Leyer más, saber más

domingo, diciembre 18, 2011 10:56
Publicado en la categoría prexinando, purnas

Iste anyo o premio d’as letras aragonesas ha siu ta Ignacio Martínez de Pisón. Nunca no heba leyiu cosa d’ell. No por manca d’intrés, pero si porque siempre que prebaba de leyer bella cosa d’ell, a la fin trobaba atro libro que me trucaba más o ficacio.Leyendo istos diyas datos biograficos d’ell he parau cuenta que bi’n ha cosas que compartimos, como a rilacion con Logronyo, estudiar en os chesuitas, a vida en Barcelona, como tantos atros aragoneses…

Aproveitando o premio, y un d’ixos sabados que pasan de corriu entre resaca, conversas y café, a la fin m’amané ta “Enterrar a los muertos”, que no ye una novela, sino lo que definen como “a suya obra más ensayistica”, y an que traza o recorriu de l’asesinato de José Robles por os comunistas mientres a guerra espanyola y o siguimiento d’o caso que fació John Dos Passos en calidat d’amigo presonal de Robles, traductor, escritor, hombre de letras.

Cal dicir que ye una obra bien documentada, bien narrada, y que, de feito, ha aconseguiu que leyese sin aturar dica o cabo. Pero lo más important que m’ha feito lo libro ye tornar a ubrir finestretas trancadas. Por “Enterrar a los muertos” amaneixen una serie de presonaches apegaus a o mundo d’as letras, que estudean luengas por vicio, que leyen, releyen y s’estudean uns a atros, que esnavesan por o mundo entre libros y escritos, que escriben y que s’escriben.

Y ye tota ixa ripa de presonaches a que ha feito que quan he zarrau o libro iste maitín, en que he maitinau sin obligación, ta rematar de leyer-lo, a que ha feito un clamamiento en o mio esprito. M’han veniu as ganas de leyer más, de saber más, d’escribir más, d’estudear más. Leyendo sobre as trayectorias vitals d’ixa chent he parau cuenta de totas as cosas que encara no se, as que encara no he leyiu, os clasicos que no he ubierto, o conoiximiento que s’eslampa de yo por manca de tiempo. Remero qui una vegada fació una lista con totz os libros que s’heban de leyer sí o sí, y que teneba intinción de fer-lo en o esnavesar d’a vida. Puestar yo no faiga ixa lista, pero si que he d’emplir foraus en as mias letras. Puestar no tienga tiempo agora ta estudear atra luenga, pero me’n tornan as ganas. Puestar tampoco no tienga tiempo ta tornar ta la Universidat, porque as amostranzas que más m’intresan no pueden fer-se a distancia, pero quedan apuntadas en o “debe” y de feito ya m’he mirau o que quiero fer, estudear y leyer…y saber.

Porque como deciba Don Quijote “el que lee mucho y anda mucho vee mucho y sabe mucho”.

Puedes dejar una respuesta, o un trackback desde tu sitio.

2 Respuestas to “Leyer más, saber más”

  1. Bitacoras.com says:

    diciembre 18th, 2011 at 10:58

    Información Bitacoras.com…

    Valora en Bitacoras.com: Iste anyo o premio d’as letras aragonesas ha siu ta Ignacio Martínez de Pisón. Nunca no heba leyiu cosa d’ell. No por manca d’intrés, pero si porque siempre que prebaba de leyer bella cosa d’ell, a la fin trobaba a……

  2. Raúl says:

    diciembre 18th, 2011 at 23:48

    Su última novela es fabulosa. 

Dixa un comentario