Entrevistas electorals 2011

Martes, marzo 22, 2011 15:46
Publicau en a categoría purnas

Dende iste blog soi prebando de reyalizar entrevistas a os candidatos a la presidencia d’Aragon d’os partius mas representatius. A ideya ye fer entrevistas presencials, curtas, sobre temas que no son cutianos en as entrevistas que fan os meyos tradicionals. Por l’inte tiengo confirmaus a tres d’os cinco candidatos, y aspero que en istos diyas, pueda apanyar as atras entrevistas.

Si tenetz bella consulta que fer-lis, y por tal de fer d’istas una entrevistas una mica mas ubiertas, tos dixo lo mail redaccion@jorgeromance.com u mesmo en os comentarios d’iste post.

A semana venient prencipiare a publicar as entrevistas, en l’orden que se produzcan.

Esferrando o pais

Lunes, marzo 21, 2011 17:31
Publicau en a categoría purnas

Espelunciecha, Castanesa, Yesa, Biscarrues, A Carrodilla, Mularroya, Gran Scala, dragau de l’Ebro, fundicion de plomo en Pina u Albalat de l’Arcebispe, nueva Aragon-Cazaril, Canal Roya, cementera d’Albentosa, y bellas atras que suposo que me dixo, y que podez adibir en os comentarios.

De verdat que no pueden pensar prochectos ta desembolicar o territorio que no sigan esferrando lo pais? De verdat se creyen ells mesmos cuan charran de desembolique sostenible? De verdat se piensan que imos a votar-los asinas?

5 convencions d’o videoperiodismo que puez albandonar

Jueves, marzo 17, 2011 11:49
Publicau en a categoría periodismo, purnas

No ye a primer vegada que m’aturo en un post de Adam Westbrook, un tipo d’ixos que has de siguir ta saper bella cosa mas d’o nuevo periodismo y mas que mas en o periodismo audiovisual. Ya mos charro de consellos ta periodistas multimedia y de nuevas ainas que poder emplegar. Huei Adam, que tien una productora audiovisual, mos ufre nuevas anviestas en a reyalizacion de noticias de video. Charra, sobre tot, d’o triballo de videoperiodistas online, que triballan con camaras chicotas y que quieren ufrir atras posibilidatz, pero m’ha parexiu intresant tamien ta os que triballamos a iste costau d’as noticias, en a television, a lo menos, como punto de salida. Profes que totas son ta debatir, pero creigo que ye intresant charrar-ne, y por ixo, foi un resumen traduciu.

1. A entrevista de tres cuartaladas:

Ye a manera clasica de fer entrevistas en noticias y documentals. Veyemos a l’entrevistau no centrau en a pantalla, mirando ta la cucha u la dreita, aparentando tener una conversa con o periodista. En puesto d’ixo Westbrook proposa aprofitar o plano normal d’o periodista (u presentador) ye dizir, uellando dreitament ta la camara, l’espectador puede establir un contacto presonal con l’entrevistau y s’aprofitan os rasgos facials d’o presonache.

Asinas s’ha feito en o documental “A la gran puta nos fuimos“, por exemplo, alportando o testimonio presonal como protagonista.

a la gran puta nos fuimos from auggie sam on Vimeo.

a la gran puta nos fuimos from auggie sam on Vimeo.

2. Planos intercalaus en a entrevista

Son ixos planos que se fican en meyo d’una entrevista ta editar a entrevista y asinas tallar as frases sin parexer que se ye editando o que diz. Por exemplo, en iste video (an ye prou mal feito)

En puesto d’ixo y como ye cutiano an yo triballo, se proposa fer servir os fundius de color ta sinyalar de manera esclatera que se ye tallando una frase. Ye un aviso ta l’espectador, que asinas identifica que o que ye sentindo no s’ha dito de corriu.

3. Abuso d’o Voice-Over

Ye dicir, l’abuso d’a narracion d’o periodista por dencima d’imachens, en cuenta de amostrar a os protagonistas d’a noticia. Ye normal en os nuestros informatius por asabelas razons. En puesto d’ixo cal emplegar-lo como zaguer recurso.

A noticia, o feito que queremos amostrar, y os suyos protagonistas son prou mas importants que o feito de que o periodista amuestre que ye en bell puesto. A pregunta que planteya Westbrook ye: Si no puez amostrar o que ye pasando u charrar con os protagonistas, s’amenista que faigas o video.

