Aragon, con totas as suyas mancas, dixa esclatero lo que ye Aragon.

  1. Aragón, nacionalidad histórica, ejerce su autogobierno de acuerdo con el presente Estatuto, en el ejercicio del derecho a la autonomía que la Constitución reconoce y garantiza a toda nacionalidad.
  2. Los poderes de la Comunidad Autónoma de Aragón emanan del pueblo aragonés y de la Constitución.
  3. La Comunidad Autónoma de Aragón, dentro del sistema constitucional español, ostenta por su historia una identidad propia en virtud de sus instituciones tradicionales, el Derecho Foral y su cultura.

Atamas d’ixo, d’a propia consideracion que Aragon tiene legalment, o d’os trangos d’a suya istoria que charran que Aragon ye un pueblo con identidat propia dende fa 1200 anyos, son asabelas as muestras que os propios aragoneses femos de nusatros mesmos. Istas nomas son d’istos zaguers diyas.

  • A posible candidata d’o PSOE a lo Gobierno d’Aragon, Eva Almunia, mos dice que emos de sentir y sobre tot, dixa esclatero o que piensa o PSOE d’a “nacionalidat istorica aragonesa”. Tamien ye atra que charra por totz os aragoneses, atamas que o propio barometro que encarga cada tres meses o gobierno d’Aragon no dixe tan esclatero que totz os aragoneses piensen y sientan o mesmo.

    Como sociedad, como aragoneses, tenemos mucha conciencia de nuestra identidad, pero también somos muy españoles. Nos lo creemos y queremos serlo.

  • Ta dixar esclatero por qué bi ha una bandera d’Espanya bien graniza en o culo d’o Chusticia acotalau d’Aragon, cada anyo l’exercito espanyol sale d’os suyos cuartels ta fer un omenache a ixa bandera en ixe puesto de Zaragoza, concretament, no en atro, ni en a Delegacion d’o Gobierno, nian os cuartels (que bi’n ha y muitos) de l’exercito espanyol en Aragon. As fuerzas vivas d’a ziudat amas, aplauden a iniciativa que dixa claro qui, como y por que acotolo a lo Chusticia y con el parti d’as libertatz d’o viello Reino.
  • Con tota a normalidat d’o mundo os meyos aragoneses emplegan l’adchetivo “regional” ta charrar d’Aragon y mesmo publicacions de l’Asociacion d’a Prensa d’Aragon lo fan servir sin garra vergüenya. Ye lo cutiano, ilegal, pero cutiano. Isto deciban os profesionals d’a comunicacion local en Aragon dimpues d’un Congreso en Balbastro.

    La agenda informativa de Zaragoza y sus administraciones copa en exceso la información regional. Una comunicación más fluida con los medios locales ayudaría a que las cuestiones de más interés encuentren cabida. El medio regional debe abrir los ojos a la información local y los periodistas locales deben buscar la singularidad de sus noticias para encontrar ese hueco.

Vasili Grossman, Rusia y a muerte

sábado, mayo 22, 2010 13:42
Publicau en a categoría purnas

Plego de rematar agora a trilochia de Vasili Grossman que Galaxia Gutemberg ha publicau en castellan. “Vida y destino” estio o primer que leyié una novela sobre a guerra mundial en os esferentz scenarios d’Alemania y Rusia. Publicau dimpues d’a muerte de Grossman difuera d’a Union Sovietica porque estio viedau cuan Grossman lo escribio. Dimpues, o zaguer publicau, “Años de guerra“, totz os escritos como corresponsal en o frent de Grossman, y una chiqueta novela sobre a vida d’os soldaus sovieticos en a Segunda Guerra Mundial. Tamien describe a limpieza etnica en Ucrania y a dentrada d’os sovieticos en o campo d’esterminio de Treblinka. O zaguer, recomendau por Antonio Lite, ha estau “Todo fluye” a suya zaguera novela, que no veyie publicada, y an amuestra tot o desencanto sobre o desembolique d’a revolucion sovietica.

En ista obra, prohibida, atamas d’a muerte de Stalin, a cretica contra o totalitarismo ye zerenya, prencipiando por Lenin y rematando por Stalin y o sistema de campos y de sucesivas deportacions etnicas y politicas. Ye muit dura, por exemplo, a descripcion d’a gran fambre d’Ucrania, que apedeco a milentas de presonas por a decision de Stalin de replegar tot lo grano ta l’estau. Ye important tamien a reflesion sobre o ser de l’alma rusa y como sieglos d’esclavitut eban contribuyito a lo desembolique d’o pais y dimpues de 8 meses de libertat Lenin eba recurriu atra vegada a la esclavitut ta fer posible una Union Sovietica zerenya.

