18 d’abiento

martes, diciembre 14, 2010 19:13
Publicau en a categoría purnas

Cartel 18 d'abiento

Cartel 18 d'abiento

Sabado, 18 d’Abiento

12:00h Acto Politico en a Plaza d’o Chustizia:Omenache a luitadoras y luitadors por os dreitos nazionals d’Aragón-

14:30h en A Enrestida: Chenta Popular

De nueitz:

Concierto en a Sala López (c/ Sixto Celorrio 2) con:

Interlude (20:00h) http://www.myspace.com/theinterludeband
Kop (21:00h) http://www.myspace.com/kopantifa

Entradas Anticipadas 8 euros en Bar Posturas, Tabierna A Flama, Urban Hell y Birosta
En taquilla : 10 euros

00:00h Fiesta-Audicion con DJs en bar Bohannon

Organiza: Bloque Independentista de Cuchas

Apoyan: Urban Hell, Ara-Info,Güembras Foscas

Va rematando l’anyo

lunes, diciembre 13, 2010 18:17
Publicau en a categoría prexinando, purnas

Encara no ha rematau l’anyo pero amonico imos pensando as cosas que hemos dixau por fer, as decisions que hemos feito, unas con encierto y atras, con no guaire. Repasamos caras, diyas, suenios, feitos, diyas, nueitz y vida. Y sobre tot, prencipiamos a planificar o venient anyo.

Yo tiengo ya bellas ideas y suenios y chent que me viene ta o tozuelo cara l’anyo venient. Dentre atras, reubrir Aragon Colonial, decision que ya he feito y que ista semana veyera os suyos fruitos, pero ixa ye a menos important. Os buenos suenios que tiengo son mas ta yo y ta chent d’aman. O futuro viene ascape, pero lo present ye o que mos endreza t’alli.

Contimos en o camin, quieras que no.

Enguero de La Pantera Rossa (web y local)

sábado, diciembre 11, 2010 11:29
Publicau en a categoría purnas

A web de La Pantera Rossa

A web de La Pantera Rossa

Un camaton de chent abio ayer en l’enguero de La Pantera Rossa, o prochecto de libreria asociativa y centro social que ubrio ayer as suyas puertas en Zaragoza dimpues de muitos meses fendo vida nomada. Que i abese tanta de chent ya ye un buen sinyal de que bella cosa asinas amenistaba ista ciudat.

Dende os primers trangos d’o prochecto yo estie implicau, pero a la fin, abie de dixar-lo por manca de tiempo. En tot caso, lo que si tos recomiendo ye que faigaz una huellada por as  baldas plenas de libros y que vaigaz a os actos y charradas que i organicen que de seguras seran bien intresantz, prencipiando por a presentacion d’o libro en aragones O despertar de l’onso,

A imachen ye d’a pachina web d’a Pantera Rossa, que gracias a o puesto que me han dixau en A Flama y a base de crepes de chicolate he puesto creyar alacetada, profes, en WordPress. Dimpues d’unas cuantas horas de triballo o resultau ye ixe que podez veyer en La Pantera Rossa y que aspero que faiga buena onra a la ilusion y as ganas de creyar y compartir d’os colectivos que presentoron ayer o suyo nuevo espacio.

Bienplegaus y entabant!

O patrimonio que lis bufa la pocha: l’aragonés

jueves, diciembre 9, 2010 17:49
Publicau en a categoría de l'aragonés, purnas

Como cada anyo a Unesco ha quitau t’a carrera o suyo Atlas d’as luengas en periglo de disparixer. L’aragones contina en o segundo trango enta a suya muerte como luenga de comunicacion. Ista categoria se diz “definitely endangered” y la cualifica, dentre atras cosas, que os ninos no aprenden ya l’aragones como luenga de mai. No ye de raso cierto, porque si bi ha bells ninons que charran de cutiano l’aragones, pero de feito no ye una situgacion estendillada.

Pero no escribo iste post ta charrar d’a situgacion de l’aragones, que ya sabemos cuala ye, y que ya analice fa un anyo, mirando, punto por punto, cuals son os criterios d’a Unesco ta calificar as luengas y fer-los veyibles en o caso de l’aragones.

