Aragón yes tú

Martes, abril 23, 2013 12:27
Publicado en la categoría purnas

wpid-2012-09-11-10.38.56.jpgEstendillo a mermelada de moras por o pan mientres remero que l’anyo pasau feba o primer trango d’o camín que m’ha trayiu enta aquí. Foi dos fiestas en una. A d’aquí, plena de libros y flors, y la d’allí, a fiesta d’una nación que s’amorta a si mesma feita confusión.

Aragón se regala como o chelo de l’hivierno, desfendo china chana un camín de mas de mil anyos. Pero ixo no  ye desincusa. Encara remane qui planta cara a lo cierzo u se deixa aventar por ell. Porque no sabemos si somos dragons u caballers, pero somos. Con fuego u con lanza hemos de fer un poder por continar fendo, por continar estando, por continar un camín que prencipió fa tantos anyos.

Os lugars comuns dicen que somos polvo, nieve, aire y sol. As cantas mos dicen que somos un pueblo d’augua en un pais ixuto. Duros y ternes. Nobles y brutos. Que somos o cierzo, tamién. Pero iste país que se mos eslampa d’as mans ye muito mas que ixo. Os suyos paisanos somos muito más que tot ixo. Aragón son istas mans, istos uellos, istos uembros. Istos didos que escriben isto, y os uellos que lo leyen. Aragón yes tú. Y Aragón continará siendo siempre que tu i sigas.

Un pueblo que fa camín por endreceras que diverchen. Uns enta l’autodestrucción. Atros, enta un futuro d’asperanza, libertat y solidaritat. Yo tiengo platero o camín que foi, en presonal y en colectivo. Si nusatros queremos que o país perviva no ye prou con a nostalchia d’un diya asinas dende l’exilio. Cal que ixa nostalchia, d’o pasau que estiemos y d’o futuro que estaremos, esdevienga rabia, luita y trangos enta o camín. O mesmo camín que mos deixoron os pais, y os pais d’os pais, y asinas dica mil y pico anyos dezaga. O mesmo camín que hemos de recorrer ta construyir o país que queremos. Aragón son os tuyos pietz que caminan enta l’asperanza.

ENTALTO ARAGÓN LIBRE!!!!

Puedes dejar una respuesta, o un trackback desde tu sitio.

4 Respuestas to “Aragón yes tú”

  1. Bitacoras.com says:

    abril 23rd, 2013 at 12:32

    Información Bitacoras.com…

    Valora en Bitacoras.com: Estendillo a mermelada de moras por o pan mientres remero que l’anyo pasau feba o primer trango d’o camín que m’ha trayiu enta aquí. Foi dos fiestas en una. A d’aquí, plena de libros y flors, y la d’allí, a fies……

  2. Sergie says:

    mayo 8th, 2013 at 15:10

    Felicitats pel seu article a Público parlant de la llei de llengües d’Aragó. I ja que sóc aquí, a veure si em pot resoldre un dubte: el CHA està a favor de l’autodeterminació d’Aragó o es conforma amb el federalisme? Hi ha independentistes al CHA?
    PD: l’estelada aragonesa mola més que la nostra!

  3. Chorche says:

    mayo 20th, 2013 at 10:10

    Gràcies! CHA es conforma amb el federalisme. hi havia independentistes en CHA, però ja no, o al menys, no de manera visible. La majoría dels indepes de CHA s’han agrupat en altres formacions com Puyalón amb gent provinent d’altres partits i organitzacions, que fa part del Bloque Independentista de Cuchas

  4. Goyo says:

    junio 20th, 2013 at 18:52

    Tamien bi ha en Estau Aragones Independentistas.

    Salut

Dixa un comentario