Purnas en o zierzo » purnas

Fer pais

Chorche — Thu, 02 Sep 2010 15:29:00 +0000

Heraldo ubre con a manifestacion por os “Biens d’a Franja” convocada por a chent de Peralta y Berbegal. O president aragones refirma a manifestacion
Puya l’ature en Aragón
Os miners de Teruel se trancan en o concello d’Arinyo ta demanar que no s’amorte o suyo triballo
O vicepresident d’Aragon va a Motorland dos vegadas en una semana (y aspera-te)
O president espanyol va ta Chapon y aconsigue un compromis ta fer baterias t’autos electricos en Vigo (Galiza)
O president catalan Montilla va ta China y aconsigue un compromis ta fer una fabrica d’autos en Catalunya

Fendo pais.

Posts relacionados:

A mia lista de blogs

Chorche — Tue, 31 Aug 2010 15:50:05 +0000

O 31 d’agosto se cilebra o Blogday, o diya d’os blogs. Deciban de recomendar cinco blogs, pero como ha feito Fernand0, yo fera atra cosa esferent. Fernando Tricas ha recomendau cinco concursos de blogs y yo quiero fer present a lista de blogs que leigo de manera cutiana. Estaran una mica desorganizatos, pero asti van as mias lecturas y no nomas lecturas, que tamien bi ha de fotos, cutianas.

Posts relacionados:

¿Informando?

Chorche — Mon, 30 Aug 2010 16:19:14 +0000

Si bi ha una lei a la que siempre se mete un adchectivo ixa ye a lei de luengas. Por definicion siempre que s’en charra en os meyos de comunicacion se mete “polémica ley de lenguas”. Bi’n ha habiu atras leis aprebatas con menos refirme, y mesmo atras que nunca no s’han aprebato, y sin dembargo ista ye polemica. No ye una adchectivacion casual, ye esclatero. Asinas que siempre que charran d’a lei de luengas, no mos informan, sino que opinan. O zaguer caso huei, en l’Heraldo d’Aragon, charrando d’os zaguers meses d’a lechislatura.

Mas casos de desinformacion. A informacion d’os meyos espanyols sobre esportes, atamas de que chugan prou equipes as ligas espanyolas nunca no ye guaire completa. Nomas mos dicen os resultatos d’os espanyols que i partecipan en as competicions, de vegadas no dicen ni qui gana, sino ye espanyol. O futbol se retalla ta lo Real Madrid y o Barcelona y poca cosa mas. Iste maitin a informacion esportiva de RNE yera en totz os boletins asinas, primer motos, an eban ganau espanyols, sisquia han dito o resultato d’os suyos competidors. Dimpues, atamas que prencipiaba a Liga de Futbol (se chugoron 8 partius) nomas han charrau y han dito o resultato de Barça y Madrid. Formula 1 dicindo lo mal que l’eba iu a Alonso y dicindo de pasata que eba ganau Hamilton y Vuelta a Espanya de ciclismo, an han dito qui ha ganau la etapa, no han dito cosa d’a Clasificacion pero hemos sabiu que o primer espanyol estio un vasco.

Atro caso. O diario El Pais ha decidiu huei charrar-nos d’a corrupcion en os concellos de l’Estato. Totz? no, no totz. Dentre os casos importants de l’anyo pasau l’unico que no surte en l’articlo ye l’unico aragones, La Muela. U la Muela no ye Espanya u ye que bi ha casos y casos.

No bi ha parolas casuals en os meyos de comunicacion. En garra d’ells. Amagar informacion u meter parolas concretas no ye informar, ye opinar. Ye endrezar a opinion d’o publico, ye creyar un imachinario concreto, como por exemplo l’emplego de “rechional” ta charrar d’Aragon, unatra vegada estendillato en os meyos aragoneses.

En atra escala Pascual Serrano en sape d’isto asabelo, asinas que tos recomiendo pasar-tos por o suyo blog y leyer o suyo libro que se diz, precisament, “Desinformación“

Posts relacionados:

Os pensionistas

Chorche — Fri, 27 Aug 2010 17:35:59 +0000

Ayer en A Flama charraban d’os lolos (u no tan lolos, que agora tot ye prou relatiu). Un carranyaba a l’atro, fendo mofla, porque no li convidaba a lo vin que yeran zorrupiando. L’atro, fendo-se l’ofendiu, deciba que no podeba convida porque yera pensionista.

-Rai, si seguro que tu ya has cobrau. Ye diya 26 o siga que ya t’han ficau os diners en a caxa y seguro que en levas en a pocha.