Escribo iste post ta fer una huellada a la situgacion d’o patrimonio cultural d’Aragon. A Unesco diz que una d’as luengas istoricas y propias d’Aragon contina en a muga d’a muerte y a television publica, ni os prencipals meyos de comunicacion, han dito ni brenca ni meya. Garra manifestacion s’ha convocau por os que son tan alticamaus por o patrimonio cultural aragones que ye en Catalunya. Garra diputau d’as Cortes ha dito cosa sobre ixe feito grau que mete a l’aragones una mica mas aman de morir mientres a lei que ha de desenvolicar a suya amostranza y emplego ye aprebada pero cuasi aturada.

Bi ha patrimonios culturals y patrimonios culturals ta os politicos d’o pais. Y ye esclatero que o patrimonio cultural d’a luenga, de l’aragones, lis bufa la pocha. Dimpues vendran con glarimas a dicir que l’arte aragones s’amorta, que os biens que tienen atros no mos lis tornan, que Goya, y la jota y Buñuel son o nuestro patrimonio. Y no digo que no, pero no me creyere cosa, nunca mas, d’o que me digan ells.

A Navidat multilingüe d’o Concello de Zaragoza

viernes, diciembre 3, 2010 19:35
Publicau en a categoría purnas

Nadal u Navidat...an son?

Nadal u Navidat...an son?

A Plaza’l Pilar de Zaragoza s’ha plenau istos diyas con puestos, carpas y milenta istorias. Tot ello se fa baxo iste cartel d’o Concello que deseya goyo en muitismos idiomas. Tantas luengas que no ese pasau cosa porque esen ficau as luengas propias d’Aragon, l’aragones y o catalan, como diz a Ley de Luengas. Una vegada mas o multiculturlismo con que se presenta a candidatura a Ciudat Europea d’a Cultura ye multiculturalismo con apelliu: “Multiculturalismo que, sobre tot, no dixe veyer a cultura propia d’Aragon y as suyas luengas d’Aragon, l’aragones y o catalan”.

Por isto, y atras cosas, por cierto, me soi repensando reubrir Aragon Colonial. Asinas lo digo.

Y si concaramos a os mercaus?

jueves, diciembre 2, 2010 12:44
Publicau en a categoría purnas

Por siguir una mica con o post d’ahiere sobre os trangos ta zaga de Zapatero quereba recuperar un post d’as primeras retalladas socials y laborals d’o gobierno de dreitas de ZP. Lo porto t’asti prencipalment porque creigo que bi ha atras solucions ta concarar a os mercaus, mesmo fendo retalladas de gasto publico sin atacar os alacetz d’a sociedat, ye dicir, os triballadors, a chent, os chicotz empresarios y a chent que ye mesmo difuera d’as normalidatz d’a nuestra sociedat.

Ye esclatero que ye dificil concarar os mercaus cuan yes ficau dica o garganchon en ells. Cuan yes parti d’os sistema capitalista mundial ye prou dificil dixar de cumplir os regles d’ixe sistema. Salir d’ixe sistema, a diyas de huei, ye una utopia. Concedindo que a utopia sirve ta continar entabant, cal, sin dembargo, estar una mica realista.

Suposando, que por o visto dica agora ye prou suposar, que ZP ye un “izquierdista trasnochado“, as politicas de cuchas abrian de contrimostrar-se en os tipos de retalladas de gasto publico que o gobierno fa. Por ixo escribie isto en os primers tiempos d’a tornada ta la dreita de ZP.

Huet, o Zapatero de “no habrá recortes sociales” ha anunciau, obligau por o FMI, a UE y Barack Obama, una serie de midas que, dentre atras cosas, retallan os dreitos socials de muita chent que paga os suyos impuestos a l’estau espanyol.

As midas dixan sin retallar garra dreito d’os ricos, dixan sin efecto midas que se vendioron como “avances” y que agora sacan d’o programa, prechudica notablement a pensionistas y triballadors publicos de baixo rango, retalla l’aduya a o desembolique y amas retalla a retroautibidat d’as prestacions por a lei de dependencia. Una alfayeta, ye esclatero, iste paquet de midas.

Cosa dice o Gobierno d’o fraude fiscal, d’as aduyas a equipes de futbol d’elite o d’a suya poca rigurosidat bosando impuestos, cosa dice d’as SICAV, d’os sueldos de politicos o d’as suyas pensions. Profés que no diz cosa de rematar con ministerios cualas competencias son ya autonomicas (como Educacion o Sanidad), u de l’absurdo gasto en Delegacions d’o Gobierno en cada ziudat, o d’as Diputacions Provincials en paises comarcalizatos. Cosa dicen, tampoco no d’o gasto militar, d’as aduyas a I+D militar u lo gasto en misions melitars de refirme a os plans d’Estatos Unitos, como Afganistan.

