Aragón, an yes?

Sábado, abril 23, 2016 10:43
Publicau en a categoría purnas

Foi un café mientres que siento a lista de mosica que tiengo parada ta iste diya. Una lista que canta en tres luengas. Que canta dende a rabia, a tristura, o goyo y a libertat. Una lista que remera o que cada diya remeras. Qui yes. D’an viens. En iste trocet d’Aragón que ocupa menos de 60 metros en l’Eixample barcelonés totz os diyas son diyas d’Aragón. Porque Aragón ye en cadagún d’as aragonesas y os aragoneses. Un Aragón que ocupa muito más d’as suyas mugas porque muitismos habiemos d’emigrar. Uns, empentaus por os entibos, atros por a guerra, os más por a fambre y a miseria, atros por l’autodisprecio que muitas vegadas os aragoneses sentimos por tot o que siga Aragón.

Fa muitos anyos ya que han prebau uns y atros en desaragonesizar o diya d’Aragón. Pero dende fa 1200 anyos Aragón se niega a disparixer. Tamién en iste diya. Aragón ye aquí y astí. Hue, en cada neurona que encara tremola ta pensar-ne. En cada tuit. En cada uellada ent’o futuro d’un país que estió, está y estará. D’un país protechiu por tucas alteras, esnavesau por un gran rio entre disiertos. Un país que refusa amortar-se y que contina estando vivo en a dignidat de qui luita diya zaga diya en esfender a tierra, as luengas, a cultura, o territorio, as chents. Un país que charra tres luengas y que s’aima y s’odia a partis iguals. Un país que han quiesto trestallar dentre ciudat y lugar, dentre montanyas y planos, dentre disierto u verchel. Un país que en tiempos d’antismás iba chuniu enta la baralla y que de tanto en tanto encara remera ixe sentimiento colectivo que mos fa dicir que Aragón ye.

Aragón, o territorio, contina estando en o mesmo puesto que fa milenta d’anyos. Aragón, as suyas chents, son espardidas por o mundo y con ellas, tamién o país. Aragón ye dezaga la muga, pero dentro de totas y totz os que un diya, por a razón que siga, diciemos “soi aragonés”. Y hue ye o diya de remerarnos como o colectivo de chent que dende Aragón o dende difuera d’Aragón mos sentimos como aragoneses en o mundo. Somos humans. Humans aragoneses. Humans aragoneses que piensen o que piensen y quieran o prochecto politico que quieran, tenemos bella cosa en común. “Y si no, no”.

Hue, 23 d’abril de 2016, dende l’Eixample barcelonés, dende l’exilio voluntario y no siempre quiesto, dende l’altaria de 1200 anyos d’historia, podemos dicir, como cada anyo ENTALTO ARAGÓN LIBRE! UN ARAGÓN TA TOTAS Y TOTZ, QUE SIGA, SOBRE TOT, ARAGÓN!

PS. D’atros anyos en purnas 😉

Aragón yes tú

Aragón ye camín

Aragón

1200 anyos caminando por a historia

Aragón, el país que se olvida

La magia de San Jorge. Abiego

A crema d’a Constitución y o poder d’os simbolos

Martes, abril 12, 2016 17:47
Publicau en a categoría purnas

Por si no tos ha plegau por garra puesto hue una periodista que fa colaboracions en a televisión publica de Catalunya, TV3, ha cremau unas pachinas d’a Constitución Espanyola en directo. Ha feito ista crema controlada de papers en refús de a decisión d’o Tribunal Constitucional espanyol de suspender a lei catalana que feba que garra familia veye-se como as companyias enercheticas lis tallaban o suministro si no podeban pagar as condutas. Iste ye o video.

L’acto en si mesmo, como ye de dar, ha devantau as queixas de bells sectors d’a sociedat. Ya sabetz, que si os nazis tamién cremaban libros, que a propia constitucion guarancia que pueda fer istas barrabasadas, que si o respeto por a constitución que mos hemos dau totz…Y ye aquí an que quiero dentrar-ie.