4. As noticias de pasada

Muitas vegadas, os reportaches d’informatius de television nomas preban de fer un resumen d’a noticia, o mas rapedo posible. Ye a manera facil de conoxer as cosas clau d’un diya. No bi ha problema con ixo, a lo contrario, ye a manera de que podamos conoxer tot o que cal conoxer, pero en puesto d’ixo u millor dito, antimas d’ixo, cal ir una mica dilla y aprofitando as tecnolochias (y a posibilidat de fer de videoperiodista unico) cal plegar an as grans camaras no pueden dentrar-ie, cal aprofundir en as historias y plegar enta os suyos presonaches principals y no tant principals.

5. Transparencia cero

Nunca no se sinya as imachens d’achencia. Asinas que puede haber espectadors que creyan que BBC (u Aragon Tv) y as suyas camaras son as que son grabando o que veyen. Puede parixer una cosa chicota, porque a gran mayoria d’a chent si que sape que a suya tele de referencia no ye en totz os puestos d’os que mete imachens, pero en puestos como Orient meyo no ye o mesmo si a camara que ye grabando ye palestina, israeli u europea, y ye important saper-lo ta conoxer millor a noticia. En puesto d’ixo caldria citar d’an viene cadaguna d’as imachens que emitimos, si son d’ista u d’atra achencia, si son un video amateur procedent d’un u d’atro bando, etcra.

Uellando enta zaga

Lunes, marzo 14, 2011 20:40
Publicau en a categoría purnas

Istos diyas he feito o que habria d’haber feito fa tiempo. Chitando a vista ta zaga he replegau totz os testos d’o viello purnas, ixe que i yera en blogia.com y los he iu puyando ta purnas.com.

Repasar os viellos testos, as viellas parolas que escribiba y escribie y escribo, ha estau tot un exercicio de memoria personal. Aimors, derrotas, victorias, reflexions, luitas, viaches, historias, suenios…tot chunto fa un corpus vivencial que s’ha tornau important ta yo, y que antimas ye a parti de yo que he quiesto amostrar mientres istos anyos. U mesmo amagar dentre parolas. Frases que charraban con belun a qui nunca no li dicie, mensaches ocultos d’o mio celebro, parolas amagadas dentre parolas amostradas.

A puyada enta iste wordpress no ha estau libre de problemas, por o que os comentarios viellos s’han tresbatiu, y encara en quedan errors que correchir, pero agora Purnas.com ye tot o que he escrito baxo ixe nombre. Lo podez veyer tot en a pachina d’archivo u navegando dentre os tags, u escando en l’escador que bi ha alto en a pachina.

Insumision

Miércoles, marzo 9, 2011 17:41
Publicau en a categoría purnas

Agora fa diez anyos que se dixo d’obligar a os chovens a pasar meses d’a suya vida con un fusil en as mans (u limpiando as casas d’as “oficialas”). O gobierno espanyol y as fuerzas armadas espanyolas han decidiu que yera una buena data ta pasar o servicio militar obligatorio por o tamiz d’os uellos de “Cuentame”, ye dicir, ufrir una anviesta nostalchica sin garra condicionant politico.

A l’acto oficial han convidau, profes, militars, chent “sinnificativa” d’a sociedat espanyola como (cata!) Butragueño, y entidatz colaboracionistas con a PSS que aduyaban por ixo a l’engarcholamient de cientos de chovens en tot l’Estau, como CCOO, UGT u Cruz Roja. En l’acto oficial han faltau os que de verdat facion posible que o servicio militar obligatorio, ixe anacronismo, disparixes d’as vidas nuestras.

No i yeran en l’acto oficial totz os chovens que decidioron declarar-se insumisos a l’obligacion de fer servicio militar obligatorio u a suya variant social. No i yeran totz os ciudadants que mientres os anyos duros an que te ficaban en a garchola 2 anyos, cuatro meses y un diya, refirmaban a os chovens valients de verdat en as carreras, concarando multas, sancions civils y agresions policials. No i yeran, tampoco no, as familias de totz os chovens que dioron anyos d’a suya vida en una luita de muitas atras presonas. No i yeran Chabi, l’atro Chabi, Antonio, Fito, Pitu… y tantos atros chovens aragoneses que estioron de “vacanzas” forzosas en Torrero, Daroca, Teruel…

Por ixo cal remerar ixos anyos de luita. Ixos anyos de manifestacions cada semana de refirme a os presos. Ixos anyos de cadenas humanas que iluminaban os puents de Zaragoza, d’antimilitarismo social por todas as cantonadas d’o pais. Cal remerar que estio o refus social o que remato a la fin con “a mili” y cal remerar a luita colectiva personificada en qui tenio a valentia de dixar-se trancar en as garcholas por as libertatz civils de totz os demas.

