Por segunda begada en una semana as informacions periodisticas sobre ETA han identificau malament a  un presunto terrorista. En primeras estió Joseba Fernández, un choben basco a qui EFE identificó como a presona detenida en Francia dimpués d’un tiroteo. Encara yeran bels meyos prebando de chustificar ixo cuan o Ministerio d’Interior franzés nimbió un bideo an presuntament se beyiba a un comando d’ETA. Oras dimpués se sabeba que no yeran que bombers catalans de bacanzas. Como apuntan atros blogs a cadena d’erros prencipia en o Ministerio franzés, pero contina con o ministerio espanyol y remata con os meyos.

Foto Tv3.cat

En as notas que ha prebocau iste inzident trobo a faltar una mica mas d’autocretica en os meyos. Podez leyer cosas intresants en Guerra Eterna, en Escolar.net, en Paper Papers,  u en 233 grados. O trango que no trobo ye que por o natural os meyos de comunicazión espanyols no tienen garra prevencion cuan se charra d’ETA. No se triga cosa en penchar fotos, dar nombres, y adchudicar feitos delitius a chen, bienga de fuents oficials u no. Ye berdat que o bideo beniba d’una fuent oficial y que por ixo salto mas facilment d’os correus-e enta las portadas, pero en totas as redauzions o recorriu de cualsiquier cosa ha de pasar por bels filtros, fueras que siga d’ETA, que allora publicamos y adibimos delitos sin confirmar, y profés, pocas begadas se corrichen informacions erroneas escritas por isto.

Cuan se trata d’ETA no rispetamos a presuncion d’inocencia (que tanto reclaman politicos corruptos, empresarios malversadors, etz), no rispetamos a privazidat y trafucamos a uns por atros con una levedat absoluta. Garra meyo quiere que li trafuquen por nuevo Gara, u Egin, u que se dude d’a responsabilidat en a “luita contra a violencia y o terrorismo”. Ye isto lo que fa que en ixa carrera entabán garra meyo faiga periodismo con o tema. Y que ye periodismo? Pues guaires cosas, pero dentre atras, confirmar datos, dudar de tot y investigar os temas. Toz os temas.

No related posts.

Publicaciones relacionadas que recibes por Yet Another Related Posts Plugin.