Somos en un puesto d’o mundo an que os simbolos han puyau por dencima d’o que ripresentan. Quan o Constitucional dicta que ye bien normal que a chent pueda quedar-se sin luz, augua u gas quan se quedan en situación precaria, encara que a propia constitución guarancia os dreitos d’a chent, dentre atros, a tener una vivienda digna, as voces que se sienten indignadas no son prou alteras, que digamos. No se cretica o TC por actuar asinas. Pero sin dembargo, cremar a constitución ye un problema grieu de convivencia. Que la Constitución siga un arma politica pero no un manual d’emplego dentre a ciudadanía sobre dreitos y debers, quan ixo de “totz somos iguals” en a constitución ye nomás que una frase de marketing, no bi ha tantas voces indignadas como quan bell ser humano en particular decide creticar/estricallar/cremar o texto. Ye más important o simbolo, que no pas o rispeto estricto a lo texto. Un texto que avala, vaga-le, a libertat d’exprision, y quemisió, lo mesmo creticar a crema por fer servir un dreito ye una incoderencia de raso.

Pasa lo mesmo quan se crema una bandera d’Espanya, por meter un caso. A indignación ye maxima en bells sectors d’a sociedat, pero casualment, son sectors d’a sociedat an que o porcentache de chent que en cuentas de pagar os impuestos en Espanya se cagan en o país que dicen esfender ta fer-lo fuera. Asinas que, una vegada más o simbolo, a bandera, ye por dencima d’o que representa, o país, l’estau, os ciudadans.

U ixos catolicos, tipo familia Pujol, que de seguras que creticarian a crema d’una Biblia an que amanixe, bien platero, ixo de No furtarás.

Somos en un mundo de simbolos. Somos en un mundo d’imachen. Somos en un mundo, en un estau, en un país, an que, a la fin, mos importa más a representación d’a realidat que la realidat mesma. A representación d’a lei, que a lei mesma. Y asinas quatre mesos dimpués, o simbolo politico d’a negociacion ha estau muito más important que a propia negociación y camina Espanya enta atras nuevas eleccions. Constitucionals, ixo sí, y ignifugas, si ye posible.

Totas as luengas fan Aragón

Jueves, febrero 18, 2016 13:00
Publicau en a categoría de l'aragonés, purnas


O gubierno ha feito, dende a suya Dirección Cheneral de Politica Lingüistica un spot ta cilebrar o Diya internacional d’a luenga materna. Que yo me’n remere, ye a primer vegada que un gobierno aragonés fa una promoción “universal” d’as luengas d’Aragón, amás contando con presonaches culturals y esportius de primera linia en Aragón.

Ye un chiquet trango, unatro más, y que plega, ixo sí, muit tardi, como quasi cualsiquier cosa que tien  a veyer con l’aragonés y o catalán. Iste trango de promoción, con decenas d’actividatz en lugars y ciudatz ta ixe diya. Estará curioso tamién, como l’anuncio s’emitirá por a televisión publica aragonesa, una televisión que no rispeta a diversidat lingüistica d’o país, que nomás que fa un programa que semana zaga semana trafuca luengas, rispeto, diversidat y cultura, pero que no aporta guaire a o rispeto a la diversidat que ye una d’os regles que articula la lei de creyación d’ixa televisión.

O bloqueyo ye permanent a la posibilidat de fer programas en aragonés y catalán, retular en aragonés y catalán, y mesmo que se sienta charrar en aragonés y catalán a qui quiera  fer-lo asinas en entrevistas, informativos u programas. Si dentrar en guaires detalles, en zagueras y dende os organos pertinents s’ha reclamau a presencia d’as luengas d’Aragón en os meyos de comunicación publicos d’Aragón. Pero por agora ye una batalla dificil por o bloqueyo d’os que veyen un ataque que la chent pueda charrar en una luenga que no siga o castellán. Pero no ye una batalla que s’haiga perdiu. Por ixo, l’anuncio ye un lamín, pero lo que queremos, ixo que a lei ha de fer cumplir, o que os dreitos humans han de guaranciar, ye a normalidat en l’emplego d’as luengas d’Aragón en os meyos publicos aragoneses. Un lamín ye dulcet, pero no en ye prou. Queremos tres chentas en o diya, con primers, segundos y postre. Y tamién, un lamín.