D’aquells anyos tamien mos quedan atras remeranzas, d’utopias, de suenios trancaus, y mos quedan, encara, as cantas que demanaba-mos en borinas y bars, que cantaba-mos d’escursion, que mos pasaba-mos en as manifas…sirva lo post d’homenache a totz os insumisos d’aquells anyos que antimas encara a diya de huei continan luitando por o cambio social y politico. Insumision!!

Una muller

Martes, marzo 8, 2011 19:00
Publicau en a categoría purnas

Naxita de pai mosico militar ista muller ha viviu dentre Zaragoza, Vitoria y Logronyo. A tamás d’a poca aduya ta que as mullers estudiasen mientres o franquismo se facio una carrera de Graduato Social, y a la vegada triballaba d’aduyant en una farmacia. Se caso con un hombre a qui li daban 3 meses de vida, pero con ell vivio 30 anyos de felicidat y triballo, y con ell tenio a o suyo unico fillo.

Mientres o mariu se ganaba la vida pintando monas, ye dicir, debuxando ta publicitar negocios en vallas, periodicos y revistas, ella antimas de fer casa, prencipiaba un negocio de libreria en o suyo vico.  A la fin habioron de trancar o negocio, pero contino triballando en casa, y mas tardi refirmando a o suyo mariu quan lo forachitón d’a suya interpresa. Dimpues, y mientres o fillo crexeba, habio de cuidar a os suyos pais y veilar por o mariu, ya malaudo y sin triballo, y mesmo habio de logar habitacions de casa suya ta chent de fuera ta poder tirar entabant.

A malotia d’o suyo mariu a la fin remato con a suya vida, y poco tiempo dimpues, moriban tamien os pais suyos. Allora, y mientres o fillo marchaba a ganar-se o pan fuera d’o pais, ella habia d’achustar-se ta triballar en una botiga de medicina natural, an que o suyo jefe, un fillo d’a gran puta, la timo, sin pagar-li a Seguridat Social, dica que ella paro cuenta y lo denuncio.

En ista epoca, antimas, habio d’aduyar o fillo, que a la fin heba marchau ta Barcelona ta completar os suyos estudeos, ninviando-li, quan caleba, diners ta bosar o loguer d’o piso. Ta ello, y una mica por no estar solenca, heba de tener chent en casa y a la fin, mesmo re-hipotecar casa suya, a casa que heba mercau con o suyo mariu.

Agora contina participando, como siempre, en a vida social d’a parroquia, contina fendo cafes con as amigas, fendo os viaches que a suya pension li’n dixa fer, refirmando a o suyo fillo, que ha tornau ta Zaragoza, charrando con a suya familia, prebando d’aprender cosas primero en a Universidat d’a desperiencia y agora en a Universidat Popular, vivindo, como siempre, prebando de ser y fer y alcompanyar en ser y fer a os otris.

Huei ye o diya d’a muller triballadora, y yo no conoixco atra muller mas triballadora que a mia mai. Gracias, mai.

T’atras anviestas d’o diya, a d’o mio sendicato, o SOA, y a d’una colla de mullers que luitan por a igualdat, A Clau Roya.

O trasgresor piadoso

Lunes, marzo 7, 2011 11:44
Publicau en a categoría purnas

O gran libro d’iste anyo en aragones ye O trasgresor piadoso, de Severino Pallaruelo, editau por Xordica. Por a curada edicion, por os testos, porque ye a tornada a l’aragones d’un d’os grans etnografos d’o Pirineo, Severino Pallaruelo, por os debuxetz que alcompanyan o testo manuscrito, porque en cada presentacion d’o libro que se’n ha feito ha empliu as salas.

O trasgresor piadoso

O trasgresor piadoso

O trasgresor piadoso ye un d’ixos libros que s’ha de leyer amonico, tastando as parolas, prexinando o que s’amaga dezaga d’ellas, fendo o camin enta l’interior que Pallaruelo ha feito en ista tornada ta la suya infancia, ta os suyos monts, ta la suya vida en os lugars que se’n aima.

Ahiere mientres leyiba o libro y me minchaba os testos y debuxos con uellos angluciosos me quede aturau en una d’as estrofas, filla d’o recorriu d’ida y tornada de muitos aragoneses.

