Chueves lardero

Jueves, marzo 3, 2011 13:16
Publicau en a categoría purnas

Como cada anyo soi parando a longaniza d’iste diya. Como cada anyo, o chueves lardero simboliza o prencipio d’o carnaval, d’as garrastolendas. Como cada anyo, ya somos prestos ta disfrazar-nos de pais sin paro, sin patrimonio perdiu u cayiu, de pais arguelloso d’as suyas luengas y a suya cultura, de pais an os prochectos son sostenibles y rispetan o medio ambient, de pais de chents, de pais sin de mugas, de pais que creye en si mesmo.

En Nueva York, tamien

En Nueva York, tamien

Cal disfrazar-se, ta tot ixo. No doubt.

Chueves lardero, choricet, chous gras, chous lardé, jueves lardero. Mesma fiesta, muitos nombres. This is Aragoooon!

Uellando enta o futuro

Lunes, febrero 28, 2011 16:30
Publicau en a categoría prexinando, purnas

Huembra en o rio

Huembra en o rio

A uembra se banya en o rio. Endreza la uellada an o sentiu de l’augua. Dende alto o cuerpo d’o fotografo se mira a la suya uembra y se mira o futuro con uellos d’asperanza. L’augua contina o suyo camin, como siempre, ta cutio. O mismo rio, atra augua que ye a misma augua. O sol fa prexinar mundos nuevos. Os monts, os picos que se i veyen tan luen no son nomas que accidents que cal dixar dezaga.

Bi’n ha un fotografo, una huembra, un sol, un paisache, un futuro. Tot esdeviene en atra cosa, que siempre, siempre, no ye mas que a vida mesma feita atra cosa. Asperando.

Josep Pla y Marcos Zapata

Miércoles, febrero 23, 2011 10:48
Publicau en a categoría purnas

Me fa goyo siempre que me trobo rilacions estranias, vinclos rarizos que nunca no sapes porque s’han creyau, y que rematan embolicaus en as cantonadas d’as memorias d’uns y atros y xublidaus d’os tiempos. Sobre tot si ixos vinclos pertenexen a ixo que decimos “as vidas privadas“.

Leigo istos diyas un libro de Josep Pla que se diz “Un senyor de Barcelona” que tien por protagonista a Rafael Puget, un presonache real, de Manlleu, a qui Pla escuitó esplanicar la suya vida ta dimpues escribir-la. Puget vivio as guerras carlistas en o suyo lugar y dimpues d’a zaguera marcho ta Barcelona. As memorias de Puget no son nomas as suyas, pues remera y recenta la vida de presonaches historicos y famosos d’ixe tiempo, dende chenerals carlistas dica artistas, cientificos o comerciants. Ye en una d’istas alcordanzas paralelas referida a Albert Llanas, un comediografo y periodista d’a epoca, an que amanixe iste vinclo estranio con Marcos Zapata, dramaturgo aragones, naixiu d’Ainzon en 1842.

Recenta Pla que li esplanica Puget que un dia Llanas trobo a Marcos Zapata en a carrera, en Madrid, zorro de’l tot.

Feba pena, recitaba poemas a una farola, en un estau de delirium tremens. [Llanas y Zapata] S’heban conoxiu en Barcelona an que lo poeta heba estau empresario de teyatro en os tiempos d’a Exposicion de 1888. La marcha d’a empresa plega a o livel de catastrofe, y si Zapata podio marchar de Barcelona en un meyo de locomocion normal estio porque Gayarre, que yera paisano suyo [Isto no ye verdat, que Gayarre yera navarro] paro una funcion benefica que li premitio bosar as deudas mas grans. Zapayera yera un tipo impresonant de bohemio.

Alticamau de veyer-lo en ixe estau, Llanas s’amana, suelta a Zapata d’a farola con muito esfuerzo y portando-lo a corderetas, aconsigue dixar-lo en a puerta d’o suyo domicilio. Zapata viviba en o domicilio d’una senyora que ell conoxeba.