As voces d’o proceso independentista catalán en La Enredadera

Lunes, octubre 13, 2014 12:11
Publicau en a categoría purnas

DSC09624
Ahiere tenié a ocasión de participar en Radio Topo en l’especial que facioron a chent de “La enredadera” sobre Catalunya. Estió un programa más que intresant por os convidaus que i participoron via telefono. Dende anviestas diversas esplanicoron porqué o Sí/Sí en Catalunya puede ser o prencipie d’un cambeo de modelo politico, economico y social. As voces de Esther Vivas, especialista en consumo responsable y soberanía alimentaria, Arcadi Oliveres, de Procés Constituent, Susanna Abella, de la Plataforma en Defensa de l’Ebre, Anna Gabriel, coordinadora d’a colla parlamentaria d’a CUP, Gerardo Pisarello, de Guanyem Barcelona y Ricardo Sr. Plástico, organizador del Salón del Cómic Social, texioron un mosaico d’esferencias y confluencias en o proceso soberanista que ye vivindo Catalunya y que ye torpedeau dende l’Estau Espanyol.

Ta yo, que vivo en Catalunya, ye dificil de vegadas esplicar que no nomás bi ha un componente nacional en o proceso de ruptura en Catalunya, que tamién bi ha una fuerte implicación social y economica dillá d’o que convenimos en dicir “nacionalismo”. Voces como as que ahiere ascuitemos o esplicoron dende as suyas esferencias muito millor que no yo.

Tos convido a re-ascuitar o programa d’a Enredadera dende o suyo podcast ta conoixer o que bi ha dezaga y empentando o proceso soberanista en o país d’aquí a o costau, y con qui hemos compartiu mientres muitos anyos l’esnavesar d’a historia.

O Sí estió en a carrera pero no en prou votos (Escocia, o diya dimpués)

Viernes, septiembre 19, 2014 15:55
Publicau en a categoría purnas

A las diez zarraba o colechio d'Easter Road

A las diez zarraba o colechio d’Easter Road

A las diez horadas o colechio electoral d’Easter Road, que no yera un colechio, que yera una ilesia, zarraba as suyas puertas. Debant d’ellas, dica o zaguer minuuto, dos chovens partidarios d’o no, y un partidario d’o sí, remanioron prebando de convencer a os zaguers votants.

As sensacions de totz tres yeran diversas. David, de Better Together me deciba que yera muit niervudo, que heban estau en Glasgow y que pareixeba que allí sería Yes. Me deciba que “heba estau muit important que bi hese muita participación, porque a la chent l’importa lo que pase” y sobre tot, que asperaba un No “porque con o NO y con a ufierta de nuevos poders  totz ganamos”. Niall, de Yes, Scotland, yera muit ilusionau “a chent ha votau en masa y ixo ye bueno t’o Sí, ta Escocia”. Como ell, muitismos militants d’o Sí s’achuntaban en as carreras, en o Parlamente, cantaban, chilaban, y yeran asperanzaus. Pero si una cosa ha distinguiu a ista campanya ha estau a masiva presencia d’o Si en a carrera, a no tan gran presencia d’o No y o fair play.

Por ixo en un mismo espacio s’achuntaban qui cantaba “Flower of Scotland”, “tos aimamos encara que haigatz votau No” u “Hue o Yes tendrá una fiesta y tamién a independencia” y os que mas silenciosos con banderas britanicas y escocesas heban votau No.

Tota ista ilusión d’o Yes prencipió a esbafar-se quan que se conoixeba o primer risultau, en un zona que en as enquestas daba Yes, pero que se decantó t’o no a la hor d’a verdat. En os  pubs, poblaus mayoritariament por independentistas, un velo de decepción cayó como una negra uembra y no marcharía ya en tota la nueit. Nomás Dundee, dentre las ciudatz tenió un risultau espectacularment bueno ta o Yes. O 53/47 de Glasgow no estió prou, y quan que se conoixió o 39/61 a favor d’o No bi’n habio bellas glarimas en un d’os pubs que remanió ubierto dica las 7 d’o maitín.

