Purnas en o zierzo

Buscant conexió sobre SOPA y Megaupload en Ràdio Matarranya

Chorche — Thu, 26 Jan 2012 09:45:33 +0000

Dende fa bells quantos meses soi colaborando con Ràdio Matarranya fendo una sección sobre internet y nuevas tecnolochías. Mientres istos meses, hemos charrau de movils, aplicacions, webs intresants, ferramientas web, e-books y muitismas atras cosas. Agora se pueden descargar os programas dende a cuenta ivoox de Ràdio Matarranya an que son penchaus quasi totz os “Buscant conexió” y a resta de programas, tamién.

Ahiere como que charramos sobre as leis antidescargas, o trancamient de Megaupload y custions rilacionadas con os dreitos (d’autor, de compartir, de propiedat), encara que estio un repaso muit por dencima, m’aimo de penchar-tos o programa, y asinas podemos debatir sobre tot isto. L’audio, como ye de dar, que ta ixo ye en Ràdio Matarranya, ye en catalán.

Ta descargar en MP3

Posts relacionados:

Nomás que cal saltar a cleta y prencipiar a caminar

Chorche — Mon, 23 Jan 2012 16:00:57 +0000

No teneba guaires ganas d’escribir iste post. Ye la verdat d’o tema. En primeras, porque no quereba fer garra riflexion sobre o diya de huei, en que fa seis anyos que triballo an triballo. Dimpués, porque se que la riflexión nomás teneba una rispuesta, que no se si soi disposau a concarar agora mesmo.

A la fin, mientres que chentaba, he prencipiau a meter negro sobre blanco en o tozuelo os pensamientos que me redolaban dende a zaguer semana. Mesmo he feito tres u quatre tuitz sobre o tema. Me pensaba huei sobre os seis anyos que fa que deixé Barcelona y venié ta Zaragoza, ta la mia ciudat, una atra vez, ta fer un triballo que no heba feito nunca y que m’ha feito aprender muitismas cosas.

En seis anyos fa tiempo d’aprender muito, de fer muitas cosas, d’esfrutar d’atras quantas, de fer triballos dignos y atros no tanto, de barallar-se por contenius y rematar goyoso por o triballo feito. Han estau seis anyos bien activos en o profesional y tamién en o presonal. He conoixiu muita chent nueva, y atra que ha iu venindo y salindo d’a vida. He tornau a lo país con todas as consequencias, retrobando viellas luitas y viellos companyers, viellos bars, viellas amistatz, sin deixar atras luitas, companyers, bars y vidas de difuera. En seis anyos he creixiu y ya no soi o zagal que con 25 anyos marchaba de Zaragoza con as maletas quasi vuedas.

Huei, fendo o repaso d’istos seis anyos, me pensaba que han habiu más luces que uembras. Tamién han habiu uembras, y bien foscas. Bellas a ran presonal y más a ran profesional, porque de vegadas m’he sentiu infravalorau. Encara asinas, y gracias a las valoracions de difuera d’o triballo, siento que en istos seis anyos he asentau a mia carrera profesional. Bi’n ha chent que valora lo que foi y como lo foi, y ixo ya ye un goyo, porque amás, m’ha premitiu conoixer atras presonas y fer discurrir una vida profesional extra-laboral. Dende l’Aragoneame, en primeras, dende iste blog, dende a creyación d’Arredol, dende Radio Matarranya, dende as charradas que he puesto fer…me siento empliu d’agradeiximiento por haber puesto fer más d’o que me premitiba fer o triballo que m’ha feito posible minchar y bosar o loguero cada mes.

Pero agora siento, y digo siento, que bella cosa s’ha trancau. Siento que de bella traza una etapa se remata. Que agora, que encara guardo l’esprito de conoixer y creixer, os trangos mios han de prencipiar a sentir-se mientras s’aluenyan. Encara quiero fer cosas nuevas, encara quiero vivir atras vidas, encara quiero estudear, y mira, ixo lo tiengo claro, me feria goi fer una filolochía, ta conoixer a composición y historia d’as luengas que me redolan…

Pero encara quiero continar fendo periodismo, porque ye lo que he quiesto fer dende que yera chicorrón, porque me fan goi a-saber-las cosas d’ista profesión, a la que completo con a mia formación d’historiador, os mios sabers tecnolochicos, a mia labor profesional d’istos anyos y con a formación que encara quiero recibir ta explicar millor as cosas, ta comunicar-me millor con a chent, ta creixer, como digo, agora que encara quiero creixer.