Ta una anviesta mas de conchunta me parixe intresant tamien iste articlo que publica o diario Publico.

Concarar o contemporizar

miércoles, diciembre 1, 2010 22:52
Publicau en a categoría purnas

José Luis Rodríguez Zapatero, de qui os papers de Wikileaks dicen que a CIA piensa que ye un “izquierdista trasnochado“, ha quiesto dixar por embusters a os espias norteamericans y ha tornau a retacular enta posicions, retalladas y decisions de dreitas. Concretament, as que li recomendaba o mercau u os mercaus, mas platerament dito. De feito, ha estau anunciar istas midas que a Bolsa ha tornau a puyar, y mesmo Rajoy ha saliu d’o silencio ta dicir que li parixeban prou bien.

Pero no quereba yo charrar d’as decisions de Zapatero, sino del feito que ixas decisions no son suyas, u no nomas son suyas. Totas istas decisions que prene en os zaguers tiempos son forzadas por os poders economicos que un diya zaga atro, menazan a os paises que s’acullen a os mercaus. No fa que Zp no siga responsable, tot lo contrario, pero ye verdat que son os mercaus os que prencipian a dictar as politicas economicas d’os estatos. A cada menaza, o gobierno ex-socialista ha decidiu responder dando razon a la menaza y fendo caso a las recomendacions. Pero cada vegada os predadors han queriu mas. Dimpues d’a reforma laboral, a de pensions, agora retallada de dreitos ta os aturaus, privatizacions…y dimpues? Dimpues atra cosa porque ye una corrida que no tien de fin.

Me remera ista situgacion que vive huei Zapatero y l’estau que gobierna a la que vivio fa no guaires anyos Chunta Aragonesista en o gobierno d’a ciudat de Zaragoza. Totz os poders facticos d’a ciudat se metion dende o primer inte a creticar tot o que CHA feba. As caxas, os meyos de comunicacion, as collas d’empresaires… Y en cuenta de concarar-se con ells, de continar con a suyas politicas (que yera  ta lo que bella chent lis eba votau) CHA retaculo. A la fin perdion os poders y nunca no dixaron d’atacar-lis.

A Zapatero li ye pasando o mesmo. Cada cosa que demanan os mercaus ye feita, y en cuenta de dicir “ah, vale, ya mos ha feito caso” ixos mercaus, que encara que parixcan anonimos no lo son pas, demanan mas y mas y mas y mas. A la fin, ZP tresbatira o suyo gobierno, abra traicionau a os suyos votanz (que parixen no escarmentar dende F. Gonzalez) y se quedara ta fer conferencias y entrevistas en El Pais dentro de 10 anyos. Y amas, abra feito tirar enta zaga 30 anyos de trangos entaban d’os dreitos socials y laborals. Bravo.

Tornar de viache

martes, noviembre 30, 2010 22:07
Publicau en a categoría prexinando, purnas

Antis cuan tornaba de un viache siempre escribiba bella coseta. Agora, cuan torno de viache, a tamas que siga un viache de bellas pocas horas, me cuesta diyas tornar a meter a capeza en o suyo puesto. Y ixo que he estau de triballo, por Barcelona y podria recentar cosetas intresantz d’as eleccions catalanas, d’as mias sensacions dimpues de dos anyos y meyo sin fer un directo en a television o mesmo d’a eslucerniant conversa que tenie en L’Antiquari.

Suposo que ixo zaguer si que lo recentare bell diya d’istos.

Tags: ,

En A Galliguera bi ha vida

viernes, noviembre 26, 2010 18:43
Publicau en a categoría purnas

Cuan en totas as manifestacions contra os entibos chilamos que en Yesa (Biscarrués, Mularroya, Santaliestra…) bi ha vida, no lo decimos por dicir cualsiquier cosa. Ye verdat que en os lugars que quieren afogar vive chent. Chent que triballa, luita, aima, siente y respira. Por ixo, cada vegada que una vida naxe en ixos lugars se contrimuestra que a luita cal continar-la y no dixar enfonsaus os suenios y barallas d’ixa chent.

Huei Concilio tien un nuevo abitador. A totz os aragoneses mos ha naxiu un fillo, Diego Gonzalez Auria. Un atro luitador contra Biscarrues. En A Galliguera bi ha vida.