Estiraron d’o cordon y a puerta s’ubrio. Aparexio una dama en chambre y senaguas que veyendo a lo poeta se li tira dencima y en un empenton l’endreza ta dentro d’o piso. Feba tantos diyas que yera difuera que no se dixa pasar la ocasion. La dama fa seguiu una huellada ta fer de menos a Llanas y trancando a puerta diz a Zapata, con huellos dulces: “No ye culpa tuya, aimor mio! Son istos amigos os que te trafucan

Marcos Zapata, bohemio y una mica zorro, porque o que se diz asti, tien una carrera en Zaragoza, en as Delicias. Como autor escribio teyatro y poesia. En obras de teyatro destaca “La Capilla de Lanuza“. Uno d’os versos d’ista obra ye esculpiu en o monumento a lo Chusticia d’a Plaza Aragon de Zaragoza:

“Sol brillante fue la libertad un tiempo, a cuya luz se agrupaban en las márgenes del Ebro los reyes con sus coronas, los vasallos con sus fueros, la nobleza con sus timbres  y todos formaban  un cuerpo”

Una rilacion, un vinclo estranio que mos leva dende Manlleu enta Barcelona, dende Barcelona enta Madrid, dende Ainzon enta Argentina (an que vivio Zapata), dende Zaragoza enta Petilla (an que naxio Ramon y Cajal que estio conoxiu de Zapata y mesmo escribio un prologo ta una antolochia). Y en o meyo de tot iste cuadro, Pla, Puget, Llanas, Zapata, y una zorrera.

Buena chen 2011

Martes, febrero 22, 2011 17:42
Publicau en a categoría purnas

Un anyo mas s’amana o festival Buena Chen an participan buena ripa de collas socials aragonesas y tamien de collas mosicals ta recollir diners que adedicar a esferents destins socials. Tenetz tota la informacion en a web www.buenachen.org

Buena Chen 2011

Buena Chen 2011

Tags:

Diya entrenacional d’a luenga materna

Lunes, febrero 21, 2011 12:43
Publicau en a categoría de l'aragonés, purnas

A UNESCO cilebra cada anyo en ista data o Diya entrenacional d’a luenga materna ta promover l’emplego de totas as luengas d’o mundo. Vivimos en un pais que tien a suerte (disgracia ta bells “aragoneses”) de tener tres luengas que a chent tien como maternas; L’aragones, o catalan y o castellan. Una vegada mas a Conselleria de Cultura d’o Gobierno d’Aragon xublida ista data y no tien garra convocatoria ta remerar a riqueza linguistica d’o pais.

Una vegada mas estara a sociedat civil ha que be de alzar o patrimonio aragones. Cal en iste diya remerar a dificil situgacion d’una luenga milenaria como l’aragones, os problemas ta o catalan en as zonas catalanofablants, o disprecio sistematico contra tot lo que no siga o castellan en os meyos de comunicacion, metendo a manera de comunicar-se de 70.000 aragoneses en o territorio d’o folklore y no pas d’a cultura. Aprebar leis de menimos que amas no se cumplen en os plazos que cal no sirve ta cosa si no s’alzan os dreitos d’os fablants, si no se dinnifica a cultura y as luengas en que han escrito Fernandez d’Heredia, Anchel Conte, Moncada u Lombarte, dentre atros muitos. As luengas en que cantan en a Val d’Echo, os Mallacan, os Draps, os Prau. As luengas en que charran cutiano dende a Val d’Anso dica Benas, dende a Ribagorza dica o Matarranya.

As luengas aragonesas son patrimonio d’o pais, pero antimas son feitos vivos, cada vegada mas amortatos, en que viven diya zaga diya milentas d’aragoneses. Cal esfender-las, cal alzar-las con leis y recursos, pero, sobre tot, cal aimar-las y charrar-las.

Sin perder lo que era…

Domingo, febrero 20, 2011 12:35
Publicau en a categoría prexinando, purnas

Se deciba Anita Usón. No la conoxie, y nomas veigo o suyo nombre en una esquela de La Vanguardia. Teneba 100 anyos que prencipioron en Samper de Calanda y rematoron en Cornellà de Llobregat. Ye una mas de totz os aragoneses y aragonesas que habioron de marchar enta Catalunya en os sieglos XIX y XX. Anita leva un d’ixos apellius aragoneses que gosan salir en as esquelas d’as ciudatz catalanas. Anita podeba estar una d’as protagonistas d’a Mermelada de Moras d’a Ronda de Boltaña.