Vasili Grossman en Alemania con l'Exercito Royo

Vasili Grossman en Alemania con l'Exercito Royo

He teniu a suerte de leyer os tres libros casi de seguido y por ixo a impresion que me fan ye de conchunta. Tamien se veye a evolucion en o discurso de Grossman, heroico cuan charra d’a guerra, d’a fuerza d’o pueblo, d’a gloria de l’Exercito Royo dica l’ombre que ya no creye en o suyo estau esdeveniu un estau de terror. Tien muitos paragrafos autobiograficos, en as novelas, y tamien cuan charra como periodista. Bi ha presonaches que se repiten en a suya obra y que tienen muito a veyer con el. L’ombre que tien un buen puesto aintro l’organigrama de l’estau pero a qui li minchan envidias por qui tien mas esito y que amas veye que no puede concarar l’estau que remata levando-se a os suyos amigos y companyers ent’o Gulag.

Leyer a Grossman da muito en que pensar, pero d’os tres libros me quedo con dos paragrafos que narran a muerte de dos presonas. Creigo que nunca no eba sentiu a muerte d’una persona en un libro como me la facio sentir el en istos d’os paragrafos. Un ye de “Todo fluye” y l’atro de “Años de guerra“.

Un anyo dimpues Masha dixo lo campo. Antis de recuperar a libertat, remanio chitada en una cabanya chelada, denzima d’una fusta de pino. Ya no la empentaban ta ir a lo triballo. Ningun no li feba mal. Os camillers dixaron a Masha Liubímova en una caixa rectangular, feita de tablas que o servicio de control tecnico eba descartau. Huellaron por zaguera vegada a suya cara. Teneba un esprision de dulce goyo infantil, de confusion, a mesma con a que eba ascuitau, a o costau de l’almacen d’a serreria ixa mosica alegre, primer, con goyo, dimpues replecando que no bi n’eba d’esperanza

Todo fluye

– An ye lo fillo d’o comisario – demando l’aleman

– Alcaso fas tamien a guerra con os ninos, vibora? – contesto a viella Maria Timofeyevna.

A viella quedo chitada en o branquil d’a casa y os soldaus alemans pasoron por dencima cudiadosament d’o bason de sangre fosca, indo dimpues d’un puesto t’atro, replegando con tot o que podioron y charrando dentre els.

“O pueblo ye inmortal”, dentro de “Años de guerra

Primers trangos enta l’aplicacion d’a lei de luengas

jueves, mayo 20, 2010 17:24
Publicau en a categoría de l'aragonés, purnas

Tardi, porque ya remato o plazo dau por a propia lei, s’han dau os primers trangos ta la creyacion d’o “Consejo Superior de las Lenguas de Aragón”. A Universidat de Zaragoza ha feito publicos os nombres d’os miembros d’o Consejo que son desinnacion universitaria (a tercena parti). Os nombres son os de Javier Giralt, Francho Nagore, María Teresa Martín Zorraquino, Francisco Beltrán y Luisa María Frutos.

Dende Xarxes han feito una ambiesta d’os suyos perfils profesionals y sobre tot, una ideya de por an abrian d’ir os perfils profesionals d’os “Consejeros superiores de la lengua” ta que de verdat sigan un “Consejo Superior de las Lenguas de Aragón”.

La Universitat de Saragossa ha triat uns perfils que, per als qui tenen un coneixement expert en la matèria (Giralt, Nagore i Martín), podran acomplir sense dificultats un dels papers del Consell: decidir, a proposta d’algun ajuntament, sobre la “denominació de la seua modalitat lingüística, fonamentat en raons històriques, filològiques i sociolingüístiques”. Aquest tres membres podran resoldre sense dificultats la denominació i mapificació sociolingüística de la Franja i de l’aragonès. El que trobem a faltar per part de la Universitat són perfils adequats pel seu camp de treball per a  l’assessorament en política lingüística, funció que la llei encomana a este Consell. La Universitat de Saragossa ha omplit els espais no filològics amb especialistes en la romanització i en geògrafa rural (Bletrán i Frutos).

El Consell de les Llengües hauria d’estar format per dos tipologies d’experts: d’una banda, filòlegs i lingüistes especialistes en l’estructura i la història del català i l’aragonès, i de l’altra, per experts en ciències socials relacionades amb la política lingüística.

Mancan cosas por saber tamien. Por exemplo, que sigan parti d’o “Consejo” quiere dicir que Nagore o Giralt no feran parti d’as Academias d’a luenga?. U, cuanto tiempo ha de pasar ta que o gobierno y as Cortes triguen a os miembros que han de proposar?. Y dimpues d’ixo… cuan se formaran as Academias si ya no se ha rispetau o plazo marcau por a lei ta la creyacion d’o “Consejo Superior”?