-No he cobrau, no. Antis si que bosaban una mica antis, pero agora…

-No digas que no, que iste maitin ya bi’n eba chubilaus como tu, en o banco, quitando os diners ta comprebar que lis n’eban bosau!

-Que no, te digo. Que no he cobrau.

-Si os pensionistas son os que millor viviz de tot o pais. No triballatz, cobratz a lo cabo’l mes y tos levan a fer gambadetas ta Benidorm.

-Cata, si podese, te pagaba lo vin, pero ye que con a pension no adubo, no, no pas.

Istos diyas o ministro de Triballo espanyol ye charrando asabelo d’as pensions, ixos diners que cobra a chent que ya ha triballau prou, u ha quedau viudo/a, u as dos cosas, y que bosamos con os diners que estalviamos dentre totz mientres a nuestra vida laboral.

No son pocos os pensionistas que atamas d’aber triballau de firme buena parti d’a vida, cobran una miseria de pension, y con ixo han de bosar casa, minchar, una mica d’ocio y continar esfrutando d’a vida, agora que no tienen d’obligacions.

Ye vital l’equilibrio dentre o que bosamos totz d’o nuestro triballo con o que cobran ells por o que han triballato y agora que ya no triballan. Y no ye una cuenta facil, sobre tot, porque cada diya lo pais ye mas envelliu. Fa 20 anyos que dicen que en 20 anyos se rematara o sistema de pensions. L’amenaza pende sobre as nuestras capezas y la solucion no ye privatizar as pensions sino achustar o sistema y limitar as prechubilacions y, sobre tot, no beneficiar bells colectivos que dentran en sistema pasivo dende os 45-50 anyos.

En tot caso, veilar por as cosas que amenistan os nuestros mayors ye parti d’a sociedat dicen que democratica que tenemos. Porque tamien en plegaremos.

Posts relacionados:

A calor t’amaga

Chorche — Thu, 26 Aug 2010 20:51:45 +0000

Amagando-mos

A ciudat ye cremada de sol y aire d’Africa. O sol ye cruel huei y no dixa dondiar por o bico, por a carrera. As morisquetas son, como diz a canta, acetas de sudor y sal. Tot se complega, por o destin, por a calor, por o mundo, por o buedo, por a chent que no y a chent que si. Imos ta la espelunga d’os deseyos. Baxamos enta lo fundo d’un mundo nuevo que ye viello. Mos amaga-mos d’a calor, de l’aire, la chent y o nuestro propio sudor pleno deseyo.

No bi ha puesto an siga millor que en as espelungas d’o tuyo cuerpo, sinyado, como amuestra a fotografia con un B27. Ye a calor d’a luna plena la que no dixa espleitar-se con a fredor d’o sol. U a lo contrario. A lo cabo, a verdat ye que no i yes, ni en o forau mas fundo d’a tierra.

Posts relacionados:

Luna de suenios

Meyos d’Aragon online – Medios de Aragón online

Chorche — Wed, 25 Aug 2010 16:43:29 +0000

Dende fa un tiempo tiengo una lista en o Google Reader con meyos de comunicacion aragoneses que tienen Feed Rss. Son meyos nacionals, comarcals y locals y mesmo bells trestallos de noticias de concellos, como L’Almunia u Alcanyiz. He preguntato istos diyas por mas meyos y he conoxito bellas desperiencias d’internet mas que he adibiu.

Encara que a pestanya de Google Reader ye ubierta a o publico, m’ha parixiu intresant compartir as webs y enrastres que sigo de manera cutiana ta conoxer a reyalidat aragonesa y dimpues compartir-la. Istos son os enrastres que tiengo de meyos de comunicacion aragoneses online (y con feed RSS), y profes, que si trobatz a faltar bell enrastre, bell meyo de comunicacion, tos agradexeria que lo me fesez plegar.

Nacionals

Provincials

Por redoladas

Zaragoza

Plana de Uesca

Baix Cinca

Cinca meyo

La clamor

La llitera

Sobrarbe

Matarranya

Bajo Aragón

Posts relacionados:

El PP, l’Aneto y a identidat aragonesa

Chorche — Tue, 24 Aug 2010 17:51:36 +0000

Una vegada que TV3 ya ha atrapaziato a suya “error” (por dicir o que diz a television publica catalana) de clamar a l’Aneto montanya catalana, o PP ha quiesto dixar la suya goteta de “indignacion” ta que no digan que ells dixan pasar “ni una” a os catalans. A polemica se feba agora porque TV3 meteba l’Aneto en una lista de montanyas catalanas y dimpues d’a presion d’os retes socials y de CHA, Gobierno d’Aragon y Corporacion Aragonesa de Radio y Television, TV3 modificaba o texto. Ya quisieran atros feitos muito mas graus como a retallada de Fomento tener a rispuesta que ha teniu isto, pero bueno, bien se vale.