Escocia heba decidiu o suyo esdevenidero, y heba decidiu que quereba continar fendo parti d’o UK. Ye de dar que garra cosa será igual d’aqui entadebant. Londres y Edimburgo habrán de negociar agora una millora d’as competencias. A promesa d’ista millora pareixe que a la fin ha decidiu a muita chent a votar por ista millora y no por a incertidumbre d’a independencia. Y puestar ha estau una d’as claus d’iste risultau (45/55) a favor d’o No.

Hue a ciudat como tota ista semana ha amaneixiu grisa, pero l’ambient yera mas gris encara. Annie me deciba, en tornar ta casa que mesmo han suspendiu una cena con os amigos, “que alto u baixo somos como risultau final, meitat y meitat”, porque dengún quiere charrar hue d’a votación “agora totz hemos de pensar qué hemos feito y como podemos millorar tot dende aquí”. Pareixe una gran chornada de reflexión, la que no fan antis d’as eleccions la fan dimpués ta fer a dichestión d’os votos.

En a carrera continan veyéndose os pegallos d’a chent, en coches y personas. O Yes y o No, fueras de polarizar o país (que tamién, en cierta forma) pareixe que ha feito pensar qué clase de país quieren. En a carrera Peter, que encara leva un pegallo d’o No, me ditz que “totz somos escoceses, y continaremos estando-ne, y agora plega l’inte de tirar totz entabant d’o país y d’a Unión”. Tres trangos debant Jessica (con una chambreta d’o Yes) no puede amagar a suya cara de decepción “ye increible, encara no entiendo como puede pasar que la chent no quiera tener l’esdevenidero en as suyas mans”. Quan me ditz adiós, dimpués de charrar una estona se chira, me se mira, y me ditz “encara que nomás que tiengamos una mano en o nuestro esdevenidero, hemos de tirar d’ell ta fer una Escocia millor, cal continar luitando, y antis u dimpués, ganaremos”.

Puestar lo deciba mirando-se as votacions por edats. Mas d’o 70% d’os menors de 18 votoron ahiere “Yes”.

Asinas han ubierto los colechios (Escocia decide)

Jueves, septiembre 18, 2014 9:58
Publicau en a categoría purnas

O diya, como quasi totz, ha amaneixiu griso de boira y humedat. Pero a las 6 d’o maitín, hora escocesa, en os colechios electorals ya bi’n heba chent aqueferada parando tot ta o diya decisiu d’o referendum escocés. Aquí no ye viedau de fer campanya en garra inte, asinas que amás d’os que levan o control en as mesas, tamién se n’han amanau dende primera hora miembros de Yes, Scotland, Better Together, y en o colechio an que i yera yo, de Green Yes.

Pero os importants yeran os votants. Bill ha estau o primer. De 29 anyos triballa en Aberdeen y ha decidiu de venir a votar antis con antis ta dimpués marchar t’o triballo. Bill, o primer en votar Ta Bill hue se decide l’esdevenidero, hue se decide “como fer un país” y por ixo creye que hue ye a votación más important d’a historia d’Escocia. Creye, como muita atra chent, que a campanya ha serviu ta fer pensar a la chent. En a suya colla d’amigos, en a suya familia “bi ha de  tot, d’o Yes y d’o No, y n’hemos fablau, hemos compartiu anviestas, hemos debatiu, y si ixo s’ha feito en totas as familias, en totas as collas d’amigos, ixo ya ye un gran trango entadebant”. No sabe qué pasará “porque as enquestas no aseguran cosa”, pero aspera que o risultau, siga lo que siga, aduye a la chent a dispertar y pensar que bi ha solucions ta os problemas. Dezaga d’ell bi yera Peter, de 64 anyos, “o primer en votar en iste vico en cada eleccion, y asobent he estau yo solo, y mira hue”, me ditz, “diez u doce presonas que lo primer que hemos feito ye venir a votar”. M’asegura que nunca no  ha deixau de votar, y que aspera que totz piensen como ell. “Os votos son a participación d’a chent, y hue mos chugamos muito”. Igual que Peter Debbie, de 32 anyos, que plega en o colechio en bici, piensa que “ye important votar, y mas que mas hue”. Aspera que o suyo voto s’adhiba muitisma chent. Encara que no me ditz si ye un “Yes” u un “No”, y yo no li he preguntau, Debbie, con cara asperanzada me ditz “que manyana tot sera diferent, y tot será millor, puestar que al principio no, pero dimpués, sí”. Ye una impresión mía, puestar, pero sí que o voto d’o Yes ha movilizau a más chent choven. Asinas piensa tamién Cubbit, de 60 anyos, que tamién ha estau d’os primers en votar porque “ista votación ye ta la venient cheneración, pero nusatros tamién hemos de parar o terreno ta ells”. Cubbit me deixa con a parola en a boca ta tornar-li a preguntar, pero ye que ubren o colechio y a chicota ringlera de 10 u 12 presonas prencipia a dentrar-ie.