Agora si que m’he vuedau, porque en o puesto an que i soi siento que no puedo creixer más. Ni as posibilidatz ni as intincions (no pas as mias) creigo que me premitan creixer más. Y bell camín habré de prencipiar, pero encara no se ni quan ni como, ni, sobre tot, a endrecera que levará. Pero mira, me quedo tranquilo de dicir isto, de mirar as montanyas d’o fundo d’a foto y saber que ta plegar enta ellas nomás que cal saltar a cleta y prencipiar a caminar.

Posts relacionados:

L’absurda guerra (en presonal) entre o libro electronico y o libro de paper

Chorche — Sat, 21 Jan 2012 17:00:57 +0000

Os libros no duermen, nomás que descansan

Puestar que isto que digo siga una perogrullada, pero de vegadas, siento bells comentarios diciria que “mitomanos” sobre as lecturas en e-book u en paper, y mira, como que siento la obligación presonal de fer a mia opinión sobre o tema. Pueden acusar-me de muitas cosas, pero no de no estar un mitomano d’os libros. A mia biblioteca ye plena de libros que m’he mercau nomás ta tener-los, edicions esferents, traduccions de libros ya leyius, versions orichinals…

Tener un libro, ta yo, ye bella cosa d’especial. Tan especial, que os que me conoixen saben que no goso deixar libros. M’aimo más de regalar-los, pero no me fa goi deixar-los salir d’as quatre paretz de casa mia si no van con yo. Pero por qué ixo ha d’estar incompatible con leyer en un e-book? Como que tamién me fa goi viachar, y como quan que viacho goso mercar libros en o puesto en que i voi, l’e-book ha esdeveniu un gran companyer en a maleta u la mochileta. Asinas en o viache puedo levar-me totz os libros que quiera, y si dimpués en merco más, no tiengo que fer espacio entre os viellos, que ya lo levo parau de casa.

Si que m’aimo la ulor d’os libros, viellos y nuevos. Si que m’aimo pasar as fuellas imprentadas y deixar que o peso d’o libro me faiga ficar-me dentro d’as suyas historias. Pero ixo no deixa que faiga servir l’e-book como una ferramienta esencial. Ta leyer más, ta conoixer más, ta viachar más.

Y tamién, y no ye que no siga important, como saben a chent d’Ara Cultural, porque en ista chicota luenga en a que escribo, a publicación dichital ye o futuro. No l’unico futuro, que tamién cal espardir a publicación en paper, pero en una luenga de no guaires fablants, u publicamos en dichital u no publicamos cosa. Por l’inte, os dos sistemas son compatibles, puestar que en un futuro no lo sigan, pero agora, huei, no cal trigar entre un y unatro. Desfrutar a lectura ye o feito concreto, sin importar en que formato. Leyer viachando y viachar leyendo ye l’horizonte deseyable, y ta ixo no cal estar, como en atras tantas cosas, maximalista.

Posts relacionados:

Fringe, Nissan, l’autonomia y Biel

Chorche — Mon, 16 Jan 2012 13:10:22 +0000

L’atro diya, veyendo o zaguer episodio de Fringe, me trucó o ficacio ixo que dicen un “product placement” d’a marca d’autos Nissan. Ye ixo que veyetz alto d’a pachina. Asinas, sin venir guaire a cuentas, mos amuestran o panel de control de l’auto, y en o dialogo Olivia diz que encara lis queda autonomía ta plegar t’o puesto an que quieren ir.

A yo ixo estió o que me fació más gracia, y asinas o dicié en una conversa en twitter con Chaco Morais y atra chent. En Fringe charran d’autonomía…Bien, ells dicen “range”, pero en a traducción deciban autonomía. Y claro, estió nombrar ista parola lo que fació que fese as rilacions pertinents. No se si hetz siguiu ista serie, pero en as zagueras temporadas somos feitos a ixo d’os multiples universos u a que una presona puede estar esferent presona cada vegada que amaneixe en a serie. As rilacions con Aragón son plateras.

Por un costau, o feito que Aragón Tv emita Fringe. Qué Aragón Tv emite Fringe? Sí, en una hora ta totz os publicos…a partir d’a 1 d’a maitinada. A yo ixo ya me fa sospeitar. Puestar que en Aragón Tv emitan a serie (mercada con a resta de televisions Forta) ta cubrir l’expediente, pero no dar pistas d’a relación d’os universos paralelos con iste país nuestro.

