Igual ye hora de dicir prau

jueves, julio 7, 2011 19:40
Publicau en a categoría purnas

Qui mos furta? qui mos ningunea? qui mos amuestra o suyo disprecio? Sistematicament totas as decisions que dende o gobierno d’Espanya pueden estar buenas t’Aragon son refusadas. As retalladas de Fomento mos afectoron mas que no pas a atros territorios, recurrioron a o Constitucional partis d’o nuestro nuevo miniestatuto, una y atra vegada refusan as negociacions bilaterals, mos bosan a deuda que en tienen con o nuestro propio patrimonio, fan obras d’infraestructuras a meyas, no las bosan, y nomas porque tenebanos una Expo que tampoco no facion suya y no refirman a Aragon en as decisions importants que afectan a o pais.

O zaguer trango ha estau l’apuesta por un corredor que no yera pas o que pretendeba Aragon. Sin dentrar en valoracions meyoambientals u d’oportunidat, as meyas parolas, as afirmacions vuedas d’o gobierno espanyol, no han portau que a la unica solucion que en epoca de crisis Europa podeba fer. Y en isto ye igual si o gobierno d’Espanya ye d’o PP u d’o PSOE, siempre tendra problemas ta reconoxer mas peso especifico a una comunidat como Aragon, con no guaires votants, y que amas decide, vegada tras vegada votar mas Espanya y menos Aragon. Somos poquetz y conformaus.

Igual a hora d’a contemporizacion ya ha pasau. Igual ya ha pasau o tiempo de no molestar guaire a la metropoli que mos coloniza con entibos demanaus por bells aragoneses y exercitos que enrunan y incendian o nuestro terrritorio. Igual ixo de votar sistematicament a partius espanyols como o PP y o PSOE tamien ha pasau.

Igual ye hora de dicir prau y esviellar iste pais en un pais combatiu, concarau, con ganas de ser y estar, pero no nomas con “peso especifico en Espanya”…igual ye hora de que Aragon diga prau y siga ixo, nomas Aragon.

Os primers trangos d’Arredol

martes, julio 5, 2011 10:00
Publicau en a categoría de l'aragonés, purnas

Arredol. Logo feito por Laira Gonzalo

Arredol. Logo feito por Laira Gonzalo

As nuevas tecnolochias d’a informacion y a presencia en o rete, en Internet, son vitas ta las luengas minorizatas, como l’aragones. A normalizacion d’o suyo emplego ye un trango mas que Internet fa mas facil, pero por l’inte no esiste garra medio de comunicacion dichital de referencia en aragones.

Arredol quiere fer una apuesta por potenciar a comunicacion en aragones. Queremos fer un medio de referencia, pero en aragones, que planteye atro paradigma socio-politico y cultural.

Trangos

  • Fer un prochecto estable y ubierto a colaboracions
  • Espardir a presencia de l’aragones en Internet
  • Creyar una plataforma de noticias en una luenga ultraminorizata como l’aragones
  • Creyar camins enta un nuevo modelo de medio de comunicacion en Aragon
  • Dotar a la sociedat aragonesa d’unatra anviesta sobre a reyalidat sociopolitica d’o pais.

Prenemos a web 2.0 como alazet, una web que tamien creyen y modifiquen os usarios, ta creyar nuevos espacios ta compartir.  Queremos fomentar l’autonomia d’os fablants de l’aragones y creyemos en a participacion ciudadana ta construyir una realidat mental esferent. Queremos construyir nuevos espacios ta l’aragones, en campos no guaire emplegaus, como as noticias, a tecnolochia, a realidat social.

Si queretz colaborar con nusatros, si yes periodista, u t’intresa a comunicacion en aragones, u as dos cosas a la vegada puetz meter-te en contacto con nusatros en o mail, info@arredol.com, en ixe mail tamien mos podetz fer socherencias que creigatz d’intres.

O logo d’Arredol y a suya imachen de portalada han estau feitas por Laira Gonzalo.