Yaya, cuan yera choven, se’n fue a servir ta Barcelona. Luego volvió t’o lugar y se casó con yayo. Te me miro n’o retrato y pienso. Por qué tornés, yaya, por qué tornés t’o lugaron perdiu n’a montaña? No te gustón as Ramblas? Por qué i tornés, yaya?

De vegadas yo encara me foi a mesma pregunta, encara que a rispuesta que a yaya de Severino Pallaruelo no’n da, yo cada vegada la tiengo mas clara.

O lolo que bailaba jotas d’os Sitios

Domingo, marzo 6, 2011 16:06
Publicau en a categoría purnas

Como que ye carnaval bi ha lolos turcos que deciden fer gracietas a os nietos bailando maquina turca u si no, jotas d’os Sitios de Zaragoza, version Estampa Baturra.

Ye carnaval!

Comentarios dende Facebook y Twitter

Sábado, marzo 5, 2011 12:04
Publicau en a categoría purnas

Como soi fendo prebas ta poder dentrar a aragoneame.com con o login de Facebook, he decidiu tamien implementar o sistema de comentarios con Facebook u Twitter en o blog. Asinas que a partir de huei ya podez dixar comentarios en purnas.com sin meter atros datos que estar enchegaus en Facebook u Twitter.

He emplegau os plugins Simple Facebook Connect y Simple Twitter Connect y he seguiu os trangos que esplanican en Ayuda WordPress. Encara manca por fer una mica de redisenyo ta que siga tot mas poliu, pero a funcionalidat ya ye implementada de raso.

Cathalanes ni valencianos en Aragon officios no puedan exercir

Viernes, marzo 4, 2011 13:54
Publicau en a categoría purnas

Cortes de Zaragoza, anyo 1400. Bernat Arlovi, escribano y tresorero que estio d’o rei Pedro IV, s’adreza a o rei Martin, fillo d’iste, ta que li confirme en o puesto de recibidor d’o Reino, como pago a servicios prestaus, por exemplo, a merca y tornada ta la Corona d’as villas d’Alquezra, Ricla y Magallon ta que o rei Pedro podese bosar a guerra con Castiella. D’a peculiar formacion politica que estio a Corona d’Aragon ye una muestra o parlament d’Arlovi que demana que o rei Martin suspenda en o cargo a Johan Sagristan por ser iste catalan. Diz asinas Bernat Arlovi (rispeto a trascripcion de German Navarro publicada en Actas del proceso de Cortes de Zaragoza 1398-1400)

Es verdat que por la exsecusion que por aquellos fue feyta en sus biens e por otros quantias que el, regendo el dito officio de mandamiento del dito senyor rey don Pedro, bistrayo en bastecimiento de viandas e en paga de companyes por restaurar la ylla de Sardenya, ha sostenido grandes danyos e importables expensas, por las quales razones el dito Bernat es venido a grant pobreza (…)  E vos, senyor, agora por importunidat de Johan Sagristan, que es cathalan e domiciliado en Cathalunya, le hayads feyta comission que el reciba los ditos emolumentos e que sea general recibidor, la qual cosa, senyor, vuestra excellencia salva, de fuero de Aragon expresso que no podiades fer en prejudicio de la comission del dito Bernat (…) supplica humilment el dito Bernat Arlovi que los fueros del dito regno servando e en millor reduziendo, porque segunt fuero cathalanes ni valencianos en Aragon officios ni semblantes comissiones no puedan ni devan exercir, como redunden en grant danyo de los habitadores e naturales del dito regno perder los ditos officios e obtenerlos cathalanes o valencianos

Y en ixas estamos, encara. En aquells tiempos sisquia se charraba de que castellans podesen exercir ixos oficios, porque ye de dar que yera una potencia forana (con continas guerras dentre Aragon y Castiella, sobre tot en tiempos de Pedro IV), pero dentro d’os estaus d’o rei d’Aragon o trestallo de poders y dreitos yera tamien esclatero.

Y que se puede quitar d’isto? Pues asabelas cosas, dentre ellas, que allora, en 1400, os aragoneses teneban prou esclatero qui heba de mandar-les, y qui podeba tener puestos de responsabilidat…os propios aragoneses, mesmo debant de chent con la que compartiban rey, luitas, diners, dreitos y sacrificios. Pues ixo.

Esvielle: Por cierto, sobre a conciencia nacional aragonesa en a Edat Meya, Jose Angel Sesma publico un intresant testo sobre “Nacionalismo y estado en la Baja Edad Media. La formación del sentimiento nacionalista aragonés” (PDF)

Pachina 15 de 217« Primera...510...1314151617...202530...Zaguera »