Veigo o nombre d’os suyos fillos (Ramón u Nuri) y d’os suyos nietos (Meritxell, Cesc, Albert, Anna) y bisnietos (Berta u Bernat). Veigo con ells a historia d’a emigracion aragonesa. Dende Samper de Calanda, a marcha por os camins, ta rematar construindo alacets y radices en o pais d’o costau. Encara chugan a o guinyote en o Centro Aragones, y mesmo beben Ambar, pero bells d’os suyos fillos y sobre tot nietos nomas remeran Aragon en as remeranzas d’os lolos y en as vesitas d’estiu enta lo lugar, an gosan ser “os catalans”.

Veigo a os mios propios cosins de Sabadell u Cerdanyola. Veigo en ells ixe mesmo discurrir d’a historia. Y me pienso en tota la fuerza y a enerchia de qui decidio salir d’os suyos lugars ta marchar a atras tierras. Y me pienso en todas as historias chiquetas d’ixos yayos que van a tallar-se as tufas en o Centro Aragones, d’os que decidion fer un Centro aragones ta obrers, d’os que han rematau en partius catalanistas, d’os que encara no saben parola en catalan, d’os que en sapen, d’os que hesen estau una aduya ta construyir iste pais nuestro, d’os que marchoron en columnas ta lo frent d’Aragon… d’os que sin perder lo que eran, ahora son también otra cosa.

Polvo, niebla? Entibos y aeropuertos

Martes, febrero 15, 2011 19:22
Publicau en a categoría purnas

No ye a primer vegada que charro d’o prexin que teneba o mio amigo Joaquin Macipe de dibuxar un Aragon d’auguas eternas crebau nomas por una tuberia por o meyo ta portar l’augua luen d’aqui. Tamien charra una canta d’o Comando Cucaracha d’ixe Aragon maritimo.

Os nuestros politicos tienen ista vision bien ficada en o tozuelo, baxo lo cachirulo, y por ixo empentan y empentan y empentan a construccion de Biscarrues u lo recreximient de Yesa u a construccion de Mularroya, Santaliestra, u mesmo de Lechago, ixe entibo que feito dengun no quiere emplegar. O fracaso de Lechago, dimpues de malmeter tierras y lugars, ye un exemplo de como se fan as cosas en iste pais. L’entibo de Lechago, a sinrazon d’os entibos feitos por fer, ye a mesma sinrazon que mos leva enta la siguient basemia d’os nuestros politicos.

Antimas d’a vision d’ixe Aragon maritimo, a os politicos nuestros lis fa goyo que ixe mar tienga islas. Islotes de tierra firme que s’empleguen por un costau ta casinos y por atro ta aeropuertos. Un mar Aragon comunicau por avions y que tienga tierra firme ta chugar-se’n os cuartos. Profes que ixa basemia politicoaragonesa leva o mesmo trango que l’entibo de Lechago. Mos lo recentan huei bien en l’Heraldo y o Periodico. Pyrenair dixara de volar, l’aeropuerto de Uesca tornara a estar una pista de cemento, l’aerodromo de Teruel, ya feito, no sirve ni ta aparcar as motos que van ta Motorland. D’ILD y Gran Scala casi que ya no cal charrar.

Pyrenair contina os trangos de l’atra companyia aerea encetada por o Gobierno d’Aragon, Pla-za Servicios Aereos. Y as mentiras de Pyrenair encara quedaban mas esclateras cuan o 31 de chinero mos deciban que a demanda de vuelos dende Lleida yera prou gran, y 10 diyas dimpues dixan de volar, por exemplo. Una politica de planificacion entivocada que leva a o fracaso economico, ixo si, con os diners de totz.

L’aspiracion de Joaquin Costa de “despensa y escuela” ha quedau ta istos politicastros nuestros en “entibos y aeropuertos (y casinos)”. Pero como diz Trasobares mos dicen de tot si dicimos isto antis de que se vaigan por o sumidero os millons publicos. Os agoreros que somos veyemos agora que os edificios d’a Expo 2008 continan sin poder-se fer servir, que os barcos de l’Ebro chitan millons d’euros ta la basuera cada anyo, que l’aeropuerto de Caude ye un disparate, que l’aeropuerto de Huesca no remata de despegar, que os diners publicos ta Ryanair en Zaragoza sirven ta que as demas companyias marchen en cuanto que no tienen aduyas, que Lechago yera un entibo que no teneba viabilidat economica, que ILD nunca no construyira Gran Scala…continamos?