Porque si charran d’autonomía, cal charrar de José Ángel Biel, agora president d’as Cortes d’Aragón y antis vicepresident, y antis atras cosas, y mientres más de 20 anyos, rector d’os destins d’o país agora en alianza con o PP, agora en alianza con o PSOE y, sobre tot, redactor y impulsor d’os esferents estatutos que ha teniu Aragón. Y pro que sí, agora ye más claro fer rilacións. Por qué puede Biel pactar con cuchas y dreitas y manullar o cotarro? Pues porque no bi’n ha un Biel. Bi’n ha, a lo menos, dos. Biel y Bielternative. Asinas un d’ells estableixe as rilacions con o PSOE y atro con o PP. Y asinas o PAR puede dentrar en os gubiernos de cuchas o dreitas sin dandalos y sobre tot, sin garra problema.

Y quien dentra en os gubiernos? (PARATZ CUENTA: SPOILER) Pues as armas que Bielternative creya, ixo que en Fringe dicen shapeshifters u cambiaformas en a versión en espanyol. Ye Arturo Aliaga un cambiaformas? Puestar que sí, ya que como Biel y Bielternative puede estar en un gobierno de cuchas y atro de dreitas (por simplificar ixo de cuchas y dreitas, prou que sí), pero no tien o poder ta fer-lo por ell mismo, como ell, asinas que ha de ser por orden d’a superioridat, que deciban en os tiempos d’antis más.

Lo que no ye tan platero ye por que puesto dentran os alternativos de l’atro universo en iste universo de nusatros. U mesmo si nusatros somos l’atro universo, u varios d’ells. Puestar o forau siga en o Coso, en a seo d’o PAR, amagau a o costau d’a botiga de chinos que diz “Chollos” y que como amuestra o blog “Lo que veo en Zaragoza” ye, más que más, un lema publicitario. Como la Nissan y Fringe. Si o product placement plega a estar d’a OPEL en cuenta de ser de Nissan a teoría no tendria refutación. De seguras.

Posts relacionados:

Eleccions 2011: José Ángel Biel (PAR)

D’os libros como calaixo an que poder alzar l’alma

Chorche — Thu, 12 Jan 2012 13:26:25 +0000

No fa guaire endrezaba os libros d’a mia biblioteca presonal, d’a mia vida. Menos d’un anyo dimpués y por socherencia visual d’atra biblioteca que vesité decidié de tornar a cambear. Mover libros ye mover vida, sin dandalo. M’han alcompanyau dende Barcelona ta Zaragoza, pero no m’alcompanyoron enta Cartachena, por eixemplo. Agora riflexionaba una mica sobre ixo. Quan marché ta Cartachena, fa ya 11 anyos, me pensé que aquello yera temporal. Teneba platera a temporalidat d’ixe viache que a la fin, duró más d’o que teneba previsto por atras circunstancias y que me tornó a fer cambear o periodismo por a hosteleria, por eixemplo.

Os libros me veilan a espalda

Manimenos, quan marché ta Barcelona, una ciudat que siempre m’heba aimau como turista, as impresions yeran esferents, y por ixo movié tamién parti d’os mios libros, que, china chana, quasi estioron totz os que encara guardaba en casa d’a mai. En ixe espacio de vida barcelonesa a biblioteca creixió por as facilidatz que me feba triballar en una librería, y quan me’n torné ta Zaragoza atra vegada o que más costó de mover estioron os libros. Pesan y ocupan espacio fesico pero tamién mental. En as viellas historias de magos y fantasía muitas vegadas alzan, baixo 7 claus, parti d’os suyos poders en bells obchectos…y parti d’a mia alma remane guardada en os libros. Por ixo, mover-los ye mover-me de raso. Y por ixo me costó tiempo rematar aquella mudanza d’a que agora se cumplen 6 anyos.

Y sin dembargo, agora en menos d’un anyo he feito mudanza interior en casa mía. M’he feito atro espacio, esferent, de creyación, de creyeción, en mover a parti de l’alma que ye en os libros, que agora, como guardaespaldas, me veilan dende dezaga mientres que escribo isto. Puestar que me cuesta menos mudar l’alma agora. Puestar que as mudanzas interiors no son as mesmas que as exterior. Puestar que os mesmos libros conoixen bella cosa que yo encara no adubo a replecar, porque a la fin, a vida ye mover-se, creixer, aprender y continar entabant y de vegadas tornar ta zaga.