Salindo d’a votación charro con Lorena, que ha plegau con o suyo cocho enta o colechio. Lorena ye a unica que me ditz que ha votau yes y me ditz tamién que “aspero que como yo, sigamos más d’a meitat os que creyemos que fer Escocia ye posible”. Ye una asperanza, prou que sí, porque tamién me ditz que “no será fácil ni que ganemos, ni si ganamos, pero tiengo platero que cal creyar un nueva Escocia libre, de presonas libres y en un mundo libre”. Soi tornau enta casa dimpués, hue será un diya intenso. Más de 4 millons d’escoceses son gritaus ta votar y os colechios zarran a las 10 y puestar que dica maitín, con l’achustau d’as enquestas, no se saba qui ha sacau ixe puntet de más que decidirá si Escocia ye un nuevo estau independient u continará fendo parti d’o Reino Unito. Yo, a lo menos, he teniu ocasión de charrar con beluns d’os primers votant d’Edimburgo.

Os uellos d’o mundo en Escocia

Miércoles, septiembre 17, 2014 17:42
Publicau en a categoría periodismo, purnas

Como yo, un periodista aragonés que triballa en Catalunya ta una televisión espanyola, decenas, centenars de periodistas de tot o mundo son istos diyas por Escocia. Iste referendum tiene bella cosa especial. Escocia ye un país que ye en l’imachinario d’o mundo, y por ixo iste referendum no ye cualsiquier referendum. Afecta amás a la Unión Europea, y en especial, a o Reino Unito, una d’as potencias economicas y politicas tradicionals.

Por ixo istos diyas por as carreras d’Edimburgo, m’he trobau periodistas chinos, chaponeses, holandeses, americans, espanyols, catalans, vascos, franceses, coreans, italians… Con bells d’ells he estau charrando d’as implicacions d’ista votación, con atros, d’o folklorismo simpatico que siempre tienen os escoceses en o pensamiento colectivo, con atros más, mesmo d’as implicacions ta la resta d’Europa y en especial, ta l’Estau espanyol.

Os escoceses se miran iste desembarco pacifico de bislai, porque ta ells ye important o referendum sin importar que piense o mundo. Han feito una achuga por votar, por creyer-se que pueden continar entabant como pueblo. Decidan Aye o Naw, os uellos d’o mundo son sobre ells, pero ells, arguellosos como pueblo que son, piensan poco en as implicacions ta lo mundo, fueras de bella referencia a “hemos de ser eixemplo t’atros pueblos”, a realidat ye que os escoceses son autoconscients de que, qui y como son. Y agora decidirán qué, qui y como querrán ser. Y periodistas de tot o mundo esplanicarán lo que puedan en decenas de luengas, mesmo en ista chicota luenga aragonesa que se mos eslampa de dentre las mans enta la suya muerte.