Mas informacion d’ista nueva ferramienta de comunicacion en aragones en http://www.arredol.com

As mancas de no estar oficials

lunes, julio 4, 2011 12:33
Publicau en a categoría de l'aragonés, purnas

Con a minilei de luengas aprebada por as Cortes y desenvolicada tant amonico como si no en o zaguer anyo, as luengas d’Aragon que no son o castellan no son oficials. A suya no coficialidat leva a muitas mancas esencials, quasi tantas como que a lei s’ature, no se desenvolique u que no se creyen os organos pertinents ta igualar as luengas a la resta de luengas de l’espacio que compartimos.

No ye que una cosa curiosa, pero una muestra d’a falta d’oficialidat le veigo a ormino en un organismo semioficial que acolla a las comunidatz autonomas y departaments d’un costau y d’atro d’os Pirineus, a Comunidat de Triballo d’os Pirineus, con siede en Chaca.

Iste anyo 2011 parixe estar que ye l’anyo d’os Pirineus, y en a Comunidat de Triballo han creyato una web ta ixe feito. Como totz os documentos que fa ixe organismo a web ye en as luengas que s’emplegan en a sarra y tamien en castellan. ¿En totas? No, profés que no. Atamas de tener a siede en Chaca a unica luenga en que no amanixe garra testo ye l’aragones.

A rispuesta que pueden dar de l’organismo ye que l’aragones no ye luenga oficial en garra puesto, y ye verdat. Asinas que meten a web en castellan, catalan, vasco, occitan, frances y angles. Ye asinas como una d’as luengas d’emplego cutiano en os Pirineus no ye luenga d’emplego en un organismo que arrocla intreses culturals y economicos d’os Pirineus.

Sisquia que como a Orquestina d’o Fabirol actua ta ixa Anyada d’os Pirineus, a lo menos se pueda sentir l’aragones, una luenga que oficialment, no esiste pas, y cuya minilei de proteccion y emplego tien os diyas contaus con o nuevo gobierno aragones d’o PP.

A mia biblioteca

sábado, julio 2, 2011 18:41
Publicau en a categoría prexinando, purnas

 

 Anviesta dende a Staatsbibliothek zu Berlin

Anviesta dende a Staatsbibliothek zu Berlin

Una vegada dentre en una biblioteca. Yera chicorrona, bien endrezada, con bells armarietz que no rispondeban a lo que meteba en os suyos letreros, pero an que podebas trobar tota la sabiduria d’o mundo. En totas as luengas d’o mundo, mesmo en as que no s’escriben. Con totz os suenios que uno ha puesto tener nunca. Con totas as letras y tipos y alfabetos que en o mundo han esistiu.

Quan i dentre, sabeba que no seria facil salir-ne. No yera que querese salir, ye que sabia que nunca no podria. Me facie ascape con o carnet d’usuario, y prebaba de ir un ratet cada diya. En salir d’o triballo, antis de chentar, dentre programa y progama de television. As mias horas s’eslampaban, sin de machia, fendo gambadetas por os corredors, tocando totz os libros, mesmo cambeando libros dentre repalmars porque m’aganaba.

Prebe d’atras bibliotecas tamien. Prebaba de escar libros que sabeba que yeran en a mia biblioteca por saper si yera millor que no pas a mia. En trobase u no, a mia biblioteca yera muito millor en o mio esmo, t’as mias neuronas. Dentre os suyos pasiellos podeba saltar d’epoca en epoca, podeba correr dentre versos y mesmo plorar dentre os libros quan bella cosa me plegaba ta l’alma.

Quan me facie o carnet, me dicion que estaria ta cutio, que no teneba calendata de fin d’achuste, que podria dentrar-ie cada vegada que querese. Pero ve-te-me que un diya, quan prebe de dentrar-ie a puerta yera trancada, y encara que facie un poder ta empentar-la, estirar-la, mover-la…a puerta no dio sinyals de poder-se mover. A man cucha d’a puerta, en un cartelet escrito a man, con tinta verda, deciba que quedaba suspendida a dentrada a tota chent, que una corporacion heba mercau os dreitos d’emplego d’a biblioteca y que no dixaban que ningun no tocase os libros suyos.