Tornar ta os uitanta

Sábado, febrero 12, 2011 19:13
Publicau en a categoría prexinando, purnas

Madalena yera una d’as chirmanas d’o mio lolo Macario. Veniba de Logronyo, cada seis meses, ta recibir radioterapia en o Miguel Servet. D’a tia Madalena alzo pocas memorias. Yo yera chicorron, porque somos charrando d’os zaguers anyos 70 y primers 80. De feito as dos prencipals cosas que remero d’ella son de l’anyo 81.

O 23 de febrero de l’anyo 81 una colla de Guardias Civils dentraban en o Congreso espanyol y feban amagar-se a totz os diputaus a tiros. Muitas vegadas hemos visto ixas imachens, tot y que ixe diya no se podioron veyer en directo y la mayoria d’a chent sentiba por radio os feitos. Yo no remero guaire cosa. Teneba nomas 6 anyos y no conoxeba a implicacion politica d’o suceso. Pero si que remero a la mia tia Madalena, plorando, como una idem, devant de l’aparato de radio. Ella ya heba viviu atro golpe d’estau, o 18 de chulio d’o 36, y tamien l’agafo fuera de casa suya, en Barcelona. Habioron de pasar 2 anyos, en meyo d’a guerra, ta que podese tornar a Logronyo. A o suyo mariu encara li fue piyor, porque li toco fer a guerra con os republicans, y una vegada rematada la guerra habio de tornar a fer cuatro anyos de mili como represalia.

Ixe mesmo anyo 81 ubriba as suyas puertas l’Alcampo d’Utebo, o primer centro comercial que tenio Zaragoza. Y tamien se mezcla o remer d’a tia Madalena con iste feito. En una d’as suyas estancias en Zaragoza, y con l’Alcampo ya ubierto, tota la familia mos ne fuemos de excursion a Utebo. A tia Madalena me regalo una bolsa d’esporte marron, marca Puma, que a yo me parixeba chigant, y que anyos dimpues veyie que no yera tan graniza. Creigo que encara la tiengo por bell puesto porque yera una d’as pocas cosas de marca que tenie de crio.

Feba asabelo tiempo que no yera en l’Alcampo d’Utebo, y la atro diya i estie. Encara alza ixe ambient una mica d’os uitanta, porque agora ya i ha mas centros comercials en Zaragoza, y iste no ha feito guaires trangos entavant. Me veniban a os huellos ixa primera vesita, y os diyas que con os mios pais y o 127 febamos a compra d’o mes en l’unico hiper d’a ciudat. O Conexion an mercamos o primer video con os diners que mos dixo en morir a tia Petra, o Flunch an febamos una Coca-cola antis de tornar con l’auto cargau.

Puestar por ixas remeranzas d’a infancia que dimpues, contento por haber pasau la ITV con l’Almera, y dimpues d’haber mercau bellas cosas en l’Alcampo, decidie parar en a Venta’l Conde a chentar. Y digo, puestar por ixas remeranzas u porque a birolla yera casera-casera, a pasta con fungos, o ternasco empanau, y sobre tot, as trunfas fritas teneban o gusto unico y inconfundible d’a cocina d’a mia lola Basilia.

Proposa a collas mosicals

Miércoles, febrero 9, 2011 17:25
Publicau en a categoría de l'aragonés, purnas

Ahiere se dioron os premios d’a mosica aragonesa que como cada anyo fa Aragón Musical. Antis que no atra cosa, cal felicitar a la chent d’Aragon Musical por a suya fayena ta dinnificar a produccion musical aragonesa. Pero a lo que imos. Una d’as categorias que fa anyos que s’entrega (con polemica bell anyo, por cierto) ye a de Canta en luenga minorizata d’Aragon. Una categoria an que culle tot. Aragones, catalan, musica d’autor, de conya, cantas en varias luengas… pero que a lo menos reconoix lo triballo d’as poquetas collas que fan mosica en aragones y catalan en Aragon.

Iste anyo, os nominaus yeran Dechusban por “Cucadetas” (aragones), Diego Stabilito por “Un actor invisible” (catalan), Inestables por “O suenio de Peter Punk” (aragones), y o ganador d’o premio, o multipresent y chenial Pepin Banzo chunto a Jota Lanuza d’Ixo Rai por “Jota from Saragossa” (multilingüe).