A Contradanza de Cetina

miércoles, mayo 19, 2010 19:49
Publicau en a categoría purnas

Ista nueit ye nueit de fuego y diaples en Cetina. D’o mas fundo d’a tradicion pagana amanixe ista danza d’a que no se sabe encara l’0richen. Puestar siga un repui d’as danzas d’a muert meyebals, d’os cultos paganos a lo fuego y a nueit, d’adopcion d’ixos cultos por a relichion cristiana.

A yo ye una danza que me fa muito goyo. Aragon no ye nomas dances en o Pirineo, ni profes nomas jota. Aragon ye ista atra cultura popular antiga, viella, que mos amuestra os alazetz d’o pueblo que estiemos que bailaba moixagangas d’una banda t’atra, que danzaba y feba torres umanas, que bailaba con espatas, cintas y gaitas y tambors, que rendiba culto a lo fuego, y a la luz, y tamien a la nueit. A cultura popular que pervive sieglo zaga sieglo.

Zoo de primavera

martes, mayo 18, 2010 17:18
Publicau en a categoría prexinando, purnas

Ha volato en cerclos dondiando por o mio cuerpo. Ha puyau enta la punta d’o naso y dimpues ha baxau dica os pietz. O mosquin danza fendo a suya mosica singular. Meyo m’ha dispertato. Encara sentiba o suyo ruido aman d’a mia orella cuan o mixin, Sputnik, ha prencipiau á abatanar a puerta.

Tranco a puerta de nueitz pero el, nierbudo y amoroso que ye, preba, cada nuei, de dentrar superando os problemas. Primer, abatana, dimpues salta y agafa o zarallo y con o suyo peso aconsigue ubrir a puerta. Continaba sentindo o mosquin y Sputnik tamien, asinas que amas de fer-me un mueso en o naso, ha prencipiau a encorrer o mosquin, primer con os huellos, y dimpues a saltos.

Ta rematar a scena os muixons que fan niedo en os arbols que redolan casa mia han prencipiau a cantar. Ya casi yera de maitins. Os animals s’eban conxurato ta no dixar-me dormir. A natura truca a la puerta. A primavera animal ha plegau ta casa Purnas.

Tags: ,

El Periodico, Ciceron y mal emplego de Google

domingo, mayo 16, 2010 18:10
Publicau en a categoría purnas

O Periodico d’Aragon publica un articlo d’opinion d’o suyo director, Jaime Armengol, sobre os retalles socials de ZP. L’articlo prencipia con una suposada dita de Ciceron que leva un tiempo dondiando por internet. Asinas prencipia l’articlo:

“El presupuesto debe equilibrarse, el Tesoro debe ser reaprovisionado, la deuda pública debe ser disminuida, la arrogancia de los funcionarios públicos debe ser moderada y controlada, y la ayuda a otros países debe eliminarse para que Roma no vaya a la bancarrota. La gente debe aprender nuevamente a trabajar, en lugar de vivir a costa del Estado”. Parece mentira que semejante sentencia fuera escrita por el político y filósofo romano Marco Tulio Cicerón hace más de 2.000 años, pues su vigencia es máxima. “

En efeuto parixe mentira que Ciceron dicies ixo, porque ye mentira. Nunca Ciceron pronuncio ixas parolas que parixen encaxar prou bien no nomas en os tiempos autuals sino en o pensamient economico d’os liberals de mercau. Si Jaime Armengol ese rechirau una mica mas por Internet, via Google, via Bing o via Yahoo, ese puesto trobar un camaton de puestos an s’amuestra que a dita ye falsa y ye nomas un montache d’os republicans. Mesmo o diario Expansion publico a verdat d’a dita y d’an salio. Bells puestos proposan ista traduccion castellana d’a dita latina:

La arrogancia de los funcionarios públicos debe ser moderada y controlada, y la asistencia de  manos extranjeras deberían reducirse, para evitar la caída de Roma.

Como se puede veyer cambea una mica o sentiu d’a frase, y mesmo atros puestos dicen que ye d’una novela sobre a vida de Ciceron y que iste nunca no dicio cosa parellana. En tot caso, o periodista, y mas si ye director de periodico, ha de mirar-se una mica mas o que publica, por muito que case bien con o que quiere dicir. Por no fablar de que si ye Ciceron (un politico d’os de siempre, cambeando de chaqueta y afavorindo guerras civils y dictadors) qui mos ha de adugar, ya mos podemos despedir d’iste modelo d’estato que tenemos.

