Spanish revolution

miércoles, mayo 18, 2011 17:34
Publicado en la categoría purnas

Dende o zaguer domingo levo pensando y repensando sobre o que ye pasando en as plazas d’as ciudatz espanyolas y tamien en as aragonesas. No soi yo de facil adibir-me a cosa y me fa goi pensar-me as cosas, pensar as causas y os achents que propician qualcosa. Soi de tanto pensar que me costo asabelo parar cuenta d’o que yera pasando en os diyas que fuoron de l’11 t’o 14 de marzo. Soi de tanto pensar que ista nueit quasi no he dormiu repensando-me as teorias y as practicas que han estau cutianas en yo dende que teneba 16 anyos. As luitas, os intes, os companyers…

Fruito de tot ixe repensar han estau os tuitz que he veniu fendo tot iste maitin, bells comprendius, atros no tanto, bells han chenerau tertulia y atros nomas disprecio, atros han chenerau intres y atros han adibiu chent a las mias dubdas. Reconoixco que se me fa rarizo no partecipar en o proceso que se ye fendo. Reconoixco que me pueden mas as dubdas que as seguridatz. Reconoixco, por fin, que me fa rabia pensar que muitas d’as cosas que ne son reclamando agora con o foco mediatico son as mesmas que hemos reclamau atras chents sin garra refirme d’a masa y profes sin a repercusion que agora tien o que ye pasando en plena campanya que dicen electoral.

Dende que prencipio o mio caminar politico conscient, siempre he sabiu con qui, como y ta que luitaba. Con os insumisos, con o 0,7, con as luitas por a tierra, contra o trescole, por a soberania, por a chusticia social…siempre bi’n heba un “ta qué” y una chent reconoixible. Y agora me cuesta replecar o que ye pasando porque no reconoixco a la chent y bella chent que reconoixco no me fa onra como companyera de viache.

Reconoixco as proposas de Democracia Real ya como muit amanadas a lo que siempre he creyiu, pero no se interpretar porqueagora y porque no antis. No me valen os retes socials, que ya esistiban o zaguer anyo, ni me vale o cansancio y o fastio cheneral, que tamien reconoxeba antis, en a vada cheneral, por exemplo, en l’atra manifestacion. No me vale o fastio contra os sendicatos, porque yo milito en un que no ye como os que dicen “os sendicatos”, ni an en os partius politicos, porque yo ya no lis voto pero me siento ripresentau por colectivos politicos que fan atra mena de politica y an no s’han amanau muita d’a chent que agora chila o mesmo que nusatros.

Puestar porque veigo en bellas concentracions caras que se o que buscan, pero no remato de veyer atras que me ilusionaria veyer. Puestar porque o que proposa No les votes no ye o mesmo que proposa Democracia real, ya y me se fa rarizo veyer-los chuntos (que no á ixena). Puestar porque en garra d’as cosas que siento remato de veyer planteyamientos que s’amenistan en iste estau que dicimos Espanya. A lo mio chudicio, cualsiquier reforma ha de planteyar-se o problema territorial amas de tota la resta de cosas que se planteyan.

Puestar porque planteyar una reforma electoral no ye atacar o problema de radiz, porque una reforma electoral que contine dixando a economia en mans d’o mercau nomas fa que perpetuar os problemas basicos: l’ature, o desembolic insostenible, o pre d’a vivienda, a manca de dreitos socials y laborals.

Pero no tot son dubdas. Reconoixco a enrestida d’os chovens. Reconoixco a ilusion d’os que salen ta la carrera. Reconoixco que s’amenista un cambeo. Reconoixco que puestar que isto nomas siga un trango que remate ilusionando-me atra vegada. Reconoixco que s’amenista la empenta de tota una sociedat ta charrar d’una revolucion. Reconoixco tot lo que diz Raul en o suyo blog y lo foi mio. Reconoixco que me fa goi veyer a nueva chent en a carrera planteyando y concarando os problemas que todas as cheneracions en teniemos antis. Reconoixco que soi un mar de dandalos y charrar con totz vusatros ahiere y huei me ye aduyando en o camin…

Puedes dejar una respuesta, o un trackback desde tu sitio.

5 Respuestas to “Spanish revolution”

  1. Bitacoras.com says:

    mayo 18th, 2011 at 17:42

    Información Bitacoras.com…

    Valora en Bitacoras.com: Dende o zaguer domingo levo pensando y repensando sobre o que ye pasando en as plazas d’as ciudatz espanyolas y tamien en as aragonesas. No soi yo de facil adibir-me a cosa y me fa goi pensar-me as cosas, pensar as causas y……

  2. César Lasanta says:

    mayo 19th, 2011 at 22:48

    Buena reflexón. Ya me cuacaría a yo poder espresar así os míos prexinallos…
    Como he dixau escrito n’o blog de Itaca, a clau ye que la chent faiga uso d’a propiedat d’o suyo voto. Cal dar-le “valura añadida”. Si solo que votas a los tuyos, o tuyo voto no’n tiene de valura. Y si no yes capaz de votar a atros, tampó no.
    Per atra parti, perdona-me que gose, creigo que tiens que aprender que la democracia cal que esfenda-mos totz. Os ciudadanos tenemos o deber de fer o control a os politicos. L’arma de control se diz “voto”. Por tanto, izquierdas, dreitas, centros, apoliticos, simpaticos y carrañaus, totz chuntos esfensando lo común a totz. Que hué estaremos chuntos y maitín enfrente, ixo no’n te debe dar cosa. Esto ye democracia. L’atro ye guerra. Una guerra n’a que no ganas tú, ni l’atro, sino los politicos, que se achustan entre ells, porque total, os votos siempre van a ser os mesmos, y nunca mos achuntaremos….
    Hué en twitter he leyiu a uno que deciba que se n’ba de l’acampada porque os de cuchas estaban tomando las riendas. Yo le he respondiu que tornase, que hi era necesario. Que teneba que espresar tamién su opinión. Hué ye lo que toca. Primer faigamos limpia, dimpués ya veremos democraticament as fuerzas de cadaún.

  3. César Lasanta says:

    mayo 19th, 2011 at 22:50

    Y esta ye la oportunidat para los sindicatos chicorrons, os movimientos ciudadadans indepedients, etcetra…

  4. Chorche says:

    mayo 19th, 2011 at 22:52

    No votar ye una opcion. Y a suya valura adibida ye fer politica tota la resta de l’anyo. Votar “a lo menos malo” ye pervertir o mio pensamiento y a luita de muita chent. Ixo lo tiengo prou esclatero. 🙂

  5. Una atra anviesta sobre as acampadas | Purnas en o zierzo says:

    mayo 21st, 2011 at 12:15

    […] os mesmos dandalos que l’atro diya, quereba huei amostrar l’atra cara d’istos diyas. A cara d’a esperanza. A cara de […]

Dixa un comentario