Chuebes Lardero, prenzipia Garrastolendas y beluns se sacan as mascarutas

jueves, febrero 11, 2010 18:23
Publicado en la categoría purnas

Güé ye Chuebes Lardero, y como cada año, he minchau a tradizional longaniza con a mia mai. Güé prenzipian as garrastolendas y prenzipia, allora, o tiempo an que no bi ha dios ni pecau. O tiempo d’a pasión y  a machia d’un mundo pagano que resiste y se mezcla y se creya entre atras creyazions y atras creyenzias.

Pero istos diyas, istos d’iste año, as Garrastolendas prenzipian con atras sensazions tamién. Bi ha bella chen que se ye sacando as mascarutas, ixas que mientres años atra chen ha denunziau y que agora parixe que ya no cal posar-se. Aquella mazada d’o siñor que adugó os destins d’España 40 años, ixo de “atado y bien atado” torna a salir enta la superfizie, porque dica agora yera una dita reyal pero una mica (no guaire) amagada.

Tenemos por un costau a la Chustizia española que ha dezidiu castigar a o chuez Garzón por prebar d’inbestigar os crimens d’o franquismo. No ye que Garzón siga un superchuez siempre guidau por a suya bondat, pero dimpués d’inbestigar y prebar de chuzgar a ditadura chilena o archentina, yera de dar que li mancaba rechirar dentre os crimens d’o faxismo español, ye dizir, o franquismo. Pero ixo a Chustizia española, eredera direuta d’a chustizia d’o franquismo, no podeba premitir-lo, asinas que ha dezidiu almitir a tramite una querella d’o “sendicato” faxista Manos Limpias y d’a propia Falange, responsable d’as muertes de milentas de presonas mientres a Guerra Zebil española y o franquismo. Ye dizir, que ha dezidiu chuzgar a Garzón por una denunzia d’os encausaus. Bella cosa asinas como almitir a tramite una denunzia de Goebbels contra os tribunals de Nuremberg.

Argüelloso d’o suyo erenzio tamién s’amuestra José Antonio Martín “Petón”, representant de futbolers, y ombre con mando en plaza en a Soziedat Esportiba Uesca. Unatro que s’ha sacau a mascaruta. Petón colabora con telebisions publicas (como TVE o Aragón Televisión), con Mediapro (a trabiés d’os programas d’esportes d’Aragón Televisión) o con Prisa (en a Cadena Ser), y por os suyos comentarios futbolisticos cobra asabelos diners. O diario Público (de Mediapro) publica güé que Petón estió ayer en un auto d’omenache a la División Azul que luitó por Hitler en Rusia, mesmo cantando o “Cara al Sol”. Cal dizir que en ixa División Azul bi eba amás de boluntarios, chen que por o suyo pasau republicano (o d’as suyas familias) yeran combidaus a partezipar en ixa dibisión ta limpiar o suyo nombre. Pero no ye o caso de Petón ni d’o suyo pai, por o que diz o mesmo Petón en una carta.

Sí canté el Cara al Sol y lo haré cada año, esa tarde en La Almudena. Y si yo falto lo hará mi hermano, que seguramente tendrá que aprenderse la letra. En mi familia llamamos a eso honrar a nuestro padre. No me verá usted cantarlo en un acto político, no soy falangista. Allí estaban su redactor y su fotógrafa, que por cierto casi se estalapiza al subirse a un banco para dominar la panorámica, ahí sí le vino bien que yo anduviera cerca y con reflejos.

Ye curioso que emplegue una parola en aragonés, por zierto, “estalapiza”, pero en tot caso, a carta de Petón ye d’un zinismo admirable.

Creía entonces en la nacionalización de la banca, en la entrega de los medios de producción a los trabajadores y en la reforma agraria, y lo hacía siguiendo a José Antonio, al de verdad, no al que nos mostró el franquismo con la complicidad intencionada de la derecha y la izquierda. Y creía, y creo, en una España de todos, democrática, en paz y saludable convivencia. En la que cualquiera pueda cantar lo que le apetezca y contar lo que le de la gana, sin daño ni fanatismo.

Suposo que os represaliaus por Falange, os muertos por a Republica y a democrazia, os que pasoron años y años en a garchola por concararse contra a ditadura tendrán bella cosa a dizir en ixo d’a “España de todos, democrática…” y en a que o “Cara al Sol” no ye mas que un canto de paz “sin daño ni fanatismo”.

Petón s’ha sacau a mascaruta en publico, encara que ya fa tiempos que ba dondiando por os zerclos falanchistas fendo charradas sobre a figura d’o fundador d’a Falange. Agora as telebisions publicas, que pagamos toz, ya saben qui ye iste señor y que piensa. Atros por muito menos han estau sacaus d’os suyos puestos, pero a mascaruta quitada, parixe que os crimens d’o franquismo y a suya esfensa son muito menos periglosos que atras “basemias” ideolochicas.

Puedes dejar una respuesta, o un trackback desde tu sitio.

Una respuesta to “Chuebes Lardero, prenzipia Garrastolendas y beluns se sacan as mascarutas”

  1. Bitacoras.com says:

    febrero 11th, 2010 at 18:24

    Información Bitacoras.com…

    Valora en Bitacoras.com: Güé ye Chuebes Lardero, y como cada año, he minchau a tradizional longaniza con a mia mai. Güé prenzipian as garrastolendas y prenzipia, allora, o tiempo an que no bi ha dios ni pecau. O tiempo d’a pasión y  a machia d’un mun…..

Dixa un comentario