Eleccions 2011 en Purnas.com (bellas conclusions)

miércoles, junio 1, 2011 15:13
Publicado en la categoría purnas

Como ya dicie en o suyo diya a mia intincion yera entrevistar a totz os candidatos d’os partius parlamentarios a o Gobierno d’Aragon. Sin emplegar os recursos como triballador d’a television publica dende o primer inte prebe de contactar con totz ells por os retes socials. Asinas que plega hora de esplanicar como estio a comunicacion con totz ells.

A travies de twitter me metie en contacto con as cuentas de Nieves Ibeas, Luisa Fernanda Rudi, José Ángel Biel y Eva Almunia. No con Adolfo Barrena que creyo a cuenta dimpues d’a entrevista y habie de recurrir a o contacto a travies d’o suyo blog. Por o propio emplego que feban antis d’as eleccions os esferents politicos o primer politico en contestar estio José Ángel Biel, prou activo en Internet, dicindo que no heba garra problema y que prebarian de fer-me un forau en l’achenda. Poco dimpues Nieves Ibeas contesto en o mesmo sentiu y una mica más entabant Eva Almunia.

Pero a primer entrevista estio la que facie a Adolfo Barrena, que contacto con yo directament por telefono ta concretar una data, y una semana dimpues l’entrevistaba en as Cortes. Dimpues d’ixo, dende a cuenta Twitter de Luisa Fernanda Rudi tamien me contestaban dicindo que prebarian de fer posible a entrevista.

En as semanas siguients podie entrevistar a Nieves Ibeas y dimpues a José Ángel Biel, unico a qui entreviste difuera d’as Cortes. Atamas d’as intincions d’Almunia y Rudi, y una vegada prencipiada la campanya, no podie entrevistar a denguna d’as dos prencipals candidatas a o gobierno.

Ye esclatero que o poder comunicativo d’un blog como iste ye limitau (nomas faltaria), por muitas razons, y dentre atras, a luenga. Tamien ye posible fer a conclusion de que quan os partius son mas chicotz, ye mas facil comunicar con ells, y son mas ubiertos a planteyar-se scenarios de comunicacion esferents como entrevistas con un bloguero en concreto. De feito, as tres entrevistas estioron marcadas por a cordialidat, encara que bellas preguntas u rispuestas podesen replecar-se como “complicadas”.

Quiero fer tamien una chicota reflexion sobre a campanya 2.0. As eleccions d’iste anyo han estau marcadas por a politica espanyola, mas que mas, y por as acampadas en as plazas, mas por o primer, que por o segundo afer, fueras d’a contina presencia en os informativos d’as acampadas en a zaguera semana de campanya. Pero creigo que no han estau marcadas por a politica comunicativa en internet. Ni as estratechias en tiempo, ni a presonalizacion d’os tuitz han feito que se tresbatan u ganen prou votos ta decantar unas eleccions. Puestar que isto cambee en un futuro no muit luen, ye mas que probable, pero por l’inte, en Aragon, Internet no ha estau o campo de baralla prencipal, como tampoco no creigo que haiga estau en os debates televisaus (a 2 y a 5) en a television por l’inte semipublica.

En tot caso, cal agradexer a os politicos que se dixoron entrevistar y a os lectors d’os posts que surtioron d’ixas entrevistas, porque ta yo ha estau un placer poder fer ixas entrevistas fueras d’o mio triballo, y por primera vegada dende iste blog que va por o suyo ueiteno anyo.

Puedes dejar una respuesta, o un trackback desde tu sitio.

Una respuesta to “Eleccions 2011 en Purnas.com (bellas conclusions)”

  1. Bitacoras.com says:

    junio 1st, 2011 at 15:18

    Información Bitacoras.com…

    Valora en Bitacoras.com: Como ya dicie en o suyo diya a mia intincion yera entrevistar a totz os candidatos d’os partius parlamentarios a o Gobierno d’Aragon. Sin emplegar os recursos como triballador d’a television publica dende o primer inte ……

Dixa un comentario