Y en bell inte, como he visto en o blog de Rincewind, mover libros ye tant facil como fer isto…U no?

Posts relacionados:

O trango entabant que amenista Aragón

Chorche — Sun, 08 Jan 2012 11:38:00 +0000

Istos diyas a presidenta d’Aragón ye fendo una entrevista a trozetz con EFE. Millor dito, n’ha feito una y agora la distribuyen de mica en mica. Entre as suyas parolas s’ha destacau a suya declaración sobre l’augua, porque seguntes Rudi, en o “Levante (sic) no demandan o trescole, que demandan augua“. Suposo que con unas danzas d’a plevia tendrán prou, porque no se como ferán ta levar augua si no ye con un trescole, u mesmo un canal como lo que ya funciona entre La Mancha y Valencia u entre Tarragona y Castellón. Pero rai, lo que ye platero ye que votar a o PP en o país y l’estau tien istas cosas.

D’istos diyas tamién se fa noticia l’Heraldo (nomás que en a versión de papel) que a puyada d’impuestos y as retalladas d’o gubierno espanyol se ceban con os territorios como Aragón, enviellius y espoblaus, a tamás que Aragón ha feito os debers presupuestarios y atras comunidatz como, casualidatz, Valencia, Murcia u Madrit, no. Retalladas en infrastructuras, servicios, pagos a cuenta, etc.

Ye a metafora perfecta d’o que pasa en iste país dende fa a saber lo tiempo. O seguidismo espanyolista d’os gubernants d’Aragón no tien os risultaus que asperan, ye dicir, que mos donen as gracias por os servicios prestaus. Ye tot o contrario. A chusmisión mos leva enta o disprecio. Pocos y conformaus somos os aragoneses. Somos tan conformaus, que mesmo partius nacionalistas como CHA, demandan aduya ta cilebrar a derrota diplomatica que suposó o Compromiso de Caspe ta os intreses d’Aragón, pero ixa ye atra historia.

Aragón amenista un trango entabant. Pareixe claro que a solución d’os problemas d’o país cada vegada ye más luen d’Espanya, pero, a lo contrario, os aragoneses cada vegada s’amanan más a la metropoli. Mos vuedan de recursos humans y economicos ells, pero tamién nusatros, que mos deixamos fer. Triunfar en Madrit contina estando, a ran presonal y nacional, l’unico obchectivo aragonés, como contrimuestra o paso curtet de Mario Garcés por a Consellería de Ficienda. Vinié, veyié y retallé…y marché ta Madrit ta un puesto de mierda, pero en Madrit.

Aragón, digo, amenista un trango entabant. Mirar-se más o melico. Mirar-se más que o que podemos fer ha de salir d’aquí y no asperar, chusmesos, os repuis que mos lancen dende a metropoli d’ista colonia an que vivimos. Ye o primer trango. Pensar, sentir y fer de país, d’o país que somos dende fa milenta d’anyos. Y dimpués d’ixe primer trango, con a uellada posada en os nuestros afers y posibilidatz, feremos o segundo, que ye soniar, pensar y creyer que no amenistamos depender d’a metropoli.

Pero ta ixe primer trango mancan ferramientas. Manca o calcero, as ganas y os liders. Manca vuedar de servilismo os gubiernos d’o país. Manca que bell un lidere o cambeo mental. Mancan as ganas de creyer-nos, en primeras, de saber-nos en segundas, de fer-nos, a la fin. Si encara somos o que somos ye porque a purna d’a historia encara en remane en iste chicot país, pero cada vegada ye más amortada. Encara que mos maltracten d’a metropoli os aragoneses encara continamos con os uellos y o boforón posaus enta allá. Igual ye hora de devantar a capeza, chitar os uellos entabant y dicir “Prou”. Allora, en ixe inte, podremos fer o primer trango enta o futuro.

Posts relacionados:

Región, qué hermosa eres

Chorche — Tue, 03 Jan 2012 16:49:34 +0000

Si bella cosa ye platera en os zaguers tiempos en Aragón ye a reversión d’un cierto sentimiento aragonesista, en electors, pero tamién en a carrera. As tres u quatre zagueras eleccions han contrimostrau que o voto “aragonesista” en o sentiu amplo d’o termino, ye de baixada. De traza mayoritaria, os aragoneses y aragonesas votan a partius d’obediencia espanyola. Por ixo no ye d’estraniar que a presidenta d’Aragón, Luisa Fernanda Rudi, que nunca no ha estau “aragonesista”, gose emplegar a ormino y sin garra prechudicio una terminolochia que ya pariexeba desterrada d’iste país nuestro.