Prencipiaba charrando d’o PP, porque ye lo zaguer actor que ha saliu a esfender l’aragonesidat de l’Aneto, y lo deciba por o que ha dito Miguel Navarro, vocero alchunto d’o PP en as Cortes d’Aragon. Isto deciba Navarro:

Instamos al Gobierno de Aragón a exigir a la Generalitat de Cataluña que desde todas las instituciones, organismos o entes públicos de esta comunidad autónoma se respete la integridad territorial y la identidad histórica, cultural y patrimonial de Aragón.

Isto lo diz o siñor Navarro que estio qui esfendio a negativa d’o PP a aprebar una lei de luengas t’Aragon, que be de estar que ixo no ye identidat storica, ni cultural ni patrimonial d’Aragon. Asinas deciba Navarro fa uns meses:

Es falso que esta ley no haga mal a nadie. Afecta negativamente a todos los aragoneses. Les perjudica porque consagra como propias una lengua ajena y otra que es mera creación científica, porque atenta contra su auténtico acervo cultural, porque tendrá un elevado coste para fines innecesarios, porque será útil a quienes cuestionan la integridad territorial de Aragón y codician su patrimonio. Esta ley es una gran irresponsabilidad política del Gobierno porque solo creará problemas donde hoy no existen.

Que tos parixe? Puede o PP clamar a cualsiquier presona, colla o institucion a rispetar a identidat, cultura y integridat aragonesa si ells mismos son qui atacan cada diya, cada ora ixa identidat, cultura y integridat? No ye cosa nomas de Navarro. Amas de no refirmar, por exemplo, a lei de luengas, querendo dixar morir por inaicion as luengas d’Aragon, rechirando por Aragon Colonial n’he trobato asabelos d’exemplos.

Gustavo Alcalde pregunta que si l’aragones ye propio d’a Val de Tena dimpues d’un discurso en ista luenga.
Luisa Fernanda Rudi emplega sistematicament “región” ta charrar d’Aragon.
O PP cambea en nota de prensa o nombre d’o Debate cheneral d’Aragon por “Debate del estado de la región”.
O logo d’o PP d’Aragon ye una bandera aragonesa que esdeviene bandera d’Espanya.
O PP s’oposa a la denominacion de Chiflo ta una ludoteca en Zaragoza.

Podebamos siguir con milenta exemplos, pero ya ye prou. Profes que pueden dicir o que quieran, profes que pueden esfender o que creigan, pero que no digan que esfienden a identidat d’Aragon porque ye una vulgar mentira.

No related posts.

Queremos vivir aqui! no a lo recreximient de Yesa!

Chorche — Mon, 23 Aug 2010 16:19:39 +0000

Iste ye o futuro

De conchunta con a chent d’Artieda tallemos a carretera no rematada dende Pamplona enta Lleida ta dicir bien altero que os lugars d’o costau de l’entibo quieren continar vivindo. A chent, mas chobena y mas viella tamien, baxo dende Artieda, Sigues, venio dende Uesca u Zaragoza, ta contrimostrar o refus social d’una obra que no s’amenista, que condena de muerte a la chent d’os lugars, que ye cara y que amas tien periglos prou importantz como ta dixar-los de banda.

Fendo mofla un d’os crios d’o lugar li deciba a atra nina: “Yesa, si! Yesa, si!”. A nina, tan seriosa como una nina de 8 anyos cuan se mete seriosa li dicio: “Yesa no, porque sino se te van a inundar todos tus juguetes“. Ixe ye o futuro que aspera a os ninos y viellos y chovens d’Artieda u Sigües si contina a sinrazon d’o recreximient de Yesa. S’inundaran totz os chuguetz, s’afogaran totz os suenios, se tresbatiran totas as remeranzas.

