Estar pai

miércoles, enero 26, 2011 23:49
Publicado en la categoría prexinando, purnas

De vegadas, cuan yera mas chicorron me veyiba a istas altarias d’a vida fendo de pai, como veyiba a o mio pai fendo-ne. Quereba tenir un fillo que criar, a qui amostrar a vivir. Quereba que m’ascuita-se charrar en ista chicota luenga como el yera, en o mio prexin, de chicot. Quereba que veye-se chugar a o Zaragoza, que chilase con yo os gols, como yo chilaba os gols de Señor, Amarilla, Ruben Sosa, Garitano, Pardeza y tantos atros con o mio pai. Tan igual me se feba que estase nino u nina.

Quereba amostrar-li a leyer, a que sentise goyo d’os libros, d’os de paper allora, y suposo que agora tamien. Quereba leyer ta ell as falorias que o mio pai me recentaba. Quereba fer d’ell una buena presona, que sentise as dolors d’os atris, que sentise como a suya ment y o suyo cuerpo s’esbarizaban amonico, china chana, enta la solidaridat, enta la luita contra as inchusticias d’iste mundo. Quereba fer que o suyo riso s’estendillase dende casa nuestra dilla lo mundo, enta l’universo escuro y fredo an li podeba sinyalar, un a un os estrels, con os suyos nombres y as suyas leyendas. Quereba amostrar-li as cantonadas d’ista ciudat mia, os paisaches d’iste pais nuestro, d’os paises d’aman y de luen. Quereba que aprende-se a aimar as esferencias, a fer chuegos de parolas ridiculos, a aimar o luengache, as luengas, o pais, os camins, o cierzo.

Tot ixo quereba fer cuan veyiba a o mio pai, y a la mia mai, fendo ixo mesmo con yo, que allora nomas yera un prochecto d’hombre. Quereba que veyese os huellos ternes d’os yayos, as risas d’os amigos d’os pais reflexadas en o suyo riso, en os suyos huellos angluciosos de saber, de veyer, d’aprender, d’aimar, de tastar, de sentir, d’estar-ie, d’estar. Tot ixo y mas cosas que me’n dixo porque as remeranzas de cuan yo quereba fer tot ixo son d’un tiempo en que o mio prexin sinyalaba l’esdevenidero.

Agora ixe esdevenidero ye present. Y encara tiengo totas ixas ganas, totz ixos deseyos, y, puestar porque mancas tu, encara son prexins, suenios…camins por fer.

Puedes dejar una respuesta, o un trackback desde tu sitio.

3 Respuestas to “Estar pai”

  1. Bitacoras.com says:

    enero 26th, 2011 at 23:52

    Información Bitacoras.com…

    Valora en Bitacoras.com: De vegadas, cuan yera mas chicorron me veyiba a istas altarias d’a vida fendo de pai, como veyiba a o mio pai fendo-ne. Quereba tenir un fillo que criar, a qui amostrar a vivir. Quereba que m’ascuita-se charrar en ista ch……

  2. Florenz says:

    enero 27th, 2011 at 10:22

    A tuya dentrada me se fa muito encertada y oportuna, amás agora que bi son destapaus asabelo de robos de ninos en Espanya, Quanta de chent no ha podito sentir cosa de totz ixos prexins que tú en tenebas y ya no podrá mai…

    Aspero qu’agora se’n faiga chusticia con ells.
    Encertau post, exprisions!

  3. Fuina says:

    enero 27th, 2011 at 11:28

    Qué parolas más polidas, Chorche!
    Un buen proyeuto d’ombre, si siñor!

Dixa un comentario