Deciba huei Rudi:

Mi objetivo es convertir a Aragón en una región líder entre las comunidades españolas, y para conseguirlo es imprescindible que Aragón sea una comunidad creíble en los entornos económicos y financieros españoles y de fuera de nuestras fronteras. No podríamos haber trasmitido credibilidad si no hubiésemos sido capaces de ordenar la administración aragonesa. Ese ha sido nuestro esfuerzo y en él seguiremos trabajando.

Rudi define a Aragón como “región” y tamién con ixe “comunidad española” que remarca o caracter espanyol d’o suyo gubierno y d’os suyos votants. Ye grau que os aragoneses sigan tresbatindo bell tipo de conciencia “aragonesa” que se vaiga esleindo en ixe espanyolismo uniformizador. Ye grau, y ye historico, porque ye un proceso tan luengo como o tiempo que ha pasau dende que os reis d’a Corona espanyola en 1591, en 1707 y china chana, retalloron, han retallau y retallan no nomás que a legalidat, que tamién a identidat aragonesa con poca oposición d’os propios afectaus. Pero más grau ye que o cargo institucional más important d’o país, a presidencia, no nomás no tienga garra conciencia aragonesa, que tamién con as suyas parolas pase por dencima d’a legalidat vichent. Ye dicir, no ye un problema politico nomás, que tamién en ye de legal.

Cal remerar o que diz l’Estatuto d’Autonomía d’Aragón, refirmau por o PP en as Cortes d’Aragón y tamién en o Congreso espanyol.

1. Aragón, nacionalidad histórica, ejerce su autogobierno de acuerdo con el presente Estatuto, en el ejercicio del derecho a la autonomía que la Constitución reconoce y garantiza a toda nacionalidad.
2. Los poderes de la Comunidad Autónoma de Aragón emanan del pueblo aragonés y de la Constitución.
3. La Comunidad Autónoma de Aragón, dentro del sistema constitucional español, ostenta por su historia una identidad propia en virtud de sus instituciones tradicionales, el Derecho foral y su cultura.

Asinas que Aragón en l’ambito legal ye una nacionalidat historica que ha esdeveniu Comunidat Autonoma. En garra puesto mete “rechión” (y tampoco no país u nación). En l’ambito nomás que legal, Aragón ye, repito, una nacionalidat historica que s’ha feito d’ella mesma Comunidat Autonoma. Ixa ye a denominación que fueras d’atras custións politicas habria de rispetar a presidenta d’Aragón quan charra como presidenta d’Aragón.

Puestar que Rudi piense que Aragón nomás que ye una rechión espanyola, igual que yo pienso que ye una nación que habría d’esfer-se y marchar d’Espanya. Pero encara que Rudi piense ixo, como bells atros aragoneses, como que charra como presidenta d’a Comunidat Autonoma d’Aragón, que en ye, porque ye una nacionalidat historica que ha decidiu fer-se Comunidat Autonoma, habría de rispetar ixa, y nomás que ixa denominación. L’atra, la que li fa goyo, ta las tertulias de casa suya.

Posts relacionados:

Suenios entre boiras

Chorche — Mon, 02 Jan 2012 11:11:52 +0000

O venient diya 6 de chinero se presenta en A Flama a exposición “Somnis entre boires” de Marc Martí, en colaboración con MagoFermin. En l’acto, a las 20.30, leyeré poesías de Marc en catalán y castellan, alcompanyau d’a suya guitarra.

“Somnis entre boires” ye una muestra de 21 fotografias de collas mosicals aragonesas en directo, que suposa una chicota anviesta d’a colección de l’autor. As imachens, feitas en conciertos de collas como Mallacán, Gen, Prau, Visión Túnel u Temps al Temps, quieren trasmitir a ideya de que bi’n ha un movimiento mosical dillá d’os espacios granizos y as grans ciudatz.

Marc Martí, naixiú de Massalió, ye licenciau en politicas y triballa en Ràdio Matarranya i Noticies del Matarranya. Como fotografo, ha publicau o suyo triballo en Heraldo d’Aragón, La Comarca, Diari de Tarragona u Temps de Franja y colabora con atros meyos dichitals. Amás, Marc Martí ye poeta y letrista de collas como Los Draps u Txirigol.