Estricalle o carnet que m’heba feito feba anyos y marche ta casa a mirar as mias opcions. Enample a rechira por as bibliotecas d’a ciudat, d’a redolada, d’o pais, dentre a totas as que podie escando ixos libros que nunca no podria uellar. Agora ya fa un tiempo que nian dentro a las bibliotecas. A garra d’ellas. As imachens que teneba d’a mia biblioteca s’esbafan ya d’a ment mia, pero cada vegada que paso por aman de cualsiquier biblioteca una punchada de dolor me viene remerando aquella biblioteca chicorrona sabendo que nunca no trobare un puesto igual ta dixar paseyar os uellos por entre fuellas enquadernatas.

Por o chusto dreito de conquiesta. 304 anyos chusmesos

miércoles, junio 29, 2011 15:41
Publicau en a categoría purnas

O 29 de chunio de 1707, fa 304 anyos, o rei espanyol Felipe V de Borbon, derogo totz os dreitos forals y territorials de l’antigo reino d’Aragon. Encara que a historiografia espanyola (y aragonesa) ha quiesto fer d’ista calendata por un costau una data que dixar xublidata y por l’atra un feito bueno ta Espanya y mesmo t’Aragon, ye bueno remerar que tal diya como huei Aragon perdio de facto a suya presonalidat churidica propia como pais independient (encara que compartindo corona con atros estaus).

Y no lo facio por a bondat d’o primer Borbon, ni porque nos querese a-saber-lo. Lo facio, como dixan esclatero os documentos, por dreito de conquiesta. Porque buena parti d’o reino s’heba devantau contra o rei borbon y heba refirmau a o candidato d’os Austria, que ya heba churau os fueros y libertatz d’os aragoneses.

Considerando haber perdido los Reinos de Aragón y de Valencia, y todos sus habitadores por el rebelión que cometieron, faltando enteramente al juramento de fidelidad que me hicieron como a su legítimo Rey y Señor, todos sus fueros, privilegios, exenciones y libertades que gozaban y que con tan liberal mano se les habían concedido, así por mí como por los Señores Reyes mis predecesores, particularizándolos en esto de los demás Reinos de esta Corona; y tocándome el dominio absoluto de los referidos reinos de Aragón y de Valencia, pues a la circunstancia de ser comprendidos en los demás que tan legítimamente poseo en esta Monarquía, se añade ahora la del justo derecho de la conquista que de ellos han hecho últimamente mis Armas con el motivo de su rebelión; y considerando también, que uno de los principales atributos de la Soberanía es la imposición y derogación de leyes, las cuales con la variedad de los tiempos y mudanza de costumbres podría yo alterar, aun sin los graves y fundados motivos y circunstancias que hoy concurren para ello en lo tocante a los de Aragón y Valencia.

Encara asinas, os “buenos aragoneses de bien” han cilebrau a imposicion d’a Capitania Militar como si estase un feito resenyable, han feito homenaches a una bandera que no esistiba pas, han aplaudiu a o rechimient que imposo a lei melitar en 1707, lo Numancia, y mesmo consideran que a presonalidat churidica d’o Reino yera un problema ta “la verdadera igualdad de todos los españoles”. Encara huei continan bells aragoneses traicionando a o pais, creyendo que de chinollos se vive millor que de pie, y continan creyendo que tot ixo estio un feito consecuent y que ocurrio porque teneba que ocurrir. Xublidan o documento orichinal, ixe que agora fa 304 anyos que estio publicau y que dixa plateras as cosas…”por o chusto dreito de conquiesta“.

Belloch y o mal perder

martes, junio 28, 2011 21:18
Publicau en a categoría purnas

No imos a descubrir agora a mena d’alcalde que tenemos en ista ciudat. Juan Alberto Belloch s’ha feito sinyalero siempre por o suyo disprecio por qui no piensa como ell y por querer, si puede, pasar por dencima de tot. No imos a descubrir agora ixo que dicie “L’Evanchelio de Belloch” repasando bellas d’as suyas actuacions mas destacadas.

Pero mientres a cosa quede dentre nusatros, pues rai. Pero huei, como ripresentant de tota la ciudat, y una vegada que Sant Sebastian ha estau nomenada como Capital Cultural d’Europa en 2016, ha dixau por o sulero a tota la ciudat con as suyas parolas de mal perdedor y, sobre tot, con o suyo quiste de tiempos de chuez.

