Dende siempre a mesa d’o salon, ixa que nomas s’ubriba en ocasions especials, ha estau o templo d’as ilusions en casa mia. Huei, cuan ya tiengo 36 anyos, o mio pai fa anyos que no i ye y a mia mai contina en a suya mecedora a os suyos 70 anyos, a mesa de fusta escura contina estando lo puesto an mos dixamos os presentz.

Ye que pasan os anyos, pero no lo carinyo. Ya sabemos que os reis no esisten pas, y os que esisten, millor estaria que no esistisen. Agora os reis no nomas son os pais. Agora os reis somos a mia mai y o suyo fillo.

Huei a mesa de fusta escura d’o salon ha tornau a emplir-se d’una miqueta d’aimor. Y una olla expres. Y dos lamparetas.

Iste ye o fuego que tot crema. Ye o fuego qui marca o esnavesar d’o tiempo. O fuego que crema en o paso dentre a primavera y l’estiu. O fuego que crema as primeras fustas ta escalfar a casa y os espritos. O fuego que alumbra cuan ya lo diya prencipia a crexer y ganar espacio a la nueit fosca.

O fuego marca o solsticio, fueras de que no se qui naxies en no se an. Encara huei continan naxiendo ninos y ninas en os portals, en as pateras, arredol d’o fogaril de casas sin teito… Igual ye o diya huei de remerar ixos ninos que naxen sin de futuro.

O fuego mos fa cambear pero tamien nos remera a totz os que encendion ixa foguera antis que nusatros. Mos remera d’an venimos y ta do imos. Mos remera que nomas somos nugos en un rete chigant que viene dende l’amanixer d’os tiempos. Y faiga aire, pleba, nieve o trone…continamos chirando y teixiendo nugos en o rete t’alcompanyar o mundo.

Goyoso solsticio y goyoso Nadal ta qui lo celebre.

Continamos aqui!

Encara no ha rematau l’anyo pero amonico imos pensando as cosas que hemos dixau por fer, as decisions que hemos feito, unas con encierto y atras, con no guaire. Repasamos caras, diyas, suenios, feitos, diyas, nueitz y vida. Y sobre tot, prencipiamos a planificar o venient anyo.

Yo tiengo ya bellas ideas y suenios y chent que me viene ta o tozuelo cara l’anyo venient. Dentre atras, reubrir Aragon Colonial, decision que ya he feito y que ista semana veyera os suyos fruitos, pero ixa ye a menos important. Os buenos suenios que tiengo son mas ta yo y ta chent d’aman. O futuro viene ascape, pero lo present ye o que mos endreza t’alli.

Contimos en o camin, quieras que no.

Antis cuan tornaba de un viache siempre escribiba bella coseta. Agora, cuan torno de viache, a tamas que siga un viache de bellas pocas horas, me cuesta diyas tornar a meter a capeza en o suyo puesto. Y ixo que he estau de triballo, por Barcelona y podria recentar cosetas intresantz d’as eleccions catalanas, d’as mias sensacions dimpues de dos anyos y meyo sin fer un directo en a television o mesmo d’a eslucerniant conversa que tenie en L’Antiquari.

Suposo que ixo zaguer si que lo recentare bell diya d’istos.

Diyas y semanas como ista fan replanteyar asabelas cosas. Tantas que parixe que, a la fin, diya zaga diya, nomas foi que asperar o diya 27. Ye triste, pero no adubo a mas y no quiero fer mas.

Difuera d’ista silla, a lo menos, bi ha unatro mundo muito millor.

Rematan os Pilars y plega lo cierzo. Os politicos enchegan os suyos twitters cara ta las eleccions de l’anyo venient. Os cachirulos tornan t’os calaxos y as flors s’amortan dencima una plataforma metalica.

Tamien tornara purnas.com cuan o suyo autor, u siga yo, aiga rendrezato as suyas neuronas que encara fan sinapsis entivocadas. Ista semana, no m’alticamo a yo mesmo.

Nunca no s’achunton os 8 chirmans cuan ya yeran grans. A vida los trestallo. Uns ta Catalunya, atros ta Zaragoza y os que se quedon en a Huesca comun que veyio como naxeban y chugaban. Gracias a que a mia tia alzaba bellas fotos y a lo triballo de Rubén Vicente, fotografo, amigo y vecin, aconseguimos que Adela Romance, chirmana d’o mio yayo, y a unica d’os 8 chirmans que encara vive, veyese a totz os suyos chirmans.

