A importancia d’os archivos

miércoles, junio 9, 2010 13:10
Publicado en la categoría purnas

En o Diya Internacional d’os Archivos quereba aber parau una lista detallada d’os archivos aragoneses on-line. Quereba aber feito ixe recorriu con una lista que mos paso fa anyos ya a profesora Falcon cuan estudiaba Storia Meyebal en a Universidat de Zaragoza.  En ixa lista amanixeban no nomas os grans Archivos, como l’Archivo d’a Corona d’Aragon u l’Archivo d’o Reino, hue en a DPZ. Amanixeban os archivos locals y eclesiasticos grans y chicotz, como o de Zaragoza u l’Archivo d’o Cabildo d’o Pilar. Remarcaba tamien a importancia d’os archivos de protocolos notarials, an por exemplo, o d’Aragon ye una alfaya ta rechirar a intrastoria civil d’o pais, a suya luenga, os entrecambeos comercials u la vida privada.

Quereba fer tot isto y como fa poco sabeba que eba teniu en as mans l’estimau document, impreso por una maquina d’escribir electronica, he prencipiau a rechirar por os paperotz que tiengo por casa. A la fin no he trobau ixe paper, que suposo que estara en casa d’a mia mai. Pero repasando viellos papers, ye dicir, rechirando en o mio archivo he trobau cosas intresantz, amagadas, cuasi xublidatas.

He trobau que ta fer o que foi agora (no lo que quereba fer, pero lo que foi) no se ta que dixe a storia meyebal, tan apasionant, tan de sentir-se parti d’una comunidat, tan de sentir goyo por interpretar o que quereban dicir os que estioron asabelos sieglos antis que nusatros en istas carreras, montanyas y disiertos que agora esnabesamos.

He trobau a carta que m’escribio un mosen peruano que compartio zaguers meses de vida d’un amigo de yo, Pepo, que moriba dimpues de anyos en coma en Lima.

He trobau viellas revistas d’os tiempos d’a insumision, un poster d’o Zaragoza d’os 80, viellos papers d’a Universidat cuan escribiba poemas y feba un programa de radio en Radio La Granja que se deciba “En el Claro de la luna”.

He trobau tamien un viello protocolo notarial de l’achuste ta fer un retablo ta Malanquilla, agora tresbatiu, d’o pintor Miguel Ximenez, y tota a documentacion que facie servir ta escribir un triballo sobre a mitolochia pagana y a suya evolucion meyebal y que encara agora pervive en bellas tradicions en Aragon.

He trobau a edicion d’o Faro de Cartagena d’o diya dimpues d’os atentaus de l’11-S en Nueva York y lumeros d’o periodico Zaragoza Rural y Zaragoza Local que feba en condicions precarias ta un empresario mas precario encara. He trobau tot ixo y bella cosa mas que callo. He retrobau parti d’a mia storia, parti d’o que agora soi y que viene d’ixos anyos.

Ixo son os archivos. Por ixo son importantz os archivos. Alzan, ta cutio, a memoria d’o que estiemos ta continar adebantando enta o futuro ta continar construyindo-nos. Son os alazetz d’o nuestro tiempo present.

Puedes dejar una respuesta, o un trackback desde tu sitio.

2 Respuestas to “A importancia d’os archivos”

  1. Bitacoras.com says:

    junio 9th, 2010 at 13:14

    Información Bitacoras.com…

    Valora en Bitacoras.com: En o Diya Internacional d’os Archivos quereba aber parau una lista detallada d’os archivos aragoneses on-line. Quereba aber feito ixe recorriu con una lista que mos paso fa anyos ya a profesora Falcon cuan estudiaba Stori……

  2. Miguel Ximenez pinta para Malanquilla | Desde Malanquilla says:

    enero 16th, 2014 at 21:01

    […] Visto en: http://www.purnas.com/2010/06/09/a-importancia-dos-archivos/#ixzz2qYshUgcy […]

Dixa un comentario