Belloch ha charrau de politica (a que diz que ha menau a decision d’o churau) pero no pas de Cultura, ye esclatero. Ha dito que puestar impugnara a decision, y que no puede ripresentar a Espanya uns que no son espanyols. Fueras de que a historia ista va de ciudatz europeas y no espanyolas, Belloch no ha charrau de porque a vida cultural de Zaragoza queda luen de Sant Sebastian, o suyo festival de Jazz, u de cine, as suyas alportacions a la gastronomia europea, etc… Mientres que en Zaragoza a politica cultural ha estau dando bandazos, ha consistiu en trancar salas de conciertos, fer desfiladas militars, fer continament recreyacions de feitos militars, plantar banderas d’Espanya en plazas prencipals, sacar conciertos d’as carreras t’as fiestas, sacar ferias culturals como Amostranza, dixar amortar festivals de cine como Cinefrancia, retirar cartells en aragones en quanto cambeoron o socio de gobierno…

Ye verdat (y por suerte) que n’ha habiu atras actuacions mas encertadas, muitas d’ellas por iniciativa privada, social y ciudadana. Y bien se vale que si hesen trigau Zaragoza como Capital Cultural, suposo que habrian cambeau bellas cosas (encara que a desperencia d’a Expo contrimuestra que no siempre t’amillorar). Pero tot isto son elucubracions.

O que no ye una elucubracion ye que Belloch ripresenta malament a os ciudadans zaragozanos, que as suyas formas autoritarias, puestar que derivadas d’o suyo tiempo chudicial u d’os tiempos como ministro de quasi tot, dixan en mal puesto a os zaragozanos. Iste si que no me ripresenta pas.

Cilebrando o fin d’o pais

lunes, junio 27, 2011 16:30
Publicau en a categoría purnas

A historia d’iste chicot pais nuestro ye plena de feitos surrealistas. Eleccions dificils d’entender, indecisions historicas, politicas d’alianzas erraticas, herencios de dubdoso valor t’o pais.  Dende os primers trangos de l’ente politico que levo por nombre Aragon os suyos mainates han parexiu querer fer disparixer o propio pais. Reis como Alfonso I, que estendillo os limites d’o reino ent’o sur, conquerindo a val de l’Ebro, querioron a la suya muerte, trestallar os suyos dominios dentre chent forana.

Jaime I, naxito de Monzon, por os problemas con os nobles aragoneses, decidio no dar surtida t’o mar a o reino, y en creyo un de nuevo, o de Valencia. Mesmo a politica matrimonial d’iste rey, por a potencia d’o vecin castellan, estio endrezata a apaciguar os castellans, y a la vegada, refirmaba a os Lopez de Haro en o suyo semiindependient Senyorio de Vizcaya. Pero os casorios d’os suyos fillos con fillos castellans metioron os alacetz d’os feitos posteriors.

Istos diyas cilebra Caspe o 599 cabo d’anyo d’o famoso Compromis. Se cilebra como o triunfo d’o pactismo devant a guerra, como una resolucion historica d’un conflicto dinastico en morir Martin I sin fillos. No ye que no hese guerra, porque unatro d’os pretendients, Chaime d’Urgell si que presento baralla contra o nuevo rey Fernando, y s’acotolo a chent partidaria d’un u d’atro d’os pretendients (dica 6 n’habio) . Pero a cilebracion amaga iste feito, como tamien os intreses imperialistas castellans y a partecipacion d’intreses foranos a la Corona, y mesmo d’o Papado, a travies de Vicente Ferrer.

O Compromis de Caspe ye o trango prencipal d’o fin d’o Reino. S’entronco una dinastia forana (con a que s’heba barallau en guerras menos de 100 anyos ta zaga). Se fico en o reino una luenga forana, o castellan, que agora ye mayoritaria, de manera quasi absoluta, se trenco a linia dinastica d’os viellos reis d’Aragon, y mesmo a politica d’alianzas tradicional aragonesa chiro ta amanar-se a la castellana. Tot ixo se cilebra istos diyas como un gran triunfo. Y ye claro que estio un gran triunfo, sobre tot, ta os que preban de borrar de raso y ta cutio la identidat aragonesa.

