Parando lo diya d’Aragon (y 2): as luengas

jueves, abril 22, 2010 16:50
Publicado en la categoría de l'aragonés, purnas

Como cada anyo as luengas d’Aragon remaniran luen d’os autos institucionals d’o diya d’Aragon. Tota a publicidat institucional, toz os discursos, toz os autos, estaran nomas en castellan. Ye un feito normal dende lo menos o sieglo XVI, por dicir una data una mica a l’azar, fueras que en o pueblo encara i ese chent que charrara, como agora, as luengas propias d’Aragon y no la forana adoptata, que agora tamien dicimos nuestra.

O caso ye que iste anyo o feito de l’ausencia de l’aragones y o catalan tien unatro condicionant, como ye que ya ye aprebada a lei de luengas. Aprebada, publicada y, en primeras, en vigor. Ye dicir, que os autos istos abrian de, a lo menos, rispetar a reyalidat lingüistica d’o pais.

Antimas, cata, que como a publicidat institucional l’han feito dende Barcelona no cal achustar garra tradutor ta lo catalan, y nomas ese feito falta demanar os servicios d’un tradutor a l’aragones, a menos que Jose Maria Mur s’ese ufriu a fer a traducion en chistabin. Cal, en tot caso, fer un censo a veyer cuantos, ya no miembros d’o gobierno, sino mesmo diputaus, charran aragones (o catalan).

Quereba fer as reflesions d’ayer y huet antis d’o 23, maitin sera diya de fiesta y puestar no m’agana meter-me reivindicatiu. Pero, profes, en o diya d’Aragon tamien nos remeran, parixe, que bi ha aragoneses de primera (os que charran castellan) y de segunda (os que charran aragones o catalan).

Maitin, por cierto, como mos remera Tierra de Barrenaus, podez fer atras cosas a lo menos en Zaragoza, que no nomas sentir os discursos oficials. Bi ha muitos atros autos en Alcanyiz, en Villamayor, en Uesca, en Caspe, en Fraga, en fin, por tot lo pais.

Maitin ye o diya d’Aragón, se suposa. No me fan mica goi as fiestas que a suya calendata se decide por un santo, pero como tenemos tan poquetas ocasions de viyer y fer visible Aragón cal celebrar-lo, prou que sí. Con tot y con ixo, contino pensando que os diyas nacionals d’Aragón habrían d’estar o 29 de chunio y o 20 d’aviento y sacar iste San Chorche tan cristiano.

Maitín tamién ye diya d’o libro y a librería asociativa Pantera Rossa y a Biblioteca Frida Kahlo celebran bells actos. A las primers las podretz trobar en o Paseyo independencia (con os suyos nuevos -y constitucionals- sinyals) y las segundas irán de tourné por as suyas diferents siedes, tot rematando en a Plaza San Bruno, a ón que o BIC será fendo borina dende lo maitin. Un sobrebuen plan, ¿no?
Puedes dejar una respuesta, o un trackback desde tu sitio.

2 Respuestas to “Parando lo diya d’Aragon (y 2): as luengas”

  1. Bitacoras.com says:

    abril 22nd, 2010 at 16:54

    Información Bitacoras.com…

    Valora en Bitacoras.com: Como cada anyo as luengas d’Aragon remaniran luen d’os autos institucionals d’o diya d’Aragon. Tota a publicidat institucional, toz os discursos, toz os autos, estaran nomas en castellan. Ye un feito normal dende lo m……

  2. Resumen d’o 2010 en purnas.com | Purnas en o zierzo says:

    diciembre 30th, 2010 at 12:50

    […] 22: Parando lo diya d’Aragon (y 2): as luengas (1) […]

Dixa un comentario