Ista chent que veyez en as fotos, istos ninos que encara chuegan y s’encorren por as carreras d’Artieda, istos viellos que filosofan en os bancos a la huembra d’o lugar, os chovens que treballan de sol a sol en os campos u que tornan t’o lugar dimpues de triballar en atros puestos…tota ista chent disparixera d’os suyos montz, d’as casas suyas, d’os bancals suyos. Por ixo chilan que no. Dicen que no. Suenian que no. Por ixo se comprometen con o patrimonio vital y cultural d’as suyas radices, d’o suyo pasau, d’o suyo mundo. Con ellos muitos atros continamos dicindo que si ellos quieren vivir asti, qui somos os demas ta fer-los marchar d’as suyas radices? Yesa no pas. Que no repitamos as errors de Chanobas u tiengamos que veyer atros lugars pantasmas baxo las auguas d’os entibos. O sieglo XXI planteya nuevas solucions.

Aqui tenetz, amas o manifiesto que se leyo en rematar a concentracion.

Posts relacionados:

Fer una entrevista u colaborar con a policia

Chorche — Fri, 20 Aug 2010 18:11:14 +0000

Por un caso d’ista semana en Aragon, an dimpues de ser entrevistada por os meyos de comunicacion a policia ha deteniu a una muller que eba furtau os diners d’un torneo guinyote, he preguntato en twitter a siguient custion.

Duda deontolochica. Fas una entrevista a un delincuent a qui son escando. A policia lo sape y te gritan ta preguntar-te an has quedato con el. Lis ne dices?

Muita chent, periodistas y no, han contestato a la pregunta. Buena parti d’as rispuestas deciban que no, atros, menos, deciban que si, que profes, y mesmo s’apuntaba a posibilidat de estar fendo un delito de no colaborar con a policia. Tos copio bellas d’as rispuestas.

ma_martin: No. Es como el código hipocrático de los médicos. No tienes por qué revelar tus fuentes, aunque sea el mismo Bin Laden.

jfmallen: si el delito es grave, creo que prima decirlo. y si fuera un empresario estafador? y si fuera un violador de menores? y si fuera un asesino? y si fuera un corrupto?

lasay_: NO. Aunque tendría que verme en la situación y saber detalles… de primeras veo un no bastante claro y rotundo.

oscarsenar: Se supone que no deberías… Pero no sé lo que haría yo.

elbetoco: Al igual que en trabajo social, la respuesta es NO. La poli lo sabe, tiene mucha jeta al llamarte…

serbarmir: eso entraría dentro del secreto profesional, vamos, digo yo ¿no?

dvdzgz ero la prensa no debe proteger a sus fuentes? Como esperas entrevistar a otro delincuente si lo denuncias?

falvarezcano: indudablemente, no. Violaría el secreto profesional y a veces el off-the-record.

manumarlasca: Se lo dices o estás cometiendo un delito… Pueden acusarte de obstrucción a la justicia. El juez decidirá si te puedes acoger al secreto profesional. Prima el sentido común.

mcshuibne: Eso es secreto (profesional y personal) y, además, yo no soy un chivato de la poli

moltbonanit: I tan que no! No es faena teua!

He sacato as rispuestas de broma (que n’ha abiu ) y tos he copiato istas atras en o mesmo orden que s’han feito. Mayoria de “no”, un “si” pendiendo d’o tipo de delincuent, y o feito real de que puetz ficar-te en un conflicto de dreitos dentre o secreto profesional y a labor d’a policia.

Os periodistas, asinas como colectivo en cheneral, que casos particulars bi’n ha asabelos y variatos, mos movemos por o mundo con o que clamamos “codigos deontolochicos” que regulan a etica que emos de manullar en una profesion que tien prou influyencia en a sociedat como ta parar cuenta de como femos as cosas. En Aragon no tenemos un codigo deontolochico propio, porque, dentre atras cosas, no tenemos un Colechio de Periodistas. Tenemos, ixo si, una Asociacion de Periodistas que s’aculle a lo Codigo Deontolochico d’a Federacion d’Asociacions de prensa d’Espanya. Asinas que, de mayor ran a menor, funcionamos, tamien en cheneral, baxo lo batiaguas d’o Codigo Entrenacional d’Etica Periodistica d’a Unesco, lo Codigo deontolochico europeo d’a profesion periodistica y o Codigo Deontolochico d’a FAPE.

Sobre o particular caso que en charro, tendrianos de partir d’a presuncion d’inocencia (encara que tot o lugar de Pedrola sape a qui han dau os diners, no sape qui los ha furtato) y tamien sobre a confidencialidat d’as fuentz. Sobre istas dos cosas, os tres organismos supraditos dicen o siguient.

O Codigo d’a Unesco:

Derecho del periodista a abstenerse de trabajar en contra de sus convicciones o de revelar sus fuentes de información, y también el derecho de participar en la toma de decisiones en los medios de comunicación en que esté empleado.

