A mia biblioteca

sábado, julio 2, 2011 18:41
Publicado en la categoría prexinando, purnas

 

 Anviesta dende a Staatsbibliothek zu Berlin

Anviesta dende a Staatsbibliothek zu Berlin

Una vegada dentre en una biblioteca. Yera chicorrona, bien endrezada, con bells armarietz que no rispondeban a lo que meteba en os suyos letreros, pero an que podebas trobar tota la sabiduria d’o mundo. En totas as luengas d’o mundo, mesmo en as que no s’escriben. Con totz os suenios que uno ha puesto tener nunca. Con totas as letras y tipos y alfabetos que en o mundo han esistiu.

Quan i dentre, sabeba que no seria facil salir-ne. No yera que querese salir, ye que sabia que nunca no podria. Me facie ascape con o carnet d’usuario, y prebaba de ir un ratet cada diya. En salir d’o triballo, antis de chentar, dentre programa y progama de television. As mias horas s’eslampaban, sin de machia, fendo gambadetas por os corredors, tocando totz os libros, mesmo cambeando libros dentre repalmars porque m’aganaba.

Prebe d’atras bibliotecas tamien. Prebaba de escar libros que sabeba que yeran en a mia biblioteca por saper si yera millor que no pas a mia. En trobase u no, a mia biblioteca yera muito millor en o mio esmo, t’as mias neuronas. Dentre os suyos pasiellos podeba saltar d’epoca en epoca, podeba correr dentre versos y mesmo plorar dentre os libros quan bella cosa me plegaba ta l’alma.

Quan me facie o carnet, me dicion que estaria ta cutio, que no teneba calendata de fin d’achuste, que podria dentrar-ie cada vegada que querese. Pero ve-te-me que un diya, quan prebe de dentrar-ie a puerta yera trancada, y encara que facie un poder ta empentar-la, estirar-la, mover-la…a puerta no dio sinyals de poder-se mover. A man cucha d’a puerta, en un cartelet escrito a man, con tinta verda, deciba que quedaba suspendida a dentrada a tota chent, que una corporacion heba mercau os dreitos d’emplego d’a biblioteca y que no dixaban que ningun no tocase os libros suyos.

Estricalle o carnet que m’heba feito feba anyos y marche ta casa a mirar as mias opcions. Enample a rechira por as bibliotecas d’a ciudat, d’a redolada, d’o pais, dentre a totas as que podie escando ixos libros que nunca no podria uellar. Agora ya fa un tiempo que nian dentro a las bibliotecas. A garra d’ellas. As imachens que teneba d’a mia biblioteca s’esbafan ya d’a ment mia, pero cada vegada que paso por aman de cualsiquier biblioteca una punchada de dolor me viene remerando aquella biblioteca chicorrona sabendo que nunca no trobare un puesto igual ta dixar paseyar os uellos por entre fuellas enquadernatas.

Puedes dejar una respuesta, o un trackback desde tu sitio.

2 Respuestas to “A mia biblioteca”

  1. Bitacoras.com says:

    julio 2nd, 2011 at 18:45

    Información Bitacoras.com…

    Valora en Bitacoras.com:   Anviesta dende a Staatsbibliothek zu Berlin Una vegada dentre en una biblioteca. Yera chicorrona, bien endrezada, con bells armarietz que no rispondeban a lo que meteba en os suyos letreros, pero an que podebas trobar tota……

  2. Xavi Alberich says:

    agosto 16th, 2011 at 13:07

    me fa molto gota  ista  bello rezento  . ye  leyo toz  os tuyos  escritos  me pareixen interesants  

Dixa un comentario