Falsa democracia; falsas ainas de control

jueves, enero 27, 2011 19:58
Publicado en la categoría purnas

Cuan os politicos que mos gobiernan quieren fer veyer que tot ye baxo lo control d’o pueblo gosan dicir dos cosas, alacetalment. Una, que estaran as urnas as que diciran qui tien razon. Atra, que se creyara una comision de control u que tecnicos independientz s’estudiaran o caso. En os zaguers diyas hemos visto, unatra vegada, que las dos son falsas. Mas que mas ixa segunda.

Tenemos o caso en Zaragoza d’o resultato d’os estudios d’o Tribunal de Cuentas sobre a chestion monecipal d’a feria ixo que dicion Expo 2008. O Tribunal creye contrimostrato que a chestion estio un desastre, que en habio sobrecargos inchustificaus, que se bosoron diners d’unas partidas t’atras sin chustificar, que en habio fundos economicos que nunca no se endrezoron ta lo suyo fin orichinal. Iste ye l’informe orichinal (en PDF), por si querez leyer-lo.

A rispuesta d’os chestors monecipals, con l’alcalde Belloch en capeza, y seguiu d’aman por Gimeno ha estau descalificar a qui fa l’informe y no pas contrimostrar que ixas cuentas son mentira, puestar porque no en pueda, ye esclatero. A chestion d’a Expo y d’a post-expo ha estau mas plena de huembras que no pas de luces, atamas d’o que digan os ripresentantz politicos d’a ciudat, que refirmoron totz a feria y que agora, bells dende a oposicion, antis en o gobierno, o viceversa, estioron colaboradors d’ixa chestion. A custion no ye, pues, ta os nuestros politicos que diz l’informe d’un Tribunal que ya estudeo lo caso, por exemplo de d’a Expo de Sevilla (por mas que Gimeno diga que no).

L’atro caso ha estau l’informe d’o CEDEX sobre os riesgos de construyir l’entibo de Biscarrues. O Cedex, que ye un organismo autonomo ta la edificacion civil, dicio en un d’os suyos informes que construyir Biscarrues yera perigloso, amas de no chustificable, ni necesario. De feito, recomendaba no fer ixa presa y desestimar l’entibo. A rispuesta d’o gobierno d’Aragon PAR-PSOE, d’os regantz, d’o PP y d’IU no ha estau  pas contrimostrar si s’amenista Biscarrues, u si ye poco perigloso, u mesmo si no prechudica dengun. Han feito l’usual en istos casos. Prebar d’asesinar o mensachero. Dende “extralimitados” como lis diz o vicepresident Biel, mesmo “ecolochistas radicals” que ha dito o consellero Arguile. Garra argumentacion util ta entender que pasa con ixe entibo.

De feito, o vicepresident Biel ye mas alticamau por o feito que s’haiga filtrau l’informe que no pas por o suyo conteniu, por o que ye de dar que esiste a posibilidat de que ya conoxeban iste informe y que ya heban feito presion ta que no se dase a conoxer. Como agora han feito presion ta que la propia ministra de meyo ambient haiga ya dito que “Biscarrues superará pronto la declaración de impacto ambiental“, pasando-se por l’arco de triunfo os informes tecnicos negativos, d’uns tecnicos que amas de ecolochistas radicals, s’extralimitan en as suyas funcions y mesmo be-den tener familiars controladors aereos.

Y asinas va la cosa, que cuan ye cosa d’entibos a o gobierno d’Aragon y a ixe que dicen Ministerio de Meyo ambient se lis cayen totz os complexos, y con as obras aturadas de Mularroya por a chusticia, encara son fendo obra, tallando pins y seguindo, china chana, como si o chuez estase tamien un ecolochista radical, que, dentre porro y porro, dicta sentencias ta que no se cumplan.

ps. Trasobares huei ha feito pleno con o suyo articlo: “Obsesión por los embalses

Puedes dejar una respuesta, o un trackback desde tu sitio.

3 Respuestas to “Falsa democracia; falsas ainas de control”

  1. Bitacoras.com says:

    enero 27th, 2011 at 20:04

    Información Bitacoras.com…

    Valora en Bitacoras.com: Cuan os politicos que mos gobiernan quieren fer veyer que tot ye baxo lo control d’o pueblo gosan dicir dos cosas, alacetalment. Una, que estaran as urnas as que diciran qui tien razon. Atra, que se creyara una comision de ……

  2. Demana a la ministra que ature a obra de Biscarrues | Purnas en o zierzo says:

    febrero 4th, 2011 at 10:56

    […] tota la presion que ye fendo o gobierno d’Aragon, seguiu por PP y IU, asinas como os regants, cal demanar a la ministra que faiga caso d’os informes tecnicos que […]

  3. Resumen d’o 2011 en purnas.com | Purnas en o zierzo says:

    diciembre 29th, 2011 at 11:38

    […] 27: Falsa democracia; falsas ainas de control […]

Dixa un comentario