25 de noviembre. Diya entrenacional contra la violencia masclista

jueves, noviembre 25, 2010 17:38
Publicau en a categoría purnas

Violencia fisica y no nomas fisica. Hostias virtuals y reals. Discriminacion salarial y vital. Chent de totas as clases socials que creyen que as mullers son, por estar mullers, menos que no os ombres. A violencia masclista no ye nomas cosas de moraus, de cardenals, de punyals u de tiros. Ixa ye a part mas veyible, pero no pas la unica. Huei, 25 de noviembre, remeramos a las mullers muertas a mans d’as suyas parellas, y tamien como no, a las mullers que denuncian as agresions d’os que abrian d’estar companyers y son tirans, y profes a totas as que sufrindo ixas agresions no las denuncian.

Tamien ye diya de denuncia d’o masclismo social, ixe que fa que as decisions, as publicidatz, as presentacions de productos, se fagan siempre dende l’anviesta de l’hombre. D’ixo charra o comunicau d’as companyeras d’A Clau Roya en iste diya.

A diario se producen multitud de conductas que generan una auténtica situación de microviolencia que va actuando sobre la mujer para disminuir su resistencia y para conseguir su aceptación. La visión androcéntrica y los valores patriarcales han hecho que el papel de la mujer en general haya sido ignorado e infravalorado, y que la agresión a la mujer haya sido aceptada como algo normal. Por todo ello entendemos que la agresión a la mujer en sus diferentes formas tiene una base y unos elementos comunes. No se trata, por tanto, de casos aislados, sino que los casos que se producen son aislados como forma de relativizar y trivalizar la gravedad del hecho.Por tanto, estamos hablando de violencia estructural que se caracteriza porque tiene su origen y se fundamenta en las normas y valores socioculturales que determinan el orden social establecido. Surge, por tanto, desde dentro y actúa como elemento estabilizador de la convivencia bajo el patrón establecido, puesto que contribuye a mantener la escala de valores, a reducir los puntos de fricción que puedan presentarse en las relaciones de pareja entre hombres y mujeres, y desde ahí a las relaciones entre mujeres y hombres en la sociedad en general, por medio de la sumisión y el control de la mujer. Bajo este planteamiento se intenta recluir y confinar este tipo de conductas al ámbito de lo privado, ocultándolo y dejando entrever una cierta normalidad.

Concarando ista decision, como agora as mullers d’A Clau Roya, millons de mullers han luitado contra o masclismo, fendo-se valer, fendo-se rispetar. En Aragon, tota una cheneracion de mullers prencipio a prener consciencia d’a suya vida cuan a segunda Republica. Una cheneracion que dimpues abio de tornar a vivir d’amagatons y chusmesa a os desinnios d’os hombres. Precisament huei Mariano Garcia en o suyo blog charra d’una d’ixas mullers, María García, que esdevenio a primer alcaldesa d’Aragon y de tot l’Estau espanyol.

¿Cuál es, no obstante, a su juicio, el papel que debe representar la mujer en la República?
-El principal debe ser hacer una intensa labor contra la guerra; desear y fomentar la paz, tanto interna como en el exterior. Como es natural, la mujer en el Parlamento debe ayudar a legislar en favor de la clase trabajadora y aún de la misma mujer, que hasta hace poco tiempo ha estado postergada a las labores domésticas. La mujer debe laborar intensamente por mejorar la condición social de las demás mujeres.

Como remata dicindo o comunicau d’A Clau Roya:

Dejemos ya de tolerar comportamientos sexistas, toqueteos no deseados, manoseos, chistes y comentarios peyorativos, dejemos de soportar en silencio actitudes que denigran y frivolizan con nuestra valía, dejemos de someternos a los mandatos sexuales no deseados, dejemos de mostrarnos como mujeres sumisas, dejemos ya! de contabilizar feminicidios, asesinatos crueles e injustificados, que no sólo atentan y terminan con la vida estas mujeres, sino contra la integridad de todas las mujeres, de la mitad de la sociedad, de madres, hijas, hermanas, primas, amigas o compañeras de trabajo. No basta con condenar esas muertes, no basta con hablar sino actuamos, mujer exige y haz cumplir tus derechos, como mujer social y socializadora, hazte respetar.

Y yo adibo: hombre, no contines estando complice d’ixas actitutz . Totz y totas iguals en dreitos.

Pachina 20 de 217« Primera...51015...1819202122...253035...Zaguera »