O Codigo Europeo:

En este sentido es necesario desarrollar jurídicamente y clarificar las figuras de la claúsula de conciencia y el secreto profesional de las fuentes confidenciales, armonizando las disposiciones nacionales sobre estas materias para ejercerlas en el marco más amplio del espacio democrático europeo.

En el ejercicio del periodismo, las informaciones y opiniones deben respetar la presunción de inocencia principalmente en los temas que permanecen sub judice, excluyendo establecer juicios paralelos.

O Codigo d’a FAPE:

El periodista debe asumir el principio de que toda persona es inocente mientras no se demuestre lo contrario y evitar al máximo las posibles consecuencias dañosas derivadas del cumplimiento de sus deberes informativos. Tales criterios son especialmente exigibles cuando la información verse sobre temas sometidos al conocimiento de los Tribunales de Justicia.

El secreto profesional es un derecho del periodista, a la vez que un deber que garantiza la confidencialidad de las fuentes de información.
Por tanto, el periodista garantizará el derecho de sus fuentes informativas a permanecer en el anonimato, si así ha sido solicitado. No obstante, tal deber profesional podrá ceder excepcionalmente en el supuesto de que conste fehacientemente que la fuente ha falseado de manera consciente la información o cuando el revelar la fuente sea el único medio para evitar un daño grave e inminente a las personas.

Con totz istos parrafos queda esclatero que o periodista puede (y debe) alzar a privacidat d’as suyas fuentz. En dengun d’istos codigos s’obliga a o periodista a colaborar con a policia ta detener a un presunto delincuent. Como apuntaba manumarlasca a policia puede acusar-te d’aturar o suyo triballo y ixo suposaria un delito, que en tot caso, abra de dictaminar un tribunal, an tu puetz apelar a la tuya praxis deontolochica, ye dicir, que a praxis profesional te premite fer-lo pero puetz aber de concarar as consecuencias.

Os codigos, totz, dixan ubiertas as puertas a la tuya propia etica. Amas de periodistas, somos ciudadans, y por ixo, a luita d’os periodistas que concaran situacions extremas entre profesion y umanidat. Ye clasico l’exemplo d’a foto d’a nina y os gueitres. En un caso menor, como o furto de 20.000 euros de vecins de Pedrola, no somos devant d’un caso extremo y yo ese primato o sentiu periodistico y no pas a colaboracion con a policia. En cada caso, atamas d’o que digan os codigos, emos de trigar dentre estar periodistas u ciudadans. Traicionar una fuent u concarar as consecuencias. Denunciar a la policia u fer plegar atra version d’os feitos. En cualsiquier caso abra qui diga que emos feito mal, pero a etica presonal y a etica como colectivo de periodistas ha de saper triballar en ixos scenarios.

Torno a fer a pregunta, por si queretz contestar. Si fas una entrevista a un delincuent a qui son escando. y a policia te grita ta preguntar-te an has quedato con el, lis ne dirias?

No related posts.

Acto contra o recreximient de l’entibo de Yesa

Chorche — Thu, 19 Aug 2010 17:57:03 +0000

Yesa, no pas!

O domingo, 22 d’agosto, a las 12.30 os vecins d’Artieda feran una concentracion ta protestar contra o recreximient de l’entibo de Yesa. O puesto de trobada estara lo puent d’Artieda. Cal refirmar a os vecins d’o lugar, a la chent de l’asociacion Río Aragón, y a totz os que creyemos que atra politica idraulica ye posible. Una politica que no s’alacete en afogar lugars y chentz, que no pase por dencima d’os periglos, y que rispete os paisaches, a cultura y as radices.

Soz convidaus a venir-ie!

Si queretz saber mas sobre Artieda y o periglo que corre a suya forma de vivir con o recreximient, tos dixo l’enrastre a un triballo d’un d’os suyos chobens, Adrián Solana.

Yesa, no pas!

Posts relacionados:

Purnas en o zierzo » purnas

Fer pais

A mia lista de blogs

¿Informando?

Os pensionistas

A calor t’amaga

Meyos d’Aragon online – Medios de Aragón online

Nacionals

Provincials

Por redoladas

Zaragoza

Plana de Uesca

Baix Cinca

Cinca meyo

La llitera

Sobrarbe

Somontano

Cinco Villas

Tarazona y el Moncayo

Valdexalon

Matarranya

Bajo Aragón

El PP, l’Aneto y a identidat aragonesa

Queremos vivir aqui! no a lo recreximient de Yesa!

Fer una entrevista u colaborar con a policia

Acto contra o recreximient de l’entibo de Yesa