As autonomias: as (viellas) nuevas enemigas

lunes, enero 17, 2011 19:39
Publicado en la categoría purnas

Que a dreita espanyola siempre ha teniu a Constitucion espanyola como una lei de maximos y no pas de menimos ye una evidencia. Que asperaban salir d’as espelungas d’an abitaban con o chilo silenciau de “Espanya una y no cincuentauna” yera custion de tiempo. Que lo mas parexiu a un espanyol de dreitas ye un de cuchas no ye una frase bueda.

En tiempos de crisis, como iste que dicen que vivimos, as solucions siempre se prenen dende os mesmos puestos de poder que han prevocau a crisis. Aduyas a bancos y caxas, que con as suyas politicas financieras y hipotecarias han malmeso milentas d’economias familiars. Retalladas de dreitos socials, prencipalment, d’a chent a la que mas afecta a crisis prevocada por os que puyoron os pres d’as viviendas, controloron os livels de cambeo, os intreses y a chestion d’impuestos. Os mesmos que facion esclatar o mercau inmobiliario, por exemplo, son agora os que no facilitan cosa as posibilidatz ta las chicotas economias familiars.

Siguioron dimpues con a reforma laboral, empentada dende o FMI y a Union Europea controlada por a economia alemana (a unica economia que ha conseguiu salir d’a crisis, casualment, a lo gran). Anyos de luita obrera contra os abusos nuevament tiraus entazaga, y lo que encara manca. Y agora li toca a las pensions. Unas pensions que dende 1991 ya abrian d’aber crebau unas 6 u 7 vegadas y que sin dembargo, encara son con superavit, atamas d’a crisis demografica que ne dicen. Profes, a reforma d’as pensions nomas para cuenta en os triballadors “normals”. Mientres anyos grans empresas como Telefonica, u os bancos, u mesmo as Fuerzas Armadas espanyolas, han estau prechubilando a os suyos emplegaus dende os 50 anyos entavant.

O turno viene agora con o sistema autonomico. O sistema que creyo a chent que facio a Constitucion ta no ficar-se en terrenos enfangaus como un verdadero estau confederal. Profes que a reforma ira ta zaga. O PP ya ha dito que cal retallar o poder d’as autonomias. O PSOE que cal achustar-las. No son as autonomias un sistema ta esfender, de feito, pero menos encara que o suyo final u cambeo vienga imposau de camin ta un neocentralismo espanyol. Si bi ha competencias duplicadas, puestar que a solucion siga borrar ministerios buedos y no pas sacar as competencias d’as autonomias.

Y dimpues plega Aragon, an o suyo vicepresident diz que Duran i Lleida no puede dicir que nomas as autonomias de primer livel abrian de tener totas as competencias. Y puestar que no pueda dicir-lo, y menos ell. Pero si Aragon no ye una autonomia de primer livel, una autonomia que pueda competir con a resta d’as nacionalidatz de l’estau ye por o desenvolic historico autonomista aragones, en parti, por cierto, por Biel y o partiu an militaba en os primers anyos post-franquistas que viedo a posibilidat ta que Aragon estase considerada a lo mesmo ran que Catalunya, Euskadi, Galiza u Andalucia. Tres reformas estatutarias dimpues continamos en o segundo livel, y no nomas por o ran legal d’o texto, sino que tamien por a propia posicion politica d’os aragoneses que eleccion zaga eleccion continan votando a partius d’obediencia espanyola.

En iste inte historico estamos. O debate sobre a configuracion de l’estau ya ye sobre a mesa. Puestar que o viello lema de que l’autonomia que mos cal ye a de Portugal siga l’unico camin posible ta no tornar ta zaga en dreitos y poder politico. Pero tiengo as mias dudas de que os aragoneses replequen iste inte historico como una epoca de luita con o nuestro esdevenidero como pueblo como obchetivo a esfender.

Puedes dejar una respuesta, o un trackback desde tu sitio.

Una respuesta to “As autonomias: as (viellas) nuevas enemigas”

  1. Bitacoras.com says:

    enero 17th, 2011 at 19:43

    Información Bitacoras.com…

    Valora en Bitacoras.com: Que a dreita espanyola siempre ha teniu a Constitucion espanyola como una lei de maximos y no pas de menimos ye una evidencia. Que asperaban salir d’as espelungas d’an abitaban con o chilo silenciau de “Espanya una y no……

Dixa un comentario