A voz d’a carrera (Escocia diya 2)

Miércoles, septiembre 17, 2014 13:30
Publicau en a categoría purnas

image

Yes y No se troban por a carrera y en charran

Annie me’n deciba ahiere que fer o referendum heba estau un gran “no bi ha uegos” dentre Cameron y Salmond. Cameron chugaba porque as enquestas deciban que nomás que un 30% d’os escoceses quereba la independencia, Salmond, porque sabeba que yera a oportunidat historica por o contexto de descontento social, crisi y retalles. En cualsiquier caso, o referendum d’Escocia ta trencar con a Union Act ya ye aquí. En quedan poquetas horas ta saber si as achustadas enquestas van enta un u unatro costau.

imageimage

 

 

 

En a carrera bi ha paradetas d’o sí y d’o no. Fueras de bella salida de tono, o tono d’a campanya ye amable. A chent d’as paradas charran dentre ells y mesmo se fan bromas. Tamién en os pubs se veye chent con chapetas d’o Yes y d’o No, y zorrupian as pintas chuntos bien contentos. Pero charrando ahiere y hue con uns y unatros bi ha una gran diferencia. A os partidarios d’o Si se lis veye emocionaus, contentos, goyosos. No ye o caso d’os d’o No, que pareixen más carranyaus. Va en a campanya. Si ye positivo, y No negativo. Ye un gran encierto de Salmond u una gran error de Cameron. Amás, os d’o Yes cada vegada veyen mas amán a posibilidat de cambear.

imageLo me deciba Neil, de Disabled people for Yes. Dende a suya silla de ruedas Neal me deciba que no tiene asperanza de ganar, porque sabe que “imos a ganar”. Charra d’os retalles, d’a manca de proteccion social ta ell y atros como ell, charra de que “en a nueva Escocia s’ha de construyir un modelo nuevo que deixe a dengún dezaga”. Y unatra riflexión “totz somos escoceses, nusatros y os d’ixa atra cantonada (an que yeran uns d’o No), y totz habremos de convivir dimpués, salga lo que salga, encara que saldrá que sí”. Ha feito totz os diyas de campanya en iste puesto de Princess Street, repartindo fuellas y charrando con totz que se i amanaban, como yo.

Una mica dillá bi ha unatra paradeta, d’o Socialist Scottish Party, cuyo lema ye “Socialismo, independencia y internacionalismo”. Recullen sinyaturas ta demandar que a nueva constitución creye un estau igualitario. A o costau, bien a o costau, tienen a tres presonas d’o Partiu Conservador. Un yayo con una Union Jack en un trocet de fusta, y dos chovens que amanan fuellas a la chent. Charro con Jonny que me da una fuella que ditz “Chuntos faciemos a NHS”. Ye o detall d’a campanya colectiva d’o NO “Better together”.

 

image Ta Jonny remanir en o UK suposa mas seguridat contra menazas exteriors, millor seguridat social, millors  beneficios socials y sobre tot, “continar estando britanicos, que ye a millor manera d’estar”. Tamién creye que a financiación de l’estau ye millor si van totz chuntos, si Escocia no deixa de fer parti d’o país. De feito, quan li pregunto que pasará si gana o No me ditz que “tot millorará porque Cameron ya ha ufriu millor financiación y millors poders ta Escocia” mientres que gana o Sí o piyor ye que “será la fin d’o Reino Uniu”.

Me remero de Jonny dimpués, quan charro con Pat, de Radical Independence en Edimburgo. Pat, una muller luitadora, que me charra d’as manifestacions contra la guerra d’Irak, contra os retalles, contra o racismo, encapeza en Edimburgo una d’as consequencias d’o referendum d’independencia. Una corrient popular que no nomás quiere una Escocia independient, que quiere una Escocia nueva. En o suyo stand a o costau d’a Scottish National Gallery recullen propuestas d’os ciudadans ta que amaneixcan en a nueva constitución.

Y digo que me remero de Jonny porque Pat m’esplanica que o referendum ha ubierto los uellos a muitisma chent. Que baixo lo si s’acubillan as ideyas, pretensions y suenios de muitisma chent que quiere cambear as cosas. Y de feito, me ditz, “mesmo a chent d’o no s’han habiu de pensar que pais quieren, ni que siga dentro encara d’o UK”. Por ixo Pat ye tan asperanzada. Aspera que gane lo sí, quiere que gane lo sí, suenia y luita ta que gane lo sí, pero “mesmo si gana lo no, as cosas ya han prencipiau a cambear y feremos, sí o no, que cambeen”.