Agora se fan 599 anyos d’o Compromis de Caspe. Huei mesmo s’anuncia que Luisa Fernanda Rudi estara a unica candidata a presidir o Gobierno d’Aragon, como han dictau os votos d’os propios aragoneses. Continamos cilebrando o fin d’o pais.

Chera y aire ta espardir l’esmo

jueves, junio 23, 2011 17:40
Publicau en a categoría prexinando, purnas

Chera

Chera

Ya son a saber los anyos que chito en a chera un paper con os mesmos deseyos. De tantas vegadas que he deseyau lo mesmo ya he rematau estando conscient que nunca no se cumplira. Pero por ixo huei tornare a chitar t’as flamas un paper con as mesmas seis parolas d’istos zaguers anyos.

En a chera cremaran as parolas y os suenios y os esmos y o cierzo las portara luen, tan luen rio t’a baxo que trigaran bellas semanas en tornar-ne. Cal aproveitar istos intes que a maxia invade o nuestro mundo racional, cal recuperar o poder d’a nueit, d’o fuego y de l’augua ta dixar-se levar luen como as parolas. Ta tornar a sentir-nos ninos que se piensan que tot o que suenian esdevenira reyalidat. Y ye por ixo que l’anyo venient, quan comprebe que as mias seis parolas no s’han tornau de verdat, tornare a escribir-las en un paper y las cremare en a chera d’o solsticio d’estiu.

Cal cremar as parolas que soniamos ta dixar que encara que nomas siga por unas horas, faigamos reyalidat os suenios.

Ya plega unatra nueit de machia. Ya plega l’inte de deseyar unatra vegada. Ya plega l’inte de cremar os esmos viellos y replenar a falsa de suenios. Plega l’inte de creyer, de l’estiu, de vivir, de creyar, como tantas atras vegadas.

Preta fuego a la fusta! Crema vidas viellas! Creya vidas nuevas! Fuego, fuego, fuego! Ye Sanchuanada!

Incomunicau

miércoles, junio 22, 2011 20:58
Publicau en a categoría purnas

Son tiempos d’estar comunicau a totas horas. Son tiempos de saper dicir “no” y prebar de que te’n digan si (encara que no te’n digan ixo, ye claro). Son tiempos d’estar apegaus a lo telefono movil (lo “suelto” que li’n dicen en bell puesto), y con iste, t’o mundo a travies d’internet.

Huei mesmo charraba d’as conexions, d’internet, d’o mundo virtual ta Ràdio Matarranya, como fere cada miercols a meyodias. A entreconexion dentre chents ye o nuevo mantra d’a nuestra sociedat. Antis se feba china chana, nomas con a chent de mas aman, y agora as nuevas tecnolochias fan posible que a entreconexion no tienga ni tiempos ni distancias.

Pero estar esclavos d’istas tecnolochias de vegadas causa problemas. Plegas enta Girona con o GPS enchegau, enta la carrera que has d’estar. No paras cuenta en l’adreza porque vas con chent que la conoix. Vas de borina y plega un inte que por circunstancias yes solenco. Prebas de gritar a os tuyos amigos con o “suelto”, que no tien bateria. Os tuyos amigos preban de gritar-te pero lis sale apagau y no se puede dentrar ni salir y tornar a dentrar. No tiens as claus d’o coche, nian sapes en que carrera en ye. No sapes l’adreza de casa. Profes, no sapes garra lumero de telefono d’os tuyos amigos de memoria, asinas que no puetz demanar atro movil ta gritar.

