Ye uno d’ixos diyas (bueno, semanas, millor dito) en que tot o que veigo u leigo me remera a atra cosa que leyito u visto. Si agora ixe d’asti diz “a” me remera a como fa menos d’una vida dicio “b”. Con a mesma, ixo si, rasmia y pintas de dicir cosas de verdat. Son istos diyas incoderentz, en os que amas, o paper d’a prensa s’ha retallato dica simplement fer de voceros d’os politicos, sin atrevir-se, profes que no, a concarar-los contra as suyas propias incoderencias.

Os mesmo que deciban que yera un fracaso a partecipacion d’os referendums independentistas catalans, u as mesmas eleucions europeas, agora creyen una victoria incontestable a de Santos en Colombia, encara que nomas votasen 3 de cada diez posibles eleutors.

Os meyos, partius politicos y resta de parentalla que creyen un abuso y protestan porque a cucha abertzale fese un acto en Bilbao u protestoron porque Soziedad Alkoholika tanyese en Zaragoza, no dicen cosa cuan o partiu d’ultradreita, ubiertament racista y con chent engarcholada por feitos delictius xenofobos convoca actos en Zaragoza, que son permitius por o delegau d’o Gobierno espanyol en Aragon, Javier Fernandez.

O gobierno d’Aragon que va lo mas amonico que puede con l’aplicacion d’a lei de luengas sinya un compromiso con o Ministerio espanyol d’Educacion ta amostrar espanyol en Polonia. Os que s’encarranyan porque a lei de luengas suposa gastos a lo Gobierno d’Aragon no han dito cosa d’isto, ye esclatero, ni d’o gasto compartiu ta l’Instituto Cervantes u la RAE.

Por no charrar d’os que quieren incentivar l’empleo afavorindo os despidos, pero ixe ye atro tema, que amas, ye muit bien esplanicau en iste articulo d’un blog d’Expansion.

No related posts.

Publicaciones relacionadas que recibes por Yet Another Related Posts Plugin.