Pat, que no para de repartir fuellas mientres que charramos se despide de mi dicindo “aspero, mr. “Arragun” (mientres que arrigue), que puedas esplanicar en o tuyo país que lo que somos fendo aquí ye asperanza ta tot o mundo, queremos un Sí ta totz, y ganaremos un Sí ta totz”

No ye identidat, ye autoesfensa (Escocia diya 1)

Martes, septiembre 16, 2014 13:21
Publicau en a categoría purnas

Plego en Edimburgo baixo la plevia. No ye guaire rarizo, asinas que dengún creye que ye un sinyal. O cutiano son os diyas grisos, a boira sobre a ciudat y a plevia que fa iste ambient humedo, gris pero tamién verde de vexetals que creixen. Annie, a mia anfitriona, ha estau dos semanas en Andalucia y en plegar en casa suya se fa cruces de como ha puesto creixer tanto o chicot chardinet que veila a suya dentrada ta casa.

image

O primer que pienso en plegar dende l’aeropuerto en a ciudat ye que no bi ha guaires cartels por a carrera. Me pienso una campanya electoral, y tan important como ista, y veigo as paretz plenas de cartels. Pero aqui no ye asinas. A campanya, mas que mas, s’ha feito de puerta en puerta, con chicotas collas de chent que va repartindo fuellas en a carrera. Os d’o “yes” (“aye” que dicen aquí) y os d’o “no”, fan gambadas por os vicos ta repartir argumentos. Argumentos. Tamien medrana, pero sobre tot, argumentos.

Charrando con Annie, una triballadora social chubilada, que m’ha ubierto as puertas de casa suya, plego en una d’as claus d’iste referendum. Prou que bi ha buena cosa identitaria. Prou que os escoceses son y se sienten escoceses, pero bi ha en chuego muitas cosas mas. Annie me ditz, meyo en broma, meyo en serio, que encara que ella no ye independentista (sisquiá ye escocesa, que ye meyo irlandesa, meyo griega, y naixida d’Anglaterra) pero que votará sí porque os escoceses son más de cuchas que os angleses. En chuego ye o sistema de salut, as pensions, os sistemas de proteccion social. Y muitos escoceses asinas han entendiu o referendum. Escoceses, sí, pero con unatra sensibilidat social, tamién.

De feito, buena parti d’a campanya s’alazeta en istas cuestions y no en patriotismo, identidat u nacionalismo. Ye de dar que existe, ye de dar que tiene buena parti d’a rispuesta ciudadana, pero o Sí u lo No, penden de muitas mas cosas. Un d’os lemas repetius por a cucha en iste referendum ye “Sack the tories”. No ye “sack the english” que ye “sack the tories”.

image

Encara asinas, Annie, que ha triballau muitos anyos como asistent social, m’esplanica que en muitas cosas o SNP, o partiu nacionalista escocés se pareixe de vegadas a os tories, que son privatizando tamién por a puerta de dezaga a sanidat, que muitas retalladas vienen d’aqui tamién, pero encara asinas, creye que con o “Sí” atra Escocia ye posible, siempre que se de unatra condición, que os partius de cuchas triballen a ixena, cosa que no fan. O Socialist Scotish Party ha patiu una división zaga atra, os ecolochistas van a la suya, Radical Independence plega de naixer…

Aquí bi ha más plevia, aquí os diyas son mas grisos, aquí podran votar o suyo esdevenidero como  país. Pero encara asinas, as remors d’o que pasa en Aragón, Catalunya, Espanya, plegan dica aquí.

Nota: Tiengo problemas ta puyar as fotos, pero esviellaré iste post en que pueda

Aragón, Aragón!