Asinas que mientres demanas unatro gintonic, prebas d’aconseguir dentre rumberos y clowns un movil con internet ta rechirar en o rete bell telefono en os contactos de gmail ta gritar-ne. Pero, por fortuna, as entreconexions 1.0 tamien funcionan, asinas que os tuyos amigos, que tampoco no tienen manera de trobar-te, deciden tornar ta zaga, enta o zaguer puesto an que t’han visto. Asti, con o gintonic, y con un  sonriso amplo te piensas: “Si, internet ye guay, pero como no tiengas pilas ni amigos…”

Prou de recular. Manifestacion contra as retalladas laborals

martes, junio 21, 2011 18:19
Publicau en a categoría purnas

Prou de recular

Prou de recular

A REFORMA D’A NEGOCIACIÓN COLECTIVA:

REMATADERA D’UN RETACULE HISTORICO

Tasament una anyada dimpués de que o Gubierno aprebase por “decretazo” una Reforma Laboral historica por o mal que fa y as mugas que mete a los nuestros dreitos como treballadors, reforma que como totz remeraremos fomenta que forachitar a los treballadors siga mas barato (de 45 a 33 diyas, lo que ye una perda economica d’o 27% t’o treballador) u fa mas facil ta l’interpresario no cumplir con os chornals pactaus en convenio, por nombrar nomas belunas d’a polidezas más importants, nos trobamos agora debant d’una atra “vuelta de tuerca”: a reforma d’a negociación colectiva, bella cosa que no s’ha feito antismas en as zaguers tres decadas. Y lo que ye mesmo pior, qui monopolizan a suposada representación d’os nuestros intreses como clase, ye decir, CCOO y UGT, s’han amostrau disposaus a negociar dica quasi o zaguer inte y quan han crebau as negociacions han reconoixiu que yera por qüestions de matiz, no pas de fundo. Siga como siga, a la fin, habrá d’estar un nuevo decretazo d’o Gubierno qui impose iste nuevo poaquet de midas contra os treballadors.

¿Qué se preba de fer con ista nueva reforma?

Sacar o prolargue automatico d’os convenios. Dica agora, y asinas ye estau siempre mientres as zaguers trenta anyadas, tot convenio que a suya puenda de vichencia remataba se consideraba automaticament prolargau dica que no se sinyase o venient con o lochico obchetivo de escusar que desapareixesen dreitos que se veniban aplicando d’antismas. Si sale enta debant a reforma isto nunca más no será asinas, con lo que en as puendas entre convenios os treballadors nos viyeremos quasi sin dreitos.

Ficar l’arbitrache con pacto obligatorio: Se fica en a negociación de convenios l’arbitrache con pacto obligatio en o caso de no meter-se d’alcuerdo muito tiempo, lo que mete mugas a lo dreito a la vada en sacar-le efectividat, deixando-nos sin a nuestra principal ferramienta de presión y luita por os nuestros dreitos.

Ennamplar a “flexibilidat interna” d’as interpresas: U lo que ye lo mesmo, enamplar a libertat d’a interpresa ta fer y esfer lo que quiera con os treballadors. Qüestions como a movilidat funcional y cheografica, asinas como os horarios de treballo, serán afectaus dreitament por isto.

Deschudicializar os pleitos laborals: Se mira de que sigan as comisions paritarias u os servicios d’arbitrache qui prenga funcions que dica agora teneban os Chuzgaus d’o Social en caso de pleito laboral, acotolando as pocas vías que teneba o treballador ta poder planificar por sí mesmo a esfensa d’os suyos intreses en caso de pleito laboral independientement d’a interpresa y d’a representación sindical mayoritaria, por un regular de tot de CCOO y UGT y alavez prou aluenyada d’os intreses d’o treballador.

Resumindo…

O que se mira de fer con ista reforma ye, resumindo, enamplar o poder d’o interpresariamen debant d’os treballadors, metendo mugas a la nuestra capacidat ta planteyar a esfensa d’os nuestros intreses colectivament (lo que ye estau de siempre os alazetz d’a nuestra fuerza) y favoreixendo que se individualice ixa negociación, baixo lo falso supuesto de que interpresario y treballador prencipian en condicions parellanas en negociar, lo que ye una mentira de tot que beneficia siempre a l’interpresario. Tot ixo sin isublidar l’empente patronal ta que os chornals sigan vinclaus a la productividat, en cuenta de fer-lo a lo tiempo treballando como dica agora, lo que suposará más presión t’o treballador y, alavez, mayor carga de treballo u, por contras, perda de poder adquisitivo.

Prou de recular! Agora toca luitar!

Pachina 10 de 217« Primera...5...89101112...152025...Zaguera »