Plega l’estiu y Zaragoza sale ta la carrera

viernes, junio 18, 2010 17:34
Publicado en la categoría purnas

No alcompanya l’orache, ixo ye cierto, pero ya plega l’estiu y a Zaragoza de siempre sale ta la carrera. Iste cabo de semana ye a rebutir d’actividatz, bellas paradas por o Concello y atras muitas por a chent d’os bicos. Os bicos de siempre, a chent de siempre. Ista ye a clase de cosas que me fan muito goyo d’ista ciudat. Atamas d’una cutiana sensacion de “no femos cosa”, a chent de Zaragoza s’organiza y arrocla arredol d’ideyas, de bicos, de propuestas, que femos servir ta creyar ixo que dicen ciudadania.

Dos d’os bicos mas tradicionals d’a ciudat cilebran istos diyas as suyas fiestas. O Gancho y A Madalena levan concarando-se dende fa sieglos. Y cuan digo “concarando-se” lo digo en o sentiu mas literal d’a parola. A chent d’istos bicos s’han barallau dende siempre, por l’actividat tradicional d’os suyos abitadors. Artesans y labradors, uns y atros, han teniu una competencia fura con as suyas procesions, os suyos privilechios y o suyo prestichio dentro d’a ciudat dende manimenos o sieglo XV. Encara huet cilebran as fiestas a mesma semana, fendo que o centro tradicional d’a ciudat siga plen de vida y d’actividatz. Mosica, fogueras de San Chuan, pasabillas, jotas, karaoke, baile, cine, chentas populars tot isto y mas en a Semana Cultural d’a Madalena y tamien en as Fiestas d’o bico d’o Gancho.

Graffiteyando en l'Asalto

Graffiteyando en l'Asalto

Amás d’isto, istos diyas se ye fendo o V Asalto Cultural que preba de emplir de color espacios albandonaus d’a ciudat con propuestas urbanas. A ciudat ye plena de graffiteros, mosica y atras actuacions que dan vida a espacios buedos, como l’anyo pasau se facio en a ribera d’o rio, y iste anyo se fa por as placetas d’o centro. Iste maitin, l’antiga churreria d’as murallas cambeaba de color por l’arte de tres u cuatro zagals con esprais. Tota la programacion la tenez asti en Asalto Cultural.

Y mas cosas que prencipian en no guaire tiempo, os Festivals de l’Ebro, u A la Fresca en os bicos rurals. Senyals de vida cultural dilla d’o que no parixe. Ista ye a Zaragoza que me fa goyo. Ista ye a Zaragoza en a que trigo vivir. Pero ye esclatero que cuan i manca, de vegadas, fan ganas de fuyir, pero ixo ye atra storia y s’abra de recentar a o suyo debiu tiempo.

Puedes dejar una respuesta, o un trackback desde tu sitio.

Una respuesta to “Plega l’estiu y Zaragoza sale ta la carrera”

  1. Bitacoras.com says:

    junio 18th, 2010 at 17:38

    Información Bitacoras.com…

    Valora en Bitacoras.com: No alcompanya l’orache, ixo ye cierto, pero ya plega l’estiu y a Zaragoza de siempre sale ta la carrera. Iste cabo de semana ye a rebutir d’actividatz, bellas paradas por o Concello y atras muitas por a chent d’os bic……

Dixa un comentario