Adela y os suyos chirmans

Como periodista os muntaches de fotos no me fan guaire goyo, pero en ixa foto irreal, de 8 chirmans separaus por a vida, diemos carta de realidat a os suenios d’Adela, que a poco veye que o suyo mundo disparixe por o tiempo y por as basemias d’a suya ment de 94 anyos. Yeran totz, Santos, Miguel, Martina, Nicolás, Justo, Bernabé, Felisa y ella, Adela, la mas choveneta. A tecnolochia facio posible creyar un suenio, un remero, una ilusion. Y estio bonito poder-lo fer, como tamien veyer a cara d’o mio lolo, a qui no conoxie, porque murio bells anyos antis que os mios pais se casoron.

Santos Romance

El teneba os huellos azuls y yo no, no li conoxie pero ye tan parti d’as mias radices como a mia yaya Cruz a qui si conoxie y m’amostro a chugar a o guinyote. Tan parti de yo como os abuelos Macario y Basi, pais d’a mia mai que m’amostroron tantas y tantas cosas y que en a mia vida de nino yeran os abuelos con qui me quedaba, con qui feba gambadas por a ciudat con os que vivie tantas cosas de chicorron y dimpues de gran, cuan se facion grans tamien y ya la capeza se lis n’iba ta mundos estranios. Son a radiz d’o que soi. Tamien. Ye a familia, tamien. De vegadas, cal agafar-se d’as radices, d’os alacetz d’un mesmo y retrobar-se en o que somos agora porque venimos d’an venimos.

Pasa la vida

Cuan corremos masiau xublidamos que o verdadero sentiu d’a vida ye nomas ixe, vivir. As chentz que mos afogan no son as millors companyeras, y o verdadero secreto d’a vida ye, de vegadas, posar-se en a carrera, leyer letra zaga letra un diario u bell libro y dixar os nuestros huellos libres ta mirar a vida de cara.

Nomas pasa que, de vegadas, notamos mas o buedo dixau en a silla d’o costau.

Amagando-mos

A ciudat ye cremada de sol y aire d’Africa. O sol ye cruel huei y no dixa dondiar por o bico, por a carrera. As morisquetas son, como diz a canta, acetas de sudor y sal. Tot se complega, por o destin, por a calor, por o mundo, por o buedo, por a chent que no y a chent que si. Imos ta la espelunga d’os deseyos. Baxamos enta lo fundo d’un mundo nuevo que ye viello. Mos amaga-mos d’a calor, de l’aire, la chent y o nuestro propio sudor pleno deseyo.

No bi ha puesto an siga millor que en as espelungas d’o tuyo cuerpo, sinyado, como amuestra a fotografia con un B27. Ye a calor d’a luna plena la que no dixa espleitar-se con a fredor d’o sol. U a lo contrario. A lo cabo, a verdat ye que no i yes, ni en o forau mas fundo d’a tierra.

Diz que de vegadas os suenios tienen rilacion con o que charramos, sentimos, pensamos u veyemos. Puestar por ixo lo suenio que he teniu ista nueit. M’he dispertato sabendo o que sinnificaba, y ixo no ye guaire normal.

Yeranos dos periodistas, una buena amiga y yo. Con o mio yayo febanos una gambada por un lugar que no conoxebanos. Parixeba que sabebanos an queribanos ir. Plegabanos, allora, en plena nueit, a lo cabo d’un camin. Baxo os nuestros pietz, lo mar. Una mica dilla cuatre maquinas grataban a montanya. Grans piezas de tierra y piedra cayeban en o mar.

As maquinas no aturaban de gratar y nusatros de fer fotos, porque yera una obra ilegal. Cada vegada a montanya s’achiquiba mas y mas. Lugo no en quedaria. Con o zaguer truco d’una d’as maquinas m’he dispertato.

Sin decir-lo, a mia ment soniaba con as obras de Yesa, con a responsabilidat d’a prensa, con l’amistat y con os mundos, como lo que veyio o mio yayo, que somos amortando de mica en mica.