Marcelino Iglesias con os achents socials

jueves, mayo 13, 2010 20:05
Publicau en a categoría purnas

 

Iglesias con os achents socials

Iglesias con os achents socials

 

Huet o president Iglesias s’ha reuniu con ixo que dicen achents socials aragoneses, ye dicir, sendicatos y empresarios (video). Se achuntaba con ells ta esplanicar-lis as midas que o gobierno d’Aragon aplicara dimpues que o president espanyol ese feito l’anuncio de retallar asabelos gastos socials, asinas como o salario d’os triballadors publicos o l’aduya a o desembolique.

Nomas conoxer-se a decision de ZP, o millor dito, nomas que os ziutadans conoxesemos ixas midas, Iglesias marcho de viache ta Madrid. Se, porque lo se, que en as consellerias d’o Gobierno d’Aragon ya manullaban cifras d’os retalles dende un diya antis. Pero os ziutadans de piet, os que femos que ixa chent mos gobierne, sentiemos ayer por primera vegada charrar de retallar gastos. O caso ye que Marcelino Iglesias marcho ta Madrid no como president d’Aragon, que marcho como Secretaire Cheneral d’o PSOE d’Aragon. A charrar como mainate d’o partiu en Aragon y no como pais. A charrar como sucursal y no como Aragon, como president d’Aragon y que ha d’esfender os intreses d’os aragoneses.

A la mesma ora que Marcelino yera en Madrid José Montilla, president d’a Generalitat catalana y secretaire cheneral d’o PSC, comparixeba en o Parlament catalan ta dentra atras cosas, esplanicar a os diputaus catalans como afeutaba as midas d’o gobierno d’Espanya en Catalunya. A esferencia de tratamient ye esclatera.

En tot caso, tampoco os ziutadans sabemos de raso como mos afeutaran as midas, ni o gobierno, nian os sendicatos, nian os empresarios (que ya han ganau una baralla y quieren mas y demandan mas reformas laborals) mos han esplanicau como mos afeuta en Aragon tot isto. En o diario Qué! han prebau de deducir a qui y como afeutara o retalle, y suposo que os diarios de paper dara mas informacion. Por l’inte ya sabemos que o nuestro president ya no ye o nuestro president sino un socialista espanyol mas.

Ni al PSOE ni a sus traidores ni a ninguno de los demás

miércoles, mayo 12, 2010 20:26
Publicau en a categoría purnas

Ixa ye a coda d’una canta d’a Polla Records, “No somos nada“. “Ni al PSOE ni a sus traidores ni a ninguno de los demás”. Diyas como huet me resonaba zerenya en as orellas. Suposo que parixiu a os votants de Felipe Gonzalez que l’eban sentiu dicir “OTAN, de dentrada no” y que dimpues estioron traicionaus con a dentrada d’Espanya en a OTAN. Huet, o Zapatero de “no habrá recortes sociales” ha anunciau, obligau por o FMI, a UE y Barack Obama, una serie de midas que, dentre atras cosas, retallan os dreitos socials de muita chent que paga os suyos impuestos a l’estau espanyol.

As midas dixan sin retallar garra dreito d’os ricos, dixan sin efecto midas que se vendioron como “avances” y que agora sacan d’o programa, prechudica notablement a pensionistas y triballadors publicos de baixo rango, retalla l’aduya a o desembolique y amas retalla a retroautibidat d’as prestacions por a lei de dependencia. Una alfayeta, ye esclatero, iste paquet de midas.

Cosa dice o Gobierno d’o fraude fiscal, d’as aduyas a equipes de futbol d’elite o d’a suya poca rigurosidat bosando impuestos, cosa dice d’as SICAV, d’os sueldos de politicos o d’as suyas pensions. Profés que no diz cosa de rematar con ministerios cualas competencias son ya autonomicas (como Educacion o Sanidad), u de l’absurdo gasto en Delegacions d’o Gobierno en cada ziudat, o d’as Diputacions Provincials en paises comarcalizatos. Cosa dicen, tampoco no d’o gasto militar, d’as aduyas a I+D militar u lo gasto en misions melitars de refirme a os plans d’Estatos Unitos, como Afganistan.

Iste ye o partiu que se diz socialista y que agora gubierna Espanya. O partiu que una vegada dezaga atra ye votau por chent que piensa en ells como muga contra a dreita d’o PP y que vegada dezaga vegada traiciona os intreses d’os ciutadans y d’os triballadors. Ixa ye a Espanya que esiste agora, una Espanya que ye gobernada por o FMI gobierne qui gobierne, y que, amas, leba agafada por a correa a os paises que agora la conforman. Ni al PSOE, ni a sus traidores, ni a ninguno de los demás.