D’a violencia

jueves, junio 16, 2011 12:42
Publicado en la categoría purnas

Os incidents de Barcelona en a dentrada d’o Parlament catalan han feito correr rios de tinta y han dixau en o segundo plano l’important. Que os presupuestos d’o pais vecin retallan 2800 millons d’euros, muitos d’ells en politicas socials. De feito, as portaladas d’os diarios, as declaracions institucionals y mesmo os editorials d’os periodicos charran d’a violencia y no pas d’as retalladas.

Asinas que amas de estar indinno y condenable l’emplego d’o lapo como arma politica, empentar y prebar de furtar un can a un ciego, y en cheneral l’actitut de bells d’os manifestans ahiere, estio una error estratechica porque no nomas no aturoron os presupuestos, que amas, han feito campanya contra ells mesmos y han feito amagar o problema prencipal, que estioron as retalladas en o presupuesto.

Y digo tot ixo con as sinceras dubdas sobre l’actuacion policial, reflexada en iste video que facioron mover ahiere por os retes socials.

Disociando o que dicire ahora d’o que paso en Barcelona, ahiere ya me feba atra mena de reflexion. Ye posible un cambeo sistemico sin garra violencia? Preguntaba en twitter si heba habiu garra revolucion (y quan digo revolucion charro de cambeo de paradigma politico) sin garra violencia? Ye posible cambear o sistema dende dentro d’o sistema sin apelar a la tension y a o conflicto? Ye posible concarar con flors y mans blancas un sistema que tien a lechitimidat de l’emplego unico d’a violencia?

Conste que son preguntas retoricas, d’historiador, y no pas de politico. Conste que no foi garra clamada ta la violencia. Conste que nomas riflexiono sobre as posibilidatz d’as “revolucions” pacificas.

Presonalment no lo creigo, y a historia lo contrimuestra. De feito, a zaguera vegada que se prebo de cambear o sistema economico mundial estio dende dentro, en ixas reunions d’o G-20 y o FMI dimpues d’a esclatada da crisis en 2008. Tos remeratz? Ixe cambeo proposau dende dentro d’o sistema por a chent que suposadament gobierna o sistema estio un fracaso y ha quedau en augua de borrainas. Tamien o filosofo frances Bensaïd ye d’ixa opinion. Os sistemas no cambean dende dentro, puestar que evolucionen una mica pero en as suyas radices contienen as mesmas contradiccions internas que los fan inchustos. Y soi charrando en cheneral. Paso lo mesmo con o sistema sovietico, con l’actual mercau mundial y mesmo con l’imperio romano. Tot funciona bien ta bells pocos o ta bells muitos, dica que plega un antagonismo interior y/u exterior.

Ye por ixo que os exemplos clasicos de revolucions pacificas, de cambeos pacificos, no lo son guaire. Ahiere mesmo se planteyaban istos exemplos en twitter, a revolucion d’os clavels en Portugal, Ghandi en a India, Mandela en Sudafrica, as revolucions arabes d’istos meses, mesmo a Marcha Verda marroqui u l’exemplo de Lech Walesa en Polonia.

En tot istos casos ye dificil creyer, fuera d’a “propaganda” historica, en o triunfo por mans blancas.

A revolucion d’os clavels partio de parti de l’exercito, que, con armas ocupo edificios civils y melitars. Estio un golpe d’estau pero en a endrecera “correcta”, y contaba amas con un rechimen que ya s’heba feito prou feble. Asinas que no habio guaire violencia, pero porque os que lechitimament la teneban como parti de l’estau estioron os que primer se rebelaron.

Lo mesmo puede dicir-se d’a Marcha Verda marroqui, con a presencia de l’exercito marroqui y a fuyida de l’exercito espanyol, ricient muerto o chefe de l’estau y dictador en os 40 anyos anteriors.

Mientres que Ghandi feba as suyas vadas de fambre y os suyos clamamientos independentistas, en amplas zonas d’o pais se combatiba con armas, muerte y sangre. En os zaguers anyos como colonia y primers como pais independient murioron mas de 10.000 presonas en as luitas relichiosas y en combates con l’exercito angles colonial y os cipayos. Tampoco cal xublidar que si as luitas en a India plegoron ta buen puerto estio tamien fruito d’a feble situgacion anglesa dimpues d’a II Guerra Mundial que sinnifico o prencipie d’a descolonizacion masiva en Africa y Asia.

Mientres Mandela pasaba anyos en a carcel, a presion esterna y as constants rebelions no guaire pacificas en os ghettos sudafricans facilitoron o cambeo de paradigma…Walesa no triunfo dica que la Union Sovietica dixo d’esistir, como os procesos independentistas en os paises balticos y en atros paises d’Europa de l’este. Cuantos muertos han habio en Egipto y Tunez (y no nomas manifestants) dica que Mubarak y Ben Ali han marchau? Quan marchara Assad en Siria mientres ell mata manifestants y os rebeldes policias? Y Gaddaffi? Y a guerra civil que son vivindo refirmada por a OTAN y paises como Espanya, porque a rebelion pacifica no dio fruitos? De feito, os mesmos que condenan a violencia d’ahiere son refirmando a luita d’os rebeldes libios.

Chustifica tot isto a violencia d’ahiere en Barcelona? No. Ye posible cambear o sistema dende dentro d’o sistema? Tampoco no. Cal una riflexion serena sobre isto. Cal pensar que ye aceptable y que no pas. Cal pensar si o Parlament (no nomas o catalan) con totz os problemas derivaus d’as leis electorals ye a voz d’o pueblo u no pas. Cal pensar si iste sistema ye o millor d’os posibles, ye millorable u simplament cal estricallar-lo.

Pero lo que no cal ye o maniqueismo que aventura tot a lo blanco u lo negro. Tot tien os suyos grisos. Y os medios, y os pensadors, y os politicos, y os “indignados”… habrian de saper trobar istos grisos ta que feitos condenables como los d’ahiere no rematen estando antimas, una error estratechica, como ya ha pasau.

Puedes dejar una respuesta, o un trackback desde tu sitio.

2 Respuestas to “D’a violencia”

  1. Bitacoras.com says:

    junio 16th, 2011 at 12:46

    Información Bitacoras.com…

    Valora en Bitacoras.com: Os incidents de Barcelona en a dentrada d’o Parlament catalan han feito correr rios de tinta y han dixau en o segundo plano l’important. Que os presupuestos d’o pais vecin retallan 2800 millons d’euros, muitos d’ell……

  2. Raúl says:

    junio 16th, 2011 at 13:11

    Gunther Anders escribió un librito sobre la necesidad (o no) de la violencia

    http://www.nodo50.org/tortuga/Gunther-Anders-La-unica-salida-es

    Lamentablemente, las revoluciones (y muchas reformas) son sangrientas; si no hay sangre, sólo hay maquillaje. Decir que se pueden cambiar las cosas sin violencia es una estrategia para que no cambien. 

Dixa un comentario