Miércoles, abril 23, 2014 9:48
Publicau en a categoría prexinando, purnas

Aragón entre barras

Aragón entre barras

Fa buena ripa d’anyos bells mocetons esnavesaban o Mediterraneo con ixe nombre en o garganchón. Hue, tantismos anyos dimpués, encara somos aquí muitos que mos decimos aragoneses y aragonesas. Gubierna o país un partiu antiaragonés, as enqüestas contrimuestran que muitismos aragoneses han decidiu borrar d’a historia o país, a suya cultura, o suyo legau historico, as suyas luengas y o suyo paisanache. Pero encara continamos aquí. Encara. Encara somos ixe pueblo redolau de montanyas i disierto. Encara vivimos partius por a mitat por un gran rio. Cara’l norte, cara’l sur, cara l’este y cara l’oeste Aragón contina tenendo o perfil que ha teniu dende fa tantismos anyos. Hue muitismas de nusatras, que venimos de tant i tant luen hemos deixau dezaga as mugas d’o país levando con nusatras un trocet d’ixe país fiero, vuedo de chent en numero y empliu de chent argüellosa, noble, acollidora, que ha triballau por fer un hogar de “esta tierra hermosa, dura y salvaje”.

Hue Aragón ye más espardiu que no nunca. Si repasatz as vuestras amistatz trobaretz Aragón luen d’Aragón en tantismos puestos. En Berlín, en Chile, en Londres, en Catalunya, en Espanya, en Andalucia, en Occitania, en Italia, en Vietnam, en Polonia, Filipinas, Suiza u Rumanía. En cada puesto que un aragonés ye, ye Aragón. Hemos esmicolau o país deixando dezaga una tierra que de vegadas devora os suyos fillos, que se creixe ta luitar contra si mesma y que se fa chicorrona ta luitar con qui quiere furtar o legau, o territorio y as chents que i son.

Hue ye diya de repensar-se. Hue ye diya d’agafar impulso. Hue ye o prencipie d’un nuevo Aragón. Hue ye lo diya en que os que somos difuera y os que sotz en o país hemos de pensar t’an queremos ir. De pensar-nos y aimar-nos. De creyer-nos y re-creyar-nos. De pensar, por un diya, que encara somos aquí. Que encara somos. Que encara somos dragons. Y que encara podemos forachitar a ixos atros dragons, os dolents, os que malfurrian l’herencio d’o país. Ye tiempo de pensar-se. Ye tiempo d’enrestir de nuevas. De chilar, una vegada más “Aragón, Aragón” y enrestir contra os mals que mos atormentan, con qui quiere malmeter o territorio y as suyas chents emplindo o país d’as suyas ferramientas de destrucción. Somos o país que queremos ser. Y puestar que no totz y totas queramos o mesmo país, pero ya sería important que totz entendensemos que a lo menos, somos un país que quiere ser.

Y en ixas soi yo, dende atro país que si que quiere ser. Dende l’atra banda d’o disierto. Con atras montanyas y atros rios y atra chent que luita por fer creixer a suya tierra. Hue, como cada anyo, me remero d’o país mío. Un que, encara que yo l’haiga deixau, no m’ha deixau a yo. Un que tiengo dentro d’a piel. Un, a lo que nunca no renunciaré. Puestar tendré atra ciudadanía, pero nunca perderé a nacionalidat. Porque yo, como tú, soi Aragón.

Encara podemos subvertir a historia. Encara podemos fer eslampar a os dragons dolents. Encara quedan esmos y luitas que luitar. Encara queda l’esprito. Encara somos. Siempre somos. Somos Aragón. De tuca en tuca. De montanya en montanya. De rio en rio. De val ta val. De disierto en disierto. “Somos o cierzo que no podetz aturar”. Somos. Vivimos. Creyemos. Luitamos. Aragón encara ye por fer. Aragón ye un recorriu. Aragón ye vida. Aragón. Dende o puesto que siga. Aquí, astí, allá. Aragón. Casa mía, siga en o lugar que siga, en a ciudat que siga, siempre será Aragón.

Entalto Aragón libre!!!!

 

 

Tags: ,
Pachina 1 de 21512345...101520...Zaguera »