Posts relacionados:

Resumen d’o 2011 en purnas.com

Chorche — Thu, 29 Dec 2011 10:36:59 +0000

Iste anyo 2011 que ya remata ha estau important por muitas cosas, a ran presonal y colectivo. Cambeos de gubiernos, d’interpresa, naiximiento de meyos nuevos como Arredol, muerte d’atros como Aragoneame, lecturas y sobre tot relecturas… Un anyo intresant, estresant de vegadas, y ilusionant a mayor parti d’as veces y no guaire en atras quantas. Como cada anyo dende fa tres, meto bells articlos que creigo que han marcau iste anyo en iste blog que cumple ya 8, y que por una u atra razón, cada vegada leye menos chent. A ideya de fer istos resumens ye de Torres Burriel, amigo y companyero d’aventuras y cada anyo en fa. Si queretz veyer os resumens d’atros anyos tenetz os d’o 2010, 2009 y 2008

chinero 2011

06: A mesa d’o salon
26: Estar pai
27: Falsa democracia; falsas ainas de control

febrero 2011

15: Polvo, niebla? Entibos y aeropuertos
20: Sin perder lo que era…
23: Josep Pla y Marcos Zapata

marzo 2011

08: Una muller
09: Insumision
25: Zaragoza en pleno (cap. 4) Dende a dictadura enta la democracia
28: A luenga que no esiste: o “romance”
30: Endrezando vida

abril 2011

06: Desaragonesizar Aragon
07: A politica, Aragon, Zaragoza y Dios
23: Aragón
11: Manipular amagando
16: Gaddafi bombardeya con armas zaragozanas (A historia d’Instalaza)

mayo 2011

18: Spanish revolution
21: Una atra anviesta sobre as acampadas
23: Aragón vota Espanya
25: A sociedat civil tien a parola
29: Tradicions familiars

chunio 2011

chulio 2011

agosto 2011

setiembre 2011

otubre 2011

07: Buen viache, Félix
21: Lo que me fa goi d’ista profesión

noviembre 2011

aviento 2011

Posts relacionados:

Cajal, l’autoodio y o desconoiximiento

Chorche — Mon, 26 Dec 2011 10:29:30 +0000

Un premio Nobel de medicina, naixiu de Petilla d’Aragón (Navarra), pero aragonés por vocación y familia, mos deciba como charraban en Ayerbe quan que estió vivindo astí. Y asinas encara continan pensando a-saber-los aragoneses. Y asinas ye a situgación en que l’autoodio y o desconoiximiento han deixau a ista antiga y chicota luenga.

Por entonces se hablaba en Ayerbe un dialecto extraño, desconcertante revoltijo de palabras y giros franceses, castellanos, catalanes y aragoneses antiguos. Allí se decía: forato por agujero, no pas por no, tiengo y en tiengo por tengo o tengo de eso, aivan por adelante, muller por mujer, fierro y ferrero por hierro y herrero, chiqué y mocét por chico y mocito, abríos por caballerías,dámene por dame de eso, en ta allá por hacia allá, m’en voy por me voy de aquí, y otras muchas voces y locuciones de este jaez, borradas de mi memoria.”En boca de los ayerbenses hasta los artículos habían sufrido inverosímiles elipsis, toda vez que el,la, lo se habían convertido en o, a y o, respectivamente. Diríase que estábamos en Portugal. A los rapaces de Ayerbe parecióles, en cambio, el castellano relativamente castizo que yo usaba, es decir, el hablado en Valpalmas y Cinco Villas , insufrible algarabía, y hacían burla de mí llamándome el forano (forastero).

Citado por Fernando González Ollé en “El habla de Ayerbe y otros aragonesismos en la autobiografía de Santiago Ramón y Cajal”, y ye de l’autobiografía de Santiago Ramón y Cajal ”Mi infancia y juventud”.

A replega de parolas no ye una replega antropolochica u filolochica, motivada por o saber scientifico, que ye una replega d’odio como amuestran os adchetivos que l’adedica: “desconcertante, revoltijo, inverosímiles” y que amás amuestra un fundo desconoiximiento que han heredau muitos aragoneses de huei, porque a luenga d’Ayerbe no yera una luenga sino “desconcertante revoltijo” que “diríase que estábamos en Portugal”.

País.

Posts relacionados: