Una atra anviesta sobre as acampadas

sábado, mayo 21, 2011 12:14
Publicado en la categoría purnas

Asambleya popular

Asambleya popular

Con os mesmos dandalos que l’atro diya, quereba huei amostrar l’atra cara d’istos diyas. A cara d’a esperanza. A cara de totz ixos chovens y no tant chovens que han saliu t’as carreras a amostrar que no mos ripresentan. Que l’esdevenidero lo construyimos nusatros, votando u sin votar, pero participando. Dicindo cosas variadas. Uns que quieren triballar mas anyos, atros menos. Uns que asperan un mundo de flors y atros que sapen que o mundo ye mas duro que ixo. Uns que creyen en a mosica y atros en as parolas. Totz, sin dembargo, con a necesidat desincusable de cambeos estructurals y vitals. Me trobe tanta de chent conoxita de tantas guerras esferents, d’o triballo, d’as luitas nacionals, d’as luitas obreras, d’os estudeos, d’a carrera, d’as borinas…que me sentie privilechiau de vivir una cosa asinas tant alcompanyau por o pasau, o present y o futuro.

Si no s’esbafa lo gas d’as emocions d’ahiere, puestar que muitos d’os que yeranos fendo rudio a las 12 d’a nueit como simbolo de que queremos cambear continemos en a luita diya a diya por levar o cambeo en a nuestra vida y en a nuestra sociedat. Ahiere o rudio yera d’asperanza. Ahiere me veyie con 18 anyos salindo a la carrera ixas primeras vegadas, quan os zapatistas se debantaban, quan os chovens yeran ficaus en a garchola por no querer portar un arma en l’exercito espanyol, quan se mos empliba l’esmo de parolas de revolucions, cambeos, igualdat, chusticia y libertat. Ahiere veyie o mio rostro en muitos atros rostros. Ahiere veyie tamien chent, como yo, d’a mia cheneracion que mos miraba-mos emocionaus porque como ya sabebamos no tot ye tresbatiu.

O mundo nuevo ixe que deciba Durruti camin de Zaragoza yera ahiere tamien en os corazons de muita chent. Puestar que ixe mundo nuevo no siga lo mesmo ta totz. De seguras que os camins de totz pasan por esferents puestos, pero ya plegara l’hora de pensar en ixo. Puestar que en haiga muitos futuros esferents en os prexins d’a chent, pero lo que si ye comun ta totz, ye que asinas no podemos continar. Encara ye tot por fer. Como siempre. Cal continar construyindo-nos.

Puedes dejar una respuesta, o un trackback desde tu sitio.

Una respuesta to “Una atra anviesta sobre as acampadas”

  1. Bitacoras.com says:

    mayo 22nd, 2011 at 15:04

    Información Bitacoras.com…

    Valora en Bitacoras.com: Asambleya popular Con os mesmos dandalos que l’atro diya, quereba huei amostrar l’atra cara d’istos diyas. A cara d’a esperanza. A cara de totz ixos chovens y no tant chovens que han saliu t’as carreras a amostrar q……

Dixa un comentario