Preguntas ta Serrat y Callizo

Miércoles, junio 20, 2012 12:18
Publicado en la categoría de l'aragonés, purnas

Dolores Serrat (debant) y Javier Callizo (dezaga)

Dolores Serrat (debant) y Javier Callizo (dezaga)

Como no podié estar en a rueda de prensa que fación istas dos presonas l’atro diya ta presentar o suyo prochecto de lei de no-luengas, que podetz consultar en Arredol, y que mereixió ista opinión mia, asinas como iste articlet que he feito ta Público, quiero fer bellas preguntas a l’aire ya que no podié fer-se-las a Serrat-Callizo / Callizo-Serrat.

  1. Quan dicen que “s’acceptaran imposicions de fuera” se suposa que en Aragón deixaremos de fer servir as normas d’a RAE?
  2. Quan dicen “modalidatz lingüisticas” se suposa que tamién as d’o castellán? Remeren que aquí en castellán decimos “encorrer” u “sondormir” encara que no sigan normativas en a imposición d’a RAE
  3. Quan dicen que i habrá una “Academia aragonesa de la lengua”, a que luenga se refieren? Quantas luengas tenemos os aragoneses? 1, 2, 3, 150, 1.300.000?
  4. Quan dicen que guaranciarán o dreito a l’amostranza d’as “modalidatz lingüisticas” en ferán un manual ta cadaguna d’ellas, ye dicir, un ta cadagún d’os aragoneses?
  5. Quan dicen que l’aragonés ye “lengua aragonesa propia de las áreas pirenaica y prepirenaica con sus modalidades lingüísticas” y que o catalán ye a “lengua aragonesa propia del área oriental de la comunidad con sus modalidades lingüísticas”, por qué no aclaran que o castellán ye a “luenga aragonesa propia d’a zona central, occidental y meridional d’Aragón con as suyas modalidatz lingüisticas”?
  6. Quantos diners paga o gubierno d’Aragón ta las institucions foranas “impuestas desde fuera” como la RAE u l’Instituto Cervantes?
  7. Sinyor Callizo. Vusté que charra aragonés d’Echo, u siga, fabla chesa, y que diz que se puede entender con qui charra aragonés d’a Ribagorza, como ye que agora s’ha ixublidau de fer-lo? Ha perdiu a suya luenga materna? An l’ha tresbatiu? En bell foradet?
  8. Quan dicen que a lei anterior yera impositiva, en que articlo concretament yera impositiva?
  9. Quan dicen que “queremos hablar de lo que nos une y no nos separa”, a que se refieren? A inventar-se luengas ta separar-nos d’a resta d’a romanistica? U quieren decir que lo que mos “une” ye nomás a luenga castellana, que de botiboleyo s’ha convertiu en a suya luenga principal, encara que vusté sinyora Serrat siga de Ripoll y vusté sinyor Callizo d’Echo?
  10. Como tendran a partir d’agora a cara de charrar d’esfender o patrimonio cultural aragonés, vusté, consellera de Cultura y vusté, Director Cheneral de Patrimonio, quan acaban de prebar d’acotolar una d’as luengas en más periglo d’extinción d’o mundo, como diz a Unesco?
Puedes dejar una respuesta, o un trackback desde tu sitio.

3 Respuestas to “Preguntas ta Serrat y Callizo”

  1. Bitacoras.com says:

    junio 20th, 2012 at 12:20

    Información Bitacoras.com…

    Valora en Bitacoras.com: Dolores Serrat (debant) y Javier Callizo (dezaga) Como no podié estar en a rueda de prensa que fación istas dos presonas l’atro diya ta presentar o suyo prochecto de lei de no-luengas, que podetz consultar en Arredol, y q……

  2. Chuan Chusé Bielsa says:

    junio 21st, 2012 at 15:10

    Chorche:
    muitas grazias por o tuyo gran treballo a favor de l’aragonés, por o tuyo exemplo y a tuya dignidà.
    Solamén puedo dizir que t’admiro profundamén. O tuyo esprito amplo y a tuya luita pazifica sin de sectarismos por lo que creyes ye d’acobaltar.
    A millor Lei de Lenguas ta ista tristisma tierra serba ista: ¡que esistisen milenta personas como tu luitando por Aragón con a dignidà con la que tu lo fas! Bien poqueta cosa podemos asperar d’os politicos d’ista  pobra tierra, y no ferán pon por l’alma d’Aragón que son as suyas lenguas bernaclas, pero de personas como tu sí asperamos cosas,  porque de l’árbol bueno perén s’asperan cada añada buenos fruitos. Sin personas como tu muito lugo rematarán as cullitas, ta cutio.
    Y si bel día comprensiblemén rematasen canso de tanto luitar contra tanta desinchustizia, ya tot lo que has feito merexe todas as grazias y l’admirazión d’o mundo. O tuyo exemplo aquí remane.
    Sisquiá fueses politico ta rechenerar ista tierra aragonesa plena de vereno. Sisquiá la tuya rasmia se  tornase en simién escampando-se por os sulcos crebazatos por a sequera eterna d’ista tierra. Sisquiá o  tuyo sentimiento de libertà s’escampe más y más por os zielos, que se torne en a más amorosa d’as plevias, que siga goyo y asperanza ta iste yermo.

  3. Chorche says:

    junio 21st, 2012 at 15:26

    Muitismas gracias, Chuan Chuse! m’has deixau con a boca ubierta y no tiengo nian parolas ta responder o tuyo carinyo! Totz femos o posible por ista luenga nuestra, dende la poesía como tú, dende a comunicación como yo, y dentre totz no imos a deixar que mos faigan callar. Muitismas gracias.

Dixa un comentario