Ye verdat que a produccion en aragones u catalan en Aragon no ye guaire gran, y ixo fa que istos premios sigan una mica desvirtuaus, porque, de feito, a canta ganadera no ye en aragones ni catalan. Asinas que dende Troballa, a microempresa que prebo de fer caminar, he decidiu ufrir una proposa a las collas mosicals aragonesas. Tenetz os detalles asti, pero isto ye lo que s’ufre dende Troballa. Tos animaz?

Tiens una colla mosical? Yes aragones? Tiengo una proposa a fer-te.

  • Tu trigas una d’as tuyas cantas
  • Yo foi a traduccion ta l’aragones de baldes
  • Apanyamos a traduccion ta adaptar-la a la tuya mosica
  • Tu la cantas, la grabas y la metes en a tuya siguient publicacion
  • Totz os dreitos d’a traduccion y a canta son ta tu (u como goses publicar)
  • Nomas m’adibes en os creditos d’a grabacion

L’estau de dreito. U aplicar a lei cuan mos vaga. Sortu

Martes, febrero 8, 2011 11:39
Publicau en a categoría purnas

En primeras se creya una lei ad hoc ta ilegalizar a una formacion politica con vinclos con ETA. Ye a que se diz “Ley de Partius”, feita y nomas que feita ta ixo. Garra atro partiu ha estau ilegalizau con ista ley. Ni os partius nazis que paran actos en Zaragoza, por exemplo, ta fer campanyas racistas, por exemplo, ni os partius que promueven guerras ilegals, ni partius con vinclos con formacions terroristas paraestatals.

Dimpues, una vegada ilegalizada la formacion prencipal, s’ha chustificado as sucesivas ilegalizacions de totas as formacions que han prebau de creyar, y mesmo partidos historicos como ANV. Se lis demanaba cumplir a lei, ye dicir, condenar y refusar a violencia. De feito, se prebo de criminalizar una coalicion de partius y organizacions no vascas (como Iniciativa Internacionalista) con prebas mas que circunstancials, que a la fin, podio presentar-se a las eleccions europeas, precisament, por a manca de prebas.

Anyos dimpues, y zaga muitos trangos que ha feito a cucha abertzale en asabelas declaracions, creya un partiu politico, Sortu, que cumple totas y cadaguna d’as condicions que demana la lei a totz os partius politicos y no nomas a ells.

Por contra, cada trango que a cucha abertzale ha feito, alcompanyau antimas por o camin enta la fin d’a violencia armada d’ETA, tanto dende o gobierno espanyol como d’os partius espanyols, s’ha desixiu que amas d’a lei, a cucha abertzale, cumplise atras condicions dilla d’a lei. Iste cabo semana mesmo se feba una manifestacion en Madrid, empentada por a dreita “democratica” mas estremista en que se demanaban condicions dilla la ley ta lo reconoximient d’una opcion electoral ta la cucha abertzale. Tamien dende o PP, y bellas voces d’o partiu en o gobierno han feito ista crida. No cal nomas ta istos cumplir a lei (que con anviesta critica ells tampoco no cumplen en os suyos estatutos), que desixen condicions no legals, como apunta tamien Ignacio Escolar (dentre atros).

Si a lei se fa ta que siga cumplida nomas cal desixir que se cumpla ixa lei (y no mas). Se puede dubdar d’intincions, estratechias u lo color d’a ropa que vistan os miembros d’o nuevo partiu, pero si cumplen a lei, l’estau, si quiere continar estando un estau democratico ha de fer o que tiene que fer. Y lo mesmo ta la Chusticia, que, en iste caso, siempre ha quedau vistero que no ye un poder separau.

Pero como tot tien una parti una mica menos seriosa, en twitter, una vegada mas, s’ha creyau un hashtag d’humor. En iste caso #Batasunarequisitos, con demandas que cal fer a lo nuevo partiu, dentre atras que metan o dominio .es, que l’himno d’a formacion siga flamenquito u condenar (que no rechazar) el uso de Ropa de montaña cuando no vas a la montaña. Pues ixo.

Pachina 15 de 216« Primera...510...1314151617...202530...Zaguera »